( حكاية اولى إتكاءت تلك الباعوضة على كتف حبيبها وعيناها تفيضان بالدموع، قال له بصوت واهن: (حبيبي...هسي حنعمل شنو بعد اهلي رفضوك).؟...مط حبيبها (الباعوضي) شفتيه بغضب قبل ان يقول في حزن عميق: (والله انا نفسي افهم بس اهلك ديل رفضوني ليه...ياخي انا خريج جامعة الباعوض العالمية...واهلي معروفين في الخيران كلها...بالاضافة لي كدا عندي بيت جاهز في خور مدينة النيل...يعني رفضوني ليه بس...نفسي افهم)...؟...هنا وضعت الباعوضة الحسناء جناحها على وجهها قبل ان تقول له وبلهجة باكية: (رفضوك ياباعوضي عشان قالوا انك زول مامحترم ومضر)...هنا انتفض (باعوضي) في غضب قبل ان يصيح بصوت عالي: (انا مامحترم..وكمان مضر)..؟...ساد الصمت للحظات قبل ان يقوم بأبعادها من كتفه، ويقول لها وهو يستعد للطيران: (انا حااوريهم اني زول محترم وود ناس كمان)، امسكت الباعوضة الحسناء بقرني استشعار حبيبها وهي تصيح: (ماشي وين ياحبيبي...حتخليني براي)...اجابها وهو يزيح يدها عن قرني استشعاره: (ماشي قريب وجاي...امشي البيت انتي)، مر يومان على غياب (باعوضي) قبل ان يطرق باب منزل محبوبته ليفتح له الباب والدها (عم بعضوض) الذى ماان شاهده حتى صاح في وجهه غاضباً: (تاااني...انت مابتفهم يازول..انا مش قلت ليك مابدي بتي لي زول شراني ومامحترم)...هنا رفع (باعوضي) في وجه (نسيبه) تلك الشهادة، التى ماان قراءها (عم بعضوض) حتى اطلق ضحكة عالية، ومن ثم وافق على عقد الزواج، ليحتفل (باعوضي) ومحبوبته بنهاية سعيدة لقصة حبهما. بالتأكيد ستسألونني بسرعة: (هو الورقة دي كان فيها شنو)..؟؟... وسأجيبكم وببساطة انها كانت تحمل تصريحاً لوزارة الصحة بالخرطوم بان (باعوضها غير ضار) و(مثال للتهذيب والرقة)..!!! ( حكاية ثانية جلس حاج التوم داخل المركبة العامة في طريقه للعمل، دقائق حتى اقتحمت المركبة (باعوضة) ظلت تتجول على وجه حاج التوم، وبين ملابسه، بينما ظل هو يحاول القضاء عليها بضربها بيديه، في تلك اللحظات انتبه اليه الكمساري فقال له بهدؤ: (ياعمك..خليها ياخي...ناس الصحة ذااااتهم قالوا مابتعمل حاجة ومابتضر..!)، هنا نظر اليه حاج التوم نظرة مليئة بالغضب قبل ان يقول له في هياج: (هسي بي ذمتك...لواقتها دي ساااااكت مامضرة)..؟؟؟ ( حكاية ثالثة وضع ذلك (الفحيص) نتيجة المعمل امام احد المرضى، وقال له بلهجة وقورة: (ماعندك ملاريا ياابني)...ولدقائق ظل ذلك الشاب ينظر للنتيجة ببلاهة قبل ان يقول لل(فحيص) بسرعة: (وطيب والملاريا العندي دي جاتني ماقاصدة ولاشنو)..؟؟؟ ( شربكة أخيرة عزيزي القارئ...ان لسعتك (باعوضة) واصبت بالملاريا بعدها، فاعلم تماماً ان تلك الباعوضة ربما تكون من (المعارضة).!! الشربكا يحلها - احمد دندش صحيفة المجهر السياسي
