زمان بنخاف الرحمن صلاتنا مع الاذان بنوفي الكيل والميزان بنتفقد الجيران ، بنساعد العدمان عندنا الخلوة والديوان ماعندنا سرطان ما عندنا التهاب مصران ما عند فشل كلوي ما عندنا تصلب شريان علاجنا عند التيمان حلبه وقرنجان حليل زمان وزمن زمان وأهل زمان.. زمن زمان.. زمان ما عندنا حقوق انسان ما عندنا كوفي عنان ما عندنا اوكامبو الهوان.. زمان ما عندنا تخويف ما عندنا تسويف ما عندنا جرح ما عندنا نزيف خريفنا كان ما بقيف ما فيهو سيل ما فيهو زيف ، زمان ما عندنا تسليف ما بنعرف اليونسيف زمان بربطنا خيط بقطعنا سيف... حليل زمان وزمن واهله زمان.. زمان ما عندنا وجهين ماعندنا عهدين ما عندنا سمح ما عندنا شين ما عندنا قوات هجين عندنا العمد والسلاطين عندنا شيخ الزين ديل بحلوا الدين بفكو السجين... وحليل زمان وزمن زمان واهل زمان.. زمان تهديد ما عندنا وعيد ما يونميد ما عندنا جنجويد.. زمان ما بناخد التار ما بنخون الجار ان الجار جار بنستر العار الصغار بيدو الكبار بنطفي الشرار قبال يولع نار.. حليل زمان وزمن زمان واهل زمان. زمان عندنا شئ خفي و بنوفي بالفي والمافي مريضنا بنشفي زمان ما عندنا زواج عرفي ، الآن واا أسفي .. كل شئ بقا خفي... جلوي حسن