بالأمس حملت الاخبار ان الحرية والتغيير (قحت) ابلغت (الحاج) فولكر بموافقتها على مبادرته (الميمونة) بقولها انها موافقة على (التعاطي الايجابي) مع المبادرة ! يعني كراع بره وكراع جوه ! والشيوعيون معروف عنهم اطلاق الكلمات اللزقة واللزجة فى مثل هذه المواقف ودائما ما يتركوا الباب خلفهم مش (موارب) لا فاتح عديل للزوغة وكده . سبق ان تساءلنا فى مقال سابق من لديه علم عن مبادرة فولكر فليقل لنا وله الاجر ! السيد (فولكر) أيها الناس إن كانت لديه مبادرة فليعلنها على الملأ أظن ده الوضع الطبيعي ولكن الرجل ما عندو (التكتح) فالرجل دعا للجلوس والتحاور وبس ! وبعد ان يجلس (المغفلون) حوله سيتعامل معهم ومن خلفه الاممالمتحدة والعالم (الغربُصهيوني) بالعصا والجزرة وبعد داك عينك ما تشوف إلا النور ! لذا برأي المتواضع ده ، (الزول ده اختوه) ! يعني من قِلة الدواويين واللا انعدام العقلاء ان يجتمع السودانيون بمحض ارادتهم ليتوافقوا بعيداً عن هذا الفولكر (الخبيث) أأي خبيث ونص وعشرة ما تقول لى يا خي ده موظف اممي مسكين وعاوز يربي عياله وبتاع ده (مصيييبة) على السودان . ده ياخى دمر (سوريا) وجاي يتلاعب علينا (الله لا بارك فى حمدوك الجابك ياخ) . لكن العاجبني (ياعمك) ان المجلس السيادي وعلى رأسه سعادة الفريق أول البرهان (حفظه الله ورعاه) أأي بقولها كده عشان فى جماعة بتورم فشفاشهم . هذا المجلس غير مهتم (خااالص) بنهيق (فولكر) ولا مواء العملاء يتزلفون حول اسوار السفارات ولا غير ذلك . فمن اول يوم قال ليهم (نؤيد المبادرة) ومشي يشوف شغله ، كلف وزراءه (ياعمك) وأعاد القضاء (شفت كيف) ورفع الظلم عن المفصولين تعسفياً وشكل لجنة لمراجعة قرارات لجنة ازالة التمكين و يستقبل ده ويودع ده و (عيييك) الجمال ماااشه و..... ! اذا يظل فقدان اليسار للشارع وفضح الاعيبهم هو ما ادى لانحسار مليونياتهم الى عشرات من المتظاهرين وخسرانهم لحراكهم المصطنع بالعاصمة هو ما جعلهم يقفوا البارحه امام (الحاج) و بإنكساره ليقولوا له (نحن موافقين سعادتك) ! اليسار عزيزي القارئ لن يتوقف هنا بل سيبدأ موسم الهجرة الى الشمال لسرقة الترس الشرعي لمزارعي الولاية الشمالية ليتبنوه وقد فعلوا ذلك بإرسال مجموعة رمزية قبل ايام ولكن هذا (الكرت) قد حُرق تماماً بعد ان أعلن ملوك الشمال (نفض يدهم) من الحكاية دي بعد ان لاحظوا زيارات من لجان مقاومة قادمة من العاصمة (شخصياً) لذا اى يوم يمر على اليسار سيقربهم من الصندوق قسراً وهذا ما لا يريدونه لذا البارحة قال ليك انتخابات شنو ياخ ؟ (سنتعاطي بإيجابية) ! يعني المال (تلتو ولا كتلتو) ! مش يا هو الكلام يا جماعة ؟ قبل ما انسي : زمااان لمن (نحرد) الغداء العصير كده بتضربنا ليك جوعة حااره ! الواحد بمشي يتعصر جنب امه براااحا كده يشحدا حق الرغيفة والطحنية ! أهااا البارح الجماعة ديل مشوا يشحدوا الطحنية من (فولكر) . قال تعاطي إيجابي قال ! صحيفة الانتباهة
