يشرحوها ليكم كيف دي؟. صعبة شديد. اقول ليكم شنو؟. طيب نشوف ليها حل ..بتلقى. ما في حاجة ما عندها (حل). اقطع ليكم حاجة من رأسي ...(حكمة اسبانية). عادل امام سألوه عن الممثل الذي يضحكه؟..فقال هو الممثل الذي اراه في (المرايا) عندما اقف امامها. شفتوا الجدعة (المقطوعة من الرأس) دي كيف؟. الفهم في تركيا ...تجيب ليك (ديك) وتشدو في الحلة – ترمي ليه (بصلة) ..وتقفل (الحلة) على كدا وترجع ليه بعد (45) دقيقة. لو الديك كبير في السن ..ترجع ليه بعد (45) يوم. الفهم في انجلترا ..نفس (الديك) تشدو في الحلة ..بدل (البصلة) ترمي ليه (دو). وتنتظر الفتوح. بجرك خمسين. تضرب (الديك)...الجنبك ما بتديه. الذوق في فرنسا ...لو (عفصت) ليك زول في رجلو تقول ليه (سوري). ومن (سوري) الفرنسية دي ...قالوا (الاسف) فرنسي. الفرنسيون ديل قالوا ليك اكتر ناس بتأسفوا في الدنيا. جنهم (اسف). الزوجة في فرنسا ..تضرب لزوجها تلفون ..تقول ليه (سوري) جيب معاك (رغيف). منتهى الذوق. ما زي هنا ..الزوجة ..قبل (جرس) التلفون ما يدخل تقول ليك : (جيب معاك رغييييييف). تجر ليك (الياء) لمن تجيها راجع. لو نسيت (الرغيف) تطلعك جبهة ثورية. تشرطوا في عيونكم ..زي كراريس الحساب. الذوق في السودان ...الواحد لو (عفص) ليه زول في رجلو ...الزول العافص بقول للزول (المعفوص) ..ما تزح رجلك دي. سمين كدا ...متل فردة الصيوان – ( الواحد يسمعك الف كلمة فارغة). بعيد عن (الفهم) التركي ...و(الذوق) الفرنسي ..ناس (تر الكنب). اسمو كدا (تر الكنب). ناس (تر الكنب) ديل عندهم (ديك) عذبهم عذاب شديد. كل يوم (الديك) دا كاسر ليه كباية شاي. الديوك عندهم مشكلة (باكات) مع كبابي الشاي. الديك دا يومي ..بجيبوه ليك المغرب من الحلة التانية. ديك عذاب بس. ينوم ليك للساعة عشرة ..بعوعي على مزاجو. مرات اسبوع ما يعوعي. ومرات على رأس كل دقيقة ..يطلع ليك في السرير ويعوعي ليك في (اضانك). ديك متعب. يفتح التلاجة...يطلع (اللحمة). يقفل التلفزيون. ديك (متعولم) اي حاجة بعملها. ترالكنب ...زهج شديد من (الديك)..وقال يشوف ليه طريقة ..عشان يقلل (كهربتو) شوية. كهربة الديك يعني. شال (الديك) ومشى بيه على (انطوان). انطوان بتاع كورة ...خطيرة. انطوان اسمو (ود البوع). ود البوع دا قالوا ليك خطير. ود البوع دا يقول ليك الكورة بتنتهي سبعة ..الكورة تنتهي سبعة. يقول ليك انتوا الليلة مغلوبين تلاتة. تتغلبوا تلاتة. تر الكنب شال (الديك) ومشى على (ود البوع)..وقال ليه والله انا الديك دا غلبني. ود البوع قال ليه غلبك كم 4 / صفر. تر الكنب قال ليه عندي (7) اولاد ..ما عذبوني زي عذاب (الديك) دا. الديك دا اصلو ما يريحني. ود البوع عاين للديك كدا ...وقال ليه (كر). الديك واقف...زي الثيردباك. ود البوع جدع ليك (الديك) بي حجر..