# تحدثنا سابقاً عن البذخ في بعض الاماكن في فراش البكا وتحدثنا عن (الطيارات) بتاعين الميتات. تحدثنا عن قشرات النساء ودقات الدهب الجيدة وحنة البكا التى يعمل لها النشادر والسبغة عشان تلحق المناسبة. هذه الحلقة تتم بناءً على طلب ومساهمة بعض الاصدقاء لالقاء الضوء على جوانب جديدة في البكيات لا تخلو من الدهشة والحيرة. تحدثت مجموعة من هؤلاء عن الجوانب الايجابية التى تُعمل مثل: 1/ التبسيط في الاكل والشراب (فول وطعمية وفتة وموية وشاي) الخدمات يقوم بها ابناء الاسرة. 2/ ختم القرآن بواسطة مجموعة او خلوة والدعاء للميت. 3/ اعطاء المساكين الذين يحضرون دمورية او دبلانج ومساعدات مالية. 4/ عدم النواح والثكلى وكشف الراس وذر الرماد او التراب عليه. 5/ عدم الحد ولبس الخشن من الثياب (فردة، قنجة او ثوب فوتة مثلاً). عادات دخيلة: 1/ ظهور حانوتية يتولون الدفن زي المصريين ويمشوا وراء الجنازة ويرددون (وحدوه: ما دايم الا وجه الله). 2/ استئجار نائحات. # اهداني صديق مداوم على اليوميات مثالاً مقتطفاً من كتاب عجائب الخرطوم السبع، يتحدث المقال عن ظاهرة استئجار (نائحات) في البكيات من بعض الاسر يقول الكاتب (في عزاء صديق له في وسط الخرطوم ظهرت امرأتان في حالة بكاء وعويل وهما تدوران حول المبنى الداخلى وبقريحته عرف انهما ليستا من اقرباء المرحوم ولا حتى من معارفه ولما اشتد به (الشمار) سأل شاباً من اقارب المرحوم عن المرأتين فقال له (ديل يا عمو بكايات) يعنى ببكن بالقروش. المروق بأجرهم كل ايام المأتم والعاجز يكتفى باليوم الاول فقط. السيناريو: # قبل وصول النائحة الى منزل العزاء تطلب (C.V) اى السيرة الذاتية للميت من زوجته او ابنته الكبرى: 1/ العمر: 70 سنة. 2/ المهنة: ضابط بالمعاش وله وكالة سفر وسياحة. 3/ المستوى التعليمي: دبلوم الحربية زائد بعض الكورسات في الترجمة والحاسوب. 4/ اسماء الابناء: فيصل، احلام، رابحة، عواطف. 5/ هل قام باى عمل بطولى: نعم محاولة انقلاب فشلت في فترة الرئيس نميرى. # تأخذ النائحة المعلومات وتعقد اجتماعاً عاجلاً بزميلاتها وبعد التداول والبروفات يخرجن للملأ وهن يرددن: الليلة يا ابدقناً دايره، وخدوداً نايرة، وقدرة فايرة، وشيكاتاً طايرة، قتلنا فيك الليلة يا ابو احلام يا الشالوك للصالح العام وحكموا عليك بالاعدام ما دايم الا الله. الليلة يا السايق الكراون يا اب مدفعاً هاون وينك ليّ. # وهنا يهيج البيت ويفور بالعويل والنواح وتميل النائحة يساراً ثم تنحنى ضاغطة بيدها اليسرى على انفها ثم تنظر الى ابنته الكبرى نظرة ذات فحوى ولسان حالها يقول: (لقيتينى كيف؟) وتواصل في الوصف وتعدد مآثر الفقيد: الليلة يا الساكن ديم لطفى اب كلمة بتشفى المامتزوج عرفى زايلة وخربانة البجيك بتجبروا والواقع بتشيلو يالسايق الكراون فقدتك السكرتيرة والتربيزة المستديرة والمارسيدس الخنزيرة خليتنا لى منو يا أخووووي يي يي يي اهي. # لاحظ العربية قبل دقائق كانت كراون، بعد ذلك تذهب النائحات الى غرفة قصية ويؤتى لهن بالاكل البارد