بمناسبة (موضة) عدادات الدفع المقدم التي خرجت للسطح خلال السنوات الماضية، وآخرها عداد (الموية) للدفع المقدم، سألني صديق لدود لي عن استمرارية مثل هذه (العدادات الخبيثة)، ومعاناة المواطن معها، وقال لي فى آخر الحديث: (عارف ياشاب بعد شوية الكلام ذاااااتو حيبقى بي قروش)، صمتّ على مضض، ثم استأذنته في الإنصراف، فالفكرة التي طرحها صديقي اللدود للتو، لم تكن مضحكة بقدر ما هي مبتكرة وجديدة لَنج، لذلك أغلقت باب غرفتي وأخرجت ورقة وقلم، ثم بدأت في الترتيب لمشروعي القادم بهدوء، وهو مشروع عدادات (الكلام) للدفع المقدم، أو مشروع الكلام (بالقروش). وهو مشروع سيوفِّر للمسؤولين الكثير من الأموال، وسيوفر كذلك للمواطن الكثير من (الهدوء)، الذي تفتقده شوارع وأزقة العاصمة، (يعني مثلاً يا اخوانا نمسك البيت؛ الراجل يجي راجع آخر الليل وهو مهدود، وقبل مايرقد في السرير، تستلموا ليك المَرَة وهاك يا نِقَّة؛ شِي قروش الغاز، وشِي قروش ابتسام الدلالية، وشي قسط توب سهرة). وفي النهاية الراجل النوم يطير ليهو، ويمشي الشغل عين مفتحة وعين (مغمضة)، ولو جينا طبَّقنا مشروع عداد (الكلام) دا، بالتأكيد الراجل حينوم مرتاااااح، طالما (الحكاية بقروش)، أصلو النساوين ديل جنَّهن وجن الصرف الماليهو داعي). ثانياً نجي نمسك المواصلات؛ (يعنى هسي في المواصلات النِقَّة أكتر من اللازم، والواحد ساااكت لو هبشتو، يعمل ليك فيها أحمد مطر، ويقعد يتكلم ليك عن زمان، وسنين زمان، والخرطوم بالليل، وسينما كلوزيوم. (ياعمي وأنا مالي؟). وبرضو مايشتغل بيك الشغلة، ومايسكت لحدي ما تَنْزل من الحافلة وإنت بدون (إضنين)، طيب هسي لو طبقنا مشروع عداد (الكلام) دا بالتأكيد الراجل دا كان سكت زمااااان، وكان بطل نقة.. يا إما (رصيدو) كمل.. وفي النهاية إنت الكسبان). ثالثاً، تطبيق هذا المشروع ليس صعباً ولا يحزنون، فقط يحتاج لتفهُّم كامل من الأخوة المواطنين، يعني لازم يقتنعوا أنو المشروع دا يهدف لراحتهم في المقام الأول، ويهدُف لتكتسب العاصمة الهدوء في كل حِتَّة؛ في المدارس، المصانع، بيوت البكاء، المستشفيات، حتى في (الحب) ذااااتو! يعنى هسِّي مثلاً تلقى الواحد يشيل ويتكلم مع حبيبتو بالموبايل عشرة ساعات، و(ما يفكوا منها إلا الرصيد يقطع)، طيب لو طبقنا عليهو المشروع دا بالتأكيد حيقلل من نسبة (الكضب)، عفواً، من نسبة (الكلام) بتاع الحبيبة ديل، ويخليهم يعملوا حسابهم في الكلام..مثلاً: *ايوا حبيبتي. *اهلاً. * إنتي كويسة *أيوا. *ياخي مشتا..... معليش يا اخوانا..الزول دا رصيدو بتاع الجمرة (خِلص)..!! شربكة أخيرة: بعد تطبيق هذا المشروع لن تجد بني آدم (عاقل) يتكلم، فقط (المجانين)، وهذا يُسهِّل علينا أيضاً حصر أعدادهم المهولة في العاصمة، (ياناس.. ما قلت ليكم المشروع دا ختري عدييييييييل).