ولا نقلل من قيمة الهلال الكبير ولا صديقتنا واختنا فاطمة الصادق لكن الامر اقرب لخال فاطنة وهلال الاجمالي طبعا الهلال الايامات دي شغال اجمالي مما المدربين جوا بالاجمالي عرفت حا يفكوا بالاجمالي ومرة لاقت في (المدينة) ال(حمامات) الحزينة قامت ادتها (في حنانها) ونبدأ من وين والا من وين وعشان تاني تطلعوا المباراة تعادل ونقاط الخرطوم الوطني بنشيل بدلها لعيبة وبكري عنده تلاتة عقودات في الشهر عقد لا يسوي ثمن الحبر الذي كتب به وعقد يساوي النجوم والملايين وعقد زواجه وابشر في اديس والهلال اصبح طارد النجوم من الدفاع للهجوم وواحد مريخابي قال لي عندنا لاعب كبير عايزنو يمشي المريخ قلت ليه وديهو الهلال يقوي شوية وبنجيبو ومحمد عبد الرحمن ده لسه عليهو حبة العقد معاه الا في الشهر العقاري وموروثات الهلال قالوا...وارثين صفر ومن زمن مدني (الوارث) خشمهم ملح ملح والقال ليكم تدرنوا في الممتاز منو وبكري حا نسميهو ( العقرب) حا يقولوا ده اسمنا نحن ..حا نقول ومالو... كل حاجة منكم حلوة وانوما حلوة حلوة حلوة.. زي موسيقى انوما كلوة كلوة كلوة والسنة الجاية لازم ابو منذر يكون الناطق الرسمي علشان المريخ لما يسجل لاعب من الهلال يطلع بيان وقالوا واحد طلع فوق برج عايز ينتحر مفروض يكون عاوز ينتظر يشوف المارق تاني منو وزي الافارقة البيقطعوا البحر المتوسط لاوربا اصبح لاعبي الهلال كلهم عايزين يمشوا المريخ والمريخ قال لا للهجرة غير الشرعية اليه واي لاعب ما بيجيب صورة ليه في جريدة الاسياد ومعاه رئيس الهلال معناتها ورقو ناقص وعلى الاقل يكون عنده صور مع صحافيين وتصريح يقول فيه الهلال بيتي والمريخ طبعا مش بيت زول ده مكان عمل وامس في مادح صاحبنا اتجلد المسكين ما عنده شغلة بالكورة مدح لهلالاب في مناسبة بدأ ب(بلح المدينة) ما عرف تاني الحصل ليهو سنو زميلو قال والله اضرب ليكم لتلاتة 999 اتجلد هو ذاتو ما عارف انو التلاتة ممنوعة هناك تتقال وانو التسعة رقم بكري والمريخ شال السنة الفاتت رقم 8 والسنة دي رقم 9 ورقم عشرة وقالو جمال فلس قلنا ليهم هو المدينة بقروش والهلال قال يا مهند الطاهر يا الخبير الطاهر اختار الصفارة وكفارة ليكم وصفارة ليكم وعايزين يدمغوا جمال بالافلاس ولاعبينهم بالاخلاص طلع لا جمال عنده افلاس لا لاعبينهم عندهم ليهم اخلاص وواهم حاجة الاخلاص والخبر الاكيد تاني بيجي من اثيوبيا جنب مصانع الكاردينال وانتوا ابو منذر شغال في مصانع الكاردينال والا ده كلام جرايد هلال طبعا كلام جرايد الهلال فشنك واريتو الاتحاد العام عمل التسجيلات في وقتها القديم اكان لسه بكري في الهلال وعندنا اقتراح المريخ يشيل بكري المدينة ويخلي ليهم بكري عبد القادر وواحد هلالابي من بحري جا سكن حدانا قال لي والله بعت بيتي في ميدان (عقرب) وواحد هلالابي لدغتو عقرب يرجف من الحمى والالم وعرقو يتفصد وقال ليهم والله ولا حارقاني
