قبل ما نتكلم عن التسجيل الصوتي الأخير للمرتزق حميرتي عايز ابشركم و ارسل رسائل لقادة الجيش و الشرطة . ابشركم والله العمليات شغالة باحترافية و كل ساعة بتمر على الجنجويد بيفقدوا فيها مركبات و ارواح و بيهربوا بالعشرات .. و وصلوا مرحلة يجندوا العوين معاهم و يشيلوهم السلاح و الحاجة دي بيكون شافوها ناس شرق النيل و المايقومات . ابشركم انو الشرطة بكل اجهزتها قاعدة ترصد رصد دقيق و شغالة شغل مختلف تماما" والله و ح تشوفوهو بعد تبداء المرحلة الاخيرة في المعركة و دي مرحلة الشرطة . قبل كم يوم في واحد من جنسية عربية جاب لي صور لقوات من الجيش و مرتزقة من المليشيا و قال لي وين الجيش و وين المليشيا ؟ و لامن اشرت ليهو على ناس الجيش اندهش لانه فاكر الناس اللابسة سمح ديل هم الجيش .. اذا كان عندنا رسالة للبرهان و اركان حربه فحنقول ليهم بعد المعركة دي تنتهي ما عايزين نشوف عسكري جيش لابس لبسة تعبانة او بوت قديم ما عايزين مظاهر سالبة في القوات النظامية .. ما عايزين نشوف عسكري جيش لابس سفنجة و البوريه بتاعه لونه اختفى .. اذا كان حميدتي الجاهل الما قراء و لا دخل كلية استطاع في فترة بسيطة انو يهتم بملابس المليشيا و احتياجاتها فكيف ح نسكت ليكم انتو المتعلمين خريجين الكلية الحربية السودانية تسمحوا بانوا جنودنا و ضباطنا تكون عندهم مشاكل في الملبوسات و المعينات و بيئة العمل .. ما ح نسمح ابدا بي حاجة ذي كده تاني . رسالتي للقائمين على امر الشرطة .. نعلم بانو في شغل كبير شغالين عليهو من خلف الكواليس و ندعمكم بكل ما نملك لكن يا سادة حاليا جنودكم و ضباطكم استراحوا فترة طويلة شديد و كل ما فترة الاستراحة تطول ح تفقدوا منهم عناصر مهمة .. ح يتساقطوا منكم و ح تدب فيهم روح الملكية و عملية الضبط و الربط ممكن تخرب تماما" .. لازم تستعجلوا خططكم و برامجكم .. بعد المعركة تنتهي لازم تكون عندكم قوات مختلفة .. لازم تكون عندكم وحدة جديدة لادارة الامن الداخلي بشكل مختلف و عناصر مختلفة .. لازم تجددوا الدماء في الفدرالية و الامنية باضافة ضباط و صف من وحدات و ادارات مختلفة يتم اختيارهم بعناية .. تجديد الدماء مطلوب في المرحلة القادمة . اما تسجيل حميدتي ما ح اقول ليكم ده ذكاء اصطناعي و بتاع .. ده ما ذكاء اصطناعي .. التسجيل عبارة عن نقاط مكتوبة في ورقة و اتقدمت لحميدتي و كل نقطة سجلها حميدتي براها بي نفس واحد واتجمعت كلها و تم دمجها في تسجيل واحد . حميدتي ما بيقدر يطلع فيديو او يمرق من الجحر الموجود فيهو او يتصل بالتلفون لقناة او اذاعة لانو عارف بمجرد ما يعمل كده ما ح يلقي فرصة للتشهد الأخير .. الدول الداعمة للمليشيا بتحاول تخلق مخرج آمن لحميدتي و حذرته من خطورة ظهوره او اتصاله . احنا بالنسبة لينا حميدتي انتهى خلاص .. المليشيا انتهت .. الشاغل بالنا و تفكيرنا هو مرحلة ما بعد الحرب .. المراحل السياسية و الامنية و العسكرية و الاقتصادية دي الحاجات الشاغلة بالنا حاليا لانو المعركة انتهت من يوم ظهور البرهان . نزار العقيلي مواضيع مهمة علاج الحمى في الطب النبوي مشكلة مص الإصبع التفاح الأخضر .. فوائد الضغط في العمل كيف نتناول الكزبرة؟ ميكب خدود البشرة الداكنة
