الفلهمة والقرضمة هي نوع من التعالي الذي يمارسه شخص ما. الفلهمة قد تكون من الفهم أو إدعاؤه، أما القرضمة أو «الكردمة» فالفهم الشائع لها هي نوع من التعالي. لكن بالبحث في المعاجم لم نهتدِ الى أي كلمة عربية مشتقة منها وحاولنا اللجوء للأخ حساس محمد حساس د. محمد عبد الله الريح ولم نصل إليه. البعض يقول إنها كلمة تركية وآخرون يرجعونها الى (الكردمة) وهي نوع من الورم أو الإنتفاخ والزول لمن يتقرضم يصر وجهه وينفخ أوداجه. الحناكيش الآن يقولوا ليك فاكيها في روحه وللتمويه يختصرونها بالحرفين الإنجليزيين (F.R)، وواحدين يقولوا ليك (مضيّقة) شديد أو مديها كوز، وآخرون يردفون مع متقرضم كلمة (متقندف) أو (مزررة) لي آخر زرارة والمتقرضمون عندهم وهم ان الدنيا لا تسير بدونهم وما عارفين حواء والدة، والأمثلة كثيرة: 1/ الفلهمة العوراء وشيل البطارية في القمرا. 2/ العربي لمن يتفلهم يعمل في سرواله جيب. 3/ البوبار وفك الزرار، وجيب الثلاجة في بيت الإيجار. هدايا الحلقة: 1/ واحد جزمته جديدة اتسرقت في الجامع يوم الجمعة طوالى مسك المايكروفون وقال الحرامى السرق الجزمة لو ما جابة راجعة انا حأعمل فيه زي ابوي ما كان بيعمل، الحرامى قال يمكن ابوه كان بيقتل الناس ولا بضبحهم، قام رجع الجزمة ولما الراجل مرق برة الجامع الحرامي سأله ابوك كان بيعمل شنو؟ قال ليه كان بيمشى حفيان!. 2/ واحدة شينة شنا مرة لقاها عفريت قال ليها اطلبي أي طلب انا حانفذو ليك. قالت ليه عايزة كل الشباب يقعوا فيني. العفريت قال ليها بكرة الصباح حأقلبك بلاعة!. 3/ المرة قالت للشحات هاك بنطلون راجلى المرحوم ده، الشحات قال ليها شكراً والله راجلك مات في الوقت المناسب لانه لو عاش يوم اضافى كان مشى عريان!. 4/ الخدامة الجديدة ست البيت قالت ليها قبل ما تنومى نحن بنفطر الساعة 8 صباحاً، الخدامة قالت ليها كويس بس لو ما صحيت مافى داعى تنتظرونى!. 5/ واحد من اهل الخيال قال لاصحابو تعرفوا في اوروبا الناس بتعمل شنو لما تنزل المطرة؟ قالوا ليه لا، قال ليهم بخلوها تنزل!. 6/ واحد ضغط على نفسه شديد إنكسرت. 7/ واحدة ثرية عندها ثلاث بنات متزوجات قالت تمتحن أزواج بناتها مشت تزورهم ولما خرجت من الأولى رمت نفسها قدام العربية. قام نسيبها شالها وجرى بيها للمستشفى، تاني يوم رسلت ليه عربية كرولا جديدة مكتوب عليها من حماتك. عملت نفس الشئ مع زوج بتها الثانية برضو نسيبها شالها وجرى بيها المستشفى. تاني يوم رسلت ليه عربية كرولا جديدة ومكتوب عليها من حماتك، وعملت نفس الشئ مع الثالثة ولما رمت نفسها قدام العربية قام نسيبها سابها مجروحة وبتنزف لحدي ما ماتت. صحا مع الصباح لقى عربية (لاند كروزر) جديدة مكتوب عليها من نسيبك. 8/ واحد جنو كورة ومعرس أربع نسوان شاف ليه واحدة عجبته قام خزن الكبيرة في فريق درجة تانية. 9/ واحد في فراش الموت قال لمرته لو مت إتزوجي جارنا مصطفى. قالت ليه إشمعنى مصطفى؟ قال ليها قبل كدة عمل فيني مقلب. 10/ تلميذ قال لزميله كويس انو امريكا اتهمت طالبان مش المدرسة كلها. 11/ نملة راقدة وقعت فيها رزة بقت تقول «أحدٌ أحد». 12/ البخيل ضرب اولاده لانه لقاهم مشغلين المروحة على نمرة خمسة وهم ثلاثة. 13/ صاحب خيال قال لصاحبه ليه المخطوبين بيمسكوا إيد بعض؟ قال ليه عشان الدبل ما تقع. 14/ واحد من أهل الخيال رفضته خطيبته قاعد زعلان وسارح، امه قالت ليه ولا يهمك حواء والدة قال ليها بالله! ولدت بتين؟. خاتمة: بالشرح الذي تم للقرضمة والفلهمة عرفنا ان المجتمع قبل فترة رفض هذا التعالي والتكبر، والآن ونحن في زمن العولمة التي أصبح فيها العلم متاحا للجميع وأصبح العالم قرية صغيرة، نرفض هذا السلوك. الاسلام يطلب منا التواضع «ومن تواضع لله رفعه». «ولو كنت فظاً غليظ القلب لانفضوا من حولك». «وأقربكم مني مكانة يوم القيامة احاسنكم أخلاقاً». * ونقول للمتقرضمين روقوا المنقة فآخرها كوم تراب. ولكم حبي وودي.