عصام الحاج مسك المريخ (جمعة) واحدة ، وطلع على كدا يهاجم ليك في جمال الوالي في جمعة الزعل """""""""""""""""""""""""" الشيء الما عرفت ليها (فلسفة) ..هي حكاية التخلص من الكابتن الشغالة في المريخ الايامات دي """"""""""""""""""""""""""" كابتن اعاروه الي الاهلي شندي وكابتن اعاروه الى الاهلي الخرطوم وكابتن شطبوه عديل كدا ، الله يستر على بلة جابر من الاهلي عطبرة """""""""""""""""""" الهلال في مباراة فيتا كلوب إلّا يلعب في الاطراف بي (الجمهور) """""""""""""""""""" . قاعدين متل (الشنط) القديمة...بعض (كراكيب) البيوت فيها (عتق) كبير – ورائحة للفصول المخملية. . فلسفة (الشنط) القديمة شنو؟. . الليلة يوم (الفلسفة) – ما يوم (الطحنية) ناس الطحنية يطلعوا لينا من العمود. . الكلام دا ممكن يزعلهم. . دا كلام (فلسفة) انتوا قايلنو (لعب). . طيب عشان ما تروّح لينا الكلام ..فلسفة (الشنط) القديمة شنو؟. . اقول ليكم. . اي زول عندو فوق الدولاب (شنطة قديمة). . في ناس بيضعو الشنطة القديمة فوق الدولاب وفي ناس كمان بيضعوها تحت السراير. . اي ناس عندهم ثقافة براهم. . واي زول عندو (فهم) مختلف. . وضع الشنط القديمة فوق الدولاب برضو (فلسفة) زي ما هو وضعها تحت السراير (فلسفة). . كل زول بي فلسفتو. . موش مرات بلاقيك زول يقول ليك انت تعال هنا (الفلسفة) شنو في النضارة السوداء دا؟. . نظام الفلسفة دي براها. . نظام صعب عديل كدا. . اي زول داخل (واتس آب) يطلع. . يا جماعة ركزوا شوية. . فلسفة الشنط القديمة ..بكون فيها (اوراق قديمة). . تلك االشنط فيها حاجات (اثرية) قديمة ...اوراق وصور وشوية (كراكيب). . اذن (الشنط القديمة) عندها فلسفة. . في (فلسفة) اقرنها ليكم بالكورة. . عشان ما نطلع من الموضوع. . زمان نحن كان عندنا مدرب ..بقول للباك انت لمن تتقدم ...لاعب الوسط اليسار ينزل يقفل مكانتك . نحن الوقت داك كان ما بنفهم في (الفلسفة) بنقوم نقول ليه : (طيب يا كوتش الفلسفة من كدا شنو؟). . اتذكر وقتها ان (الكوتش) كان بزعل ويتنفط فينا ويقول لينا : (الفلسفة من الحكاية دي عشان ما تنبهل ورا). . برضو فلسفة. . اقول ليكم (فلسفة) غريبة قاعدة تحصل لي في المناسبات. . انا الى الان ما عارف السر في (الفلسفة) دي شنو؟. . مرات وقت تمشي ليك مناسبة ..يقوموا يسألوك : (بيبسي وإلّا ميرندا). . تقول : ميرندا. . وتشدد على الحكاية دي (ميرندا) عليك الله. . يجيبوا ليك (كولا) – حاجة برة المقرر يعني...ما عندها اي علاقة بالعرض القدموه ليك. . الحاجة البتحيرني في الحافلات. . حفلات العرس العادية دي. . في اي حفلة بمشي ليها ..بلقى ليك بتاع (البنقز) اول واحد بطلع في المسرح. . اول واحدة في الفرقة بطلع. . رغم ان (البنقز) في الفرقة هو الآلة الموسيقية الوحيدة الما عاوز ليه (ضبط). . مع ذلك صاحبكم دا اول زول بظهر من الفرقة الموسيقية وهو اول واحد بطلع في خشبة المسرح. . ما عارف انا (الفلسفة) في الحتة دي شنو؟. . الفلسفة دي يمكن يكون عملوها ناس الحكومة. . ناس الحكومة ديل عندهم جنس (فلسفات). . اي ورقة تقدمها ليهم عشان يصدقوها يقولوا ليك تعال الاسبوع القادم عشان تستلم ورقك. . ليه الاسبوع القادم؟. . بس حبا في (التلتلة) وجرجرة الناس. . يشغلوا ليك الناس بالحكاية دي ..