الديك واقف. ود البوع عاين لي تر الكنب ..وقال ليه اسمع (ديكك) دا ..بطاريتو صينية؟. تر الكنب عاين ليه كدا ..وقال ليه تصدق يا ود البوع قاعد اقول ل (المرا) كلامك دي ما بتصدقو. ود البوع قال لي تر الكنب ..ح نغير ليه (البطارية). تر الكنب قال ليه لكن يا ود البوع نلقى ليه بطارية اصلية وين؟. ود البوع قال ليه دي ما مسؤوليتي ..قبلك جوني ناس فريق (التليشاب)قالوا عاوزين ليهم حاجة يغلبوا بيها في المباراة القادمة. ما قادرين يثبتوا. رجفة (بايرن ميونخ) لي هسع ما فكت منهم. يهضربو زي الساعة المقدمة. بشه ..بشه ..بشه..بشه. قلت ليهم اول حاجة تغيروا الحارس. قالوا بنغير الحارس...اصلا نحن عندنا حراس زي (حجارة البطارية) ..كل 10 يوم لازم تغيرها. قلت ليهم شيلوا (الباكات). شالوا (الباكات). عندهم باكات ..يبكوا ليك بعد المباراة زي الزول المشى السوق وما لقى ليه تلج. قلت ليهم وسطكم دا في (حافلة) ما بنفع. شيلوا الوسط. وسط ملتق متل نقالة الحوادث. قالوا ح يشيلوا الوسط. قلت ليهم الهجوم. قالوا لي الهجوم مالو؟. قلت ليهم انتوا عندكم (هجوم) ...هجومكم دا شايت على الكشافات. هجومكم دا وقت يدوه ضربات جزاء ما بجيبها. بعدين معقولة ..هجومك دا زي جامعة افريقيا ..واحد من مالي وواحد من اثيوبيا وواحد من ساحل الحاج ..انتوا ندوة عن الاتحاد الافريقي في قاعة الصداقة. سوداني واحد ما فيهم. ويقولوا ليك الدوري الممتاز بي رعاية (سوداني). قالوا لي ود البوع ما مشكلة ..بنشيل الهجوم. قلت ليهم والمدرب. قالوا جدا – نشيل المدرب. مدربكم دا في الفاشر بقع من الكرسي ...في الطيارة بعمل شنو؟. جايبين لي مدرب عمرو 78 سنة..دا في (لجنة) تاني ما بنفع. ومجلس الادارة. يا ود البوع انت كمان ما تبالغ (مجلس الادارة) نشيلو كيف؟. قلت ليهم انت عاوزين تغلبوا وإلّا عاوزين حاجة تانية؟. مجلس الادارة حقكم دا يعمل ليكم (مقصورة) اوكي. يجيب ليكم (الحضري) اوكي. ينظم ليكم سيكافا ..اوكي. يلعبكم مع بايرن ميونخ ..اوكي. لكن يغلب ليكم الهلال ..دي ما تحلموا بيها. قالوا لي خلاص ح نشيل مجلس الادارة...لكن بس خلي لينا (الوالي). قلت ليهم الوالي دا اول واحد يمشي. بالذات الوالي ..مشكلة كلها في (الوالي). الوالي ..ومكتبو يا سلك!!. قلت ليهم والاعلام. قالوا لي الاعلام مالو؟. الاعلام مالو ما كويس يا ود البوع ..بكسر في (التلج) ..وبنفخ في الفريق ..اكتر من كدا يعمل ليكم شنو؟. قلت ليهم انتوا عندكم اعلام..اعلامكم خلى (المقصورة)..وركز على الحكام. يا ود البوع انت عاوزني نعمل شنو؟. غيروا لي (الاعلام). مشكلتكم الاساسية في الاعلام دا؟ يا ود البوع...نحن لو بنقدر نغير الاعلام كان شلنا سيكافا. والله دي ما مسؤوليتي. خلاص بعد الاعلام عاوز شنو؟. بعد الاعلام ...