كنت بعتقد أن غنية ست البنات أنا جايك عريس.. وبحلف الكتاب مهرك ما رخيص.. غنية تحوي في طياتها طرطشة.. ودق جرس.. وخصوصا لما يصل الحتة بتاعة باركو العرس يا الأمهات وبالفاتحة يا ناس ما حلال.. والجماعة يكوركو وراهو بإصرار شديد حلال يكونو برضهم ممكونين علا فايتنو بالصبر.. ما فضلهم إلا يحلفو طلاق ويقولو حلال.. من الأول قال لها مهرك ما رخيص.. وعشمو كلو انو يشيلوها من كرعيها ويجدعوها ليهو بي ساااااااااكت.. بالفاتحة بس.. لكن بصراحة ليهو حق.. الزول وقت يبقى نفسو في شي.. يا يلقا.. يا يقعد يحنس ويدق جرس.. زي ما سو الزول دا.. يا يصبر والصابرات روابح.. ويشيل ويتعضر لها "عارفك جميلة وزايدة في البنوت حلا.. والمال عليك يا غالية ابدا ما غلا.. لكن ظروفنا القاسية كيف نبدلها؟.. فاضل وحاتك بس نفوسنا ندللها" يعني من الفقر العلينا ما فضل لنا إلا نبيع نفوسنا.. شفتو الطرطشة دي؟. الغنية دي كانت زمن البت قاعدة في بيتها وراجية العريس.. لكن هن الله يديهن العافية جن بعد تلاتين سنة وقالن لو "تعال بالعندك أبوي بي يسندك".. وهو ما طمّع كتير منهم.. سمعت غنية للمطرب بلال موسى.. سمعتها أكتر من أربع مرات.. بتقول "بستناكي بستناكي..انت بس كملي لي تعليمك".. هذه الغنية في ظاهرها تنازل وصبر لحدي ما تكمل تعليمها.. وفي باطنها طمع واستهبال واستكراد.. يا بلال يا أخوي.. التعليم دا بي ساااااكت؟.. ما بقروش ومصاريف.. وقومة وقعدة سمعت الغنية وكملتها جججججت.. ما سمعتو جاب فيها طاري مصاريف واللا قروش واللا دقا سدرو وقال يشيل مع ابوها الشيلة.. يا بلال يا اخوي القراية دي ما دايرة مصاريف؟ البي يدفعن منووووووووو؟.. واللاّ انت تستناها من ضل لي ضل.. وهي تقرا وتتخرج وأول ما تشتغل تجي تعرسها؟. صراحة وبكل شفافية يا بلال يا أخوي دا استهبال عديييييل. ومكنة منك ساكت.. حنك بيش.. نحن تفتيحة يا فردة!!!. وبرضها طرطشة.. خايفك تقولها بستناكي بستناكي لحدي ما تكملي الالزامية.. وبستناكي لحدي ما شتتغلي.. وبستناكي لحدي ما تلملمي قريشات العرس. أصلو ما وراي حاجة غير استنى واصبر اسوي شنو؟.. و بعد تلملميهن تديني ليهن واجيب أمي وأبوي ونجي أعرسك "وحات الله ما بزوغ بهن.. والخائن الله يخونو".. يا بلال خسمتك باللزي خلقك ما تطمع الجنون في بنوت الناس.. وتعلمهم الطمسة.. سوي غنية تانية.. أصلها سواة الغنا بقت ساااااااهلة.. سوي غنية وقول لها بستناكي انتي كملي لي تعليمك وأبوك تب ما يشيل هم المصاريف.. أها وكمان ضكرنة مني بستناكي واصرف عليكي لمن تخلصي الدكتوراه.. وإن بقيت زول فنجري قول لها بستناكي لحدي ما كلكم تكملو تعليمكم انت واخوانك الصغار.. والمصاريف علي.. أما حرم النور.. قالت وهي تغني من صُجها وتشكر في زول:- (زولن بركة وأصلو كريم.. بي يعزم على المافييش) يا حرم يا بت الناس.. ان زعلتي وان رضيتي.. بصراااااااحة وبكل وضوح زولك دا كضاااااااااااااااااااب.. وغشاش.. حاجة مافي، يعزم عليها كيفن؟؟؟.. أو يكون عارف الجماعة ديل مستعجلين وما بيقعدو ليهو.. والله لو طلعو غتات وقعدو..زولك دا ياكل نيم..!! احتراز:- اعمل حسابك منهم:- الحليم إذا غضب.. والفقيران إذا رطب والحرامي والكديسة لو زنقتهم في أوضة الباب البجيب الريح- صحيفة اليوم التالي
