# هناك مثل يقول كلام الطير في الباقير هذا المثل يشير الى منطقة الباقير الزراعية المشهورة والتي تكثر فيها الاشجار ومع وجود الاشجار تكثر الطيور بكل انواعها وهي تشقشق وتحادث بعضها البعض باصوات لا نفهمها وربما كانت تسبح الله سبحانه وتعالى المهم صار المثل يطلق على الكلام الغير مفهوم او الذي يصدر من شخص (فكت معاه) او (كهربتو) زادت او جن او اصبح (جنريتر) كما يقول الحناكيش. # اسمحوا لنا في هذه الحلقة ان نتكلم بلغة الطير ونفسر بعض المصطلحات العصرية والامثال القديمة: # غسيل الأموال: غسيل الاموال في المصطلح الاقتصادي معناه ان هناك فلوس آتية من مخدرات او طرق غير شرعية ويسعى اصحابها لاكسابها الشرعية او ادخالها الدورة الاقتصادية عن طريق المصارف اى توريدها في بنك او شراء مؤسسات وبيعها بعد حين وتعرف بالانجليزي Laundry Money. ولكن (المقربين) عرفوا غسيل الاموال في السودان هو عملية تفتيش الزوجة لجيوب بناطلين زوجها او جلابيته قبل رميها الغسالة او اعطاء الملابس (لود اليومية) او ارسالها للغسال. # زرة كديس في تكل عزباء: العزباء هي المرة المطلقة التي اعطيت باقي حسابها: اي طلقوها بالتلاتة وما فيها (رقشة لعرس تانب) وهي في الاصل تعمل معلمة او احالوها للصالح العام وتعيش على معاشها الشهري الذي تصرفه (بالتلتلة). العزباء توكلت على الله واشترت كيلو لحم ضان و(سبكت الحلة) وقالت على مابال الحلة ما تبرد تمشي الجيران لعشرة ونسة وقفلت باب التكل لكن نست الشباك فاتح جات كديسة قضت على الحلة وكيلو الضان وجات صاحبتنا العزباء ولقت الكديسة (بتقرقش) في باقي العظام قامت قفلت الباب والشباك وشالت ليها عكاز وعينك ما تشوف الا النور. # الاسم الحركي للزوجة: عملت استطلاع مع صحباني عن تسمياتهم لزوجاتهم وطلعت بالحصيلة الآتية: الحاكم العام، المعارضة، الحكومة، وزير الداخلية، ام المعارك. # من قاموس لغة الحناكيش: أ?. أيامك طحنية: ايامك حلوة. ب?. فردة: صاحب او صديق، الشخص الذي يقولها يقصد انه هو وفلان يكونان ثنائي او جوز عشان كده هو فردتك. # طالعني الخلا: زمان لما اثنين يتشاكلوا بيقولا لبعض طالعني الخلا (سينا) الله يرحمه قال العاصمة شرف الدين بانقا ما خلا فيها حتة يطالعوا في الناس للخلا. # الحيطة والزيطة والزمبريطة: ماذا تعرف عن الحيطة فيما يلي نرصد بعض اسماء الحيط المشهورة: # حائط برلين: وهي الحيطة المشهورة التي كانت تفصل بين الالمانيتين الشرقية والغربية والتي ازيلت بعد الوحدة. # حائط المبكى: وهو الحائط المقام قرب المسجد الاقصى والذي يصلي امامه اليهود ويجهشون في البكاء ظناً منهم ان ذلك يسثط عنهم ذنوبهم. #الحيطة المائلة: اسم مسرحية معنى قريب لمعنى بعيد زي (العمة المايلة). # انواع الحيط في السودان: 1. حيطة الجالوص (زبالة) 2. حيطة مسلحة 3. حيطة مطرطشة 4. الحيطة القصيرة هدايا الحلة: حاجات عن الحيط: 1. حرامي جاء ليلاً وتلب حيطة احد المنازل وهو لا يعلم ان هناك بئر جديدة خلف الحائط ولم تغطى بعد وعند القفز سقط في فتحة البئر ولأن الظلام كان حالكاً استمر سقوطه لمدة طويلة وعند ملامسته لارض البئر قال قولته المشهورة (سنة يالحيطة). 2. الحيطة وكرة القدم: وتعني صف من اللاعبين يصطفون على بعد ست خطوات من مكان تنفيذ الفاول للخصم ووقوف الحيطة بغرض حماية مرمى الفريق. لاعب (ايده خفيفة) وقفوا ليه الحيطة بدل ما يشوت الكورة جرى نط الحيطة. 3. الحيط والأمثال: أشهر مثل عن الحيطة يضرب للانسان (المخلوع) الذي لا يستطيع التركيز يقولوا ليك الزول التقول واقعة فيه حيطة. الحيطة والحذر بالعربي الفصيح يقول للشخص خذ الحيطة والحذر يعني اعمل حسابك وكن حذراً. المصري بقول انا راجل في حالي داياً ماشي جمب الحيط وكافي غيري شري. # الظيطة والظمبريطة: معناها الدوشة جات من وين. 4. واحد معرس واحدة رغاية مع صحباتها عادي بتتكلم في التلفون ساعة وساعتين وجنها كروت شحن مرة جاتها مكالمة اتكلمت معاها نص ساعة بس لان النمرة كانت غلط!. 5. واحدة حنكوشة مشت الحج لقت زحمة في رمي الجمرات قالت ليهم مافي فرع تاني؟. 6. واحد جنه ينبز لحدي ما ناس الحلة طردوه مشى طلع فوق الجبل وقال ليهم يا ناس الحلة انا خليت النبز السمع سمع والما سمع الله ينعل ابوه!. 7. قرادتين ماشين في الشارع بالنهار واحدة قالت للتانية نمشي كداري ولا نركب ملح في كلب. 8. الاستاذ في حصة الرياضيات بعلم في التلاميذ الطرح قال ليهم كان معاي في جيبي 5 جنيه وقع منها 2 جنيه يبقى كم في جيبي تلميذ قال ليه يبقى جيبك فيه خرم!. 9. عجوز شافت ابليس قالت اعوذ بالله منك ومن شكلك قال ليها انتي يعني هيفاء وهبي!. 10. واحد في الشاطي من أهل الخيال في واحد بغرق كلما يرفع ايده عشان الراجل ينقذه بيقول ليه وعليكم السلام!. خاتمة: # ربنا يحفظ عقولنا دايماً اللهم متعنا باسماعنا وابصارنا ما احييتنا واجعله الوارث منا. مع تحياتي،،،