سودارس : قون بشه زي (الحبة السوداء) بشيل وجع الرأس والضهر والغدد الحلقية

أكوبام كسلا يعيد قيد لاعبه السابق عبدالسلام الخارجية: رئيس الوزراء يعود للبلاد بعد تجاوز وعكة صحية خلال زيارته للسعودية الأمر لا يتعلق بالإسلاميين أو الشيوعيين أو غيرهم الأمين العام لرابطة العالم الإسلامي يستقبل رئيس وزراء السودان في الرياض طلب للحزب الشيوعي على طاولة رئيس اللجنة الأمنية بأمدرمان شاهد بالفيديو.. فنانة سودانية تنفجر غضباً من تحسس النساء لرأسها أثناء إحيائها حفل غنائي: (دي باروكة دا ما شعري) الخلافات تشتعل بين مدرب الهلال ومساعده عقب خسارة "سيكافا".. الروماني يتهم خالد بخيت بتسريب ما يجري في المعسكر للإعلام ويصرح: (إما أنا أو بخيت) تعاون مصري سوداني في مجال الكهرباء شاهد بالصورة والفيديو.. بأزياء مثيرة.. تيكتوكر سودانية تخرج وترد على سخرية بعض الفتيات: (أنا ما بتاجر بأعضائي عشان أكل وأشرب وتستاهلن الشتات عبرة وعظة) ترامب : بوتين خذلني.. وسننهي حرب غزة البرهان: لن نضع السلاح حتى نفك حصار الفاشر وزالنجي وبابنوسة شاهد بالصورة والفيديو.. حصلت على أموال طائلة من النقطة.. الفنانة فهيمة عبد الله تغني و"صراف آلي" من المال تحتها على الأرض وساخرون: (مغارز لطليقها) شاهد بالفيديو.. شيخ الأمين: (في دعامي بدلعو؟ لهذا السبب استقبلت الدعامة.. أملك منزل في لندن ورغم ذلك فضلت البقاء في أصعب أوقات الحرب.. كنت تحت حراسة الاستخبارات وخرجت من السودان بطائرة عسكرية) يوفنتوس يجبر دورتموند على التعادل أول دولة تهدد بالانسحاب من كأس العالم 2026 في حال مشاركة إسرائيل 900 دولار في الساعة... الوظيفة التي قلبت موازين الرواتب حول العالم! "نهاية مأساوية" لطفل خسر أموال والده في لعبة على الإنترنت د.ابراهيم الصديق على يكتب: معارك كردفان.. رئيس اتحاد بربر يشيد بلجنة التسجيلات ويتفقد الاستاد عثمان ميرغني يكتب: المفردات «الملتبسة» في السودان إحباط محاولة تهريب وقود ومواد تموينية إلى مناطق سيطرة الدعم السريع محمد صلاح يكتب التاريخ ب"6 دقائق" ويسجل سابقة لفرق إنجلترا شاهد بالصورة والفيديو.. خلال حفل خاص حضره جمهور غفير من الشباب.. فتاة سودانية تدخل في وصلة رقص مثيرة بمؤخرتها وتغمر الفنانة بأموال النقطة وساخرون: (شكلها مشت للدكتور المصري) السعودية وباكستان توقعان اتفاقية دفاع مشترك المالية تؤكد دعم توطين العلاج داخل البلاد غادر المستشفى بعد أن تعافي رئيس الوزراء من وعكة صحية في الرياض تحالف خطير.. كييف تُسَلِّح الدعم السريع وتسير نحو الاعتراف بتأسيس! دوري الأبطال.. مبابي يقود ريال مدريد لفوز صعب على مارسيليا شاهد بالفيديو.. نجم السوشيال ميديا ود القضارف يسخر من الشاب السوداني الذي زعم أنه المهدي المنتظر: (اسمك يدل على أنك بتاع مرور والمهدي ما نازح في مصر وما عامل "آي لاينر" زيك) الجزيرة: ضبط أدوية مهربة وغير مسجلة بالمناقل ماذا لو اندفع الغزيون نحو سيناء؟.. مصر تكشف سيناريوهات التعامل ريال مدريد يواجه مرسيليا في بداية مشواره بدوري أبطال أوروبا ماذا تريد حكومة الأمل من السعودية؟ الشرطة تضع حداً لعصابة النشل والخطف بصينية جسر الحلفايا شاهد بالصور.. زواج فتاة "سودانية" من شاب "بنغالي" يشعل مواقع التواصل وإحدى المتابعات تكشف تفاصيل هامة عن العريس: (اخصائي مهن طبية ويملك جنسية إحدى الدول الأوروبية والعروس سليلة أعرق الأسر) إنت ليه بتشرب سجاير؟! والله يا عمو بدخن مجاملة لأصحابي ديل! وزير الداخلية يترأس إجتماع لجنة ضبط الأمن وفرض هيبة الدولة ولاية الخرطوم في أزمنة الحرب.. "زولو" فنان يلتزم بالغناء للسلام والمحبة إيد على إيد تجدع من النيل حسين خوجلي يكتب: الأمة العربية بين وزن الفارس ووزن الفأر..! ضياء الدين بلال يكتب: (معليش.. اكتشاف متأخر)! في الجزيرة نزرع أسفنا من هم قادة حماس الذين استهدفتهم إسرائيل في الدوحة؟ مباحث شرطة القضارف تسترد مصوغات ذهبية مسروقة تقدر قيمتها ب (69) مليون جنيه في عملية نوعية.. مقتل قائد الأمن العسكري و 6 ضباط آخرين وعشرات الجنود الخرطوم: سعر جنوني لجالون الوقود السجن المؤبّد لمتهم تعاون مع الميليشيا في تجاريًا وصية النبي عند خسوف القمر.. اتبع سنة سيدنا المصطفى عثمان ميرغني يكتب: "اللعب مع الكبار".. جنازة الخوف حكاية من جامع الحارة حسين خوجلي يكتب: حكاية من جامع الحارة تخصيص مستشفى الأطفال أمدرمان كمركز عزل لعلاج حمى الضنك مشكلة التساهل مع عمليات النهب المسلح في الخرطوم "نهب وليس 9 طويلة" وسط حراسة مشددة.. التحقيق مع الإعلامية سارة خليفة بتهمة غسيل الأموال نفسية وعصبية.. تعرف على أبرز أسباب صرير الأسنان عند النوم بعد خطوة مثيرة لمركز طبي.."زلفو" يصدر بيانًا تحذيريًا لمرضى الكلى الصحة: وفاة 3 أطفال بمستشفى البان جديد بعد تلقيهم جرعة تطعيم

