هجا شعراء سودانيين مغتربين الإعلامي " حسين خوجلي " بعد ذمِه الإغتراب والهجرة لخارج السودان قائلاً : ( انا لو قعدتا شحاد في السودان ده ما بسافر بره) !! جاء ذلك خلال برنامجه التوك شو بفضائية " أمدرمان " الأكثر مشاهدة ومتابعة من قبل السودانيين خاصة من هم بالخارج ، فنظم الدكتور مأمون عبدالحليم مغترب بالمملكة العربية السعودية قصيدة حلمنتيشية بعنوان " السودان بيسمن لو حسين خوجلي خسه " قال فيها : بيسمن السودان يا حسين لو انت خسيت جسمك نزل ويفرح الغبش المتعبين ويبقا رايق حالا انعدل تضرب الشية مع الكباب وتامر الناس تاكل البصل ... وحتي بصل الشوم والرماد زرعو خايس ضربو المحل تلدغ المغترب الهمام ياخي روق امشي علي مهل ديلا شالو الوطن الكسيح في العيون لا ضنا لا ملل كيف يكونو في اخر الصفوف وفي المحافل فوق للملل شوفو كيف الطيب الزين خله بلدو تكون فوق زحل وغيرو كم مهرة وخييرين في العوالم مضرب مثل اعتذر بيجيكا الكلام كان عسل او كان محنضل وأضاف الشاعر " أبوبكر محمد خير " مغترب بالمملكة السعودية قائلاً : قولو قولو تراك يالمتين يالفطورك عجلى وحمل لاتبعلتا درر الكلام ولاتخلط السم بالعسل ياخى رورق اول انت روق النشوف لو جضمك نزل النشوفك زى الخلوق النشوفك لو نص جمل وكان الاستاذ حسين خوجلي قد تحدث خلال برنامجه (مع حسين خوجلي) والذي يعرض علي شاشة قناة امدرمان عن الهجرة وجوانبها السلبية ، قائلا لماذا يهاجر الناس عن السودان وتساءل السودان عاوزين تخلوا لي منو ؟ كما تحدث عن معاناة المغترب السوداني وعن عزة النفس التي يجدها في السودان ولا يجدها في دول المهجر ، وذكر الإعلامي " خوجلي " انه لن يترك السودان من اجل الاغتراب واضاف : (انا لو قعدتا شحاد في السودان ده ما بسافر بره) واردف قائلاً ان تظل مواطن درجة عاشرة في السودان خير لك من ان تهجر وطنك بغرض تحسين الوضع المعيشي...وواصل حسين خوجلي تفجير المفاجأت وقال:احسن حاجة في السودان ده تلقي العامل (يقل ادبو) علي صاحب العمل وعلي الدكتور...(وقلة الادب) في بلدك تعد جزء من الكرامة...وتابع حديثه قائلاً: اي زول في دول المهجر مؤدب رغم انفه ويحاول ان يثبت لأصحاب العمل انه مسكين ومؤدب..واختتم حديثه قائلاً الزول لو قعد في البلد دي وزرع طماطم وسعي لتربية بعض الاغنام خير له من الإغتراب..وقال لو كل الأسر في السودان جلسوا مع اولادهم ووضعوا مشروع سيجنوا ثمار هذا المشروع وسيصدروا منه لدول الخارج ايضاً .