٭ رسولنا الكريم يقول البخيل من ذكرت عنده ولم يصل علي. ذكر سيد الخلق والصلاة عليه واجترار سيرته ومجاهداته من أحب الأشياء للمسلمين عامة وللسودانيين خاصة والآية الكريمة التي تقول (إن الله وملائكته يصلون على النبي يا أيها الذين آمنوا صلوا عليه وسلموا تسليما) ويقال ان الصلاة عليه هنا هى الذكر والمدح. المداحون الاوائل زي اولاد حاج الماحي وحاج التوم من الله وود أب شريعة كان لهم دور كبير في تثقيف الناس عن السيرة النبوية وزرع حب رسول الله صلى الله عليه وسلم في نفوس السودانيين. المداحون يجدون الاحترام والعون من عامة الناس ففي أي مناسبة أو في الاسواق عندما تبدأ حلقة المديح ويضعون كيس الطارات على الارض ويأتي المحبون ويعرضون ويرمون مبالغ مالية تشجيعاً لهم. الآن تطورت فرق الانشاد والمديح وادخلت إضافة للطارات الآلات الموسيقية كالاورغان والساكس وصار لهم (عداد) زيهم زي الفنانين، في السابق كان المداحون يذهبون للقرى (بالحمير) ويمكثون في أي قرية كذا يوم في ضيافة اهلها ويقومون بالواجب نحوهم، هناك طرف ونكات حدثت في هذا الجانب نتعرض لها فيما يلي: 1/ في مداحين نزلوا عند واحد جلدة مدحو كثيراً ولم يذبح لهم وشبكهم لقيمات وشاى احمر بعدما تعبوا قال ليهم خلاص اختموا لينا المديح بمدحة (أسد الله النتر) قالو ليه انت لو عايز أسد الله ينتر ما كان ضبحت ليه؟ 2/ المداحين نزلوا عند رباطابي كل الوجبات ام رقيقة بى كسرة (دبغهم دبغ) وهم بحبوا القراصة بالدمعة قاموا يقطعوا ويسمعوا فيه، واحد قال للثاني والله نحن القمح عندنا في البلد يرقد لى حوله قام قال ليهم ما لازم القمح يرقد لى حوله انتو قاعدين ليه. 3/ ابو داود - رحمه الله- قال في سبعة مداحين جوا بى حميرهم في قرية عند واحد مفلس قالوا ليه دايرنك تعشينا وتعشي حميرنا والصباح تعمل الفطور والغدا والعشا وتغسل لينا هدومنا ونقعد معاك اسبوع بعد داك تدينا الفيها النصيب ونمشي، قال ليهم ان شاء الله الواطة تصبح لا أنا لا انتو ما نتلقي. 4/ مداحين برضوا نزلوا مع واحد شبكهم كسرة بى ملاح كسرة بى شطه - لحم مافي- الراجل عنده عتوت سمين وكانوا مأملين انه يضبحوا ليهم لكن الراجل عمل نايم الجماعة وهم مسافرين العتوت جا ينطط قدامهم، قاموا قالوا للعتوت والله انت ما قصرت عملت العليك. هدايا الحلقة: 1/ زوجة الجزار سألت زوجها اذا التيمان الفي بطني ديل طلعوا بنات نسميهم منوا؟! قال ليها واحدة كيلو باترا والتانية كيلو لحمة. 2/ الزوجة: سأضحي بنصف عمري لو اشتريت لي عربية. الزوج: في الحالة دي حاشتري ليك عربيتين يا روحي. 3/ المدرس: لماذا سمي شهر اغسطس بهذا الاسم؟ التلميذ: لأنه واقع في الصيف والناس يغطسون فيه في البحر من شدة الحر. 4/ شرطي حركة ولدوا ليه ولد لا يفهم إلا بالاشارة. 5/ الاول لصاحبه من اهل الخيال: ولدي بقى يمشي من كان عمره ستة شهور. صاحبه: بالله يكون وصل وين؟ 6/ ابو داؤود سمع واحد بيقلدوا في اغنية - كيف الحياة غير ليمك ومن بعدك اصبح حظي زي لون هضليمك يا نعيم الدنيا، الفنان غناها كيف الحياة غير نيمك ابو داؤود قال ليه غنيها تاني برضو ردد غير نيمك قال ليه طيب قول واصبح حظي زي لون برسيمك. خاتمة: احمد يا حبيبي سلام عليك يا مسكي وطيبي سلام عليك. وسلام على كل من اسهم وردد مديح المصطفى صلى الله عليه وسلم. مع تحياتي
