مازالت الي وقتنا هذا ...تمتعنا (تمريرة) هيثم مصطفي حفظه الله ورعاه بالدهشة ...وتخلق عندنا حالة من حالات الفرح الجميل. ما زالت تمثل عندنا تمريرة هيثم مصطفي (اسطورة)..صلاح احمد ابراهيم في (مريا).. او حاجة زي نقر الاصابع في (البيانو)...كما عند هاشم صديق. او هي مثل (انشودة الفن) عند سيد خليفة... يا هيثم ...(لحن الحياة) منك. محمد موجات صوتية قالوا ليك الدكتور وقت عاين لنتيجة الفحص عشان يشوف الحصوة ...وعمل موجات صوتية لي اكرم الهادي سليم. الدكتور وضع ايدو في رأسو ..وقال لي اكرم انت وقت كنت صغير ..كنت بتأكل الحصحاص. اكرم قال ليه ابدا. الدكتور قال ليه : طيب كنت بتأكل الطمي. اكرم قال ليه ابدا. الدكتور قال ليه : غريبة ..طيب (النجيلة) الظاهرة في الصور دي طلعت من وين؟. اكرم طبعا على نياتو. قال ليه يا دكتور : النجيلة دي صناعية ..وإلا طبيعية. الدكتور قال ليه : والله دي ما بقدر احددها ليك من اول صورة ..لازم تعمل فحص تاني. اكرم عمل تاني موجات صوتية. الدكتور قال ليه : النجيلة دي طلعت نجيلة صناعية. اكرم قال للدكتور : بس عرفتها يا دكتور ..النجيلة دي نجيلة استاد الخرطوم. الدكتور قال ليه : لكن نجيلة استاد الخرطوم الجابها هنا شنو؟. اكرم قال ليه : دي قصة طويلة يا دكتور ..ما في داعي احكيها ليك. الدكتور قال ليه لازم تحكيها لي عشان اشوف ليك العلاج المناسب. اكرم قال ليه : يا دكتور لكن انت كدا بتحرجني مع سفاري. الدكتور ما ناقش أي حاجة ..قال ليه سفاري دا منو؟...بتاع المعمل. اكرم قال ليه : يا دكتور قلت ليك القصة طويلة ..والسبب كلو من سادومبا ..خلاني اكل في النجيلة لما جاب لي (الحصوة). الدكتور قال ليه : بس...انا عرفت علاجك ..انت عندك مشاكل في الدفاع ..عشان كدا جاتك الحصوة. في زول عاقل كدا يا اكرم ..يلعب مع ناس طارق مختار. انتوا ليه بتعملوا في نفسكم كدا. كورة هي وإلا حملة تبرع بالدم. نداء هسع يا رمزي صالح لو عيدت عند اهلك ..ما كان افضل ليك من المباراة التي لعبتها اول امس. وقت ما بتعرف (تسلخ) ...الفصاحة ليك شنو؟. نوع دا عندنا بغسل (الكرشة). تنويه يا طارق مختار اظهر ...اطلع من تحت (البطانية) ...خلاص الدوري الممتاز انتهي. شنو شتاء وصيف (لابد) لينا تحت (البطانية). بعد كدا اطلع ..(سادومبا) عفي عليك. انا عارفك ..انت بترجف هسع من مباراة كأس السودان. يا زول اطلع ..(البطانية) دي ما بتمرقك. نكتة في نقطة النفطي مسكين ..كمل لياقتو كلها في (التجسس)...عشان كدا ظهر في المباراة زي الزول البجيهو ضيوف الساعة اتنين ظهرا ..يقوم يقول ليهم : يا جماعة متغديين وإلا نعمل ليكم غدا. احتمال واحد طلع من استاد الهلال بعد المباراة يضحك زي (دعاية معجون الاسنان)...قلت ليه : مالك البضحكك شنو؟. قال لي : اول مرة اشوف لي (ضحية) ما فيها (مرارة)...ضحية لحم صر. هسع دا احتمال دا. افتراض كأس الممتاز السنة دي غيروه وبقي كبير ..هيثم مصطفي (حفظه الله ورعاه) ليه حق يمشي ليه الاردن. قالوا ليك هيثم طمبل شاف كأس الممتاز ...قعد يتخيل ويتذكر ايامه في الهلال ..