* هل تصدق عزيزي القارئ أن نادي المريخ هو النادي الوحيد في السودان الذي يملك ستة (ألقاب) .. * إنفرد المريخ وعبر تاريخه الطويل بنصف دستة من (الألقاب) ولعله النادي الوحيد الذي يملك هذه الألقاب المتعددة .. * ما في نادي في السودان حصل على الألقاب التي حصل عليها المريخ .. * حتى الهلال (سيد البلد) لا يملك ألقاب المريخ .. * ولذلك نحن ومن باب الإعتراف بالشئ سنستعرض ألقاب المريخ الستة ومن بعد نعرج لكثير من الأشياء التي إنفرد بها المريخ دون باقي الأندية .. * أول لقب للمريخ هو : (مدفور البلد) .. * (مدفور البلد) : يعني هو النادي الوحيد الذي يقوم ب(الدفرة) سواء أن كانت دفرة (سياسية) أو دفرة (فنية) .. * بندفر عشان ينتصر وبيندفر عشان يلعب وبندفر عشان يعمل إنتخابات وبيندفر من الحكام ومن السياسيين ومن الإتحاد العام (معتصم جعفر) ، وبندفر من الوزارة .. * ولذلك أنا أعتقد أن هذا اللقب هو من أصدق واعمق الألقاب التى تشبه المريخ .. * طيب نجي للقب التاني .. * (الضل) : وكلمة ضل أطلقها صحفي أوغندي موسم 2009، على المريخ قبل نحو سبع سنوات .. * يعني ده لقب (جاي من برة) .. * لقب مستورد يا مولانا .. * لقب محمولاً جواً .. * الضل : لقب أطلقه الأخوة الأوغنديون الأشقاء الذين قالوا أن المريخ هو (ظل الهلال في السودان) .. * وأيضاً هذا لقب توفرت فيه درجة عالية من المصادقية والموضوعية .. * طيب نجي للقب التالت .. * (الوصيف) : وهذا لا يسمى لقب بل هو (مركز في تصنيف الدوري) ولكنه إرتبط بالمريخ حتى صار (لقبا) .. * والوصيف كلمة معناها مشروح ولا تحتاج لشرح .. * شينة والله عمرك كلو تكون وصيف .. * الجيل الجديد ده كلو جا لقى المريخ وصيف .. * طيب نجي للقب الرابع .. * (دواعي أمنية) : هل تصدق عزيزي القارئ المريخ هو أول نادي في العالم (عشان ما جاهز فنيا) قامت الحكومة إتدخلت في حاجة ما بتخصها وأجلت ليهو مباراة معلنة ؟؟ * الحكومة عشان (بكري متمرد وسيف تيري ما قاعد يتمرن وفوفونا بيأكل أندومي) قررت تأجل المباراة .. * فوفونا محترف المريخ المهاجم قال في تصريح قبل أسبوع : (أنا بأكل أندومي في الفطور والغداء والعشاء) .. * هذا محترف يعيش ظرف إنساني قاسي .. * الحكومة لما شافت داك متمرد وده بيأكل أندومي (التلاتة وجبات) قررت تأجيل المباراة ل(دواعي أمنية) .. * يبقي يا مولانا أيضا لقب (دواعي أمنية) يشبه المريخ تماما .. * نجي للقب الخامس .. * (الإصيفر) هو لقب أيضاً مشروح ومعروف بالنسبة للوسط الرياضي .. * اللقب السادس هو : (نادي الحكومة) .. * وهذا اللقب بالذات متفق عليه .. * المريخ (نادي حكومي ولوحتو صفراء) .. * هو أول نادي في العالم يحكمه (رجل حكومي) لمدة أربعطاشر سنة تخللتها إنتخابات (مرة واحدة) .. * دخل جمال الوالى لنادي المريخ عن طريق الحكومة ولم يثبت أحد هلاليته أو مريخيته .. * المهم إنو زول جابتو الحكومة ومسك المريخ .. * وقد قامت الحكومة بصيانة وتحديث إستاد المريخ وعملت طابق شاخور والمقصورة الطايرة .. * والآن الحكومة أجلت للمريخ مباراته خوفا من المرمطة .. * وأيضاً الحكومة (كسر رقبة) شالت سوداكال (المنتخب) وجابت ود الشيخ (الحكومي) .. * شالوا داك وجابوا ده (ساااكت كده) .. * مزاج بس .. * ديل الستة ألقاب .. * طبعاً في لقب سابع أطلقه إعلام المريخ ضد فريقه وإنتو كلكم عارفنو لكن أنا احتراماً لصحيفة (قوون) ما ح أكتبو .. * يبقي يا مولانا أنا دايرك تعرف إنو المريخ عندو ستة ألقاب هي : (مدفور البلد ، الضل ، الوصيف ، دواعي أمنية ، الإصيفر ، الوصيف ونادي الحكومة) .. * بالإضافة للقب السابع .. * ستة وسابعهم لقب أطلقوه على أنفسهم .. * بخلاف هذا هل تصدق عزيزي القارئ أن المريخ أول نادي في العالم يخسر بالسبعة والسبب (البرد) ؟؟ * سبعة أهداف دخلت مرماهم وقالوا لينا ده البرد .. * هل تصدق أن المريخ أول نادي في العالم عندو مجلسين ومع ذلك عندو محترف بيأكل (أندمي) تلاتة وجبات ؟؟ * حرام عليكم والله .. * هل تصدق المريخ أول نادي يسجل لاعب ويقوم مجلس الحكومة يمنع اللاعب من التمارين (حسادة كده) عشان المجلس المنتخب ما يستفيد منو ؟؟ * هل تصدق المريخ أول نادي تعاني (نجيلته) من وجود (ديدان) بتأكل النجيلة كل ستة شهور ؟؟ * عندهم ديدان ما بتخلي النجيلة تقوم .. * والله صحي .. * عشان كده نجيلة الإستاد عندهم (مُصلعة) وعاملة زي (وش البت الما نفع معاها الكريم) .. * هل تصدق المريخ أول نادي يتعاقد مع لاعب من البوسنا إسمو (نجاد) عمرو (47) سنة وكان (خفير في جامعة الدول العربية) ؟؟ * هل تصدق المريخ أول فريق (يشيل الكورة ويجري من الملعب بدون دواعي أمنية) ؟؟ * هل تصدق إنو أطفال المريخ أصبحوا مدمني (قناة الهلال) ؟؟ * هل تصدق اللاعب في المريخ بيشوف نفسو أقل من نجم الهلال ؟؟ * وهل وهل وهل وهل .. * كلها (هالات) .. * هلات سوداء ونمش وحب شباب وتجاعيد كمان .. * وغايتو الله يكفينا شر (المُصدي) اللمعتو الأيام .. * ونركب صافنات ونجيبة (شايقية) وأصلو الزول بيموت والذكرى تفضل حية .. * و..و.. * وقلبك ليه تبدل صدا وليه تحول ……أوع تقول لي لدواعي أمنية ..