والساخن وعند الانتهاء من هذه المأدبة تعطي البنت الكبرى النائحات مبلغ 300 الف جنيه وتقول لهن همساً ضروري تجو بكرة المغرب عشان ناس السعودية والبلد جايين: كويس!. متفرقات عن البكيات: # زي ما في رجال (طيارات) بحبو السفسفة والاكل وبتاعين ميتات قالوا بقوا في نسوان طيارات (سفسفة). ياكلوا ويشربوا واذا لقوا حاجة مطرفة بيشيلوها. الضحك في بيت البكاء: 1/ قالوا عوض دكام الله يرحمه مشى لمأتم وزير امه ماتت جابوا ليه الشاى بارد والموية سخنة طوالى قال للوزير دي خدمات بطالة Very bad Serves تسخنوا الموية وتبردوا الشاي (كلام ياعوض دكام). 2/ رباطابي مروق وبحب البكيات والونسة كان مسافر جاء لي بكا واحد قريبه لاقاه يوم الرفع نادى ود المرحوم اداه 3 مليون قال ليه حرّم ما ترفعوا ابوكم ما كان راجل هين افرشوا 3 ايام تانى على حسابي. 3/ جعلى اخته معرسة شايقى الولد جا للجعلى قال ليه ابوى مات. الجعلى رسل لاهله وجوا كلهم، المرحوم بعد البرود (عطس) الولد قال لى خاله ابوي حي وفرفر الخال قال ليه حرم بعد الجعليين ما جوا مش لو فرفر ابوك مدفون مدفون يا اندفن انا بداله. 4/ واحدة بتحب البكيات وأكل البكيات سمعت بي مرة ماتت في الحارة 19 قالت امشى اقيل افطر واتغدى وآكل لقيمات الصدقة وارجع. وصلت بعد الساعة ثلاثة ونصف وهى على لحم بطنها قالت لى ناس البكاء: المرحومة الله يرحمها ويغرف ليها عرفوها جيعانة وغرفوا ليها الغداء طوالى. 5/ الراجل الحاسد كان ببكى وراء الجنازة بكى شديد قالوا ليه انت ما كنت بتحب المرحوم مالك بتبكى بكاء حار كده؟ قال ليهم مش قالوا البكاء على الميت بعذبه في قبره؟!. 6/ المرة العشمانة في الزواج لما راجلها اتوفى مرقت مع الجنازة وقدام الرجال قعدت تبكي بصوت عالى وتقول الليلة يا الخليتنى وحيدة في شقتى الجديدة وسجلت لى العمارات وخليت لى الدولارات منو تانى البسوق العربات ومنو البجيب الايجارات واحد من اصحاب الخيال قال ليها رسالتك وصلت. 7/ واحد بخيل جداً ذهب ليزور امه في المستشفى وجد كلمة ادفع... قال لو كده احسن ازورها لما تطلع في البيت. 8/ بخيل ابوه مات مشى يعمل ليه نعى في الجريدة قال ليهم ماهى اصغر مساحة عندكم؟ قالوا ليه سطر واحد فيه خمسة كلمات قال ليهم اكتبوا رزق ينعى والده قالوا ليه لسه فاضل كلمتين قال ليهم ويصلح التلفزيونات!. 9/ واحد قال لي صاحبه تعال شوف النقطة الزرقاء الفى الحيطة دي شنو؟ قال ليه دي نملة لابسة جينز!. 10/ فار كان في الغابة جاري ليه اسد ميت الحيوانات صفقت ليه قال ليهم انا كان زعلت ما برحم!. 11/ كلب اصابه انهيار عصبي لانه كان بينبح في زول اطرش!. خاتمة: # قال رسول الله صلى الله عليه وسلم: (النائحة اذا لم تتب قبل موتها تقام يوم القيامة على سربال من قطران ودرع من جرب) اى يسلط على اعضاء جسمها الجرب والحكة ويغطى جسمها بالقطران وهو ما تمسح به الابل في حالة المرض وهو اسود ورائحته كريهة وقابل للاشتعال. # حمانا الله وحماكم ابكوا ساي وامسحوا بمناديل الورق (التيشوس) واستغفروه. مع تحياتى،،،
