قبل ان تفتح (علبة الساردين) في حكمة صينية (قاطعها من رأسي) ، بتقول ليك شوف تاريخ الانتاج وتاريخ الصلاحية كمان رأسك بقى (صيني)تقطع لينا من رأسك وتقول لينا (حكمة صينية) قبيل ان (اهوّد) بيكم في هذا الموضوع عاوز اقول ليكم ان العنوان اعلاه السيرة الذاتية ل (ف م) الذي اكتب تحت مظلته الان هو عنوان لقصيدة للشاعر الايراني (رضا براهيني)وهو ناقد وروائي القصيدة عبارة عن (معاناة) عامل بسيطيعرض براهيني الي سيرته منذ ان كان طفلا ويصور معاناة العامل في تنقله من مصنع الي مصنع ويكشف الظلم والاضطهاد الذي يقع عليه ، وينقل لنا ذلك في القصيدة عجبني في القصيدة اكثر من (متنها) عنوانها الذي اكتب تحته اليوم لكن حتى لا نطلع من المولد بدون حمص فاني ادلف لبعض كلماته في قصيدته تلك: يقول (رضا براهيني) وهو بالتأكيد ما قاصد (سيدي بيه) تلقى ما سمع بيه اكيد لو سمع بي ناس (ضفر) ديل الشعر يطير من رأسو والله موضوع (انشاء) ما يقدر يكتبو تاني يقول رضا: منذ ستة أيام فحسب ، قبضوا عليَ وقبل ذلك الحين وهم ينزعون أظافري ، وأنا لي أربعون ظفرا عشرون في أصابع يدي وقدمي وعشرون في عقلي استوقفني في القصيدة ان (الاظافر) يمكن ان تكون في العقل وهذا من كفاح (رضا براهيني) الذي سجن وعذب لمدة (102) يوما وكتب قصائد كثيرة عن السجون والتعذيب ما علينا بقصته تلك وقصيدته (النكدية) ، هو الناس ناقصة نكد (اعملوا فيها ما سمعتوا حاجة)نحن فقط نستعمل (العنوان) لغرض رياضي سوف احدثكم عن هذه السيرة ربما الان وربما لاحقا تخيروا بين العرضين سوف تجدوا طلبكم في حكمة يونانية قديمة (قاطعها من رأسي دا) بتقول الفول المصلح ابعد منو كيس العيش بتلقى (الفول المصلح)وبتعيّر في (كيس العيش)والايامات دي مفروض الرغيف يكون زي (ورق الامتحانات)يقولوا ليك من بدري (لن تصرف لك غير رغيفة واحدة) ضع الموبايل في الشاحن وتعال كمل العمود قبل ايام كتب الاخ هيثم محمد علي الذي يكتب بمفردة فيها سماحة وطيبة ومودة كتب هيثم يسأل (لماذا يكرهون المريخ؟) نحسب لهيثم انه يقدم الهلال بعبارة (حبيبنا الهلال) وهي عبارة جميلة تأكد سمو (الروح الرياضية) عند هيثم محمد عليولعل هذا ناتج من تصوّف هيثم وتشبعه بالمحبة والروح الرياضية العالية لا بد لنا في هذا السفور والخروج والذي نفقد بسببه الكثير من الود ان نشكر هيثم محمد علي على روحه تلك وعلى تجرد كتاباته من (الكراهية) وهذا امر يستحق عليه هيثم الثناء والتقدير والشكر لهيثم نقول قبل الاجابة على سؤاله (لماذا يكرهون المريخ؟)نقول لهيثم مقطع من قصيدة للشاعر الالماني (برتولد برخت)يؤكد فيها ان (الكراهية) تعود على حاملها اولا بالخراب والسوء وتشويه الملامح يقول برتولد برخت : لكننا نعرف أن الكراهية حتى وإن كانت للخسّة فهي تشوّه الملامح، وأن الغضب حتّي وان كان ضد الظلم فإنه يبح الصوت آه ! نحن الذين كنا نريد ان نمهّد الأرض للمودّة ، فشلنا في أن نكون ودودين ، ولكنّكم عندما يحين الوقت في النهاية ويصبح الإنسان عونا لأخيه الانسان، فكّروا بنا ، وسامحونا ! نتمنا ان ننجح في ان نكون ودودين