سودارس : القون الثالث لو جاء في (الدافوري) الزول بشيل كرسييه ويفوت

أمجد فريد الطيب يكتب: حياة تجلت في وضوح المبادئ: وداعا فينك هايسوم عثمان ميرغني يكتب: حرب السودان ومخطط شد الأطراف الخليج الضحية الكبرى: إيران وجهت 83% من هجماتها إليه… و17% فقط إلى إسرائيل بعثة المنتخب تصل بورتسودان وسط إهتمام كبير منتخبنا يتدرب صباح الخميس بإستاد بورتسودان قائمة صقور الجديان لوديتي السعودية كواليس صادمة... كيف تعطلت صفقة تسليح الجيش السوداني في اللحظات الأخيرة؟ 11 دقيقة إضافية من النوم ليلا تساعد فى الوقاية من النوبات القلبية 13 حزمة لغوية جديدة لترجمة محادثات "واتساب" سناب شات" يحوّل الصور إلى فيديو بالذكاء الاصطناعي بالصورة.. الصحفي السوداني الشهير حسين خوجلي يستعيد بصره وسط سعادة أصدقائه ومتابعيه: (عودة البصر لصاحب البصيرة والوان وحمدا لله على السلامة أبو ملاذ) الباشا طبيق : السيطرة على الكرمك تعيد تشكيل الخريطة العسكرية في السودان تعديل وزاري مرتقب في السودان يشمل ست حقائب وزارية هل يكون محمد صلاح الصفقة الكبرى القادمة بالدوري الأمريكي بعد جريزمان؟ جلسة مع محمد صبحى في الزمالك.. اعرف السبب استمرار محاولات الأهلي لإنهاء أزمة الشرط الجزائي مع توروب يارا السكري تكشف لليوم السابع تفاصيل دورها فى فيلم صقر وكناريا شاهد بالصورة.. فاتنة الإعلام السوداني تخطف الأضواء بأحدث إطلالة لها والجمهور يطيل الغزل في جمالها: (يا دووب كدة عيدنا) باسم سمرة: الناس بقت تناديلى ب«زكى».. ونجاح عين سحرية توفيق من ربنا ذكرى رحيل أحمد حلاوة.. ممثل جمع بين الهندسة والدكتوراه فى فلسفة الفنون نصائح لوقاية مرضى حساسية الصدر من التقلبات الجوية والرياح مشروبات تساعد على حرق الدهون بعد كحك العيد اكتشاف مرض وراثي جديد يسبب الشيخوخة المبكرة والقصور الإدراكى شاهد بالصور. الفنانة مروة الدولية تفاجئ الجميع وتعتزل الغناء وعازفها الشهير ينشر مراسلات واتساب بينهما أكدت فيها تمسكها بالقرار بالصور.. مدارس أبو ذر الكودة تلزم أسرة طالب بدفع غرامة قدرها 100 ألف جنيه بسبب كسره مفتاح مروحة بالفصل ومتابعون يتصدون للدفاع عن المؤسسة شاهد بالصورة والفيديو.. في تقليعة جديدة.. شباب سودانيون يلطخون صديقهم العريس ووزيره ب"ظهر الصابون" و"البودرة" الهلال يواجه ضغط المباريات في رواندا جبريل يلتقي المبعوث الشخصي للأمين العام للأمم المتحدة إلى السودان مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية كيف تفاعل النجوم مع خبر رحيل صلاح عن ليفربول؟ ضبط 2800 قندول بنقو بالجزيرة في عملية نوعية لمكافحة التهريب ترامب يصدر أوامره ويكشف تطورات مثيرة مع إيران طهران ترد على تهديدات ترمب هل مخالفة ترامب خلل في الكون؟! الأمن يداهم مخزن يبيع الوقود المهرب لعصابات التنقيب عن الذهب تراجع معدّل التضخّم في السودان بادي يصدر مرسوم تنظيم أعمال التعدين التقليدي وضبط آليات التعدين بالنيل الأزرق رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة شركة كهرباء السودان تحديث حول سير أعمال الصيانة الطارئة للشبكة القومية توقّعات بارتفاع غير مسبوق في أسعار النفط ضبط 238 كجم من "الآيس" وأسلحة بجانب نحاس بولاية البحر الاحمر ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد أغلى علبة كعك في مصر تشعل مواقع التواصل قيم الهلال المتوارثة يجب أن تبقى أبد الدهر بنك السودان المركزي يصدر توجيهًا للمصارف إبراهيم شقلاوي يكتب: الزراعة ما بعد اقتصاد الحرب في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته ملتقي التحصين للعام 2025 ينعقد بحضور التحالف العالمي للقاحات والشركاء صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

القون الثالث لو جاء في (الدافوري) الزول بشيل كرسييه ويفوت

مقالات متنوعة نشر في النيلين يوم 16 - 09 - 2013

ناس المريخ ...بقى (حنكهم) في (الحكم) ما بقسم ..زي كيلو الطماطم البقى ب (30) جنيه.