(بشه) ما يلعب. ود البوع!!. ودي نضمنها ليك كيف؟. وبكري المدينة. بكري المدينة مالو؟. بكري المدينة ما يلعب. ود البووع!!. ونزار الصاقعة. نزار الصاقعة مالو؟. ما يلعب. ود البوووع!!. وكاريكا. كاريكا مالو؟. كاريكا ما يلعب. ود البووووع؟. شفتوا لو (خليفة) لعب بجهجهكم. باختصار كدا ..الهلال دا لو عاوزين تغلبوه إلا يلعب ليكم بي (9) مشجعين. لو لعب ليكم ب (11) مشحع بغلبكم. ود البوع. ود البوع شنو؟..شابكني من الصباح ود البوع ..ود البوع ..ود البوع..ود البوع تطير عيشتو..والله ناس (بشه) ديل لا بتمسكوا ولا حاجة. الجماعة اتصدموا ..جاتهم نفسيات ..عشان كدا دوروا ليك في (الحكام). ترالكنب قال لي ود البوع ..كدا الكورة دي خليني منها ..هسع (الديك) دا بعد ما نغير ليه (البطارية) بيظبط. الكورة دي قنعنا منها ..كدا خلينا في (الديك)؟ يا زول ما تشيل هم ..(الديك) دا بعد ما تغيير ليه (البطارية) ببقي ليك زي الحصان. ترالكنب ..شال الديك مشى ركب ليه (بطارية). الديك ما استعدل ...الديك في جنو. ترالكنب جاب الديك ورجع لي ود البوع ..قال ليه : والله يا ود البوع الديك في جنو؟. ود البوع عاين للديك كدا ..وقال ليه كدا غيير ليه (الشاحن). يا ود البوع شنو ؟..شابكني من الصباح بطارية وشاحن ..(ديك) هو وإلا (جلاكسي). ود البوع عاين ليك لي ترالكنب كدا ..وقال ليه اسمع (التقنية) دي دخلت في اي شيء. الصينيون ديل بي شلاقتهم دي بدخلوا في اي (ديك) في البلد دي. يمين الصينيون تخليهم كدا ...(العدس) البتعملوه في البيت يتدخلوا ليكم فيه. ترالكنب شال (الديك) ومشى غير ليه (الشاحن). الديك في حالتو. ترالكنب ..صبر اسبوع ..صبر اسبوعين ...الديك ما اتصلح. شال الديك ومشى على (ود البوع) قال ليه غيرت الشاحن ..والديك ما استعدل. ود البوع عاين للديك ..وقال ليه اسمع غير ليه (الكفر). ترالكنب ما قال شيء ..شال الديك ومشى عشان يغير ليه (الكفر). غير ليه (الكفر) ..والديك في حالتو. لكن ترالكنب بقى لمن موبايلو بضرب ..الديك بعمل (عاشقة). ديك قديم ..من زمن تلفون عاشقة. والديك في جنو. تر الكنب شال (الديك) ومشى على ود البوع ..قال ليه يا معلم الديك لسع ما استعدل. ود البوع قال ليه اسمع (الديك) دا اضبحو ..ما عندي ليك حل غير انك (تضبحو). ترالكنب قال ليه طيب انا لو عاوز اضبحو ..البجيبني ليك شنو؟. هسع دي عاوزة ليها (انطوان). ترالكنب شال ديكو وطلع. وقال ليك في سرو ..انت انطوان شنو ..لا كورة نافع فيها ..ولا ديك. طيب بتنظر لينا في الصباح فوق كم؟. ملحوظة : انتوا إلّا يجوكم بي فوق كدا. هوامش امس رضا مصطفى الشيخ ..جاب لينا فيصل سيحة في فقرة الامبراطور. قعدوا ليك في الكرسي ..وقال والله الجهاز ما شغال. انتوا تلفزيون السودان دا كشك ليمون. معقولة ..الناس وصلوا القمر ..وانتوا لسه في الجهاز ما شغال. طيب وقت الجهاز ما شغال ..