عند تجولك في سوق كادوقلي لابد أن يلفت نظرك ذلك الرجل السبعيني الذي يجلس عند مدخل السوق تحت شجرة (اللبخ) الظليلة ، والذي تنتشر حوله مجموعة من (الحجبات) و(العروق) وبعض من اوراق القرطاس المهترئة عليها كتابات مبهمة لا تستطيع فك طلاسمها، يقابلك بنصف ابتسامة وبعدها ينهمك في عمله قبل أن يطلب منك الجلوس بالقرب منه ويظل في حالة صمت تدعو للقلق ،لا يتحدث معك ما لم تبدأ معه الحديث، هو الفكي أحمد عمر والذي التقت به (السوداني) بمدينة كادوقلي، ودردشت معه عن تلك (العروق والحجبات) فماذا قال...؟ همس الحديث: عندما تقترب منه يحاول الحديث معك بصوت خفيض ويطالبك بالجلوس بالقرب منه خشية أن يسمع أحد من المارة حديثك، فهو حريص علي عدم سماع المارة لأسرار زبائنه-كما قال لنا- تظهر علامات الضجر علي وجهه عندما تتحدث معه بصوت مسموع، حتى اذا كان حديثك معه خارج ادوات عمله فدائماً ما يقول لك وبصرامة: (وطي صوتك).! بداية الشغل: في بداية حديثه معنا تحدث عن بداية عمله قائلا : (انا اصلا من مواليد كادوقلي ومنذ أن كنت شاباً أعمل في صناعة الحجبات والعروق وهذه المهنة هي الوحيدة التي عملت بها)، ويضيف ل(السوداني): (انا اقدم فكي في كادوقلي وزول معروف لاني اعمل بهذا المهنة من زمن بعيد).! السوق تعبان: ويضيف في الحكي ل(السوداني) قائلاً: ( ياولدي السوق اصبح تعبان...ومازي زمان)، ويضيف: (الآن اصبح الشغل ماشي لحجبات معينة ولعروق معينة لكن في السابق كانت كل حاجاتي بشتروها سريع لكن الآن الوضع اختلف والناس بقت ما فاضية للحاجات دي وزبائني شبه اتعدموا بس بنتظر الناس البجوا من الخرطوم ينعشوا لينا السوق شوية). انواع الحجبات: وعن انواع الحجبات والعروق يقول الفكي أحمد: ( انا لدي جميع انواع الحجبات والعروق ومنها حجاب السلاح ويسمى التصريف ودا طبعاً بيمنع السلاح يضربك حتي ولو كان الشخص بالقرب منك... وعندي حجاب الطبلة ودا طبعاً اخطر انواع الحجبات فهو يستعمل في كل شيء يعني اي مشكلة حصلت ليك تقوم تقفل الطبلة وبتطلع ب(مزاااج) منها، وعندي حجاب السكين وهو ضد طعنات السكين ولدى مجموعة اخرى وكل زول حسب طلبو..! عروق محبة: عن انواع العروق يحكي الفكي ويقول: (لدي عرق لوجع البطن وعرق الشغل ودا بنفع مع اي زول عاطل من العمل فعند استعماله يحصل علي وظيفة فوراً، ولدي ايضاً عرق وجع الضهر، وهذا يقضي تماماً على آلام الضهر، وعندي برضو عرق المحبة وهو يقرب الحبايب حتي لو كان احدهم لا يحب الثاني.!! المحبة رخيصة: وعن اسعارها يقول الفكي أحمد: (حجاب الطبلة ب(35) جنيها وحجاب السلاح ب(35) جنيها وحجاب السكين ب(25) جنيها وعرق وجع الوطن ب(20) جنيها وعرق العين ب(20) جنيها وعرق المحبة ب(10) جنيهات فقط والاخير دا زمان كان أغلي عرق لكن الآن عرق المحبة اصبح رخيصا).!! التلفون السبب: وعن سبب تراجع سعر عروق المحبة يقول ضاحكا : (زمان البت والولد ما بقدروا يتقابلوا في الشارع عشان يصرحوا بحبهم لي بعض، وفي كثير منهم بجوني يشيلوا عرق للمحبة، لكن الليلة البت والولد بيتلاقوا في التلفون وفي الشارع يعني ما محتاجين لعرق محبة ذاتو)، ويضيف ضاحكاً: (يعني التلفون دا عملا فينا... لكن الناس البجونا من الخرطوم بطلبوا عروق محبة كتيرة خلاص)..!
