اذا كان رب الفيفا للطبل ضارب ..براكم انتوا بتعرفوا البحصل لي جماعتنا ديل شنو؟ القرار الفني في المريخ اصبح في يد (صلاح ادريس) وليس في ايد الفرنسي (غارزيتو) قال علي الامين : (السيتم لم يرفض تسجيل المحترف الياسو في كشوفات المريخ مطلقا ودا كلام ما صاح) ما انتخبوكم وما جابوكم يا مجلس المريخ عشان تمارسوا (الخداع) حتى مع جمهوركم الفساد الذي يحدث في (الفيفا) والفضائح التى ثبتت على رجال الاتحاد الدولي لكورة القدم ليس بعيدة عننا. غرقانين فيها للاضنين. ما يحدث في الاتحاد السوداني لكورة القدم يؤكد اننا فعلا اصبحنا نتأثر بالفيفا ونعمل بلوائحها. إحنا بتاعين (الفيفا). ليس في القوانين – وانما في الفساد الذي ضرب المجتمع الدولي لكورة القدم. الحكاية بايظة من (فيفتها). بايظة من كبارها. واذا كان رب الفيفا للطبل ضارب ..براكم انتوا بتعرفوا البحصل لي جماعتنا ديل شنو؟. بربوها للصباح. امس في صحيفة (قوون) وعبر حوار الرائعين أحمد الحاج مكي وعصام طمل فجر (علي أحمد الامين) رئيس لجنة التسجيلات وتنقلات اللاعبين بالاتحادين المحلي بالخرطوم والاتحاد العام منذ 1983 وحتى الآن اخطر المفاجآت. حيث كشف علي الامين بشجاعته المعروفة ومهنيته العالية عن ذريعة (السيستم) التى مرر بها مجلس المريخ مع الاتحاد العام اجندته ليتم اقصاء المسكين (الياسو) الذي رشحه غارزيتو ليحل بديلا عنه المصاب (سيلا) الذي رشحه صلاح ادريس. يعني القرار الفني في المريخ اصبح في يد صلاح ادريس وليس في ايد الفرنسي غارزيتو. عليه ما بعيد تاني صلاح ادريس يضع (تشكيلة) المريخ ويقول لي احمد الباشا (قوم سخن). احمد الباشا دا قصتو قصة طبعا ..ح نعود ليه ان شاء الله تفصيلا. وجه احمد الحاج وطمل سؤالا لعلي الامين وقالوا له : (هل السيستم رفض قبول تسجيل محترف المريخ الياسو؟). في داعي للاحراج دا؟. في داعي للسؤال دا؟. اصلو ما في داعي ليه. طبعا الاحراج هنا لمعتصم جعفر ومجدي شمس الدين واسامة عطا المنان …عشان السؤال كشف (السيستم) الذي يعمل به الاتحاد العام. طلع عندكم (سيستم) غريب. سيستم زي (الصراف الآلي). شوفوا اجابة علي الامين الزول الصريح وواضح على سؤال احمد الحاج وطمل (السيستمي) كان كيف؟. قال علي الامين : (السيتم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في آخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). تاني يا عالم. عشان الكلام يقع ليكم. علي الامين قال : (السيستم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في آخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). الكلام دا لو بالانجليزي نقولوا ليكم بالعربي. (السيستم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في آخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). بالهندي. (السيتم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في آخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). بالبرتغالي : (السيتم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في اخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). بالشنقيطي : (السيتم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في اخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). بالفول والطعمية : (السيتم لم يرفض تسجيل المحترف الياسو في كشوفات المريخ مطلقا ودا كلام ما صاح والحصل انو المريخ في اخر لحظة غير رأيو لاسباب يعلمها هو لا علاقة لها بالسيستم وحكاية السيستم دي تكون مخارجات). في اوضح من كدا. يكتبوا ليكم كلام علي الامين دا (صباح ومساء). يعملوا ليكم حبة قبل الاكل – وحبة بعد الاكل. في (فساد) اكبر من كدا. في (خديعة) وغش اعظم من هذا الذي حدث. السيستم ذنبو شنو؟. خلوه السيستم ان شاء الله يحرق ..