طماطمكم دي تقول بتجبوها لينا من حديقة (البيت الابيض) في واشنطن.
تقول بتسقوها (عصير).
(30) جنيه ليه؟...مهجنة بي (تفاح).
كيلو الطماطم كان ب (30) جنيه في الوقت الذي كان فيه كيلو الفراخ (23) جنيه.
انتوا طماطمكم دي (بتكاكي).
قاعدة (تبيض).
الطماطم والله ما عندها أي دخل بالموضوع بالكتب فيه دي..لكن بس بجيب ليكم السيرة عشان تبقى ليكم (موعظة).
والفهم فهم ..والما فهم بي طريقتو.
حبيت أقول ليكم بس ...كيلو الطماطم في السودان أغلى من كيلو العنب.
نحن زمان ساكت كنا شايلنها مع (العنب).
دا العنب يا رجالة طلع ارخص من (الطماطم).
مفروض (الطماطم) يبعوها في (عمارة الدهب)..ما في انصاف في بيع الطماطم مع العجور والفجل.
شن جاب لي جاب.
المريخاب فكوا (الحكم)..بعد لقوا موضوع الحكم دا أصبح مكشوف ..وما مقنع..وبقوا بعد أي مباراة قمة يقولوا ليك (طابق شاخور).
والكراسي ...شنو كدا ما عارف؟.
خلوا (الحضري)..البجلي في الكورة زي (ما يطلبه المستمعون) أي الهلالاب ..ومسكوا ليك في (طابق شاخور).
بعد أي مباراة للهلال في استاد المريخ مع (الوصيف)..يطلع المجلس والاعلام ويقول ليك جمهور الهلال كسّر (الكراسي).
كراسي شنو البكسرها جمهور الهلال وفريقه منتصر.
دا فهم شنو يا جماعة؟.
دا زي الزول البمشي عشان يجيب ليه (جبنة) من الدكان..يقوم يلقى (جبنة) مافي ..يجيب ليه (صابونة) ويرجع.
ناس صابرين سنتين ..مشاكل واعتصامات ...ومحاكم وطعون ما سمعنا لينا بي (كرسي) واحد اتكسر عندهم أو اتفقد..رغم اختلاف الآراء والمشارب في الهلال.
ناس صبروا السنين دي كلها ..وكانوا في كل احتجاجاتهم واعتصاماتهم وغضبهم يعبّروا بصورة حضارية ومحترمة .. لم يتجاوزوا القانون ...حتى وفلذة كبدهم هيثم مصطفى يتجه جنوباً ..والثابت في التاريخ والجغرافيا والقانون والطبيعة أن تكون الهجرة إلى الشمال.
هيثم مصطفى فعلها عكسية وهاجر إلى الجنوب بعد (17) سنة ..مع ذلك جمهور الهلال لم يخرج عن النص ..ولم يتعرض حتى للاعبه السابق بسوء أو هتاف خارج عن الأدب كما كان يفعل جمهور المريخ مع لاعبه الحالي عندما كان يلعب في الهلال.
ومازال الاحترام والتقدير متبادل بين جمهور الهلال ولاعبه السباق.
هذا الجمهور الراقي والعظيم ..تصوروا حسب فهم المريخ (القدر فهم الحضري) بعد أن انتصر بثلاثة أهداف ..وقلّص الفارق ..كسّر وحطّم كراسي استاد المريخ.
