المريخ جاب لاعب من كينيا ولاعب من يوغندا ..(انتوا عاوزين تنظموا سيكافا في تشكيلتكم) """"""""""""""""""""""" المريخ طار من البطولة الافريقية من تمهيدي (كتابي الاول) """"""""""""""""""""""""""""" الطيران الحصل في استاد المريخ اكتر من الطيران البحصل في مطار الخرطوم الدولي """""""""""""""""""""""""" طيرانكم يا ناس المريخ (حديّة) ما طارتو """"""""""""""""""""""""""""""" . في المناسبات العامة – في ناس بحبوا يحرجوا الناس ، تخصص في الاحراج والرباط الصليبي. . هسع (الرباط الصليبي) الدخلو هنا شنو؟. . الزول وقت يكون عاوز ليه سبب ما بعدم الحيلة. . هسع بعد (الرباط الصليبي) تقول لينا (فيصل سيحة). . عاوز ليك سبب بس. . بتفتش ليك عن مدخل. . اتذكر اول مرة جابوا لينا (مهاجم) عشان يعلب معانا في الفريق كان محترف (اجنبي). . عيونو مركبة بالجنبات – كلا العينين (لفت). . ما فيهم يمين. . الاتنين ناصية شمال. . والاجنبية وقتها كانت تعني ان يكون الشخص من مدينة اخرى غير المدينة التى يمثلها الفريق. . يعني نحن في (شندي) كانوا لمن يجيبوا لينا لاعب من (عطبرة) كنا بنعتبر ذلك اللاعب (اجنبي). . الوقت داك ما كان في (اجنبية) اكتر من كدا. . ولا بنعرفها. . فهمنا وقتها كان كدا. . فهم في حدود تمشي الدكان تجيب ليك زيت وبصل ودقيق ..وتتحرفن في النهاية وتقول لبتاع الدكان عليك الله الباقي اديني بيه (طحنية). . ثم تضيف بعد ان ترفع رجلك وتعقلها وتضع قدمك على (بنك) الدكان : (صلحها عليك الله). . الله يقطع سنين (الطحنية)...وابو الطحنية والخلفوا الطحنية. . شبكتنا طحنية – طحنية وخليت (الروس) مفكوكين فينا متل صحان الفول في مطعم شعبي. . تلقاها منتشرة حول الكشك. . تنتظر (الصحن) لمن تشبع. . والزول ذاتو وقت يشوفك منتظر (صحنو) بقعد يأكل على راحتو ويلحس في اصابعينو. . اتذكر جابوا لينا مهاجم (اجنبي) من كسلا – كنا بنعاين ليه (شذرا)..قارشين ملحتو. . واقف لينا في الزور. . المهاجم الاجنبي دا اتذكر في تاني تمرين ليه مع الفريق ..طلع من اول (5) دقائق بعد التسخينة بسبب اصابة تعرض لها مع مدافع الفريق (الغتيت). . عندنا مدافع (الغتة) ظاهرة في ضلو. . غتة زي دي اصلو ما لاقتني. . الجهاز الفني ومجلس الادارة (اتجرسوا) جنس جرسة في (اصابة) الزول دا. . ما فاضل ليهم إلّا يقفلوا ابواب النادي تلاتة يوم. . نحن نتفرم وتتهرد (ركبنا) ...ما في زول بهببنا...نتشلهت في الدنيا دي جنس (شلهتة). . اشمعنا المحترف الاجنبي دا اتجرسوا ليه كدا ..(ركبتو) فيها مفاصل انجليزية. . ليه نحن ما بشتغلوا بينا؟. . المهم بعد (4) يوم قام مجلس الادارة بلغنا ان المحترف الجايبنو من كسلا الفحوصات الطبية اكدت عنده (رباط صليبي). . الله. . الرباط الصليبي وقتها كان جديد ...نحن الزمن داك كنا بنسمع بيه سمع في اصابات الملاعب الاوروبية. . الوقت داك كنا فاكرين (الرباط الصليبي) اصابة بتحصل في (النخرة) ما كنا فاكرنها بتحصل في (الركبة). . ثقافتنا كانت محدودة الوقت داك – اعلى حاجة بنحضرها في الرياضة (عالم الرياضة). . عالم الرياضة يوم يفوتنا بحصل لينا ضمور في ثقافتنا الرياضية. . نبقى قاعدين في (الصقيعة). . عالم الرياضة بتاعة الاذاعة ما حقت ناس (رضا وسيحة)..قاعدين لي ميرغني المامون واحمد حسن جمعة. . في حقيقة الامر وقتها لمن قالوا لينا المهاجم المحترف دا عندو (رباط صليبي) كبر في نظرنا واقتنعنا بيه ...وعرفنا في قرارة انفسنا ان الزول دا محترف كبير. . عشان (الرباط الصليبي) دا ما بجي لزول ساكت ...