* عندنا فرصة لإصلاح الحال. * ولا ينصلح الحال إلا بالإعتراف بالعيوب. * ولأن المقام مقام إحلال وإبدال. * نركز على الإحلال والإبدال. * ثبت بما لا يدع مجالاً للشك. * أن فى المريخ لاعبين لايعرفون قدرهم. * وبالتالى لايعرفون قدر النادى. * فمن يبخس نفسه بالتأكيد لن يكون له قدسيه لأى إنتماء. * عندنا ناس أدمنوا الفشل. * وجلدهم أصبح قوياً. * الهزائم لا تخيفهم. * ولا تغضبهم. * ولا تؤثر فيهم سلباً ولا إيجاباً. * لذا التخلص منهم أصبح هو العلاج الناجع. * أيها الناس. * سمعنا ببعض التمرد فى أوقات مختلفة. * لاعبون يقودون التمرد على النادى. * لم يتمردوا على إنتكاساتهم التى شوهوا بها وجه النادى وتاريخه الجميل. * ولكن تمردوا على النادى نفسه. * وجود ديل لايعطى الفرصه الى تغيير السياسات الإدارية وسط الجدد. * أوعه من ديل. * وزى ديل. * عليه. * نبعد ديل لكن بفهم. * من يسئ السلوك أهلو طوالى. * والبعض ممكن يكون لسه باقى ليهم زمن فى تعاقداتهم. * يعنى لو فكيناهم لازم ندفع. * وعشان ما ندفع لمتمرد. * نعمل الآتى. * خانه فيها لاعبين. * واحد ضعيف والتانى متمرد. * نشطب الضعيف ونسجل بدلوا واحد تانى. * ونستعين بلاعب من الرديف فى نفس الخانة. * ونبقى على المتمرد. * نلعب اللاعب الجديد مرة ولاعب الرديف مرة. * نتمرد على المتمرد. * كنبة يا عمك. * لو مشى براهو. * الله معاهو. * ولو قعد يخسر حوافز المباريات لأنو أساساً ما بكون فى القائمة المشاركة. * المتمردون يا يمشوا براهم يا الكنبة راجياهم. * وصدقونى لاعب لعب ستة سنوات ولم يقنع لن يقنع مستقبلاً أبداً. * وصدقونى لاعب هش لو بلعبها بى لسانو لن تجده حاضراً فى المناسبات الكبيرة. * فكونا من المتمرد والهش. * أيها الناس. * فيصل موسى برغم موهبته هل هو صانع أللعب الذى ننتظر معه بطولات جويات وصولات وجولات دولية؟؟؟ * شيميلس هل هو المحترف الذى يحقق لنا الفارق أفريقياً؟؟؟ * نواصل.. * لو كان عندنا لاعبان فى خانة واحدة. * وطنى ومستورد. * والأثنين ما ماليين الخانة ولا بملوا عيوننا. * نبحث عن لاعب فى الخانة. * لقينا وطنى يبقى الوطنى عجاج كرعينو. * لقينا أجنبى يبقى الفريزيان عجاج كرعينو. * ونستعين بلاعب من الرديف يتقاسم الفرص مع الفضل والجديد الوصل. * وهكذا نتخلص من سوالب الكشف بدون ضوضاء. * وبدون فتح صفحة جديدة. * فالمجرب لايجرب. * أيها الناس. * الضعف وسط اللاعبين ثلاثة أنواع. * نوع ضعيف مهارياً. * ونوع ضعيف إنتماء وإرتباط. * ونوع ضعيف جسدياً ضعيف فى الإلتحام. * فتضيع موهبة هذا النوع الأخير وسط غابة العضلات والفتوات ولا يفيدنا بتلك المهارة الخجولة وسط الدفر القانونى. * أرى والخبراء أكثر دراية منى. * إن لاعباً مثل شيميلس أو فيصل موسى. * لا تنقصه مهارة ولا شطارة. * ولكن تضيع تلك المهارة والشطارة بسبب الضعف فى الإلتحام. * فيستلم فيصل ليسقط أرضاً. * ثم يفكر فى النهوض ليستعمل مهارته. * يكون الناس الشتر طفشوها قبييييييل. * فالقتال الأفريقى يستند على الأجساد القوية قبل المهارة. * أما شيميلس فطواااااااالى يفقد الكرات المشتركة لأنه يمتلك جسداً ضئيلاً وحريفاً. * فتخذله ضآلة جسمه ولا يستفيد من الحرفنة الا فى بعض الأحايين. * لذا عند الإحلال والأبدال نختار الأبدان القوية والفارهة ونضع السرعة من أولويات الإختيار. * فنحن نقاتل فى أفريقيا. * وعشان الناس ما يفهمونى غلط. * حديثى ليس عن الطول والقصر. * ولكنه عن القوة والفتوة. * فميسى ومارادونا وسامى عز الدين كانوا قصار القامة. * ولكن القوة العضلية كانت متوفرة لهم. * لذا إستفادوا من مهاراتهم. * وحديثى ليس عن الشحم