الكلام دا بتصدق يا جماعة؟.
ما في زول واحد في المريخ عندو عقل يقول ليهم (مسرحيتكم) دي أصبحت مملة ومكشوفة ..وما جايبة دخل.
فريق انتصر ..بمجلس (فاقد للشرعية) كما يقول الوزير والمعارضة..على فريق فيه (17) لورد أقل واحد فيهم عندو (مزرعة دواجن).
معقولة فريق ينتصر في هذا الظرف ..وبعد كل هذه الصعاب ..يحطّم كراسي استاد المريخ.
معقولة.
عشان شنو؟.
فريق خاض مباراة القمة بتوليفة وطنية ..وبجهاز فني وطني ..ولعب أمام فريق فيه (7) أجانب ..وبقيادة جهاز فني أجنبي تتجاوز مرتباته في الشهر ال (50) ألف دولار ...هل يعقل أن يكسر كراسي استاد المريخ؟.
على شنو يا حسرة نكسر (الكراسي)..على كورتكم الجميلة ..ولاّ على انتصاركم ..أم على أهدافكم الملعوبة؟...أم على (نجيلتكم) العاملة زي توب الكرب السادة.
المريخ الذي شاهدناه أمام الهلال يستوجب الشفقة والعطف ..ولا أظن أن هناك هلالابي واحد في الدنيا ممكن ينظر إلى كراسي استاد المريخ ليلة الجمعة الماضية.
كراسي شنو؟.
انتوا لسع في المحطة دي ..شال (قلمي)..وقطع (شبطي)..وأكل (فطوري) يا أستاذ.
العالم اتجاوز حتة الكراسي دي.
انتوا زي حكاية (الشافع)..الكل ما يمرق الشارع يرجع البيت عشان يشكي لي أمو ..حمودي ود فاطمة دقاني..وشال سفنجتي.
اكبروا شوية يا لوردات ..بدلاً من أن نخاطبكم بمثل هذه اللهجة واللغة التى يكتب بها إعلان المريخ ويستفز فيها (الشعب السوداني) كله ممثلاً في جمهور الهلال.
حكايتكم دي يا لوردات زي حكاية واحد كدا كل ما يكون عندو مناسبة يقعد يعد في الكراسي ..ويجيّك في النهاية ويقول ليك في (كرسي ناقص).
أو في (كباية) شاي مفقودة.
ناس المريخ بقوا يعملوا نفس الشيء وبعد أي مباراة قمة ...يحاولوا يطلعوا جمهور المريخ من الخسارة بالأحداث التي شهدها استاد المريخ عقب المباراة.
ودائماً يستعطف مجلس المريخ ..وإعلامه جمهور المريخ بحكاية وحشيّة جمهور الهلال وعصبيته وتحطيمه لكراسي طابق شاخور.
وناس المنتديات يعجبوك يجيبوا ليك صور مدبلجة ويقولوا ليك شوفوا جمهور الهلال عمل شنو؟.
انتم ونحن ..هلالاب ومريخاب ..نعرف أن السودانيين اصحاب اخلاق رياضية ...وهم أبعد ما يكونوا عن العنف والوحشية والاعتداء على الآخرين.
اخلاق السودانيين تتنافى تماماً مع ادعاءات إعلام المريخ ومجلسه ..ولا أعرف من أين لأهل المريخ بهذا (المكر) الذي يجعلهم يصورون جمهور الهلال بهذه الوحشية.
جمهور الهلال لو كان بهذا السلوك ...لما صبروا على (غارزيتو) ..ولما احتملوا البرير بعد شطب هيثم مصطفى ..ولثاروا في وجه الوزير الذي هدد استقرار الهلال وجعله عرضة للضياع والخراب.
الناس ذاتها ما كانوا بصبروا على رفع الدعم من المحروقات.
الحكومة كل شهرين تشغل الناس بي موضوع تحويل المواقف وترحيل المستشفيات إلى الأطراف ..ما في زول قال حاجة.
ناس بالطيبة دي ..التى تصل حد (المسكنة) ممكن يكسروا ليهم (كراسي).
