يوم الخميس كنت بحضر في فيلم للمبي على قناة مصرية بعد الفيلم شلت الريموت وكعادة الريموت في السودان ما بشتغل طوالي مرات تديهو كف ومرات هزة هزتين ومرات تطلع الحجار وتديها من «تيالينك» المنتج من غدد تحت اللسان وتديهو مسحة بي طرف بناطلينك حتي يشتغل المهم بعد حضرت اللمبي شلت الرموت و «كروج» حولت لي قناة من حقاتنا السودانيات لقيت ليك اب كسكته في لقاء كبير ومثير خرجت من اللقاء بان امكانيات الكوميديا في البلد دي امكانيات ضخمة شديد مفروض نستفيد من تلك المواهب الفطرية الرهيبة في عالم الكوميديا لمبي شنو الفي مصر قابض الجو نجومية لمبي مصر ليست الا حلق للمالوش ودان البلد دي درامياً تمتلك المواهب لكن العين بصيرة والحكومة يدها قصيرة ومضقلمه قصاد الدراما وبمناسبة الدراما اليومين دي فعاليات مهرجان البقعة العالمي السنوي شغالة انا ما متأكد وزير الثقافة عارف ولا ما عارف الزول ده لو ما عارف كلموهو قولوا ليهو البلد دي فيها دراما زي الدراما لكن ناس الدرامات بعاكسوها فيها مسرح يبني ستين امة ولكن يظهر انو ناسنا ما دايرين يبنوا امة عشان كده تضيع مواهبنا ساكت والجو يقبضوهو اللمبيين اها كرووج حولت لي قناة سودانية لقيت كردنة حبيبي الليبي طبعاً اليومين دي اي هلالابي سميناهوا الليبي لقيت الليبي بتكلم وما احلى الكلام في خشيم الليبي الزمن القضاهو كردنة رئيساً للهلال بدفع براهو اذا ضربناهو في سبعة ببقي قدر الزمن القضاهو جمال رئيسا للزعيم وبدفع براهو ما حصل جمال قال الروب وما حصل من على النادي لانو الدافع الوحيد وما حصل مس اي من رموز الكيان باي شيء هو بالله يا روشا الدفع ده حار كده؟ المهم الليبي تحدث عن حا نعمل حا نعمل وحا نعمل وحا نعمل ونكر المواسير قال ما جابها بس الكويسه انو اعترف بوجود المواسير حا نعمل كان شعار الحلقة ووقفت عند حا نعمل سينما الهلال كردنة لخبط بين الخطاب الانتخابي للاندية والخطاب السياسي البدخل البرلمان. قرب يقول حا نعمل ليكم صهريج ومدرسة ثانوية للبنات قال حا نعمل سينما الهلال دار الخيالة يعني وقال الصواميل فكوها بفعل فاعل يعني يوجد خائن في الهلال شماعة جديدة يعلق عليها الليبيون فشلهم نرجع لدار الخيالة اعملوا جمبها دار الخيانة الاهلة الفاتحين خيال وبحلموا بكأس افريقيا دخلوهم السينما وشغلوا ليهم فيلم الطراح الفيلم ده جميل شديد الطراح طبعاً هو الزول البقيف في موقف المواصلات ينظم الحافلات ويوجه الركاب تلقاهو بكورك دروشاب يا اركب دروشاب نفرين تلاته دروشاب يا مستعجل امدرمان اربعين بانت جوازات يا هايس ارح يا مستعجل صحافات جامعة السودان مينا بري يا زلط ارح يا ديامه ما يفوتك الكريس والدنيا ما دوامه فيلم الطراح فيلم جميل يحكي عن امتدادات عاصمة ترامت اطرافها وانتشرت كأعشاب النيل فيلم يحكي عن سوء ادارة اجبر المنتج في الولايات علي ترك مشروعه الانتاجي ويهجره مجبراً مهاجراً لعاصمه لا تستوعبه الا في مهنة هامشية تفقده الآدمية ويحيا مطارداً من البلدية المهم أجمل حتة في فيلم الطراح لما الكاميرا تدخل كلوز علي الطراح وهو يصيح ليب لييييييب لب لب لب لب اركب ليبيا بالخلا وجمب دار الخياله دي مفروض كردنه يبني دار الخيانة عشان يخت فيها الجماعه الرخوا الصواميل بتاعت الكشافات ايها الناس الزعيم هو النادي الوحيد الذي يمثل هذا الوطن في بطولة افريقيا للابطال وهو النادي الوحيد في ولاية الخرطوم الذي يمثل دولياً فما هو دور ولاية الخرطوم في هذا المشوار الافريقي المريخي مع العلم بأن المريخ يمر بفترة مالية حرجة تحتاج للدعم السريع حتي يدبر النادي امره فهل تكرمت ولايتنا بدراسة الامر في سرعة تتماشى مع الخطوات المسرعة نحو مباراة وفاق؟ ام ستصهين ولايتنا عن دعمنا ولا نراها الا في مقدمة الركب وقت الاحتفال بالانجاز كعادة الحكومات؟ تتذكروا لما جبنا مانديلا؟ المرحوم حجوج دفع دم قلبو اقطاب المريخ دفعوا الوراهم والقدامهم وعندما وصل الطائر الميمون حاملاً كأس مانديلا نزلت الحكومة كلها شايلة الكأس على سلم الطائرة وناس حجوج وسامي وبريمة كانوا ورا اخي الدستوري اخي النافذ اخي الحكومي ان كنت لا تهتم ولا تدعم حقوا بي انجازات الناس ما تنعم ايها الناس نتوقع موقفاً ايجابياً من حكومة ولاية الخرطوم تجاه دعم المريخ ايها الناس كنا نتمنى انتصار المنتخب ولكننا خسرنا مجدداً هاردلكم ونتمنى بناء منتخب وطني يبدأ بالمراحل السنية اهتموا بالمنتخب وقدموا الدعم والخطط لنكون حضوراً في المحافل الدولية ايها الناس ان تنصروا الله ينصركم اها نجي لي شمارات والي الخرتوم كان شفت يا والينا نحنا كامدرمانيين معتمدنا ود الملازمين دايرنك تكلموا لينا للوطن الكبير مهما اتكلمنا وانتمينا برضك ما نفع يا والينا بقينا غرباء مستأجرين يا والينا بس وطنا الصغير ام در يا والينا خلوها وطنا لينا ما معقولة كل الناس امدرمان وسخانة تقول لينا كلموا الزول ده يا والينا يا يتكاتف معانا وينضفها لينا يا يزح لينا سلك كهربا ننساك كيف والكلب في ام درمان بقي يمشي بي طرف اصابعينو ويعاين بي طرف عينو خجلان من الوسخ.. يقطع الوسخ ويقطع سنينو. وإلى لقاء. سلك
