وقت ما يلقوا ليهم شيء يعلقوا عليه بيقعدوا يعلقوا ليك على الجرايد – يقولوا ليك الجرايد الايامات دي ما فيها اي حاجة “”””””””””””””””””””””””””””””””” قالوا ليك (ضفر) اشترى ليه جلابية جديدة للمجموعات…وبكري المدينة غيرّ تلفونو “””””””””””””””””””””””””””””””””””””” • قالوا ليك في واحد ما عندو اي موضوع. • او عندو انا ما عارف. • في تداخل في هذا الموضوع – ما في تصور نهائي. • الزول دا جابوا ليه (ولد) في ظروف صعبة. • حالتو كانت صعبة شديد – (قرش ما عندو). • في (فلسة) كدا بتظهر في (الجبهة). • عيونك الاتنين يشرقن. • الزول البتلقى بيجري على التلفون وقت يضرب – اعرفو (مفلس). • او تلقاه بدون مناسبة كدا بدخل ايدو في جيبو. • ويطلعها (خاوية). • او بقعد يتكلم ليك عن انبثاق الروح في التزلق الوجداني (كلام كدا يقطعو ليك من رأسو). • انت وقت عندك كلام قدر دا ما تبقى (شاعر) وتريحنا في عمرنا دا. • بدل ما تقعد تنظر لينا في الفاضي كدا. • المهم زولكم جابوا ليه (ولد) في ظروف صعبة. • ما عندو اي شيء. • زولكم ما لقى قدامو غير (سيد الدكان). • سيد الدكان اسمو (ود الفرملو). • اسمو كدا (ود الفرملو). • جابوا ليه (ولد)…وجرى ليك على (ود الفرملو) – اول حاجة شال ليك منو (14) كيس حلاوة وربع بلح. • ورصيد ب (10). • وقعد يوزع في الحلاوة والبلح ويضرب للناس. • الما بضرب ليه عديل – بمسكل ليه. • وشال ليك منو حق الولادة ..قروش كاش – (قال ليه لمن اصرف برجعها ليك). • صرف شديد. • والنسوان يعجبنك. • كل مرة تطلع ليه واحدة …عاوزين (صلصلة). • يمشي لي (ود الفرملو) يجيب (الصلصة). • عاوزين (سكر). • يمشي لي (ود الفرملو) يجيب (السكر). • عاوزين (بصل). • يجري لي (ود الفرملو) يجيب (البصل). • عاوزين (دقيق). • يجري لي (ود الفرملو) يجيب (الدقيق). • يرتاح شوية كدا. • يجيّه (شافع) جاري ..يقول ليه قالوا ليك عاوزين (تلج). • يمشي لي (ود الفرملو) يشيل ليه قروش ويمشي يجيب (التلج). • الحلة كلها مكسورة عندهم. • صرف شديد. • طبائخ اشكال والوان. • والشاي والقهوة مدورة اليوم كلها. • جابوا ليه (ولد) في سبع بنات – لازم يفرح كدا. • لازم يصرف كدا. • عاوزين (لحمة). • يمشي لي (ود الفرملو) يشيل ليه قروش عشان يجيب (اللحمة). • عاوزين (كهربة). • الكهربة كملت. • يمشي لي (ود الفرملو) يشيل ليه كهربة. • ود الفرملو كان بجيب الكهرباء في الدكان. • وناس المستشفى الحصلت فيها الولادة يعجبوك. • القابلة عاوزة حقها ..تقول (الولد) دا طلعتو من (شنطتها). • والدكتور. • والناس الواقفة قدام باب غرفة الولادة. • المحلية ذاتها عاوزة حقها. • صرف كتير. • ود الفرملو اصلو ما قصر. • عمكم بشيل منو ..وود الفرملو بكتب في الكراسة. • دا بجر – وود الفرملو بقيّد. • يوم سماية (الولد)…الحلة دي كلها اتكسرت في بيت السماية. • الاهل ديل جوا من عطبرة وسنار. • اي بص بقيف بنزلوا منو عشرة يسألوا من بيت السماية. • خلق مبالغ فيها. • عمكم تقول ما جاب ليه (ولد)..تقول جاب فريق (شيلسي). • جمهور غفير. • الخلق طالعة في الحيطة. • قدام الناس ديل ما كان في اي خيار غير (ود الفرملو). • والحمدلله ود الفرملو دكانو فيه اي شيء من (الكبريت) الى (الكهربة). • ووقت تحتاج قروش – كمان بسلفك. • اصلو ما قاعد يقصر مع زول ود الفرملو. • الاهل اتلموا في الدكان …يشربوا ليك في (القهوة) ويسألوا عن (الشاي). • القرع البجيبوا ليهم يعلقوا ليك عليه. • مالو مسيخ ملح كدا؟. • وسلطة الاسود دي زيتها شوية. • تعليقات شديدة. • ما بفوتوا حاجة. • ويا ولد شيل (القهوة) دي غيرها ..خليهم يكبوا ليك قهوة سخنة. • وقت ما يلقوا ليهم شيء يعلقوا عليه بقعدوا يعلقوا ليك على الجرايد – يقولوا ليك الجرايد الايامات دي ما فيها اي حاجة. • ويا ولد زيد المروحة دي. • والمكيف دي مالو سخن كدا؟. • وامشي جيب ليك تلج. • الحاجات دي كلها بتقع على رأس (ود الفرملو). • زولكم ما عندو اي خيار غير (ود الفرملو). • والنسوان كل مرة يفتحن ليهن فاتوحة جديدة. • عاوزين صابون. • عاوزين رغيف. • جري على (ود الفرملو). • وفي وحدات كمان في السماية بطلبن (رصيد). • هو في الحالة دي ..الاهل اتجمعوا كلهم في الصالون ..