كشف الدكتور الفاتح حسين عبد الله استشاري الباطنية والمناظير عن العلاقة بين اكل الفول وعدم النوم وقال في رده على مستمعة اتصلت ببرنامج عيادة على الهواء في الاذاعة السودانية المشكلة في عدم النوم بعد اكل الفول ما في الفول المشكلة في النوم لأنو إذا شربتي كباية لبن ونمتى طوالى لا تهضمى لأنو في أثناء النوم الهضم بيقل بنسبة 50% يعنى أجهزة الإنسان لما يكون نائم 50% تنفس و50% ضربات و50% هضم و50% حركة الأمعاء و50% حركة كلى كلها بتنوم معاك فنحن بننصح الشخص حتى اللبن العادي دا لا يشربه وينوم يعنى الفول ما عنده مشكلة لأنو الفول عبارة عن ألياف عيب ألياف الفول إنها سميكة وعند بعض الناس بيكون هضمها صعب شوية لكن ما عند كل الناس يعنى الفول عند بعض الناس بيريحهم راحة تامة لأنو الألياف ذي ما قلنا علاج ونحن دائما بننصح ناس المصران لأنهم هم بالليل يتناولوا الخفيف بدري بين الأكل والنوم لي اى زول لازم يكون ساعتين لكن الإنسان العادي يأكل اى شيء إن شاء الله كوارع اى حاجة لكن بين الأكل والنوم يكون ساعتين أما مريض المصران بننصحوا بي انو يتناول مشتقات الألبان بالليل يا لبن إذا هو من ال50% الذين يهضموا فدا كويس معاى لبن بي اى شيء سواء برغيف أو شعيرية أو اى شيء بعداك إذا لا يتغير الى زبادي لأنو الزبادي كويس جدا لأنه من المهضومات.