كما ينشد برتولد برخت وهيثم محمد علي صاحب العبارة الجميلة (حبيبنا الهلال) والهلال حبيب لكل فيه ذلك التسامح والالفة والجميل فيه شيء من العشرة والملح والملاح اما كراهية الناس للمريخ فاننا نقول ان هذه (الكراهية) يصنعها المريخ نفسه ويفرضها على الاخرين فرضا زي (القرقريبة) والله (القرقريبة) ما عندها دخل بالموضوع دا لا من بعيد لا من قريب المريخاب يظنوا ان كل الدنيا هلالاب وان اي مشكلة تحدث في المريخ سببها الهلال وان كانت الدلائل تؤكد عكس ذلك (والسيستم قفل) خير دليلولكن الهلالاب دائما عندهم القدرة على التسامح والعفو والسمو فوق هذه الصغائر ربما الاحساس بالكراهية ناتج من احساس المريخ بالدونية امام الهلال لذلك نحن ذلك الشعور نضع له العذر في المريخ الكراهية تعود الي صاحبها بالوجع وهى يخسر صاحبها اكثر من يكسب المريخاب يبدعون في صناعة الخصوم ويتجلون في خلق الاعداء من العدم ما تقعدوا تعاينوا لي في الساعات زي (الحكم الرابع) السؤال الذي طرحه هيثم محمد علي (لماذا يكرهون المريخ؟)اولى بالاجابة عليه المريخاب نفسهم لعل احداث الحصاحيصا الاخيرة تأكد ما ذهبنا اليهالتعامل والاستفزاز الذي تعامل به المريخ في الحصاحيصا يولد مثل هذه الكراهية اظن الان ان الحصاحيصا كلها تكره المريخ في فعلته تلك ويشاركها تعاطفا في تلك الكراهية رفاعة ومدني وكل مدن ولاية الجزيرة العظيمة هذه التصرفات وتلك الافعال لا تولد غير (الكراهية) المريخاب عليهم ان يكونوا صرحين مع انفسهم حتى لا تبلغ كراهيتم ام درمان ويصبحوا في (عزلة) في وطنهم وقائع الاحوال وسوابقها تثبت ان المريخ هذا الموسم في كل مبارياته ورحلاته حدثت له (مشاكل) ، وكان طرفا في كل الازمات التى حدثت في الممتاز هذا الموسم من دون شك ليس من المنطق ولا المعقول ان يكون كل تلك الاطراف (غلطانة)والمريخ وحده هو على صواب امام الهلال وفي استاد المريخ ادعى مجلس المريخ واعلامه ان جمهور الهلال كسّر كراسي استاد المريخ وتهجم على طابق شاخور واحاله الي حطام اخرج مجلس المريخ بيانا تلو الاخر يستفز فيه جمهور الهلال وينال منه والحكمة الروسية (القاطعها من رأسي دا) بتقول لا يمكن ان تحدث هذه الافعال من جماهير فريق منتصر لكن عشان الاتحاد العام للمريخ لا يوالي غير (الوالي) اصدر في حق الهلال عقوبة ذهب المريخ الي شندي عادوا من هناك بخسارة قالوا بعدها الجمهور اعتدى على بص اللاعبين واكدوا انهم تعرضوا الي ارهاب وضرب وخرج عصام الحضري يشكي ويهاجم جمهور شندي العريقة ، في الفضائيات المصرية في عطبرة تكرر نفس المشهد وقالوا ان جمهور الامل الكبير اعتدى على اللاعبين وان الحضري اصيب بجروح بالغة وخضع لعملية جارحية في الفك اتضح فيما بعد ان هذه العملية (عملية جيوب الانفية) قبل هذا سقط لاعب المريخ المحترف ايداهور في مباراة المريخ والامل (ميتا) فاخرج مجلس المريخ قبيل ظهور نتيجة الكشف واسباب الوفاة بيان يهاجم فيه فريق الامل ويعرض حياة لاعبيه للخطر في الحصاحيصا الان والتى تعتبر مدينة مقفولة للمريخ والتى جاء منها ابناء المريخ معتصم جعفر ومحمد سيد احمد والفريق عبدالله حسن عيسي والفريق طارق عثمان الطاهر (اللورد الما عارف اسمو)قدم المريخ اعتماد كراهيته وهو يستفز مدينة الحصاحيصا واهلها باحداث نقلتها الصحف في الايام الماضية واكدتها الصور لا نريد ان نتحدث عن الواقعة لكن نقول اذا كان المريخ يفعل هذا في الحصاحيصا التى قدمت له خير ابناءها ماذا يا ترى سوف يفعل في المدن الاخرى؟ غايتو حركاتكم دي ما تعملوها لينا في شندي!! أبعد هذا هل يسأل الاخ هيثم محمد علي عن اساب كراهية المريخ السبب واضح راجعوا مواقفكم وهذبوا تصرفات مجلسكم ، وفريقكم ، ولاعبيهقبل ان تضيّق عليكم حتى في (الرد كاسل) ملحوظة : لعل سيرة السيرة الذاتية ل (ف م) وضحت الان هوامش ندخل على الدرس الثاني يا ضفر اسمع كلامي دا انت وباسكال وبلة جابر وموسي الزومة ومعاكم الطاهر الحاج (سادومبا يبرأ من شتارتك دي يا الطاهر)شوفوا ليكم من بدري (كورس) للدمازين بي حالتكم دي (5) دقائق ما بتصمدوا قدام سيدي بيه سيدي بيه قالوا ح يمشي الدمازين شايل (سماعاتو) الكشف بالدور العندو رضوخ العندو تقرحات العندو تصلب كلو كلو ح يكشف عليه سيدي بيه عشان كدا ننصحكم تدخلوا ليكم (معهد) عشان تقوّا لغتكم وتقدروا تتفاهموا مع الزول دا بعدين مباراة القمة في الدمازين اي واحد فيكم يا ضفر يدخل المباراة شايل ليه (دكشنري) مع الدكشنري كل واحد يدخل عليه شايل ليه (كمينة) طوب الزول دا بي اخوي واخوك ما بثبت بنطلع ليكم تصريح من (الحكم الرابع) ما عندكم مشكلة اكرم الهادي سليم في (الحصاحيصا) اتجهجه في الدمازين يعمل شنو؟ ناس المريخ قالوا عاوزين سيدي بيه قبل الدمازين وإلا بعد الدمازين؟ كروجر يطرد في ناس سليمانو ويقول جيبوا لي تراوري مدربكم دا كلموه يعقل ويخلى (الخفة) دي انتوا ما تختصروا الحكاية وتنضموا للهلال ان شاءالله تلعبوا في الرديف ديل طلعوا معجبين بالهلال اكتر مننا هيثم مصطفى لعب في الهلال (17) سنة هسع ناس مزمل ابوالقاسم بقوا وقت هيثم ما يشيل جائزة نجومية المباراة بزعلوا عملتوها ظاهرة يا حليل فيصل العجب لعب في المريخ (15) سنة ما في زول زعل ليه زعلة يا سلك انتوا كلامكم الزمان عن العجب الوصلنا غانا وعن المرجيحة والمعجون كان في (التونه) بالله نكروا (العجب) حطب هسع وقت رمضان عجب يشيل جائزة نجم المباراة بزعلوا الجائزة في رمضان (عجب) ما عاوزنها هيثم بس يا ما عاوزين انتوا يا معاوية الجاك على كدا لو جاكم (سيدي بيه) تشيلوا ليه جمال الواليوتسموا استاد المريخ استاد سيدي بيه ديل ريتشارد خلعهم ليك لو عارفنكم قاعدين على الهبشة كدا كنا شطبنا ليكم (بويا) عشان الحضري يرتاح في عضمو دا الزول رفض يرجع عديل كدا الخوفة الدخلت في الحضري تاني لي يوم الدين ما بتطلع الحضري دا اصبروا لي عليه ح اعمل ليه (من الغلاف للغلاف) اصبروا بس انتوا نحن اي حاجة عندنا بي نظام الحكمة البلجيكية (القاطعها من رأسي دا)بتقول الضرس لو ملتهب ما تقعلو اصبروا خلوا الالتهاب يروح عاجل : يا ناس المريخ الحصاحيصا دي تاني إلا تدخلوها ب (فيزا) وإن طال السفر - محمد عبد الماجد صحيفة قوون