تبقى عشان توقيع جاري بين المصالح الحكومية شهر كامل. . ناس الحكومة خلوهم. . انتوا عارفين ناس الدكاكين ذاتهم الايامات دي جابوا ليهم (فلسفة) جديدة. . فلسفة غتاتة. . بصنفها ضمن فلسفات الغتاتة المنشورة في هذه البلد. . هسع يمكن الجماعة ديل يطلعوا ليهم قرار يحظر النشر في الفلسفة. . اصلو الايامات دي اي حاجة تكتب عنها الجرايد يقولوا ليك حظروا النشر فيها. . عشان كدا انا ما بستبعد يحظروا النشر في (الفلسفة). . هي وينها (الفلسفة) الانت قاعد تتكلم عنها دي؟. . لو (الفلسفة) كدا ..يبقوا ليهم حق يحظروه. . فلسفة اصحاب الدكاكين الايامات دي انك بتمشي ليك لي دكان طول وعرض. . تلقاه قاعد (يرشرش) في المحل برة بالموية. . ومطلع صناديق البادر ..ومجدعها قدام المحل. . تمشي عليه ..تقول ليه عاوز طحنية. . يقول ليك : (طحنية ما في). . طيب انت يا ود الناس وقت طحنية ما في (البترشرش) ليها شنو؟. . في داعي للرشرشة دي وانت (طحنية) ما عندكم. . اكيد انتوا قلتوا طيب الفلسفة من الحكاية دي شنو؟. . الفلسفة من الحكاية دي واضحة. . وعشان ما تقولوا انا بتكلم ساكت ..ح اشرح ليكم الحكاية كلها ..عشان تعرفوا اصحاب الدكاكين ديل بفكروا كيف؟. . سيد الدكان وقت يكون عنده (دقيق) عاوز يبيعو ..وقت تمشي تسألو من (الرغيف)..يقول ليك رغيف ما في. . عارفين ليه؟. . عشان تشتري (الدقيق). . سيد الدكان وقت يكون عنده (حطب) باير ..وتمشي تسألو من (الفحم) بقوم يقول ليك : فحم ما في. . عارفين ليه؟. . عشان تشيل الحطب. . صاحب الدكان من غير اسماء بكون عنده نوع من انواع البارد ما ماشي. . تسألو من نوع من انواع البارد ماشي صاح ..يقوم يقول ليك النوع دا ما في ..بس في النوع دا. . اها هسع سيد الدكان وقت يقول ليك ما في طحنية ..بكون عنده شعيرية صلاحيتها قربت تنتهي وهو عاوز يتخلص منها. . عرفتو (الفلسفة) وين في الحكاية دي. . والله اول مرة نكتشف انو (الطحنية) عندها فلسفة. . يا جماعة اي حاجة في الدنيا دي عندها (فلسفة). . ما في حاجة ساكت. . اي حاجة ...عندها فلسفة. . هسع ناس المريخ ديل عندهم (فلسفات) غريبة كدا. . اشرح ليكم فلسفاتهم دي – فلسفة – فلسفة. . جمال الوالي شغال في المريخ على طريقة سنة (ادارة) وستة شهور زعل في البيت. . يعني بعد كل موسم ..جمال الوالي بمشي يزعل ليه (6) شهور في البيت. . ال (6) شهور دي هي شهور (البور) في المريخ ..اي هي الشهور التى يظهر فيها عصام الحاج. . عصام الحاج دا مسك المريخ (جمعة) واحدة ، وطلع على كدا يهاجم ليك في جمال الوالي. . جمعة الزعل. . جمعة واحدة خلت ليك عصام الحاج يهاجم ليك جمال الوالي طيب الزول دا لو مسك المريخ (شهر) كان هاجم منو؟. . كان ودالياس ذاتو هاجمو. . ح تسألوني وح تقولوا لي طيب (الفلسفة) من كدا شنو؟. . اقول ليكم. . جمال الوالي في (زعلتو) دي بفضح ليك ناس عصام الحاج القاعدين يتفاصحوا في الفاضي ديل. . لكن الشيء الما عرفت ليها (فلسفة) ..هي حكاية التخلص من الكابتن الشغالة في المريخ الايامات دي. . الناس ديل ما خلوا ليهم (كابتن) حايم. . لموا ليك في الكباتن ديل من طرف. . الكشة بدأت من اكرم الهادي لي فيصل العجب كابتن المريخ السابق. . خلوا ليك المريخ قاعد في (الصقيعة) بدون اي كابتن. . ما فيه اي كابتن. . الجماعة ديل في العام الماضي تخلصوا ليك من (فيصل العجب). . قالوا لي فيصل العجب ما في احسن من (الاعتزال). . العجب اعتزل. . اتخلصوا من الرأس الكبيرة. . السنة دي بقت ليهم الحكاية ساهلة. . اول حاجة (اعاروا) ليك سعيد السعودي الي شندي. . قبل الموضوع ما يبرد شوية ..