كان بكسروا كراسي ...كان طلعوا الشارع.
لقد خسر الهلال في استاده من مازمبي بخماسية وهم يحلمون وقتها بالبطولة ..لم يغضب الجمهور ..أو قل لم يخرجوا عن السلوك القويّم.
أما جمهور المريخ ..فقد دون التاريخ له الكثير من الوقائع والأحداث بداية من احداث سيمبا ..مرورًا بأحداث مباراة المريخ والامل والهتاف على حكم المباراة بألفاظ سوقية بثتها الاذاعة القومية على الهواء مباشرة.
إن هذه اللغة وهذا الاستعداء والتوحش الذي نجده في بيانات مجلس اللوردات واعلام المريخ يمكن أن يقود إلى الخراب والدمار الذي يتحدثون عنه الان.
والنار من مستصغر الشرر فليحترم مجلس المريخ جمهور الهلال وليكون تعاملهم مع الأحداث بمسؤولية وأن يتحملوا اخفاقاتهم ..بدلاً من تحميل تلك الاوزار لجمهور الهلال.
المؤسف أن يخرج تصريح من الأمين العام للجنة تسيير المريخ (اللورد الما عارف اسمو والله)..ويطالب من الوزارة التدخل.
وزارة شنو يا أخوي...هي الوزارة في موضوع (البرير) ما قدرت تتدخل ..عاوزها تتدخل في موضوع (كراسيكم) دي.
الدولة في السيول والأمطار والفيضانات ما قدروا يتدخلوا ..قاعدين يتفرجوا زينا ...عاوزهم يا لورد يدخلوا عشان كراسيكم دي.
اللورد الما عارف اسمو جاء على لسانه هذا التصريح : ( طالب الأمين العام لنادي المريخ من وزارة الشباب والرياضية على خلفية تدمير جماهير الهلال لمدرجات الطابق الثاني لملعب المريخ في عقب مباراة القمة الأخيرة التي جمعت الطرفين مساء الخميس الماضي وانتهت بفوز الهلال بثلاثة اهداف لهدفين.
وحمل الفريق شرطة الاتحاد العام سبب تكرار سيناريو الدمار لإستاده بعد أن تباطأ في عدم حسم ذات الدمار الذي لحق بالاستاد الماضي وقال الاتحاد تباطأ في معاقبة الهلال لعام الماضي بعد أن تحكم طابق شاخور واضاف ملعب المريخ تابع للدولة وليس ريح واحتضن الكثير من الفعاليات ويمثل واجهة مشرقه للسودان لذلك يجب على الدولة حمايته).
دا كلام اللورد ..الأمين العام للجنة تسيير المريخ ..هسع الكلام دا ممكن يطلع من (مشجع) ناهيك من الأمين العام.
اللورد استعمل كلمة (الدمار) في تصريحه أكثر من ثلاث مرات ...كأننا في (رام الله).
يا زول تصريحاتك دي احتفظ بيها لي هجليج وأبوكرشولا...ما تدخلها لينا في الرياضة.
خربتوا السياسة ..كمان عاوزين تخربوا لينا الرياضة بهذه اللغة (العبيطة)..والمستفزة وغير متصالحة.
الأمين العام لمجلس المريخ بستعدي الدولة على جمهور الهلال ..وكأن جمهور الهلال هذا ..جمهور اجنبي أو جمهور قادم من (الهند) عشان يشوف هدف بشه الثالث ويرجع.
الهلال الغالب تلاتة ...جمهوره يكسر كراسي استاد المريخ ..رغم من أن اللورد (الما عارف اسمو دا) ...هو عارف أن الزول في الدافوري لمن يجيبوا الهدف الثالث بشيل كرسيه ويرجع البيت باعتبار أن الكورة انتهت.
عاوز أنت بعد هدف بشه (السينما) جمهور الهلال يكسر كراسيكم.
الأمين العام للمريخ في واقعة غريبة ..طالب بتدخل الدولة ..يعني ممكن عادي تاني الدولة دي تقيف ليكم (حيطة) لمن تكون في مخالفة على المريخ لصالح الهلال على بعد (40) ياردة من مرمى المريخ.