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

قون بشه زي (الحبة السوداء) بشيل وجع الرأس والضهر والغدد الحلقية

قوون نشر في قوون يوم 17 - 09 - 2013

سهوًا أمس أرسل عمود ومادة سبق لها النشر في صحيفة قوون..وتسبب ذلك في غياب هذه المادة التى كان يفترض أن تنشر أمس الاثنين.

نعتذر عن هذا الخطأ غير المقصود ...ولكم العتبى حتى يحقق الهلال بطولة الممتاز والدوري هذا العام.

قلت في كتابات سابقة إني سوف أخصص برمجة خاصة لأهداف الهلال الثلاثة التى سجلها الازرق في حارس المريخ عصام الحضري (45 سنة)..وسبدأ اليوم إن شاءالله بهدف (بشه) الثالث ..ثم احدثكم عن هدف عمر بخيت ثم اختم بالقون الما خمج هدف عبداللطيف بويا.

واحد سألوه الساعة كم؟.

عاوز يقول تلاتة إلا ربع قال بشه إلا ربع.

واحد مشى للدكتور ...الدكتور كتب ليه حبوب.

قال للدكتور ..يا دكتور ابلع الحبوب ..بعد الاكل ولاّ قبل الاكل.

الدكتور قال ليه بعد هدف بشه الثالث.

اتنين اول مرة يشوفو بعض.

واحد فيهم قال للتاني يتخيّل لي أنا (باشوتك) قبل كدا ...قاصد انو شفتك قبل كدا.