وقالوا لي زولكم اها عاوز تسمي الولد منو؟. • واحدة قالت ليه سميّه على (جدو)…الولد دا امانة ما كان عندو (جد) كلمتو واحدة زي السيف. • الشبه ظاهر – العيون (المفنقلات) دي عيون جدو. • سميه (اسماعيل) على جدو. • اصلو ما فايت جدو. • واحدة بتقول ليه سميه على (خالو) عبدالرحيم الفي السعودية …امانة ما عندو (خال)..ما قاعد يقصر مع زول …حاجاتو من السعودية قاعد تصلنا. • تنط واحدة تانية ..مالو لو سميتو على عمو الدكتور (أحمد)..والله الخرطوم دي كلها بوقفها على فد رجل. • وكمان بيجيبوه في (التلفزيون)..اصلو ما بتلقى ليه اسم احسن من اسم عمو. • وان شاءالله بس يطلع ليك زي عمو – ويحق الاسم. • حاجة تاني تقوم وتقول ليهم سموه على ود عمتو الشهيد (ايمن). • مالو اسم (ايمن) اسم عصري وصغيّر ..وسيد الاسم شهيد. • خالتو تقول ليه سميه على ولدي (الطيب) …كمان الطيب فيه كلام ..زول هادي ورضي..وقلبو ابيض. • عمتو تقول ليه يا زول سميه (عثمان) على ود جدو الخضر ..يمين قالوا ليك عثمان دا عمل ليه عمارة من (11) طابق. • غير العربية الهمر. • وقت العروض كترت ..والاسماء اتعددت …قالوا نسمع كلام (الاب). • قالوا ليه انت عاوز تسميه منو؟. • زولكم قام وقف في نص الصالون. • وقفل ليك (المروحة) ..عشان صوتو يبقى واضح. • وقال ليهم انا عاوز اسميّه (ود الفرملو). • حبوبتو قامت علي حيلها وقالت ليه سجمي عاوز تسميه (ود الفرملو) على منو؟. • قال ليهم على (سيد الدكان). • كلهم سكتوا. • تاكلوا من الصباح في (الضلع) وكمان عندكم رأي…ما عارفين (الضلع) دا طالع من وين؟. • هسه ناس المريخ بعد ما اتأهلوا لمرحلة (المجموعات) وبقوا معانا في سرج واحد..بنقول ليك (انجازكم) دا مفروض تحسبوه للهلال. • بكري المدينة من الهلال. • غارزيتو من الهلال. • علاءالدين يوسف كورتو اتصلحت في الهلال. • تراوري (المتمرد) دا ذاتو من الهلال. • الباشا في الكنبة من الهلال. • عبده جابر. • يمين كان بقيتوا على (محسن سيد) كان هسع نظمتو سيكافا للمرة الرابعة في هذا الموسم. • وكان على (وانغا)…كان الترجي ضربكم سبعة. • ولو ما عاوزين تحسبوا الانجاز للهلال ..وشعرتو ان الموضوع دا بعمل ليكم مضايقة. • وممكن يعمل ليكم احراج. • وبتتحسسوا منو؟. • احسبوا الانجاز للحكام. • يمنحوا فيكم في ضربات الجزاء زي (ود الفرملو). • بصرفوا ليكم في ضربات الجزاء زي (التموين). • …….. • ملحوظة : الدكان دا لو قفل ……السماية بتطرشق. هوامش • المجموعات السنة دي دخلتها (كراع) غريبة. • دي اصلو ما مجموعاتنا البنعرفها. • فيها (نفس) جديد. • كمان انتوا مالكم بتزعلوا. • الحقيقة بتزعلكم ليه؟. • قالوا ليك (ضفر) اشتري ليه جلابية جديدة للمجموعات. • وبكري المدينة غيرّ تلفونو. • جماعتكم (جُداد) على المجموعات. • خلعتكم دي اوعكم تعملوها لينا الليلة في القرعة. • انتوا وناس سموحة – ممكن تموتوا فيها. • خلعتكم قطعت لينا الكهرباء. • دا كلام يا احمد الحاج. • العمود بقينا نكتب فيه زي (المرارة). • الكهربة قاطعة. • ناس الهلال ديل مفروض يركزوا لينا في الدوري الممتاز. • امامهم مريخ الفاشر ومريخ ام درمان. • ونقطة ما عاوزين نفقدها امام المريخين. • ولا نقطة. • ولا شولة. • نحن الممتاز عندنا اهم حاجة. • ولا بنلعب. • ولا بنجامل في الدوري الممتاز. • المجموعات براها – والدوري الممتاز براهو. • مباراة صعبة للهلال في الفاشر. • الاستعداد والجهازية والتركيز طريق الهلال للانتصار في الفاشر. • وبعد الانتصار في الفاشر …الانتصار في ام درمان سوف يكون في متناول اليد. • انتصروا اولا في الفاشر. • في ام درمان – جمهور الهلال براهو بحسم المباراة. • ما عندكم اي مشكلة. • اذا كان الهلال بنتصر في الكونغو ..ح يفشل في الانتصار في الفاشر. • ثقافة الانتصار خارج القواعد ..امر يجب ان يستمر. • الطريق الى البطولة يكون عبر الانتصار خارج الديار. • السنة دي ارتحنا من (سيكافا). • الله شافنا. • الله مرقنا منها. • بلا سيكافا بلا دوشة معاكم. • لو عارفين (المجموعات) يمكن تخليكم تصرفوا نظر عن (سيكافا) كان في موسم بنوصلكم للمجموعات. • ……….. • عاجل : الزول الجديد في البلد بكون ظاهر.