شطبوا ليك موسى الزومة. . امس اعاروا ليك اكرم الهادي سليم الي الاهلي الخرطوم. . يعني في هذه التسجيلات المريخ تخلص من (3) كباتن دفعة واحدة. . كابتن اعاروه الي الاهلي شندي وكابتن اعاروه الى الاهلي الخرطوم وكابتن شطبوه عديل كدا. . اقول ليكم حاجة فيها شوية (فلسفة). . الله يستر على بلة جابر من الاهلي عطبرة. . بعد (مجزرة) الكباتن دي ...المريخ ح يكون كابتنو منو في الدورة الثانية. . اكيد ح تقولوا الكابتن ح يكون علاءالدين يوسف. . الجماعة ديل نضفوا الطريق لي (فييرا). . اي واحد (طنطن) كدا وإلا كدا شطبوه. . القال كلمة ساي اعاروه. . موضوع (الكباتن) ديل عاوز ليه موضوع (مستقل) براهو كدا ما فيه اي (فلسفة). . عشان كدا بكرة ان شاءالله نكتب ليكم عن هذه المجزرة التى قصدوا بها كباتن المريخ. . كمان انتوا قايلين حاجة زي دي بتفوت علينا. . نحن ما عندنا حاجة بتفوت ساكت. . نحن اي حاجة عندنا بي نظام. . حتى (سنونك) المشتتة دي زي السراير المجدعة في الحوش نص النهار. . ملحوظة : اها يا جماعة بعد كدا قصرنا معاكم في حاجة. هوامش . الحاجة العاوز اعرفها من غير اي فلسفة ..ناس الهلال ديل عاوزين يسجلوا متين؟. . قاعدين كدا تقول ما بلعبوا في المجموعات. . تقول مشاركين ليهم في ندوة ما في بطولة. . انتوا الاصابات الدورت في الهلال الايامات دي شنو؟. . اصابة مساوي ..اصابة بشه ..اصابة بكري المدينة ..اصابة خليفة. . هذه الاصابات معها ايقافات ..ايقاف بويا ..ايقاف سيسه. . الحاصل شنو على الهلال؟. . مع الحاجات دي كلها ..(تسجيلات) ما في. . لجنة التسيير مشغولة في نفسها. . فريق كورة القدم ..ما في زول جايب خبرو. . فكوه ليك في القاهرة ..وما في زول اشتغل بيه. . الهلال في مباراة فيتا كلوب إلّا يلعب في الاطراف بي (الجمهور). . ما عندنا اي اطراف. . العوض على الجماهير. . الهلالاب عليهم ان يطلعوا من احباط مباراة الزمالك. . فكروا في مباراة فيتا كلوب. . ناس المريخ صعدوا في دورة حوض النيل من مرحلة المجموعات. . شفتوا (مجموعات) المريخ ظريفة كيف؟. . مجموعاتكم زي (الرحلة) الترفيهية. . حاجة بتضحك. . مجموعات شنو؟..عليكم الله ما تشوهوا لينا سمعة المجموعات. . لو استمريتوا على الحالة دي ممكن نفتح فيك بلاغ اشانة سمعة للمجموعات. . هسع مجموعاتكم دي مجموعات. . لو شيلتوا ليكم (كراسي) وقعدتوا بيها برة البيت احسن ليكم. . عملتوا لينا زحمة ساكت. . الزول البدخل مباريات المريخ الايامات دي خلوه يشيل معاه علبة بندول. . معقولة المريخ كلو بقى (اوليفيات). . يشطبوا في ولاد المريخ وكباتنه ويسجلوا في الاجانب. . (10) اجانب كما جاء في موقع سودانا فوق يشاركون مع المريخ في سيكافا. . انتوا يا جماعة عندكم مهرجان سياحي. . انا عرفت ليه جابوا قوات الدعم السريع للخرطوم. . المريخ كلو بقى (اجانب). . بتمنى المريخ يسجل الاجانب ديل كلهم. . ناس اكرم وموسى وسعيد ..يتغربوا في البلد دي ..والاجانب يتحكروا في المريخ. . انتوا ما تجيبوا ليكم (كابتن) من برة. . شوفوا ليكم (كابتن) من توغو. . توغو دي فيها (كباتن) حاجة ما تخلص. . ........ . عاجل : بلة جابر قالوا ليك الايامات دي لو الباب ضرب يقول دا (شطب)..لو مسكلو ليه ساكت في التلفون يقول دي (اعارة). وإن طال السفر - محمد عبد الماجد صحيفة قوون