واللحم. * فسقراط البرازيل وسكسك وعصام عباس وعصمت الإمتداد ما كانوا مثل صديقى الفاضلابى. * عدمانين اللحم. * لكن العضم قوى. * لذا برضو إستفادوا من مهاراتهم. * أسى ضفر ده. * رمضان من أول يوم بدخل ليهو العضم. * لكن فى دبابة بتقيف أمامو. * ما شاء الله. * إذا القوة والفتوة هن الأساس. * أيها الناس. * قبل كل ذلك. * جهاز إدارى قوى وخبير. * يدير اللاعبين بحزم وقوة برضو. * يغير من السياسات التى خلقت لنا كم فرعون كده. * فراعنة يتفرعنوا علينا. * ولا يدروا انهم ليسوا إضافة للكيان. * بل ان الكيان إضافة لهم. * هذا الجهاز الإدارى. * يجب ان يجد من المجلس كل الصلاحيات فى تنفيذ عمله. * يخصم من حافز من يخصم. * ويوقف من يوقف. * والمثل عندنا عقوبة أبوتريكة التى لم يكلف مجلس الأهلى عناء مناقشتها. * بل صادق عليها لأنه يعطى العيش لخبازو. * ولا يريس ويتيس. * إستعينوا بالأشبال والرديف وإستعينوا بالصبر والله مع الصابرين. * بالتأكيد سنجنى الثمار قريباً إذا صبرنا على من يستحق الصبر. * ولكن المجرب لايجرب. * فصبرنا عليهم حتى علم الصبر أننا نصبر على شئ أمر من الصبر. * الهيبة أساس التعامل مع الكيان. * المهم. * الأهلة سكتنا ليهم عن هدفهم فى مباراة القمة. * قالوا عندهم قون تانى. * بس زى الزول القالو أدوهوا جائزة عشان شاف هلال رمضان. * قال ليهم داك واحد تانى. * القون بتاعكم يا روشا تسلل. * لأنو التداخل فى الكرة فى موضع التسلل يعد تسللاً. * ليس بالضرورة لمس الكرة حتى يعد اللاعب متسللاً. * أرجعوا لشريط المباراة. * بعد ان غادرت الكرة قدم نزار. * بكرى هبشها ولا ما هبشها؟؟؟ * الإجابة لا تغير من الحالة. * إذا هبشها تسلل. * وإذا ما هبشها تداخل. * وتداخل فى قانون التحكيم تعنى تسللاً. * يبقى ما عندكم قون أساساً. * الكورة واحد صفر جابو أتير على الطائر فى سقف المرمى. * أما الحديث عن هدف بشه. * فالحكم أطلق الصافرة. * وحتى أيهاب الذى كان أقرب الى الحالة توقف عن اللعب. * وبشه برغم سماعه للصافرة لعب الكرة. * ويجب على الحكم إنذاره. * لأن مثل هذه التصرفات تثير الجماهير. * ويصدقها بعض الضعفاء. * وتخلق البلابل. * بشه يستحق الكرت كان. * يبقى هداف المباراة أتير توماس المحترف الجنوب سودانى. * أيها الناس. * نتحدث سنينا عددا عن الشفتنة. * عمر بخيت يثير لاعبنا ليطرد. * وزغبير يمسك بلاعب الهلال الثائر ليهدئ من روعه كى لا يأتى بتصرف يطرد عليه. * معقولة بس!!! * أها. * نجى لى شمارات والى الخرتوم. * أكان شفت يا والينا. * فى إتنين بتاعين بحر. * جوا ماشين شاقين حى راقى ماشين البحر. * البحصل فى البلد دى ما بتقعد بدون بحر يا والينا. * المهم قابلهم صيوان قدر الدنيا. * بى مكيفاتو وكراسى جلوسو. * والعربات الجمبو موديلات وموديلات. * فيهن واحدات إسمهن كده زى المضاد الحيوى. * وناس يلمعوا ويتلامعوا. * وناس واقفين بره لابسين نضارات سوداء. * بعاينوا على وين. * ما فى زول عارف. * لافى شماشى جمب الصيوان. * لا فى غنماية ولا حيوان. * واحد سأل التانى. * قال ليهو هنا فى شو يا عمك؟؟؟ * التاى قال ليهو واحد كسار تلج عقد بتو عزم الكبار كلهم. * الأول قال ليهو الكبار كلهم؟؟؟ * التانى قال ليهو أيوة الكبااااااااااار كلهم. * الأول قال ليهو أفرتق ليك العقد ده؟؟؟ * التانى قال ليهو تفرتقوا كيف؟؟؟ * الأول قال ليهو أجى جنب الصيوان وأكورك. * ياهو...ياهو...ياهو. * صدقنى بى مأذونهم يتحللوا من العمم الوهم دى ويفكوا تيكة. سلك كهربا ننساك كيف وكان قلت ياهو البلد كلها تجرى.....يا ناس ياهووووو والللللللللللى لقاء سلللللللللللللللك في السلك - بابكر سلك