الرباط الصليبي دا اصابة محترفين. . نحن قدر ما (عكينا) في الكورة دا ما حصل واحد فينا قالوا عندو (رباط صليبي). . الدم بصل للركب ...مع ذلك ما في حاجة اسمها (الرباط صليبي). . رباط صليبي يجي لمنو؟. . هسع حصل في يوم سمعتوا ب (بلة جابر) عندو (رباط صليبي). . الرباط الصليبي دا ما بجي لي زول اروش. . الرباط الصليبي بيجي للكشافات ما بجي لناس بلة جابر. . قصر الكلام – في ناس بحبوا يحرجوا الناس ..وينكدوا عليهم في المناسبات العامة. . يعني مرات وقت يجي زول شايل ليه صينية شاي في مناسبة ..بقوم واحد من الناس (الحرّاجين) ديك يقول للزول دا : مالك (بتتلكع) كدا؟. . بتتلكع دي في اللغة حقتنا دي ما عندها معنى. . لكن نحن عشان (شفوت)..وبنقيف في خشم الباب رجعنا لقواميس اللغة الروسية ..لقينا ليك بتتلكع دي يعني الحاجة الما بتسوى شيء تقوم تعمل منها موضوع. . عند الروس كدا. . اي حاجة تعمل ليك فيها (موضوع). . في ناس يعملوا ليهم موضوع من مافي ..ووقت الموضوع يبقى موضوع عنده رأس وقعر ..يقوموا يخلوه ويشوفوا ليهم موضوع (ميت) منو ما عندو قيمة. . ووقت الموضوع الميت دا يبقى موضوع يقوموا تاني يخلوه ...ويشوفوا ليهم موضوع تاني. . اليوم كلو يروح في عدم المواضيع دي. . الناس الما عندهم موضوع ديل ممكن تقول عنهم (بتلكعوا). . اها جماعتنا ناس المريخ ديل اول حاجة طاروا من بطولة الاندية الافريقية للابطال. . طاروا ليك مع النباهات. . طاروا من (التمهيدي) تقول لاحقين ليهم فرن. . انتوا لاحقين ليكم (قطر). . في زول عاقل وواعي كدا بطلع من دور ال (64). . انتوا جنيتو. . انتوا ما واعين. . البطيركم من (التمهيدي) شنو؟. . لاحقين شنو؟. . العجلة في شنو؟. . نحن بينا وبين نفسنا قلنا البطولة دي اصلها بطولة كبيرة وناس المريخ ديل ما بقدروا عليها. . عذرناهم. . قلنا البطولة كبيرة عليهم. . تتخيلوا ناس المريخ رجعوا عملوها تاني. . عملوا شنو؟. . عملوها تاني وطاروا من سيكافا. . نحن سيكافا دي ذاتها ما كنا فاكرين فيها (طيران). . كنا قايلنها (سليقة) ساكت. . تتخيلوا طلع فيها (طيران). . وفيها (زعل). . واستقالات – وقعاد في البيت. . قول سامحناكم في (الطيران) من البطولة الكبري. . البخليكم تطيروا من (سيكافا) شنو؟. . البيطركم شنو؟. . سيكافا دي تعملوها براكم. . تخترعوها. . تنظموها. . تختاروا فرقها. . تجيبوا حكامها. . وتلعبوا في استادكم. . وتجي تطيروا منها. . انتوا استادكم دا استاد وإلّا مطار. . الطيران الحصل في استادكم دا اكتر من الطيران البحصل في مطار الخرطوم الدولي. . استاد المريخ تاني ح نسميه (مطار المريخ). . طيران شديد. . بعدين حكايتكم دي ذاتها ما صحيحة. . لا تجوز (رسميا). . في زول في موسم واحد بطير ليه من بطولتين. . انتوا عارفين لو وديّنا قضيتكم دي للفيفا ح يقفلوا ليكم النادي. . ح يقولوا ليكم كدا ما صاح. . كدا غلط. . طيرانكم دا يا ناس المريخ (حديّة) ما طارتو. . يدعموا فيكم بالنفط ..والجنسيات ..ما خلوا ليكم شيء ..وانتوا تشيلوا وتطيروا من البطولات. . الغريبة بعد الطيران دا كلو بابكر سلك قال إلا نمشي الدهب بعد كدا. . انت يا سلك قايل لو مشيتو (الدهب) ما بتطيروا. . يمين تطيروا من اول (جرام) دهب. . انتوا قايلين يا سلك ح تمشوا لي قدام في الدهب. . ح تطيروا من (تمهيدي) الدهب. . طيران التمهيدي في الدهب ح يكون على مشارف (قبقبة). . يعني قبل ما تنزلوا اجهزة الاستكشاف يا سلك. . من بدري. . هسع عليكم بطولة الاندية الافريقية عرفتوا ليها شنو؟..