# انت شايت على وين مصطلح بتاع كورة ودافوري، زمان في الدافوري لما يقسموا الميدان مرات بقسموه هلال مريخ او حلة ضد حلة او بقولوا لكل اثنين انتو (اتساموا) يعنى كل زول يشيل ليه حجر او فلة بيبسي ويخلوا رؤساء الفريقين يعزلوا ومعلوم انه في كرة القدم كل فريق يمثل نصف الميدان. والماتش وهو يشبه المعركة الحربية، فهناك الدفاع والوسط والهجوم وهناك الجهاز الفني والمدرب (الكوتش) وهناك الجهاز الاداري الذي يمثل مجلس الحرب او البنتاقون المهم كل فريق يسعى للوصول لارض الخصم والنيل من مرماه (ولما نالوا مرماهم جفونى وقالوا عب مجنون) بمعنى آخر كل فريق يشوت رماته على مرمى الفريق الخصم واذا في زول شات على مرماه تبقى مشكلة ومفارقة. # هسى امريكا شاهدة وموقعة على اتفاقية الجنوب ولكن ما شايتة مع فريق الاتفاقية وسعت للانفصال وفي اتفاقية دارفور مناديبها عملوا القرعة وكانوا حكام وسط ورجال خطوط ولابسين نفس شعار الاتفاقية ولكن برضو شايتين مع الفريق الآخر ولاعبين لعب (ضاغط) و(هاك ياكروت حمر) وانذارات وعقوبات اقتصادية وادراج في قائمة الدول الراعية للارهاب وتحريش لتشاد، ما معروف المباراة دي نتيجتها حتكون كم والمشكلة في ان الشايت ضدك انت ما بتكون متوقع منه ذلك وكما قال سيدنا على (اللهم اكفنى شر اصدقائي اما اعدائي فانا كفيل بهم). أمثلة لهدذه المفارقات: 1. يوليوس قيصر امبراطور روما العظيم كان يثق في صديقه بروتس ومفتكره مخلص له وواقف معه وعندما فوجئ بخيانة الوزراء والغدر والطعن كانت طعنة بروتس عند قيصر اكبر من طعنة السكين وقال له وهو يلفظ انفاسه الاخيرة (حتى انت يابروتس)!. 2. واحد احوص بجهز لى عرس بته بدل يضرب حيطة منزله جير ضرب حيطة جاره، وللصدفة برضو جاره طلع احوص ولما شافه بيضرب في الحيطة قال ليه عندكم مناسبة ولا شنو بتضربوا في بيتكم بالجير؟. 3. الجماعة ذهبوا في رحلة صيد كل شخص ببندقية فيهم واحد احوص وكما يدلعه مزمل ابو القاسم (حووصة) وفي واحد خايف من (حووصة) ولاحظ انه بدل يصوب نحو الارنب يصوب نحوه فسأله انت مصوب نحوي ولا نحو الارنب؟ قال له نحو الارنب قال ليه انت صوب نحوى عشان تقتل الارنب!. 4. واحد احوص شاف بت الجيران قال ليها ازيكم ياشباب، بت الجيران طلعت هي ذاتها (حووصة) قالت ليه خلاص اتلميتو يا اولاد الحلة لى قلة الادب!. 5. شاعر حلمنتيش قال كان قصدى احب اختك مادام الريدة وقعت فيك بختك!. 6. قيل ان ملكة مدللة قالت للملك انها لم تر شخصاً يصطاده تمساح وتريد ان ترى ذلك رأى العين وكلف وزير شليق بهذا الأمر فعمل احتفالاً ونصب الخيام والكراسي على ضفاف النهر وأمسك برجل مسكين ماشي في الطريق وأوثقه امام (القيفة) في انتظار التمساح وانتظروا اكثر من ساعتين ولم يظهر التمساح فقال الوزير للرجل (خج) الموية حتى يشعر بك التمساح وهنا قال الملك للوزير يظهر ان خبرتك كبيرة في هذا الأمر اذهب حل محله وفعلاً ذهب (خج) الموية وجاء التمساح وابتلعه ولسان حاله يقول دي نتيجة الشوت ضد المساكين!. 7. الجماعة الفتوات لاقوا راجل مسكين في مركز الانتخابات (قبقبوه) وقالوا ليه انت معانا ولا مع الخيانة قال ليهم معاكم طبعاً، قاموا جلدوه وقالوا ليه نحن الخيانة يامولانا!. 8. بينما كان رجل وزوجته يتجولون في سوق تجارى ضخم راحت منه وقدر ما فتش عليها وسط الزحام لم يجدها وفجأة رأى واحدة جميلة جداً مشى ليها وقال ليها تسمحى لي بالحديث معك لدقيقة، قالت ليه ليه؟ قال ليها لأنى بمجرد ما اتكلم مع اى واحدة جميلة مرتى بتجى ناطة من وين ما بعرف!. 9. المرة قالت لراجلها اليوم عيد الحب وحلمت انك اشتريت لى احفظ مالك ما معنى هذا الحلم؟ قال ليها في المساء حتعرفى، ولما جاء في المساء جاء وهو يحمل علبة هدايا انيقة فأعطاها لها بمناسبة عيد الحب ولما فتحتها وجدتها كتاب تفسير الأحلام!. 10. دكتورة اسنان سألوها هل اتزوجتي؟ قالت (لثة). 11. واحد وقع في السلم على ظهره واتألم مشى الدكتور كتب ليه مرهم وقال ليه ادهن مكان الاصابة دهن السلم!. 12. دكتور الاسنان قال للمريض لماذا تصرخ وانا لسة ما لمست اسنانك قال ليه انا بصرخ عشان انت عافصنى!. خاتمة: # امريكا كانت شايتة مع مصر وزميلها الكوتش حسنى مبارك ولما شافت انو خسر المباراة طلعتو بالكارت الأحمر، وكذلك فعلت برضو مع كابتن زين الدين بن على في تونس، والآن اخرجت الكارت الاحمر للقذافي الذي يرفض الخروج من الميدان. الله يستر على ناس الحركة الشعبية. مع تحياتي،،،