لزومو شنو تجيبوا لينا سيحة. جاء قال ليه كلمة وفات. نظام ما في مشكلة. المشكلة في الجهاز. يا حليلك يا سيحة بقيت بتاع (جوائز) ساكت. عشان تاني تقعد تنظر فينا. قلنا ليكم البهبش الهلال دا ما بكسب خير. قعدتوا تغالطوا فينا. ابوشيبة قال حكم كوستي كركة ما ح يشيل الشارة الدولية عشان الهلال ما انتصر في المباراة التى ادارها كركة. وهسع سيحة دا من قعد يظلم في الهلال جهاز التلفزيون بقى ما شغال. ويا ريت تفهموها بعد كدا. الهلال اليوم منتصر ..منتصر باذن الله ..نثق في ذلك ..ثقة تامة. وكمان عشان احددها معاكم ..اتير توماس ح يجيب الهدف التاني. دي غير اهداف صلاح الجزولي. ما تشيلوا هم. وابقوا على استاد الخرطوم من بدري. شجعوا الهلال باحساس المجموعات. تشجيع الهلال اليوم ..هو دافع لانتصار الهلال على مازمبي ان شاءالله. فريق المريخ ح يدخل في اجازة مفتوحة بعد مباراة اليوم. يلا شوفوا ليكم دورة حوض النيل ..او شوفوا ليكم سيكافا. ما تقعدوا كدا. نحن عندنا (مجموعات)..ما عاوزين اي لخمة. ما عاوزين اي جوطة. يقولوا ليكم الكلام الف مرة. منتصر زيكو قال المريخ سوف ينتصر اليوم. يا زيكو كدا انت اول حاجة رجع الكورة. بعدين اقعد اتكلم لينا عن توقعاتك. عندنا ضربة جزاء عديل كدا لم تنفذ الي الان. بلة جابر وعلاءالدين يوسف وباسكال ..اقرب الي ان يطردوا من مباراة اليوم. الحكم اذا لم يحسم التفلتات من البداية ..فان المباراة سوف تفلت عليه. مع كتابات اعلام المريخ ..توقعوا (الكروت الحمراء) للاعبي المريخ في ظل الشحن الذي سوف يدخلوا به للمباراة. فقط نتمنى حكم عادل ..وحكم لم يتأثر بالكتابات الموجهة التى استهدفته في الايام الماضية. اتوفيستر قبل شهر قال الهلال هو الفريق الثالث ...(لاحظ ان الهلال يتصدر الان للممتاز). اتوفيستر امس قال الهلال فريق عنيد. انت ما قلت يا اتوفيستر الهلال الفريق الثالث. بتعرف الخوف. اكتر لاعب مرتاح في المريخ ..ضفر واكرم الهادي سليم. جماعتكم اخر راحة. الشقاوة ...وقعت في ايهاب زغبير. ايهاب زغبير ..حارس مرمي تستقبل شباكه اهداف ساهلة. يعني ما تتعبوا معاه شديد. سجلوا بالساهل يا صلاح الجزولي. هل سوف يتم استبدال ايهاب زغبير؟. انتظروا الغيار. فيصل سيحة امس في برنامج عالم الرياضة لو ما شافها شينة كان قال هدف الهلال الاول امس ما صحيح. وكان قال المريخ عندو ضربة جزاء. وكان قال سيف مساوي مفروض يطردوه. لكن شافة شينة ...والجهاز ذاتو ما شغال. ..انتوا الليلة فائزين ..فائزين يا هلالاب ان شاءالله. اسمعوها مني. وامشوا عدل على الاستاد. شجعوا ..طوال التسعين دقيقة ..وخلوا اعصابكم هادية ..الهلال فائز باذن الله. فقط مطلوب من لاعبي الهلال ان يلعبوا بقوة ..وحماس ..عشان المريخ سوف يحاول ان يفرض اسلوبه عن طريق الضرب ..