في اللخبار من الولاياتالمتحدةالأمريكية الخبر التالي: (سان فرانسيسكو – حصلت كلبة من فصيلة (شيواوا) على منصب عمدة مدينة سان فرانسيسكو بولاية كاليفورنيا الأميركية، وذلك ليوم واحد، كجزء من حملة لتأمين مأوى للحيوانات في المدينة. وقال متحدث باسم دائرة رعاية الحيوان في المدينة، إن أنثى الكلب، "فريدا"، والتي دفع صاحبها 5 آلاف دولار مقابل هذا الامتياز، سوف تمضي "يوما خاصا" لها بجولة في معالم منطقة خليج سان فرانسيسكو. وقالت ميريام سايز، القائم بأعمال مدير دائرة رعاية الحيوان، إنه بعد هذه الجولة، سيقام احتفال خاص في قاعة المدينة (على شرف فريدا)، وسوف يتم تقديم الهدايا لها، والتي تشمل سريرا، وسلة من الألعاب والمنتجات الأخرى).. . يوم واحد بس؟.. يوم واحد داير يسوي شنو؟.. "فريدا" كدي زحي جاي واديني اضانك ما يسمعونا الجماجرة وينقلوا النضم: "علي بجملة الليمان وما طالباني حليفة.. أنا كان بكانك أكنكش في كرسي العمودية دا وما أفكو لي جنا الجنا.. يا زولة انتي من صُحِك؟!!!! وبعدين تعالي هنا، يوم واحد داير يسوي لك شنو؟ يوم واحد دا، خلعة ساكت من المنصب الجاكي دا، لا تحري لا تدري ما يقضيكي، خلعة بس ما يكفيكي.. عايني جاي.. نحن هنا العمودية دي قاعدين يتكاتلو فيها يتضابحوا عديل.. إنتي جاتك في صمة خشمك.. أووووعك تفكيها.. بعدين مش هم براااااهم سووكي عمدة؟. خلاص!!!.. أي زول ينضم معاكي القميهو حجر وكضميهو وقولي ليهو أنا جايبني الشعب!!!.. العمودية دي شفتيها عندنا هنا.. رجال يسدوها ويقدوها جارين وراها.. ويمسّكوا في بعض مواسير ويتخابثوا علي بعض.. وما يغشوكي يقولوا ليكي بنديك سرير وسلة من الألعاب وما بعرف شنو. قولي ليهم سرايركم طايرات عليكم وانا زااااتي زولة رقاد واطة سااااااااكت.. بعدين شفتي تتقدمي شوية في العمودية دي، إنتي تقعدي توزعي في السراير وفي الألعاب وفي الواطة كمان..!!!!!.. وبعدين يا فريدا الأناتي عندنا هنا ما لاقيات التكتح.. قلااااااال البيمشن لي قدام.. تعرفي الواحدة إن خلاااااااص ريسوها، يمسكوها قروش الختة.. كل أسبوع تلملم القريشات وتديهن المرا العليها الدور وتديّن منها نصهن!!!.. أسمعي نضمي.. أمسكي قوي.. يا زولة إنتي طاقة ليلة القدر واتفتحت لك.. وبعدين عايني جاي بعد تتوهطي في العمودية، عليكي الله رسلي لي فيزة زيارة.. وما بكضب عليكي اصلي بزوغ، علا وحااااات الله أعاهدك إن قبضوني، طاري اسمك دا، فوق خشمي ما بجيبو.. أفو"!!!!!! *الشيواوا: فصيلة كلاب صغيرة الحجم تعتبر من كلاب الزينة في حجم الكديسة.. حنكوشة ما بتقدر تهوهو.. ولو هوهوت وكتر عليها في النهاية تهوهو هزاز!!!!.. لو لقيتها واقفة وتتراجف أعرف انها قاعدة تهوهو.. وهرّاشة بعدين تعاين ليك وتقرب تقول ليك: "أمشي كدا.. والله حسي أعضيك" بس!! هي لا بتعضيك ولا شي..!!!!.. لا يوجد منها نوع في السودان إلا ما ندر.. بعدين نحن هنا الكلاب البيقدنها ويسدّنها معايشن في تعب وملاواة.. لمن تجينا الكليبات المخلقنة دي؟. د. عادل الصادق مكي الباب البجيب الريح- صحيفة اليوم التالي