وقال والله الواحد لو ما لعب في الهلال كان افتكر كأس الممتاز دي (فيلم اجنبي). انت يا طمبل لو ما شفتك في اخر خمس دقائق تتكلم مع البرنس كنت مفتكرك اعتزلت منذ عودتك من (اورلاندو). هسع دا افتراض دا. نظرية واحد دخل فيه (قندران)...قام بعد سبعة ايام ...وقال ليهم : اصلو (بشة) بعمل فينا كدا. هسع دي نظرية دي. استرشاق هيثم المرابط لاعب في المباراة ...ما عرفتو ..قدر ما حاولت اتذكرو ما قدرت. الزول دا انا شايفو وين؟. الشبه دا ما غريب عليّ. واحد مفتح كان بحضر معاى في المباراة قال لي : انت تعال هنا (الجاسوس) دا بعمل شنو في المباراة دي. انت يا المرابط عاوز (تجسس) كمان في (المقبرة). هسع دا استرشاق دا. مساوي نجم الموسم الشيء الذي لن يختلف عليه احد في هذا الموسم ..هو ان لاعب الهلال سيف الدين مساوي نجم لهذا الموسم ...بعد ان حقق نجومية منقطعة النظير في خط الدفاع ..وان كنا فقدنا مساوي في الوسط ..إلا اننا كسبنا لاعبا في خانة كنا نعاني منها. سيف الدين مساوي لم يكتف بالاداء الراقي والجميل الذي ميزه ..وجعله في هذا الموسم المدافع الامثل ..وانما كان تفوق ونبوغ مساوي ناتج من التزامه خارج وداخل الملعب. مساوي لاعب خلوق ..يقدم كل يوم ما يثبت انه لاعب كبير ..وانه يستحق ان يلعب في الدوري الايطالي بهذا التكنيك الدفاعي العالي. لذا يكون اتفاقنا عليه. المريخاب طبعا بقلدوا...شافوا الهلال رجع سيف الدين مساوي ..قاموا رجعوا سعيد السعودي ...وقاموا كمان قالوا سعيد السعودي كان بطل. كان بطل في كرري هو. زول مغلوب تلاتة ...وطالع من تمهيدي مجموعات ..كيف يكون بطل. طول ما السعودي دا في تشكيلة المريخ ...ما تحلموا المريخ يفوز على الهلال. الموضوع دا منتهي بالنسبة لينا. شيلوا اللوحات واحد طارت ليه الملاريا في رأسو ...الدكتور قال ليه : انت من متين بقيت تشوف فرشة المعجون ...(كديسة)...وبقيت تحس محل ما تمشي انو دفار الخدمة الالزامية وراك. زولكم قال للدكتور ..والله يا دكتور الاعراض دي ظهرت من هدف بشة الاول. يا دكتور اقول ليك حاجة. انا (نسيبتي) ذاتها بقيت اشوفها متل حملات الدفتردار الانتقامية. لا الامور ان صلت كدا ...يبقي الموضوع دا ما (ملاريا) بس. الموضوع دا فيه حاجات تانية. بتوع التمهيدي ناس المريخ ديل جابوا ليهم (حارس) من جامعة الدول العربية. في التسجيلات دي ناس المريخ عاوزين ليهم (دفاع) من الاتحاد الافريقي...و(هجوم) من الاممالمتحدة. جامعة الدول العربية ..براها ما بتمرقكم. الهدف الثالث في رمزي صالح عارفين جاء كيف؟. وقت هيثم مصطفي رفع الكورة من الكورنر ..رمزي صالح طلع ..قال اول حاجة اتصل باعضاء جامعة الدول العربية ..اشوف الكورة دي بمسكوها كيف؟. انت يا رمزي لو (سفاري) انتظرك ....(ديمبا) بستناك. سفاري بقي زي سواق اللوري الما عندو رصيد ..كل ما يمسكل ليه زول يعاين للرقم ويقول ليه : يا ود الناس لكن ارجع ليك كيف؟. هسع سواق اللوري ذنبو شنو؟. يا وارغو ممكن تهدي المريخاب دبل الله بريدهم ..لو كان وارغو مشارك في المباراة ..كان الهلال فاز ستة. انتوا هيثم المرابط دا في القمة الاخيرة كان لاعب مع منو؟...