عادي جدًا ..جمال الوالي ذاتو ..يطالب الدولة تتدخل عشان تحمي شبكة المريخ من صواريخ بويا.
عادي ...اللورد (الما عارف اسمو دا) ...يجيب شرطة الاحتياطي المركزي لمحمد أحمد بشه لأنه سجّل (4) أهداف في شباك المريخ.
شنو الحقارة البتعمل فيها دي يا بشه؟.
(4) أهداف في المريخ ..أنت قايل المريخ دا فريق حلتكم.
شنو كل ما تقابل المريخ تجيب ليك فيه هدف؟.
بي فهم (لوردات) المريخ دا ...ممكن اللوردات يحمّلوا (معتمد أم درمان) مسؤولية هدف بشه في الحضري.
المعتمد ما شايف شغلو ...لو كان شايف شغلو ...كان كاريكا من البداية ما عكس الكورة لبشه.
الكورة كانت اتقطعت.
لكن كالمعتاد ...المعتمد ما جايب خبر.
الوزير بتاع الرياضة ذاتو كان يخلي المفوضية تطلع قرار تقول فيه إن هدف بشه الثالث ما شرعي.
أما هدف عبداللطيف بويا الذي جاء من ( دار الإذاعة برسل ليك سلامي)..فهو ينبغى أن يستدعي فيه البرلمان السوداني الأمين البرير رئيس نادي الهلال ..عشان يقول ليه دا شنو البتعملوا فيه دا في المريخ؟.
والي الخرطوم ذاتو ...مفروض يشوف شغلو.
يعني كورة (ضفر) التي ضربت في قايم مرمى الهلال ..مفروض (الوالي) بتاع ولاية الخرطوم يطلع قرار رسمي ويقول إن (القايم) كان في وضع (تسلل)...عليه فإن الكورة هدف للمريخ.
انتوا ما شفتوا فيصل سيحة في برنامج عالم الرياضة قال شنو؟.
فيصل سيحة قال هدف رمضان عجب صحيح ..وما تسلل ..وأكد ذلك بلون (النجيلة).
قال لون النجيلة (غامض) شوية.
أنا أول مرة أعرف أن لون النجيلة لو كان غامض شوية ..فإن اللاعب الذي يقف في ذلك اللون لا يمكن أن يكون متسلل.
يا فيصل سيحة عاوز اسألك سؤال.
الناس البحضروا المباراة دي في تلفزيون أبيض وأسود ..يعرفوا لون النجيلة كيف؟.
الاكتشاف دا في الأساس أنت جبتو من وين يا سيحة.
الفيفا لو عرفت اكتشافك دا ح تدخلوا في لوائح الفيفا ومواد التحكيم في الجمعية العمومية القادمة للاتحاد الدولي لكرة القدم.
يمكن يبقوا (لون النجيلة) حكم رأية.
يا سيحة عاوز أقول ليك حاجة.
كلامك بتاع (لون النجيلة) دا ...نوم بيه هنا ..أوعك تطلع بيه بره ..وأوعك تقولو في تلفزيون غير تلفزيونا دا ..عشان ما يشيلوا حال (نجيلتنا).
على العموم ..سيحة ما غلطان ..غلطان رضا مصطفى الشيخ الجاب لينا زول اكتر تعصباً للمريخ من (ود الجنيد) مشجع المريخ الشهير.
يا سيحة معليش ..الجمعة القادمة تعال لينا بي (طبلتك).
الموضوع دا عاوز ليه (طبلة).
لون النجيلة براهو ما بحلكم.
المحيرني جهاز الفيديو حق التلفزيون ...لمن جابوا ليه سيرة (لون النجيلة) ضرب.
ملحوظة : غايتو يا مريخاب عندكم جنس لوردات ..لو مسكوا الموردة (48) ساعة بنزلوا بيها للدرجة الثالثة ...احمدوا الله ساكت يا مورداب انو ما عندكم (لوردات) بالشكل دا.
هوامش
لاحقاً ح اعمل ليكم برمجة خاصة لأهداف الهلال الثالثة في الحضري.
اصبروا بس.
جار التحميل.
يعني نظام شنو؟.