زول شالوه جري على الحوادث ..حالتو خطره شديد ..لقى ليه زول في الحوادث حالتو اخطر منو ..قال ليه : الاخ برضو (بشه).

زمان (الشيلة) بجيبوها ستة ..ستة...هسع الشيلة بقوا يجبوها بشه ..بشه.

زمان تفتح الماسورة ..بتقول ليك : اخخخخ. هسع تفتح الماسورة بتقول ليك (باسكال).

مريخابي سايق عربيتو زي الحلاوة ..فجأة كدا وقفو ليك رجل مرور ..عاين ليه كدا ..وقال (30) جنيه ما رابط الحزام.

المريخابي قال ليه نلقاها منكم ولاّ من بشه...الحزام اربطو على شنو المباراة انتهت.

مريخابي تاني ..زوجتو قالت ليه اعمل ليك في الغداء بامية مفروكة ولاّ ملوخية مطبوخة.

المريخابي قال ليها اعملي أي شيء من غير (بشه).

طيارة وقعت في المحيط ....ماتوا (61) راكباً ..وكل طاقم الطيارة ..بعد (45) يوماً ...هيئة الطيران المدني لقت (الصندوق الاسود).

فتحوا الصندوق الاسود لقوا فيه (7) جنيه ..واسكراتش ب (5) جنيه ..ودبلة.

ال (7) جنيه ما عارفها.

الاسكراتش ..ما عارفو لي شنو؟.

أما الدبلة ..فهي برضو ما عارفها.

لكن ناس الأمم المتحدة قالوا هذا كل ما تبقى من (باسكال).

عشان تاني تصبّغ شعرك...(انت قايل نفسك في عيد ميلاد).

نخش على هدف بشه الثالث طوالي بعد هذه المقدمة...وفي اعتقادي أن هذا الهدف فيه (سيناريو) ممتع ..ودراما تجمع بين التراجيديا والكوميديا السوداء.

الهدف مليان ..أو شبعان ..عشان التحركات ..والتنشيطات والتمشيّط الذي شهده الهدف غني بالأحداث والتفاصيل.

من غرائب الصدف أن معلق المباراة عندما كان يتحدث عن المباراة على أنها (عيد) من أعياد الرياضة في السودان ..كان الصاقعة نزار حامد شغال تبيّض (ذهاباً واياباً) في اخونا علاءالدين يوسف.

علاءالدين يوسف من الحركة دي لمن ضعف ..ولونو قلب ..ووزنو اتقسم النص.

الاشياء دي كلها حصلت في لحظة ..زي (ضربة مصنع الشفاء)..زول فاهم شيء مافي.

أو زي ضربة مخزن اليرموك ..ناس يقولوا (صواريخ)..وناس يقولوا (طيارات) ساكت...وناس الحكومة العاوزين يرفعوا الدعم من المحروقات بقولوا دا بتاع اللحام.

بتاع لحام بعمل كدا.

لو بتاع اللحام بعمل كدا كنا رجعنا (القسطنطينية).

كان فتحنا الاندلس.

معروف أن هدف بشه الثالث بدأ من هذه الحركة التمشيطية التى قام بها الصاقعة نزار حامد في (سنتر الخرطوم)..اقصد في سنتر ملعب المريخ بالضبط.

الكلام دا حصل في النص ...عشان ما يطلع لينا واحد من الجماعة ويقول لينا الحركة دي (تسلل).

تسلل نحن بنبيع فول سوداني وترمس.

حركة نزار الصاقعة حدثت على مشارف الملعب الخاص لفريق المريخ ..على بعد (19) سنتمترًا فقط من خط السنتر حسب قياسات المعمل (البشاوي) للهلال...في زاوية رؤية تقدر ب (90) درجة على منعكس الزاوية (ج) ..المنفرجة من القطر (ق) على مستوى (شوف العين)..عملاً بمبدأ رائعة إبراهيم الكاشف ..(أنا يا طير محل ما تطير بشوفك).

شفتوا الملاحقة دي.

