حسن خليفة العطبراوي هذا الشلال المتدفق وطنية وإحساس بالجمال كان نجماً بارزاً في محاربة الاستعمار بأغاني الحماسة التي اشتهر بها بالرغم من انه كان يعمل جزاراً في عطبرة إلا ان احساسه القوي واختياره للقصائد وأداءه الممتاز كان مثل الشوكة في حلق الاستعمار. دعونا تردد معه: 1- يا غريب يلا لي بلدك: يا غريب يلا لي بلدك لملم عددك وسوق معاك ولدك بئس الاستعمار في شمس أو ضل تاني ما بنتغش واستلابنا يطول شعبنا اتحرر من قيود الذل نزلوا العلمين يلا فوتوا الكل يا غريب يلا لي بلدك قالوا في الميثاق كل زول بلدو وديل بواقيكم لسه ليه قعدوا يلاآآ يلا لي بلدك 2- أنا سوداني أنا أيها الناس نحن من نفر عمروا الأرض حيثما قطنوا يذكر المجد كلما ذكروا وهو يعتز حين يقترن حكموا العدل في الورى زمناً أترى هل يعود ذا الزمن ردد الدهر حسن سيرتهم ما بها حطة ولا درن نزحوا لا ليظلموا أحداً لا ولا لاضطهاد من أمنوا وكثيرون في صدورهم تترى الأحقاد والإحن دوحة العرب أصلها كرم وإلى العرب تنسب الفطن أيقظ الدهر بينهم فتناً ولكم أفنت الورى الفتن ٭٭٭ يا بلاداً حوت مآثرنا كالفراديس فيضها منن فجر النيل في أباطحها يكفل العيش وهي تحتضن وتغنى هزارها فرحاً كعشوق حدا به الشجن غير هذي الدماء نبذلها كالفدائي حين يمتحن بسخاء بجرأة بقوى لا ينئ جُهدها ولا تهن 3- كما تغنى للمحبوبة: نسانا حبيبنا الما منظور ينسانا مالو سافر روح ما غشانا حليل الخوة الماقدر عشانها نسانا حبيبنا وعارف ريدنا هوله عشانه بتمشي قلوبنا وراء رحيله يسافر بينا لداره ومقيله نقول فارقنا سافر يا حليله ٭٭٭ كيف العشرة هانت لي قليبو الزمان نساها نسى اخلاص حبيبه يا معذبنا وما قادرين نسيبه نقول لا بد أن الشوق يجيبه ٭٭٭ طول يا ليل لي همي واساي واشهدي يا نجوم سعدي وبلاي خلاص في حبه ضاع أملي ورجاي بقيت وحيد نجوم الليل عزاي 4- وغنى للهلال: هلال العظمة هلال علينا افرح وغنى يا شادينا لذا كرمه الهلال الثقافي أجمل تكريم اذ أرسل له عربة خاصة والبسه شعار الهلال وهو يردد هلال العظمة. هدايا الحلقة: /1 واحد ساق زوجته لمتحف الآثار وولده الشقي، الذي سأل أبوه دا تمثال منو يا أبوي، الأب: لا أعرف، الولد: صورة منو دي يا أبوي، الأب: لا أعرف، الولد: من هذا المحنط يا أبوي، الأب: لا أعرف. الأم قالت لي ولدها: خلاص بطل اسئلة، أبوه قال ليها: خليه يسأل عشان يتعلم!!! /2 تلميذان تأخرا عن الدراسة، الأستاذ سأل التلميذ الأول لماذا تأخرت؟ قال ليه حلمت إني مسافر، المدرس سأل التلميذ الثاني: طيب أنت اتأخرت مالك؟ قال ليه: حلمت اني قاعد اودع فيه! /3 المدرس سأل التلميذ هل الثعلب يلد أم يبيض؟ التلميذ: يا استاذ الثعلب مكار يمكن تتوقع منه أي حاجة. /4 جعلي لقى خاتم سليمان دعكه عمل تشلخات للعفريت. /5 واحد غبي اتهموه بالذكاء طلع براءة! /6 حكم كورة مشى مقهي طلب واحد - صفر. /7 المرأة لصاحبتها : زوجي بقى نساي خلاص كل يوم يسأل عن مفتاح الشقة ومفتاح العربية ومفتاح المكتب، المرأة الثانية: أخير انتي أنا راجلي نساي أكثر من راجلك كل يوم من الصباح يقول انتي ما غريبة على أنا شفتك وين؟ خاتمة: هذا العبقري العطبراوي كان ابداعاً يمشي على قدمين، ألا رحمه الله بقدر ما قدم للسودان وبقدر ما ألهب حماسة السودانيين لمحاربة الاستعمار. مع حبي وودي،،،