المريخ وإلا الموردة. ما عرفتو شايت على وين؟. حاجة حريصة حاجة حريصة اشترت ليها ساعة ...وطلعت حجر الساعة ..وقالت الايامات دي الزمن جاري شديد ..بقوم ينزل حجر الساعة. تعريجة الموضوع دا في غاية البساطة. الكورة طلعت ضربة ركنية ...وناس سفاري وسعيد السعودي ورمزي صالح قاعدين يتفرجوا. هيثم مصطفي حفظه الله ورعاه ..مشي يعكس الضربة الركنية... وناس سفاري ..وسعيد السعودي ورمزي صالح قاعدين يتفرجوا. ديمبا ..قال لي هيثم ارفع ...وناس سفاري وسعيد السعودي ورمزي صالح قاعدين يتفرجوا. وديمبا اتقدم ..وسفاري ورمزي والسعودي قاعدين يتفرجوا. ديمبا لقي الكورة قدامو والقون فاضي ...وسفاري ورمزي والسعودي وقلق وابراهومة قاعدين يتفرجوا. هسع ابراهومة ذنبو شنو؟. انت يا رمزي (مالك فجأة كدا بقيت نساي). بالله كل ما اشوفك اتذكر العدوان الثلاثي بقيادة بشة وسادومبا وكاريكا على اراضي الوصيف. يا رمزي بصراحة كدا ...انت البلد دي دخلتها (حارس مرمي) وإلا حاجة تانية. ناس النفطي والمرابط ومهدي بن ضيف الله دخلوها (جواسيس). انتوا وين الاسم دا؟. الاسم ياتو؟. مهدي بن ضيف الله. اول مرة اشوف لي (جاسوس) بجنسوه. وان طال السفر بتوع الضللة مريخابي قال لي انت (بشة) دا ايطالي ...قلت ليه خلاص اسحروا لينا... انت يا الهلالاب كملتوا (اللحمة) وقبلتوا على المريخ. واحد قال لي انت موسي الزومة دا ...مالو مع الكشافات؟. قلت ليه موسي الزومة ما عندو مشكلة مع الكشافات ...لكن الظاهر كدا موسي الزومة دا (تقل) في (الشربوت). انتوا يا ناس المريخ (الشربوت) دا ما منعتوه في المعسكر. مريخابي تاني ما عجبو كلامي ..قال لي يمين دا (شامبيون) ساكت. نحن كما ما بنعرف عكسة الشربوت من عكسة الشامبيون. بتوع الطابق التاني هلالابي قال لي والله ناس المريخ ديل لو عملوا ليهم (طابق ثالث) كان اضانهم بردت شوية ..واعلامهم السالب كان على الاقل لقي ليه شيء يتكلم فيه. غايتو لو المريخ عمل ليه (طابق ثالث)..كان (الطوب) لقي ليه ناس يتغزلوا فيه. حوار من طرف واحد زول شاف ليه بنت ..اعجب بيها طوالي. قال ليها : لو سمحتي يا اخت الساعة كم؟. البنت قالت ليه الساعة اربعة ونص. صاحبكم قال ليها : ممكن تديني رقم تلفونك. البنت قالت ليه : لا طبعا. صاحبكم قال ليها : طيب وقت ما عاوزة تديني رقم تلفونك ..وريتني الساعة كم ليه ...الرشاقة ليك في شنو؟. سين وجيم س : تفتكر ناس المريخ بقولوا شنو بعد نهائي قمة الممتاز؟. ج: ناس الوصيف بقولوا المريخ يعلن جاهزيته لنهائي كأس السودان. كل مرة بتقولوا كدا يا مريخاب. انتوا استعدوا ...ونحن بنضربكم. حسن تفتيحة حسن تفتيحة اشتري ليه قطعة ارض في الخلاء ...وقال بعد 250 سنة ..احفادوا بعرفوا قيمة القطعة دي. برنامج العيد واحد قال لي انا اهم حاجة عندي في (الضحية)...المرارة. بعد ما اضرب المرارة ...ما عندي قضية بي أي شيء. واحد تاني قال لي : انا اهم حاجة عندي ..(شية الجمر)...الضحية عندي شية الجمر ..بعد اضرب ليك شية الجمر ..بكوع ليك في ضل ...قطر ما بصحيني تاني. الزول الاول اتلفت على وقال لي : اها انت اهم حاجة عندك في (الضحية) شنو؟. قلت ليه : اهم حاجة عندي في (الضحية)..