(الياسو) ذنبو شنو؟. جايبنو من بلدو في السخانة دي. وعاملين ليه اربع فحوصات. يدخلوا فيه من معمل لي معمل. متل (فئران) التجارب. ويعملوا معاه ابداء رغبة. والساعة 12 منتصف الليل تقولوا ليه : (السيستم) رفض. انتوا قايلين الناس عندها (قنابير). حاجاتكم دي لو عملتوها بالواضح وبي شفافية ما في زول بيسألكم. ممكن تعملوا الحاجات دي في النور ويكون عندكم شجاعة لتحمل قراراتكم بدل ما تحمولها للسيستم. لكن تعملوها في النور كيف وانتوا اتعلمتوا على (اللف والدوران). الحاجة لو ما عملتوها باللف والدوران روحكم بقت ما بترقد. خلوه الاعلام. خلوهم الهلالاب. جمهور المريخ دا بتغشوا فيه ليه؟. جمهور المريخ فوضكم وانتخبكم ..عشان تتعاملوا معاهو بوضوح وتنقولوا ليه الصورة بي امانة. ما انتخبوكم وما جابوكم يا مجلس المريخ عشان تمارسوا (الخداع) حتى مع جمهوركم. ويزين اعلام المريخ للناس ذلك. اعلام المريخ الذي لا يملك ان يفضح هذا او يكشف عن الحقيقة ..ليس فيهم من يملك القدرة لأن يقول البعمل فيه مجلس المريخ دا غلط. خداع. كضب. بسكتوا. وما بقدروا يقولوا شيء. الاعمال التى تتم بهذه الخديعة لا تنتج غير (الخطأ). عشان كدا (سيلا) دا اقنعوا منو؟. دا من البداية كدا دخل في كشوفات المريخ بصورة غير سليمة. لا نريد ان نقول بصورة غير شرعية. لكن نقول انه دخل لكشوفات المريخ بخديعة كبيرة. الاتحاد العام شارك المريخ في هذا (الاثم). اللاعب الذي يقوم بابداء رغبة يصبح صاحب حقوق كاملة ملزم النادي بدفعها لها في حالة إلغاء التعاقد. وقد وقع ذلك الامر على اللاعب المحترف الاجنبي (بركاوي) الذي قام الهلال بي ابداء رغبة معه وصرف الهلال التعاقد معه بعد ذلك ..فقد كلف ذلك وقتها الهلال اكثر من (30) الف دولار استملها المحترف بركاوي. الياسو ضحكوا عليه. وضحكوا كذلك على غارزيتو. قالوا ليه (السيستم) رفض اللاعب. يفترض ان لا يتم انهاء التعاقد مع اللاعب دون ان تسدد له حقوقه كاملة. إلّا اذا كان اللاعب وصل لاتفاق مع مجلس المريخ ..ومررت الحيلة بهذه الصورة خشية من الجماهير والاعلام وغارزيتو. لكني استبعد ذلك ..وارجح ان اللاعب كان (ضحية) فقد بدأ واضحا على اللاعب الغضب. وصرح اللاعب في اكثر من منبر ان استبعاد التعاقد معه كان نتيجة (مؤامرة). هكذا يدير الاتحاد العام لكورة القدم اموره ..وبهذه الصورة يمرر الاتحاد العام (كبائر) المريخ. الفساد ليس بالضرورة ان يكون (ماديا). الفساد الاداري اخطر من الفساد المالي…والنظام الذي يعمل به الاتحاد العام نظام كله (فساد). سيستمكم ضارب يا معتصم جعفر. ………. ملحوظة : السيستم بقى يعملها ظاهرة. هوامش الارباب صلاح ادريس بقى كل يوم يكتب عمود عن سيلا. كل يوم بقول لينا سيلا دا احسن زول. سيلا احسن محترف. سيلا ما في زول متلو. كتب الارباب امس : (وسيلا ذلك الهاديء طبعاً و الباذخ خلقاً و المستأسد لعباً والمتوفق عطاء هو محترف مثالي بكل الأبعاد و المعاني لا يتأخر عن تدريب ولا يغيب عن مباراة و يحتفظ بعلائق ود و حب مع كل زملائه من اللاعبين و الإداريين) . دا سيلا. سيلا البنعرفو دا. وإلّا سيلا تاني. غايتو لو سمعتوا ليكم اغنية في الايام القادمة عن سيلا تلحين صلاح ادريس ما تستغربوا. الزول طلع خطير شديد. نحن لو اقتنعنا بالكلام دا. البقنع غارزيتو منو؟. جمال الوالي ظاهر عليه ما مقتنع. على العموم الكلام دا ما كتير على سيلا ..لأن صلاح ادريس قال عن مالك الذي استغنى عنه المريخ نابغة. شوفوا صلاح ادريس قال شنو عن مالك وسفاري وهو يتحدث عن سيلا : (عد إلى أهلي شندي فيعود ليكمل عقد القوة و النبوغ الدفاعي في إضافة حقيقية للنابغ مالك إسحق و المتمرس سفاري و غيرهما من العقد النضيد). نذكركم ان المريخ كان قد سبق واستغنى عن مالك (النابغة) وسفاري المتمرس. ديل نبغوا وين؟. اتمرسوا وين؟. عاوزين نعرف بس. ونذكركم ان الارباب صلاح ادريس ضن في التسجيلات الماضية على الهلال بمحمد صلاح الذي سجله في الاهلي شندي ثم اعاره لفريق المهدية. صلاح ادريس الذي ضن على الهلال – يجود للمريخ بي (سيلا)..ويقول ان المريخ في مهمة وطنية. يا ربي الهلال دا بمثل (المعارضة). الهلال دا في مهمة (معارضة). …………. عاجل : لو ناس يوفنتوس عارفين (سيلا) بالمواصفات دي ..كانوا لحقوا بيه نهائي دوري ابطال اووروبا يوم 6 يونيو القادم.