أو على نسق أغنية السباتة ..(كدا ..كدا يا الترلة السايقها قندراني)...الترلة طبعاً عارفنها ...وسواق القندران هو نزار الصاقعة..(أشرب موية وارجع كمل العمود).

نظرية الصاقعة نزار كانت في حوالي الساعة التاسعة وعشر دقائق من مساء ليلة الجمعة الموافق (7) ذو القعدة...وهو توقيت يتوافق تماماً مع حركة تلاعب (عوض احمودي) بأوتاره ..لمن يشيل عود ويقعد بره البيت.

الحركة (الحبنشرجية) دي ...فيها (99) طعماً ..أقل طعم فيها ممكن يوديك (روسيا) تقرأ موسيقي وترجع (دكتور) زي الفاتح حسين.

بمناسبة الدكتور دا.

قالوا ليك في واحد سمع انو الفاتح حسين (دكتور)..قام شال موبايلو ومشى على الفاتح حسين في البيت ..وقال ليه يا دكتور والله بشعر بي (اشمطاط) في العصب الداخلي وتحوّر في الاوردة ..والانسجة القلبية.

الفاتح حسين قال ليه لكن أنا ما دكتور طبيب بشري ..أنا دكتور في الموسيقى.

الزول قال ليه والموسيقى دي فيها (دكترة) كمان...قادر الله.

الفاتح حسين قال ليه ..النظرية في انبثاق الروح على مكامن الحواس الملتهبة.

الزول قال ليه ..رغم من أني ما فهمت أي حاجة ..لكن من كلامك دا واضح أنو كلام ما ساهل..اعزف لي عليك الله مقطوعة من مقطوعات محمد وردي الموسيقية.

الفاتح حسين عزف ليه (لو بهمسة).

الزول قام زي (الطلقة).

بعد ما قام قال ليه طيب أنت ما بتقول دكتور في الموسيقى!! ..هسع سواتك دي مأمون حميدة بعملها ...والله (موسيقتك) دي شالت الوجع كله زي (هدف بشه)..عليك الله كمّل جميلك وافتح ليك عيادة خاصة.

هدف بشه زي (الحبة السوداء) بشيل أي حاجة ..وجع الضهر ...التهابات ..تشنجات ..وجع الضرس ..الغدد الحلقية ..أي حاجة بشيلها الهدف.

ولو ما صارف كمان بصرف ليك.

نحن طبعاً النظرية حقت الصاقعة نزار حامد القاطعها من راسو نظرية (مرقنبو قرنبو) ، كما أشرنا إلى ذلك في كتابة سابقة.. إذ مرق نزار الصاقعة بي علاء الدين في (الصقيعة)...في السهلة..طلع بيه الخلا ..وقرأ بيه ..ورجعوا تاني إلى (قواعده) ناقص الطوحال واللوز و(7) قزازات دم وشريحة موبايل.

نفسى أعرف (شريحة الموبايل) دي راحت وين في العملية (الصاقعاوية) دي التى نفذها نزار حامد في سنتر المريخ.

الشريحة تكون حرقت ...وغالباً شركة الاتصالات تكون قفلت شريحة علاءالدين يوسف بعد العملية الفظيعة دي.

نحن طبعاً بتاعين شبك ..ومقطعين ذيل السمكة ..وعارفين أي شيء.

شلنا نظرية (مرقنبو قرنبو) دي ..وجرينا على المعمل الجنائي قلنا نشوف الحاصل شنو؟.

اصلو (النظرية) دي ما وقعت لينا ..وما فهمنا فيها حاجة..زي (الشعيرية) البتجيك طاشة في المناسبات...ما تعرفها جايه من وين؟.

انقروا ناس المعمل الجنائي قالوا لينا شنو؟.

ناس المعمل الجنائي قالوا لينا العملية دي حصلت وين؟.

افتكروها حصلت في البرازيل أو في الدوري الايطالي أو في الدوري الاسباني أو الانجليزي.

قلنا ليهم ..الحكاية دي حصلت في استاد المريخ.

قالوا لينا ما معقول....معقول السودان اتطور كدا ...(طيب ليه الحكومة رفعت الدعم) وقت في حاجات مشرقة كدا في الدوري السوداني.

