شفتوا الزول من يقعد يبلع في ريقو – اعرفوه طوالي ما عندو موضوع """"""""""""" الخواجات صعبين في الحاجات دي – ما بتفاهموا تلقوا البطل يكفت ليك الخاين مع عبارة (فلتذهب الى الجحيم) لمن نحن (نتكرفس) من الفرحة في الكراسي """"""""""""""""""""""""""""" (الفرس) الجحيم عندهم هي (جهنم)..وعبارة (اذهب الى الجحيم) عندهم (برو به جهنم) """""""""""""""""""""""""" في الافلام الاجنبية عندما يقوم (البطل) بقتل احد الخونة في الفيلم يقول له وهو يوجه له اللكمة الاخيرة (اذهب الى الجحيم) ، او حسب الانجليزية (go to hell). الخونة في الافلام الاجنبية بكونوا لابسين ليه (تي شيرتات) مشخطة كدا. ونضارات سوداء. ما عارف العلاقة بين الخيانة والنضارة السوداء شنو؟. اهم حاجة في خونة الافلام الاجنبية النضارات السوداء. مرات الواحد عشان يتم ليكم العمود – يقوم يقطع ليكم من رأسو – وانتو تشيلوا وتصدقوا. اصلو الواحد ما يقول ليكم حاجة. البطل يقول للخاين (go to hell) ثم يرسله الى العالم الاخر. ونحن نشيل ونتفرج. كثير من المشاهد تلخص في هذه الجملة (go to hell) ونحن كجمهور بنقعد ننطط في عيونا. ونبلع في ريقنا. شفتوا الزول من يقعد يبلع في ريقو – اعرفوه طوالي ما عندو موضوع. بلع (الريق) في شندي (عيب). عارفين انتوا السيول دي لو هدمت وكسرت وغرقت الناس – ما مسموح لي اي واحد يبلع ريقو. عاوزين تبلعوا – ابلعوا ليكم حاجة تانية – لكن (ريق) لا. نحن شفوت. نحن صعبين. نحن ما عندنا زول بيبلع ريقو. يقطعو رقبتك ما تبلع ريقك. عاوز تبلع (ريقك) تشوف ليك غرفة مضلمة تدخل تبلع فيها (ريقك) وتطلع (لا من شاف ولا من درا). لكن هسع موضوع (الريق) دا ما تعملوا لينا موضوع – البلد غرقانة – البلد كلها موية وانت عاوز تتكلم لينا عن (الريق). مالك انت؟. في شنو؟. خلاص نرجع ليكم للموضوع (ما بنختلف). ما في مشكلة. بمناسبة الكلام دا – قالوا ليك فنان (جديد) طلع ليك في المسرح في حفلة عرس قام غني اغنية الراحل خوجلي عثمان التى كتبها الشاعر الراحل حسن الزبير (ما بنختلف). الناس كلهم اتكيفوا ليك من الاغنية دي – انبسطوا ليك جنس انبساطة – وقالوا ليك الله لا جاب الاختلاف. الفنان نزل من المسرح وطلع تاني وغني ليك اغنية جمال فرفور التى كتبها اسحق الحلنقي (المشكلة). الجماعة في الحفلة زعلوا ليك. قالوا للفنان انت هسع دي ما قلت (ما بنختلف) – (المشكلة) الجابها تاني شنو؟. دا كلام ساكت برة العمود. ما تعتبروه لي كلام. نرجع نواصل في الموضوع الرئيسي. اصلو وقت تكون في (مطرة) الزول بقوم يتلخبط كدا. بتحصل لخبطة غير ارادية. زمان ايام السينما ووقت الناس بمشوا يدخلوا سينمات كانت هذه العبارة عندما تقال في الفيلم (go to hell) الجمهور الذي يشاهد في الفليم كلو بقعد يصفق. ينبسطوا ليك على الاخر. الجمهور كان عنيف بحب مثل هذه العبارات. وبطل الفيلم ذاتو كان بقول العبارة بصورة (مستفزة) يطيّر ليك في عيونو الخضر زي ملاح الخضرة البكون ما اتفرك كويس – كل (خضارررية) طايرة ليها في حتة. الخواجات صعبين في الحاجات دي – ما بتفاهموا تلقوا البطل يكفت ليك الخاين مع عبارة (فلتذهب الى الجحيم) لمن نحن (نتكرفس) من الفرحة في الكراسي. الكرفسة في البرد حاجة ما تخلص. ونبقى متخارجين. عادة هذه العبارة تقال والبطل بيرمي بالخاين من شباك طيارة او من سطوح قطر او سفينة او من الطابق (21). الخواجات ديل يقعوا ليك من الطابق (21) يتفشقوا ليك في الواطة زي (الكاتشب). الغريب والمدهش ان (الفرس) الجحيم عندهم هي (جهنم)..