والخبط. ألعبوا يحماس يا مساوي. وما تتركوا المريخ يرهبكم. اعلام المريخ شحن لاعبي المريخ ..واوهمهم ان الحكام يظلمون المريخ. وجمال الوالي زار معسكر المريخ ..ووعدهم بالحوافز الخرافية ..يعني (الشحن) سوف يكون في قمته. مطلوب من الهلال فقط ان يفرض اسلوبه. يا نزار الصاقعة ..اعمل حركات ..فك وركب ..خلي المدرجات تنتعش. يا بشه ..ما تتمسك ..الجماعة ديل بسرحوا. يا صلاح الجزولي ايهاب زغبير ..ممكن ان تسقبل شباكه اسهل الاهداف. لمسة بس. ولا تتعب. بصر طوالي في القون. يا اتير توماس ..جيب قونك. افرحوا ..وعيشوا انتصاراتكم. ألعبوا مباراة اليوم ..وما تختوا بالكم لمباراة مازمبي. احسموا مباراة اليوم. التفكير في مباراة مازمبي في مباراة اليوم ..يفقدكم نتيجة مباراة اليوم. التركيز والحماس مع المسؤولية ..سوف تجعل الهلال انتصار اليوم حتمي. اغرب شيء ..مزمل ابوالقاسم اعاد قصة ضرب لاعب الهلال للاعب المريخ بالبونية. مزمل لم يذكر اسم اللاعب الذي ضرب لاعب المريخ بالبونية. اللاعب هو علاءالدين يوسف الذي يلعب في المريخ الان. اللاعب البتحذر منو يا مزمل بلعب معاكم. ونحن نذكر الحكام بذلك. اعلام المريخ بحرض على طرد فييرا. الليلة لمن يطردوا ليكم فييرا ..ما تزعلوا. براكم بتقولوا كدا. بتجيبوا لي نفسكم الهوا. نذكر لاعبي الهلال ان مزمل ابوالقاسم شبه لاعبي الهلال بالارانب ..وشبه لاعبي اندية المجموعات بالسباع ..عند اجراء قرعة مرحلة المجموعات. عاوزين نشوف الليلة (الارانب) ديل بعملوا شنو؟. ما تنكروا كلاكم. الارانب لو غلبوا المريخ ..لاعبو المريخ ح يطلعوا شنو؟. نحن ما بنقول. قولوا انتوا ..(على طريقة اسماعيل حسن). في النيلين يستحق ايمن اليماني التحية ..وهو يحلل مباريات الممتاز بصورة (رقمية) جميلة. اليماني هو اول من ادخل التحليل (الرقمي) في تحليل مباريات الدوري السوداني. بل ان اليماني يتميز حتى على المحللين العرب في القنوات الكبيرة. اهم ما يميز اليماني انه يرصد اللاعب وتحركاته عبر الفيديو ..ويقدم للمشاهد اجتهادات اللاعب ..بعد ان كانت تمر على المشاهدين مرور الكرام. ايمن اليماني يفترض ان يحلل اليوم في التلفزيون القومي وليس في قناة النيلين. وان كانت الاعلانات والوقت في التلفزيون القومي لا تتيح لليماني ان يقدم لنا تحليلاته الرائعة. نرجو ان تخصص قناة النيلين وقتا كبيرا لايمن اليماني في التحليل. المريخ سوف يتجه بعد مباراة اليوم الى تفجير قنايل اعلامية عن التسجيلات. تاني ح يغشوكم. وتاني ح يلعبوا بيكم. ويقولوا ليكم كلام كتير. ما تصدقوه. ...... عاجل : الساعة عشرة الليلة ان شاءالله ح تكون لكل المريخاب هي (اخر ظهور)..اسألوني من الحكاية دي ..كلهم بطلعوا من الواتس آب. وإن طال السفر - محمد عبد الماجد صحيفة قوون
