شطحة مغتربة.. اي زول من السودانيين القاعدين بره السودان ديل ولااستثنى احد يقول ليك والله السودان ده بقي كيف مابعرف..!! وغايتو السودانيين بقو صعبين خلاص ونوع الكلام ده ... يعنى انا مشيت امريكا مرورا بأوروبا وانتهاء بالخليج وذات النغمه وذات العلاقات الفاتره فيما بيننا بل والتوجس والحذر من بعضنا البعض ...وياهم ديل ذاتهم البجيبوهم يعرضوا ويبشروا فى التلفزيون ديل ..والفنان يكورك...نحن الساس ونحن الرأس ونحت برانا دون الناس ...والله صحى ..!! شطحه تانية السودان كلو بحضر الدوري الانجليزى ويستمتع بريال مدريد وبرشلونه وبعرفو الاحتياطي بتاع ارسنال وعندى اولاد اختى صغار كده حافظين اسماء مساعدين المدرب بتاع بايرن ميونخ ..وناس بتشوف كوره ذي الكوره...وبعد ده كلو تلقي الغلاط والصوت ده فى السما فى انو الهلال ده سيدا والمريخ ده منقطه والله ما عرفت ده شنو ده ... انفصام فى الشخصيه ...ولا لالوب بلدنا ولا عنب الناس ...ما عرفت والله.... شطحة تالتة أنتو الناس البتلقاهم واقفين تحت الطياره ديل منو ...!!؟؟ يعنى اول مالطياره تقيف فى المدرج بتلقي ليك ذي خمستاشر واحد كده جنب السلم ...المستقبل ليه زول ...والمنتظر ليه وصيه ... والجا ساكت كده جابو الدرب...السؤال ديل دخول هنا كيف ..!!لانو الحته دى مفروض مايكون فيها اى زول كجزء من إجراءات الأمن والسلامه... لكن نعتز ونفتخر بانه من المشاهد التى يطلق عليها ....فقط فى السودان ...!!! شطحة باكية مشيت لى بيت بكا فى أجازتى دى أشيل الفاتحه وانا قاعد فى الصيوان لاحظت انو عدد الواقفين يشيلو الفاتحه يتوقف على عمة المعزى وحجمها فكلما كانت الجلابيه بيضه مكويه والعمه مفلفله كان عدد الوقوف كبير واحيانا من غير اهل المتوفي ...يعنى جا واحد مسكين كده وقفو ليه اتنين كده ووقفه ذاتها تعبااانه ...والله خلوهو يشيل الفاتحه على روحو دى...بس الكويس انو الشطحه دي ماعامه .....لكن بالطريقه دى والله الفاتحه ذاتا يرفعوا عنها الدعم ...!!! شطحة اخيرة عشرين جريده رياضيه وكوره مافي يعنى النتيجة 0/20 لتبقى مجرد شطحات ولو ماكنت من ذي ديل وااسفاي واماساتى واااذلي..