شية الضربة الركنية. والله هيثم مصطفي حفظه الله ورعاه ..بعمل ليك شية من (الكورنر) تقطع ايدك وراها. الزول التاني ...قال لي والله اول مرة اسمع بي شية الضربة الركنية. غايتو انتوا يا الهلالاب بتجيبوا ليكم حاجات. حاجات غريبة. قصة بايخة جدا حاج حمد قال لي : والله البلد دي لو فيها اربعة زي (بشة) كنا مشينا كأس العالم. قلت ليه والله انتوا لو مشيتوا كأس العالم ...(موسي الزومة) يرجعكم. معقولة الي الان في لاعب مثله الاعلي (الكشافات). انتوا وين الاسم دا؟ الباشا الله مرقو هسع لو الباشا كان مشارك في مباراة القمة الاخيرة ...الاعلام السالب كان قال سبب الخسارة (الباشا). وهسع الكلام دا ما بعيد منهم ..ممكن تلقي ليك جماعة (مسطحين) كدا ..يقولوا ليك الهدف الثالث سببه احمد الباشا. انتوا يا مريخاب ..(الباشا) في ليبيا ما عاوزين تريحو. بطانية طارق مختار في وصيفابي قال لي عليك هسع في داعي. قلت ليه في شنو؟. ما فهمت حاجة ..غير قولي لي : في داعي ..في داعي. ثبتوا ليك ..طبعا نحن في المواضيع الزي دي صعبين ..قلت ليه : الحاصل شنو يا زول ...ان الحاجات دي بطاعن فيها. الوصيفابي سمع سيرة الطعن قعد يرجف ..وقال لي : عليك الله هسع في داعي طارق مختار يدخل الاستاد بي (بطانيتو). قلت ليه ان بقت على البطانية هينة ..انا قايلها حاجة تانية..بعدين يمكن الزول يكون بردان ...انتوا الزول في (بردو) لاحقين ..والله ناس بكرى المدينة ديل (يبردوا) بلد بي حالها. حصوة اكرم انا حصوة اكرم بخليها ..وممكن اتجاوزها ليكم.. لكن البعمل فيه رمزي صالح دا ما بقدر اتجاوزو. انت يا رمزي الحصوة من الكورة المعكوسة ما بتعرفها. سفاري السم السارح زمان كانوا بقولوا سفاري السم الهاري. هسع بقي سفاري السم السارح. انت يا سفاري وقت بتسرح كدا ...كلم (الشغيل) يغطي ليك. هو الشغيل فاضي لكن. الشغيل براهو ..عاوز ليه زول يغطي ليه. روسي في الحتة دي راجل صعب ...شنبو زي العطلة الرسمية ...شنب قاطع..الرجل دا اختلف مع زوجتو. المشكلة وصلت السما...والاجاويد ادخلو ..وناس الحلة ما قصروا.. اخر حاجة في راجل حكيم في الحلة ..قال ليهم المشكلة دي عاوزة ليها (روسي). دي ما بقدر عليها إلا (روسي). ابو المدام ..قال ليه : لكن روسي نجيبو ليك من وين والدنيا كلها في اجازة. فجأة كدا في (روسي) جاء نازل فيهم بي برشوت. قالوا ليه : ها يا روسي ها ..جيت من وين في الوقت دا. الروسي عاين ليهم كدا ..وقال ليهم : انا لو ما جيت في الوقت دا ما ببقي (روسي)...وحل ليهم المشكلة واتخارج. هيع...الروس كمان بيلعبوا. الجواسيس الحمر شفت ليك النفطي طالع يعتب. اتعوق وين الله اعلم. ربط الركبة وجابوا ليه التلج. وبرضو ما عارف الزول دا اتضرب وين؟. الولد بتألم يعني. غايتو يا النفطي إلا تكون اتعوقت في (التجسس)...لكن في الكورة ما شفنا ليك حاجة. انت وقت ما عندك لياقة بتكمل لياقتك في التجسس ليه ..وتقعد في المباراة تشكي من (الركبة). اما اخونا هيثم المرابط فمن الواضح انو عندي مشكلة في (الحبر السرى).
