يخلط السودانيون البسطاء بين لفظي القرين والبعاتي ويخطئون في ذلك. اذن ماهو القرين؟: # ورد ذكر القرين عدة مرات في القرآن الكريم (سورة ق) «وقال قرينه هذا ما لدي عتيد». «قال قرينه ربنا ما أطغيته ولكن كان في ضلال بعيد». للقرين تعريف في اللغة وفي الشرع: # العلماء عرفوا القرين على انه الصاحب او الرفيق. القرين يتطابق في الصفات مع قرينه. # الحديث: «ما من احد الا وكل به قرينه». «ما من احد الا وكل به قرينه من الجن وقرينه من الملائكة». # عندما يبلغ الانسان مرحلة البلوغ ومرحلة التكليف يكون له قرينان. ما هو البعاتي؟: # البعاتي هو فهم ولفظ سوداني يقصد به شخص يقوم بعد وفاته وتحكى عنه القصص الخيالية والروايات المختلفة ولكن بعد العلم والاستنارة اختفى هذا المفهوم. نسمع القصص عنه ولكن ما عرفنا في زول اكله البعاتي، اهلنا القدام بقولوا ان بنتاً قتلت وقامت من موتها لتدل على الذي قتلها ولذا قبلوا بتفسير «ترب البنية». قصص عن البعاتي: # عندنا في ودنوباوي واحد (شارطوه) امشي يدق (وتد) في مقابر احمد شرفي «نص الليل» فذهب مرعوباً ودق الوتد ولكن في جزء من جلابيته وعندما اراد الرجوع جلابيته ظلت مثبتة في الوتد وافتكر ان البعاتي امسك به وقعد يكورك ويصرخ لحدي ما حصلوه وفكوا الجلابية!. # في ودنوباوي في واحد جزار بحب الحصين واخوه خواف جداً ولم يعلم ان اخوه اشترى حصان، جاء ونام، الحصان عطش فمشى نحو «قُلة الموية» وحاول الشرب منها ولكن القلة دخلت في وجهه ولم تطلع وجاء فوق سرير صاحبنا الخواف وبدأت القلة في تسريب المياه الباردة وصحى اخونا مرعوباً وبدأ يكورك البعاتي البعاتي وهرع ناس الحلة وهدأوا صاحبنا الذي قيل انه احتاج لتبديل ملابسه الداخلية!. هدايا الحلقة: 1. مسطول قالوا ليه لو انت بتصلي ودخل عليك اسد بتكمل الصلاة ولا تجري، قال ليهم لو ما احتجت اجدد الوضوء ممكن اكمل الصلاة!. 2. واحد بتاع شمارات وحب استطلاع قالوا ليه لو بطلت حب الاستطلاع حنديك ? مليون جنيه قال ليهم طيب ? المليون الثاني حتدوه لي منو؟. 3. واحد عبيط راكب في الحافلة عجبته بت ركبت جمبه لمن نزل كتب نمرة الحافلة!. 4. المضيفة قالت لي واحد صعيدي في الطيارة تحب اجيب عشاء كامل؟ قال ليها ليه هو كامل ما عايز يتعشى؟. 5. واحد راكب في الطيارة ومعاه قرد، المضيفة سألته هل هذا الحيوان معك؟ نط القرد قال ليها ايوه!. 6. واحد حرامي قرر يتوب سرق شريطين من شرائط عمرو خالد!. 7. غبي حبّ يِغرّق صاحبه قام خرم ليه المايوه بتاعه!. 8. طالب جنه يعمل بخرات في الامتحان طلع دايخ بعد الامتحان لانه كتب بخرته في المروحة!. 9. واحد شين اتزوج واحدة شينة جابوا ولد شين رموه!. 10. جعلى كريم اتزوج واحدة كريمة جابوا تيمان حلف على الداية الا تشيل واحد!. 11. الزوجة قالت لأمها زوجي إتأخر انا خايفة يكون عرس فيني قالت ليها اتفاءلي خير امكن داسته عربية!. 12. المرأة صحت راجلها الساعة 2 صباحاً وقالت ليه قوم في صوت حرامي قال ليها قومي انتي امكن تكون حرامية!. 13. المرة قالت لزوجها تعال وديني المستشفى امي ودوها المستشفى عندها تسمم قال ليها مالا عضت لسانها؟. 14. واحد هراش قال لصاحبه امبارح خليت مرتي تركع على رجليها قال ليه قالت ليك شنو؟ قال ليه كانت بتقول لي «اطلع من تحت السرير لو انت راجل!. 15. الراجل كان بيقرأ في كتاب «الرجل سيد المنزل» زوجته قالت ليه انت ما عايز تبطل قراية الكتب الخيالية دي؟. خاتمة: # علمنا الرسول صلى الله عليه وسلم كيف نتجنب قرين الجن عندما ننام او نخرج من البيت وان نحرص على الصلاة وقيام الليل عندما يكون الانسان على وضوء فلا يقربه اي قرين سوء حتى لو كان من البشر، وان نقول قبل النوم «اللهم اسلمت نفسي اليك وفوضت امري اليك وألجأت ظهري اليك رغبة ورهبة اليك لا ملجأ ولا منجا منك الا اليك آمنت بكتابك الذي انزلت ونبيك الذي ارسلت فإن مت مت على الفطرة» # و»بسم الله توكلت على الله ولا حول ولا قوة الا بالله ما شاء الله كان وما لم يشأ لم يكن حسبنا الله ونعم الوكيل» # اللهم احفظنا جمعياً. ودمتم،،، مع تحياتي