وعبارة (اذهب الى الجحيم) عندهم (برو به جهنم). شفتوا الكلام دا كيف؟. عشان ما تقولوا نحن بنتكلم ليكم ساكت. باقى نحن اي حاجة عندنا بي نظام. اصلو نحن ما عندنا حاجة ساكت. ولا بنجامل في الحاجات دي – خاصة في موضوع (الجحيم) دا. اذهب الى الجحيم بالاسبانية (ir al infierno). اما الهنود فعندهم الجحيم على ذلك النحو (भाड़ में जाओ)...ما عارف ح تكتب ليكم صاح بعيدين في العمود ام تطلع ليكم (فاضية) مع الطباعة. نحن الجحيم عندنا هنا بنفسرو حسب الموقف. الناس بقولوا الانسان ابن (بيئته) – وانا بفتكر ان الانسان ابن (فكرته) – ما تقولوا لي وانت منو عشان تقعد تتفكر لينا كدا؟. كمان عاوزين تحرمونا من (التفكير). اي زول بنظر الى (الجحيم) من وجهة نظرو. يعني تفسير (الجحيم) بختلف من زول لي زول – اي شخص بكون شايل اعتقاد معين عن الجحيم. طلاب المدارس خاصة الطلاب الما بقرأوا منهم وما بذاكروا بعتبروا ان (الامتحانات) هي الجحيم. وان الدنيا دي ما فيها جحيم اكتر من ان الزول يمتحنوه. ديل عاوزين مدارس بدون امتحانات. الموظف الكحيان وتعبان ...الجحيم عندو بيبدأ من يوم عشرين – من يبدأوا يقولوا ليه جيب – وجيب – وجيب وهو يكون ما عندو قروش. واحد زوجتو مكراهو بالعدس – كل يوم تعمل ليه (عدس). عدس الفطور بقسموا منو للغداء. وعدس الغداء بخلوه للعشاء. عدس اليوم كلو. تفتح التلاجة تلقاها كلها (عدس) تقول (داخلية). عدس – عدس – عدس. الزوج دا سألوه قالوا ليه (الجحيم) عندك شنو؟. قال ليهم الجحيم عندي (العدس) دا. وقتها (العدس) كان قدامو. موش مرات في زول بقولوا ليك عيونه (عسلية). اها الزول دا عيونو كانت (عدسية). لو جبت ليك (رغيفة) تأكل منها. عدس مبالغ فيه. واحد تاني سألوه قالوا ليه (الجحيم) شنو؟. قال ليهم والله ما في (جحيم) غير نشرة تسعة البجيبوها لينا عشرة. ديل بكضبوا في (النشرة). شفتوا ليكم ناس بكضبوا في النشرة. وفي التلفزيون القومي كمان. ناس برة – العالم الاول – العالم المتطور (الكضب) في (الحدايق) خلوه. وديل بكضبوا لينا في النشرة. طبعا الحدايق اكتر حتة الواحد ممكن (يكضب) فيها. اي واحد تلقاه قاعد ليه مع (بنت) قاعد يكضب ليها. انا شغال في بنك. وانا شايل الشغل كلو في رأسي. وانا مسافر تركيا. والبنت بتصدق. عارفين البنت بتصدق ليه؟. عشان (البنت) ذاتها قاعدة تكضب. انا عندي قطعة ارض. وانا ما بخش واتس آب. يبقى كضب في كضب (ما فارقة معاهم). شفتوا النظام دا كيف؟. وقت اقول ليكم نحن اي حاجة عندنا بي نظام بتقعدوا تغالطوا. جنكم غلاط. يتغالطوا ويشربوا في الشاي. لكن انت ما قلت لينا. ما شرحت لينا الموضوع. الجحيم دا الليلة قصتو شنو؟. اقول ليكم. نحن الهلالاب (الشفوت) بنعتبر سيكافا دي (جحيم). جحيم ما فيها اي طعم. وانا حالف يمين – ما افوّت على المريخاب موضوع (سيكافا) دا. ح اقعد احرسهم كدا. عاوز اشوف (سيكافا) دي حدها وين؟. انا كنت ما عاوز اكتب. ما كنت عاوز اقول حاجة. لكن المريخاب براهم بفتحوا السيرة. كلمة (الخور) كلمة ما لذيذة وبنترفع عن ذكرها ..