طرتوا منها من كتابي الاول. . الناس يا دوب في أ – اسد و نا – نمر و تا – تمر...جماعتكم طاروا. . ملحوظة : طيرانكم بقى اكتر من العدس...(اول العدس بيطير). هوامش . ناس المريخ بقوا شغالين بالنص. . يعني شنو؟. . يعني اللاعب يجددوا معاه ويعيروه. . جددوا مع اكرم الهادي سليم واعاروه للاهلي الخرطوم. . جددوا مع الطاهر سادومبا واعاروه للرابطة كوستي. . طيب رأيكم شنو؟. . تجددوا لي جمال الوالي وتعيروه لفداسي. . عاوزين نجيب (فداسي) للممتاز. . لجنة تسيير الهلال الظاهر عليهم ما قاعدين يتلاقوا. . والظاهر عليهم كمان مع عندهم تلفونات بعض. . عشان كدا اي واحد فيهم يصرح بي اتجاه. . يا جماعةا اتلموا ..وقولوا ليكم حاجة فيها فايدة. . نحن ما بنلوم كامبوس يفاوض في الاهلي المصري او الزمالك. . كامبوس عقدو مع الهلال (6) شهور ..البخليه ما يفاوض شنو؟. . اذا كان رئيس نادي الهلال ذاتو قاعد يقول انا تاني ما بقعد بعد انتهاء الفترة الحالية من التكاليف. . يعني رئيسكم يا ناس الهلال بتفش ليه عن مخرج. . البجبر كامبوس على القاعد شنو؟. . المريخ في الموسم القادم ما ح يكون فيه سوداني واحد. . اكرم السوداني مشى جاء بدلا عنه جمال سالم اليوغندي. . الطاهر سادومبا فات. . موسى الزومة فات. . سعيد السعودي فات. . وعنكبة فايت. . جابوا ليكم (قطر) اجانب. . واحد من كينيا وواحد من يوغندا ..(انتوا عاوزين تنظموا سيكافا في تشكيلتكم). . المريخ في الدورة التانية ما في زول بعرفو. . مجلس ادارة المريخ قال لاتوفيستر امشي حلل مباريات كاس العالم ..واتفاوضوا مع برهان تية ومحسن سيد. . اخلاق ما في يا جماعة. . كدا ما صاح منكم. . بعدين اتوفيستر دا ذاتو البخليه يمشي يحلل مباريات كاس العالم شنو وهو (سيكافا) بطير منها. . زولكم دا لو مشى يحلل في التلفزيون الالماني ح يعملها ليهم كلها شيل يا بلة واطلع يا موسى. . خربتو ليه رأسو. . ما اظن عندو رأس تحليل. . يحلل شنو؟. . إلّا يحلل ليهم (الكشافات). . بعدين اتوفيستر دا عادي جدا ينوم في الاستديو. . الزول دا بين الشوطين كان بنوم. . ما ينوم في الاستديو. . مجلس المريخ مع طيرانه من البطولة الافريقية وطيرانه من سيكافا إلا انه مجتهد شديد في التسجيلات. . المهاجم الغاني اكرا قالوا ما فيه كلام وهو قد كلف المريخ (400) الف دولار. . اقصد كلف الدولة (400) الف دولار. . الهلال الذي يشارك في مرحلة المجموعات ما سجل. . ولا شغالين بالتسجيلات. . ولا عليهم. . الناس البطيروا بسجلوا لاعب ب (400) الف دولار. . دا عاوزين تطيروا بيه من وين كمان؟. . والله خسارة (طيران) ساكت. . بالمناسبة الطيران الكتير بيعمل انتفاخ في القاولون. . وانتوا يا ناس المريخ (قلاوينكم) اتهردت هرد من الطيران. . انتوا يا الهلالاب بتتكلموا ساكت. . عندكم مباراة يوم الجمعة اثبتوا فيها – خلوا الكلام الكتير. . كمان نحن قاعدين نتلوم لينا في زول. . ولا بنكضب. . ولا بنجامل في الحاجات دي. . عاملين لي كدا زي يوم السبت العصر. . يوم السبت العصر كيف؟. . يوم السبت العصر الناس كلها بتلقاها مادة بوزها. . في شنو يا جماعة. . ما عارف ليه الناس يوم السبت بتكون زعلانة وقافلة معاها كمان. . اوعك تهبش ليك زول يوم السبت العصر ..بقوم ينفجر فيك. . الناس ضايقة وممكونة ..وصابرة. . اصبروا قربت. . شنو القربت؟. . الماهية؟. . انتوا تفكيركم مشي لي وين؟. . ..... . عاجل : بلة جابر شغل المكيّف والمروحة وقعد منتظر (الاعارة). وإن طال السفر - محمد عبد الماجد صحيفة قوون