ناس المعمل الجنائي قالوا لينا الزول الطبقو فيه النظرية دي عايش.

قلنا ليهم عايش.

قالوا لينا ما معقول ...الزول دا شافو الله ساكت ..عشان عملية بالشكل دا الزول البتطبق فيه طوالي بشتت.

قلنا ليهم الحمدلله ما جاتو عوجة ...لكن هو في عداد المفقودين ..ناس المريخ قالوا علاءالدين يوسف بعد هذه العملية ما جاء التمارين ..واختفى وفي ناس قالوا اتعرض لإصابة في القصبة الهوائية.

ناس المعمل الجنائي قالوا لينا النظرية دي في العادي بتجي من ترسبات (غددية).

قلنا ليهم ترسبات غددية يعني شنو؟.

قالوا لينا ترسبات غددية يعني انتفاخ في الكنترباس.

قلنا ليهم الكنترباس دا حاجة غير البنكرياس البنعرفو دا.

قالوا لينا ما عندو أي علاقة بالبنكرياس ..دا حاجة أخطر من (الفنترحاس).

قلنا ليهم الفنترحاس دا شنو؟.

قالوا لينا انتوا ما عارفين كمان (الفنترناس).

قلنا ليهم شن خبرنا بيه ...نحن لو بنعرف الفنترناس كنا قرينا طب..أو على الأقل كنا دخلنا كلية التمريض العالي.

ناس المعمل الجنائي قالوا لينا ما مشكلة ..التحليلات الأولية للنظرية أثبتت أن علاءالدين فقد الذاكرة.

فقد الذاكرة عديل كدا.

قلنا ليهم ذاكرة شنو كمان ..ما تضخموا لينا الموضوع ...الزول دا كويس ..ما عندو أي حاجة.

قالوا لينا أبدًا ..النظرية دي الزول البتطبق فيه ما بطلع من تلات حاجات ..يا الله يفتكرو ..وانتوا قلتوا الزول دا عايش ..يا يفقد الذاكرة ...يا يرفعوا الدعم من المحروقات.

قلنا ليهم بس..اقيفوا هنا.

انتوا قلتوا (يرفعوا الدعم من المحروقات).

قالوا : ايوا.

قلنا ليهم بس دي الحكاية الحصلت ذاتها في البلد بعد نظرية (مرقنبو قرنبو).

ناس المعمل الجنائي ..قالوا لينا وانتوا لو رفعوا الدعم من المحروقات المقعدكم هنا شنو ..انتوا ذاتو اعملوا (مرقنبو قرنبو)..طوالي مفروض تمرقو.

قلنا ليهم نمرق شنو؟..ديل ما بمرقوا ..قاعدين يتابعوا لي في (ملكة جانسي)..وهدف بشه الثالث ...والجماعة رفعوا الدعم.

والله الكلام دا يحصل في تونس ولاّ مصر ولاّ تونس ولاّ اليمن ولاّ ليبيا ...الشعب هناك طوالي يعمل (مرقنبو قرنبو).

قلنا لي بتاع المعمل الجنائي ..يا زول ادينا نتيجة الفحص ..ما تعمل لينا مشاكل...نحن ما ناقصين.

شلنا النتيجة ..وجينا لي (بشه).

لقينا ليك كاريكا شغال بدرّس في ناس ضفر والباشا ...(الباشا تلميذ)..قولوا واحد ..يقولوا واحد ..قولوا اتنين ..يقولوا اتنين ...(أ) أسد ..(أ) أسد ...(با) بامية .. يقولوا (با) بامية....(ر)..رفعوا الدعم من المحروقات ...(ر) رفعوا الدعم من المحروقات.

كاريكا شغال كدا ..يجيب ويودي في (الباشا)..ينزل بيه ويطلع ..زي الروب الفى السعن.

شفتوا النظرية التى طبقها نزار حامد في علاء الدين يوسف ..جاء كاريكا وطبقها في أحمد الباشا.

نزار حامد طبّق نظريتو بالتبيّض المركزي ...ومدثر كاريكا طبّق النظرية في أحمد الباشا بالشلهيت المروحي.