وما كان لنا ان نوصف المريخ بي انو ح يمشي (الخور). لكن جمال الوالي براهو قال ليهم كدا. الكلام دا ما مني. الكلام دا من جمال الوالي شخصيا. تعالوا شوفوا الحاصل (قبل ما تقعدوا تنططوا لي عيونكم كدا). عيونكم دي زي الدكاكين الفاتحة ناصية – كل عين مشاترة في حتة. الزميل احمد الحاج قدم تقرير رائع عن اجتماع المريخ بخصوص المشاركة في سيكافا. احمد الحاج تحدث في تقريره الذي نشر يوم الخميس الماضي في قوون قائلا : (سبق ان انفردت قوون بنشر خبر الاجتماع الذي عقده مجلس المريخ يوم السبت 28 رمضان الماضي الموافق 26 / 7 / 2014م حيث نشر خبر ما دار في الاجتماع في عدد قوون الصادر يوم الاحد 29 رمضان الموافق 27 / 7 حيث أكد الخبر ان مجلس المريخ قد عقد اجتماعا ضم رئيس النادي جمال الوالي واعضاء المجلس بالاضافة للكابتن برهان تيه المدير الفني للفريق ومحسن سيد المدرب العام وحاتم محمد أحمد عضو المجلس واحمد الباشا كابتن الفريق وقرر المجلس في هذا الاجتماع منع الجهاز الفني من الاتصال بالاتحاد العام في أية قضية ادارية تخص المريخ لأن المجلس هو المسئول عن اية قضايا ادارية وتم تسليم محسن خطابا بهذا المعنى وناقش الاجتماع امكانية مشاركة فريق الكرة في بطولة سيكافا وطرح رئيس النادي جمال الوالي وسأل الجهاز الفني سؤالا مباشرا (هل ح تجيبوا لينا بطولة ولا تودونا الخور). دا كلام شنو؟. جمال الوالي دا مالو بقت لغتوا كدا – (خور) شنو يا زول؟. لاحظوا ان الاجتماع دا كان في رمضان. جمال عاوز يمشي (الكاف) والمريخ يمشي (الخور). براهم قالوا ح نمشي الخور. يعني نحن ما جبنا حاجة من رأسنا. ساعة ونص بتكلم ليكم عن الذهاب الى الجحيم وعاملين لي فيها ما فاهمين. انتوا إلّا يختوها ليكم واضحة كدا. الزميل حسن فاروق كان قد كتب امس عن موضوع (الخور) هذا وهو قد فتح لنا (كوة) ضوء للحديث عن هذا الموضوع. اها عشان تفهموا حاجة. موضوع (الخور) دا انا ح اتابعوا ليكم خطوة – خطوة. لمن نوصلكم اخرتها. خلوا لينا بالكم طويل – المريخ مشارك في سيكافا. ونحن ما بنفوت ليكم (كورنر). انتظرونا بي (نضارات سوداء). .... ملحوظة : (go to hell). هوامش الليلة المريخ لاعب مع البوليس. اها المباراة دي منقولة وين؟. دي مباراة (منقلة) ما تنقلها ليكم. نحن نلعب مع مازمبي – وهم مع البوليس. نحن مباراتنا (مشفرة). وانتوا مباراتكم إلا في (sms). مباراة شنو كمان؟. مفروض تدسوها. مفروض تخجلوا منها. مفروض تشوفوا ليكم بلد. نحن موضوع (الخور) دي لي معلوميتكم ما بنخليه يروح ساكت. امانة ما تعبتوا معانا. خليكم جاهزين لينا. خور - وكمان في السيول دي. ..... عاجل : هي البلد ناقصة (خيران) عشان تمشوا ليكم لي (خور) برة البلد. وإن طال السفر - محمد عبد الماجد صحيفة قوون
