هناك مصطلحات شبابية انتشرت في الآونة الاخيرة، وسنحاول في يوميات الشفت البحث عن اصل المصطلح وربطه بالفهم الجديد الذي اختير له. 1- الحلج: عُرف الحلج في موقفين: الموقف الاول هو حلج القطن، ومعناه عزل البذرة من القطن ونظافته وفرزه الى درجات «درجة اولى وثانية وثالثة»، والاستفادة من البذرة وعصرها واستخراج الزيت منها «يطلعوا زيته»، والمعنى الثاني اذا حلجت الماسورة اي صارت لا تقفل وتسرب الماء، ويكون ذلك بخسارة الجلدة، وتستعمل كلمة الحلج او حلجنا اذا كان الانسان كثير الكلام وملحاح في طلباته، لدرجة انه يحلج اعصاب محدثه، او المغالاة في طلباته، زي حلج القطن بالماكينات، وما قدرنا نربطها «بمأساة الحلاج» العالم الذي أصر على رأيه ودفع روحه ثمناً لذلك. 2- كسير الثلج: هذا المصطلح يطلق على الشخص الذي ينافق او يجامل شخصا آخر ووصفه بصفات ليست فيه. ووجه الشبه ان الشخص الذي يكسر مثلا لوح ثلج ويضعه في حفاظة لزوم استعمال الثلج المكسر في شرب عصير او ماء او حاجات تانية حامياني للشخص المُكسر له. طيب كسير الثلج في السودان وافريقيا والمناطق السخنة مقبول.. يا ربي ناس القطب المتجمد الشمالي وناس الاسكيمو ديل المصطلح ده بياكل عيش عندهم؟ حكاوي عن الحلج: 1- المرة الحالجة راجلها، قامت مشت بيه الدكتور وقالت للدكتور راجلي ده بيتكلم بالليل في النوم كتير، قال ليها اديه فرصة يتكلم بالنهار؟ 2- واحد مشى البحر يعوم، العسكري قال ليه ممنوع العوم هنا، قال ليه طيب ليه ما قلت لي قبل ما اقلع هدومي؟ قال ليه لأن قلع الهدوم ما ممنوع. 3- الراجل شاف ولده سكران، قال ليه وكمان بقيت تشرب خمرة؟ قال ليه أعمل شنو يا ابوي كنت عايز اشرب سيجارة بنقو فخجلت منك، قلت اشرب كأسين اتشجع بيهم شوية. 4- في موظف في احد البنوك جنو سلفيات، حلج المدير حلج بالسلفيات، مرة طلب سلفية طوارئ قال مرته ولدت فجأة؟ 5- الأول: أنا متأكد انو الرجال بتحملوا الالم اكتر من النسوان. الثاني: انت دكتور؟ الأول: لا.. ببيع جزم نسوان. حكاوي عن كسير الثلج: 1- في دكتور عيادته جنب قراش بتاع ميكانيكية، وكانوا ظريفين معاه بصلحوا العربية وبنظفوها، قام عزمهم عشاء وجاب ليهم ويسكي. الميكانيكية ونستهم كلها العربية بتأكل زيت، والفرملة بتأكل جلود والعربية بتأكل لساتك، الدكتور قال ليهم رأيكم شنو في الويسكي ده؟ قالوا ليه كويس بس بيأكل ثلج. 2- الشافع جاء جاري لأمه وقال ليها: اديني قروش اديها للراجل المسكين البكورك بره الشارع ده. أمه فرحت بشهامته وعطفه على المساكين بعد أدته القروش، قالت ليه الراجل كان بكورك بقول شنو؟ قال ليها آيسكريم... آيسكريم. 3- عربي اشترى آيسكريم وبدأ يأكل فيه بتلذذ.. آخر قطعة قال بقزقز بيها ويمصها قام بلعها، قال ما في رزقي. 4- شافعتين الاولى قالت: انا نفسي اكبر كبيرة زي امي ألبس الفساتين وامشي الاعراس، الثانية قالت ليها أنا نفسي أبقى زي ابوي علشان ما اخليكي تمرقي. 5- اثنين فشارين واحد من القطب الشمالي والثاني من القطب الجنوبي. الاول قال: البرد عندنا شديد لدرجة ان النار اتجمدت. الثاني: وعندنا البرد وصل لدرجة اننا ما بنسمع الكلام الا لمن نسخنه بالنار «هاك الدليب ده». خاتمة: ابعدوا عن حلج الناس وتعلموا ادب الاستماع، ووزعوا فرص الكلام علشان الناس ما تزوغ منكم، كسير الثلج لو كان مجاملة لا تؤذي به غيرك، ممكن بس ما تكون ألواح ثلج كبيرة ورمضان على الأبواب.