يجيبو ..يرجعو تاني...تاني يقوم يجيبو ..تاني يرجع بيه ..نقول خلاص عاوز يعكس.

تعال يا ولد غسل لي عمك.

أنت بتقرأ في سنة كم؟.

وجيت الكم يا شاطر.

الأسئلة دي كلها وجهها كاريكا للباشا.

كاريكا يمشي ويرجع ليك بالباشا ..لمن الباشا ال ( DHL) اللابسو في قميصو بقى (تلغراف)..اتماص عديل كدا في الفانلة ..وعيون الباشا بقن في نص الفانلة.

يا زول النزل عيونك هنا شنو؟.

مالك بقيت زي (دمج فاتورة الكهرباء مع الموية).

وكاريكا شغال ..يجيب ويرجع في الباشا (الحلو صار يحبي اسم الله عليه حبيب قلبي).

شفتوا أنا بتابع (طيور الجنة) كيف؟.

اقصد بتابع في ناس الباشا ديل كيف؟.

حبيان مبالغ فيه.

في اثناء ...شيل العدة ..ورجع العدة ..البعمل فيها كاريكا مع الباشا ..الحضري غلبو الصبر ..قام طلع من المرمى واتقدم خطوتين في اتجاه كاريكا ...(شاهد الفيديو المرفق مع العمود).

كاريكا شفت ..شاف (الحضري) طلع من المرمى ..عمل ليك حركة التمغنط الارادي مع (بشه)..دي حركات بفهموها ناس بشه ونزار وكاريكا.

غاندي كان واقف قدام بشه ..بشه في عملية (البرق البرق)..جاء وقف ليك قدام غاندي.

هنا كاريكا عمل شنو؟.

برم الكورة.

مسرح الحدث ..هنا بقول إن الباشا (فاقد للوعي) بسبب (المساسقة) التى قام بيها مع كاريكا ...والحضري بره المرمى ..وغاندي في لحظة أصبح خلف بشه.

اتلعبت الكورة لي بشه ..وصلتو زي (قالب الحلو)...بشه عمل ( يا جمال دنيا يا ناس يا جمالها)..وجمال هنا ما عندو أي علاقة بي جمال الوالي.

بى لمسة على خفيف ..وضع بشه الكورة في القون ....الحكم المسكين لقى ما في أي طريقة ينقض الهدف دا ...قام جاري على السنتر.

قون.

تفتكروا بعد السيناريو دا كلو تكون (كورنر).

نوع دي فيصل سيحة ممكن يقول (اوف).

لو جاملكم كدا ...ممكن يقول ليكم (كورنر).

سيحة بعد العمر دا شغال لينا بي (لون النجيلة).

نجيلة غامضة ...قون.

نجيلة فاتحة ..تسلل.

شفتوا العلم دا وصل وين؟.

انت يا رضا مصطفى الشيخ ...(جهاز الفيديو) العندكم في التلفزيون ما شغال..عاوزين تشتغلوا لينا ب (لون النجيلة).

شغلوا جهاز الفيديو أول.

نرجع لي نظرية (مرقنبو قرنبو).

السؤال.

السؤال الأول ...(اجباري).

هل كان (باسكال) وقتها ، أي ساعة الهدف..هل كان بتابع في (ملكة جانسي)..نفسى أعرف الزول دا وقت اللحظات الحرجة دي بمشي وين؟.

الزول دا جايبنو محترف ولاّ (مشاهد).

والله حلاقة باسكال دي فيها حلاة سواق امجاد.

حاجة ما تخلص ..خاصة بعد رفع الدعم من المحروقات.

السؤال التاني ..(اختياري).

فيما كان يفكر (موسى الزومة) لحظة تسجيل بشه للهدف؟.

يكون بفكر في (الكتمة).

أو في سمك عوضية.

الحكاية واضحة بالنسبة لينا.

السؤال الأخير.

ألا تعقد أن (كراسي) استاد المريخ اصابها نوع من الهلع (البشاوي) الذي اصاب الحضري اكتب موضوعاً انشائياً عن هذا (الهلع).

