٭ بعد انفجار أزمة سوق المواسير في الفاشر ومدن لاحقة نعيد مادة الكورة واللاعب الماسورة ونغيرها الى العنوان أعلاه. وتتلخص مشكلة سوق المواسير في عصابات من المستهبلين الذين يستغلون المواطنين السُذج بإدخالهم في تجارة وهمية ذات أرباح عالية وبعد اذاقتهم (موية السكر) وبعد تجميع أكبر قدر من الودائع يختفي المستهبل وللاسف دا نوع جديد من الاحتيال ما كان موجود عندنا، المحيرني ليه اختاروا المواسير كبضاعة هل لأن الناس الغشوهم كانوا كيشة ولا شنو. هذه الحلقة محاولة لربط الكورة باللاعب الماسورة وخطورة الممارسة الجديدة التي عُرفت بسوق المواسير. أنواع المواسير وأنواع اللاعبين: ٭ هنالك عدة أنواع من المواسير تستخدم في مجال مياه الشرب والصرف الصحي وتصنع بأقطار مختلفة حسب الغرض منها وموضوع استعمالها، كما ان لها اقطارا وأطوالا مختلفة ما يدعو أحياناً لقطعها أو ثنيها ووصلها، ولابد ان تتوفر في المواسير ثلاث شروط وهى المتانة وطول فترة الاستعمال وقلة التكاليف، ولو قارنا هذه الشروط باللاعبين فلابد ان تتوفر في لاعب كرة القدم القوة والسعر المعقول لتسجيله ويلعب أكثر من موسم ويفضل ان يلعب في أكثر من خانة، والمواسير لابد من حماية سطحها الداخلي والخارجي حتى لا تتعرض للتآكل والرمي، اللعب كذلك يجب على النادي حمايته والحفاظ على لياقته وابعاده عن السهر و(الصعلكة) حتى يكون جاهزاً لاداء المباريات حتى لا يفقد (حرفنته) وعشان كورته ما تفك منه ويشطبوه سريعاً. أهم أنواع المواسير: 1/ مواسير فخار وهى تصنع من الفخار الحجري القليل المسام. 2/ مواسير الخرسانة العادية والمسلحة وتصنع من الاسمنت والخرسانة والرمل وهى أقل ثمناً ويمكن صنعها محلياً. 3/ مواسير الفايبر قلاس خفيفة الوزن عمرها الافتراضي كبير وتستخدم للمياه والصرف الصحي ولكنها مرتفعة الثمن. 4/ مواسير الزهرة تتميز بالعمر الطويل وفي فرنسا خط مواسير مستعمل منذ عام 4191م أسعارها معقولة وسهلة التركيب. 5/ المواسير الصلب وتصنع من ألواح الصلب سهلة الصنع لا تكسر يمكن التحكم في قطرها، 5/ مواسير البلاستيك سهلة التركيب سهلة الصنع سهلة النقل. أنواع اللاعبين والمواسير: ٭ لاعبو الدفاع ديل زي مواسير الصلب ومواسير الاسبستس والمواسير الخرسانية يصعب اختراقها، أما اذا كانوا من نوعية مواسير البلاستيك أو الفايبر قلاس فالعوض على الله.. حارس المرمى بس الا يجيب من جوه.. لاعبو الوسط والهجوم متطلب منهم المرونة عشان كدا تبعد عنهم صفة (الموسرة). محاولة لمعرفة لماذا شبه اللاعب الكيشه بالماسورة: 1/ الماسورة غير المرنة وبالتالي تشبه اللاعب زي عمود النبرو ما يقدر يتحرك ولا يقدر يحاور كما ان مجاورته سهل. 2/ الماسورة دائماً تركب تحت الارض أو على الحائط ويقولوا ليك ارموا المواسير أي ركبوها على الحيطة او العرش عشان يوصلوا من داخلها اسلاك الكهرباء واللاعب لو كان في الارض او على الحيطة تبقى مشكلة. 3/ اللاعب ذو العضلات الصلبة غير مرن ويمكن كسره بسهولة. 4/ اذا كان اللاعب زي ماسورة البلاستيك او الفخار معناها سعره رخيص والرخيص برخصته يضوقك مغصته. 5/ المواسير قد تنفجر احياناً اذا كانت موية حلوة حتعمل طين وتبشتن الواطة، وكان بقت صرف صحي بس اقفلوا (النخرين). 6/ في مواسير مستوردة من ماركة وارغو سعرها غالي واداؤها كباري اخير منها المواسير المصنوعة من الزومة. 7/ أشهر محطة بص هى محطة المواسير بالحارة الرابعة الثورة في نادي بقى زي الحارة الرابعة لاعبينو كلهم مواسير. 8/ الحنفية يمكن ان يطلق عليها نفس الاسم ماسورة بس لو اتحلجت حتكون الموية كابة على طول لو غيروا ليها الجلدة يمكن تتصلح لكن دائماً الناس يلجأون لتغييرها.. اللاعب البتحلج مصيره الشطب (ماسورة ومحلوجة كمان). هدايا الحلقة: 1- واحد زهجان من مرته النقناقة بنى بيته في شكل دائري عشان مرته ما تقول ليه حابسني بين اربعة حيطان. 2- واحد زعلان من مرته كبة في نفسه جاز وولع نار وراح حاضنها. 3- واحد مشى مع زوجته محل احذية قال للبائع جيب ليها شبشب زحاف، قالت ليه لا أنا عايزة جزمة كعب عالي «ابو مسمار» البائع قال ليه يا أخي اشتري ليها كعب عالي هو انت الحا تلبس... قال ليه وانت مالك هو انت الحا تنضرب؟ 4- أحوص أبوه مات دفن أمه. 5- الراجل قال لولده لمن نابليون كان في سنك كان الاول على فصله.. الشافع رد على أبوه وقال ليه: عندما كان نابليون في سنك كان إمبراطور فرنسا. 6- واحد ثقيل مشى زار شيخ مريض وقعد معاه مدة طويلة وقال للشيخ انصحني، الشيخ قال ليه اذا زرت مريضاً فلا تمكث معه طويلاً. 7- واحد كسلان قالوا ليهو: بعد ما تصحى من النوم بتعمل شنو؟ قال ليهم برتاح شوية. 8- صرصور راقد في الانعاش اخوه سأله: بف باف؟ قال ليه لا فردة شبشب.. 9- شافع رباطاب ماشي مع امه والدنيا رمضان قال ليها يمة شيليني قالت ليه زح كدا انا صائمة.. قال ليها انا قلت ليك شيليني ولا أكليني؟ خاتمة: أنا شخصياً ما مقتنع بتشبيه اللاعب بالماسورة لكن نعمل شنو لناس مزمل ابو القاسم و«حووووووصة» بتاعه وما عارفين الجاب المصطلح دا منو؟ اللاعب الكيشة يمكن يكون كبري يمرر الخصوم واذا قوون يكون غربال او صفاية او اشتر ودائماً يبيضه الكورة بين رجليه لكن ماسورة دي ما لافقة.. واحد سأل: الماسورة بت منو؟ قال ليه بت نقط.. هاك الشطب دا.
