اهلنا الطيبين ثقافتهم الغذائية تعبانة شوية او بمعنى اصح بياكلوا ساى، اكلات الاكثار منها يضر وتسبب امراضا مثل مرض النقرس او «القاوت» والذي يدلعه البعض بمرض الملوك، وهو يأتى من الاكثار من اللحم الضانى «هو نحن لاقين فيه كده بعد سعر الكيلو فات الأربعين جنيه» وعلشان ما نتفلسف نشوف تشخيص الأطباء لهذا المرض ويقولون انه مرض يصيب المفاصل ويؤدى الى تفاقم الحالة واحداث خلل فيها، وهو يسبب الما ووخزات عنيفة عند كعب القدم او في الاصبع الكبير. القاوت يحدث بسبب ترسب « أملاح البورات» في أنسجة المفصل وما يحيط بها من غضاريف وعظام وعضلات ويشبهه الاطباء ب «مسمسار القدم» المرض له علاقة مباشرة بوظيفة الكلي لأنها المسؤولة عن طرد أو حجز أملاح الجسم وهذا المرض يكثر عند الرجال دون النساء وهو مرتبط بزيادة الوزن والإفراط في الأكل وشرب الكحول. اهم أسبابه: 1/ الوزن الزائد. 2/ عدم علاج ضغط الدم. 3/ العقاقير المستخدمة لعلاج ضغط الدم والتي تعمل علي خفض نسبة الأملاح والماء في الجسم. 4/ قلة النشاط والحركة. 5/ الامراض المزمنة مثل مرض السكري، ارتفاع نسبة الدهون في الدم أو ضيق الشرايين. بالدارجي كمية من الاكلات والمشروبات التى تبدأ بالكاف كلها ترفع نسبة القاوت وهي: 1/ الكمونية. 2/ الكلاوى. 3/ الكوارع. 4/ الكستليتة. 5/ الكبدة. 6/ الكبكبي والفول والبقوليات. ومن المشروبات الكوكا كولا. ولو مشينا للتحلية ابعدوا عن الكنافة والكستر ودي من عندى ولو عاوزين تنزلوا الضغط اشربوا الكركدي شاى ولا شربات. هدايا الحلقة: 1/ الطفل لأمه: مدرس الجغرافية سألني مين اللى فتح قناة السويس ولقت ليه ما عارف، الام: انا عارفاك وعارفة شيطنتك والله يكون مافي زول فتحها غيرك!. 2/ مدرس العلوم سأل التلميذ ما فائدة الاذنين؟ التلميذ: فائدتها انها تمنع النظارة من السقوط يا استاذ!. 3/ الاب سأل المدرس: هل تفتكر ولدي حينجح في الامتحان؟ المدرس: ده بتوقف على شطارة التلميذ الذي سيجلس بجانبه في الامتحان!. 4/ صاحب خيال بعد بالانجليزي ون، تو، ثري، فور، فايف، استغفر الله سكس!. 5/ كديستين اتلاقو وجرى بينهما هذا الحوار: الاولى: مياو، الثانية: مياو، الاولى: مياو مياو، الثانية: ما تغير الموضوع. 6/ الراجل قال لزوجته انتي مجنونة تسرحي شعر الكلب بمشطي قالت ليه ما تخاف غسلت المشط بالاول!. 7/ بمناسبة البرد الزوج اتصل بزوجته من الشغل وقال ليها: انا جاي على البيت سخنى لي الموية بسرعة وقفل التلفون صديقه في الشغل قال ليه: هدي الرجالة ولا بلاش شكلك بتخوف مرتك شديد؟ قال ليه يعنى دايرني اغسل العدة في البرد ده بموية باردة؟. 8/ سواق التاكسي ماشي بسرعة رهيبة الراكب صرخ فيه لا لا انا اعصابي ما بتتحمل السرعة الشديدة دي، السواق قال ليه اعمل زيّ ، قال ليه اعمل شنو؟ قال ليه غمض عيونك!. 9/ الزبون لصاحب المطعم اهنئكم على نظافة مطعمكم، الجرسون: وكيف عرفت ذلك؟ الزبون: لأن الاكل كله صابون!. 10/ مدير الفندق قال للعامل الشيال الجديد لازم ترحب بالزبون وتناديه باسمه، الشيال وانا اعرف اسمه كيف؟ قل ليه بتلقاه مكتوب على الشنطة، بعد شوية دخل زبون للفندق رحب به الشيال قائلاً: مرحباً بالسيد جلد طبيعي فاخر!. 11/ واحد بتاع خيال سكن في بيت مسكون وهو مولع سيجارته جاه الجان بشكله المرعب قال ليه اديني سيجارة قام اداه تاني يوم جاه ناكش شعره قال ليه اديني سيجارة اداه، ثالث يوم جاه سنونه بارزة وعنده قرون والدم طالع من خشمه قال ليه اديني سيجارة قام اداه وقال ليه ما ملاحظ انو التدخين بدأ يأثر على صحتك؟!. 12/ قبل المباراة اللاعب الاول سأل الثاني لماذا تستحم قبل المباراة؟ اللاعب الثاني: لاسجل هدفاً نظيفاً!. 13/ الراجل في مقابلة اذاعية قالوا ليه تحب تستمع لشنو؟ قال ليهم اذان المغرب!. 14/ البت لخطيبها لما نتزوج انا عاوزة اشاركك في كل مشاكلك ومتاعبك واخففها عنك، الخطيب: الحمد لله انا ما عندي مشاكل، البت: ايوة لأننا لسنا ما اتزوجنا!. 15/ واحدة شينة جداً قبل ما تدخل الحمام قالت اللهم انى اعوذ بك من الخبث والخبائث، الشيطان قال ليها من غير ما تقولى انا اساساً كنت مارق!. خاتمة: لعلاج هذا المرض العصري اللعين ينصح الأطباء بالآتي: 1/ الراحة التامة عند حدوث المرض. 2/ تناول الدواء المضاد للمرض والمسكن. 3/ شرب الكثير من الماء. 4/ الامتناع عن شرب الكحول «هاك الجلد ده». 5/ البعد عن الاكلات الغنية بالبروتين مثل الاكلات التى اشرنا اليها. 6/ المحافظة على الوزن وتخفيفه. 7/ الحركة والرياضة. نحن في السودان بروتاريا وناس بسطاء وما عايزين نكون ملوك خصوصاً في امراضهم. ام رقيقة مالها لوموها لى!. وكل عام وأنتم بخير،،،