نظام نحن أي حاجة عندنا بي نظام.
عبدالماجد قال لي هدف (بويا) جاء كيف في الحضري؟.
قلت ليه ما عارف ..الهدف دا أنا شفتوا في الإعادة (20) مرة وفي اليوتيوب (44) مرة ...وفي كل مرة بشوفو جاء بي زاوية مختلفة.
آخر مرة شفتو جاء في (التمانيات).
لكن يتخيّل لي في الواقع جاء شمال الحضري.
يا ناس عطبرة ..رفعوا الدعم.
المريخ طرفكم يوم الثلاثاء القادم.
يوم (17).
يا ناس الأمل مرسل ليكم الحضري بي سنو (45) سنة.
يا ناس عطبرة ...والله انتوا ما قاعدين تقصروا في الواجب.
في (هدية) يوم الثلاثاء ح تصلكم.
الحضري دا لو شتوا ليه من (الامتداد الشرقي) الكورة بتدخل فيه.
من الامتداد الشرقي شوتوا ليه من (محطة العمودين) تحديدًا.
المحطة قبل الأخيرة.
شفتوا كيف؟.
عشان تعرفوا نحن معاكم ..محطة ..محطة.
اعملوا اللازم.
وخلوا الباقى علينا.
لو محتاجين لي أي (بشه) بنرسل ليكم (بشه) صغيرة كدا.
أملنا في (الأمل).
والعندو أمل في الأمل ..أملو ما بخيب.
هو اسمو كدا.
اسمو (الأمل).
(3) نقاط جاهزة وجاتكم.
اوعكم تقصروا.
يا أحمد الحاج ...اليوم كلو أمس كان مباريات ..وقعدت اكتب في (البشات) دي.
لا حضرت كورة البرسا ..لا شيلسي ..لا ارسنال ..لا يوناتيد لا اليوفى.
هسع دا ما ظلم.
مورنيهو اشرك (ايتو) رغم عدم الجاهزية.
تقولوا لي الجنرال ما يشرك تراوري.
تراوري في الاتحاد عاوزنو يسجل أهداف كتيرة إن شاء الله عشان يعوض غيابه.
الحضري قالوا بعد هدف بويا ..سحبوا منو (حوض السباحة).
لو دي كورتك يا الحضري ..(الشقة) ذاتها مفروض يشيلوها منك.
مفروض تسكن ليك مع طلبة في داخلية.
وتقعد كمان كل خميس تغسل هدومك براك.
يا أكرم الهادي سليم ...عرفت ليه أنت فرحان كدا يوم الخميس الماضي.
فرحان عشان الله شافك من صواريخ بويا.
الحاجات دي أنت ما بتقدر عليها.
أخير الحضري.
برشلونة غالبة الشوط الأول واحد والنجم غالب الصفاقصي واحد الشوط الأول ..وشيلسي مغلوب ..وارسنال غالب ويوناتيد كذلك ..وتعادل الانتر واليوفي ومازمبي ضرب وفاق اسطيف على طريقة رمضان أحمد السيد المهتم في عموده بالتواصل العالي مع القراء.
نشوف الريال بعدين.
دا الطلعنا بيه من مباريات الأمس.
اليوم اتوقع انتصار الزمالك على الأهلي.
ما عارف مجرد توقع.
باسكال الظاهر الشهر دا ما ح يصرف مرتب.
والله لو صرفتوا ليه يا لوردات تكونوا بالغتوا.
أما الحضري فينبغى أن تخصموا من قروش عقده مع المريخ 50%.
حارسكم دا يا مريخاب ...في دوري داخليات المدارس لو عمل حركاتو دي ...كان سحبنا منو الجنسية وكتاب الجغرافيا.
كتاب الجغرافيا هسع ذنبو شنو؟.
يا أحمد عاوزين نتابع الشوط التاني لبرشلونة بي مزاج.
.......
عاجل : انتوا ناس المريخ ليه ما قالوا (المطر المطر) يوم الخميس ضمن شماعاتهم ..يا ربي عشان ما جات مطرة.
وإن طال السفر - محمد عبد الماجد
صحيفة قوون

انقر هنا لقراءة الخبر من مصدره.