الجميل في هدف بشه أنه كان هدفاً (اجتماعياً)..هدف (نفير) عديل كدا ..فيه شغل منظم..وهو بثبت روح الهلال ..والالفة فيه.

اشتغل في هذا الهدف (نزار حامد)..وأظن أن النظرية التى عملها نزار في علاء الدين يوسف هى التى أخرجت المريخ كله من المباراة بالجمهور.

عشان الناس بما في ذلك الحضري ..وقفوا مشدوهين بهذه النظرية التى طبقها الصاقعة نزار في أخونا اللطيف علاء الدين يوسف.

لذا فإن الموهبة ...والحركات الجميلة مثل هذه الحركة هى التى تقلب المباراة.

انتوا قايلين مسي بسجل الأهداف كيف؟..بعمل ليه حركة (بهلوانية) كدا في منتصف الملعب ..الناس بتقيف هو بسجل الهدف.

نزار حامد شده ليك الناس بتلك الحركة ...والتى نعتبرها مفتاح الهدف.

شفتوا التحليل دا كيف؟.

تقولوا لي قناة الجزيرة.

قناة شنو؟.

الدور التاني في هدف بشه لعبه الماهر والانساني والملائكي الجميل والراقي مدثر كاريكا.

الزول دا اشتغل شغل في الطرف اليمين بتاع المريخ.

عمل ليك أي حاجة في (الباشا).

فرتك ليك الباشا دا ..خفير ..خفير.

يسوقو ويرجعو ..يسوقو ويرجعو.

هذه المساسقة ..خلت الحضري يتقدم شوية من المرمى ويتجه نحو القائم الذي بيمينه ...في نفس الوقت ..خلت بشه ينط ويقيف قدام مدافع المريخ غاندي....(شاهدوا اللقطة في الفيديو المرفق مع العمود).

بعد الوصف دا طبعاً ما عاوزين ليكم (فيديو).

الفيديو عطلان ..زي فيديو تلفزيونا (الوهمي)..وليس (القومي).

الدور الأكبر طبعاً لصاحب الهدف ...بشه والذي يعتبر أفضل لاعب في الوطن يتحرك مع الكورة ..ويستفيد من المساحات.

بشه مهندس مساحة...بستفيد من المساحات.

في المريخ هناك فراغات عريضة...لذلك يستفيد بشه من هذه المساحات والفراغات ..ويسجل دائماً في مرمى المريخ.

ما فارقة معاه الواقف في القون منو.

رمزي صالح أم أكرم الهادي سليم أم عصام الحضري.

سجّل بشه (4) أهداف في شباك المريخ وهو أعلى معدل تسجيل في القمة..وبشه ينتظر منه أن يفعل الكثير ..في مرمى المريخ في كل اللقاءات القادمة.

يا بشه الله يديك العافية.

ملحوظة : نقفل على كدا.

هوامش

بعد اقتراب قرار رفع الدعم من المحروقات ...ناس المريخ ..فكروا في بديل ...يعوض لهم رفع الدعم.

قاموا عملوا شنو؟.

قرروا يدللوا (كراسي) الاستاد.

قالوا عندهم 1523 كرسي اتحطمت بقيمة 837 مليون و650 الف جنيه بحساب تكلفة الكرسي الواحد (70 دولارًا ).

حسبوا لينا (الكراسي) بالدولار.

شفتوا الناس ديل مشكلتهم وين؟.

مشكلتهم (الدولار).

انصح مجلس المريخ (الرايح ليه الدرب)...وإعلام المريخ (السالب) التركيز في مباراة عطبرة.

الكراسي خلوها هسع.

افتحوا ملف مباراة عطبرة.

المباراة يوم (17).

والرقم (17) عامل مشاكل في المريخ.

جمهور عطبرة ...يجب أن ينتبه لحيل جمهور المريخ ..الذي سوف يعمل على عدم اكمال المباراة.

يعني زي ما قال الرشيد علي عمر ...انتبهوا لمخطط المريخاب.

قبل كدا وعندما كان ابراهومة لاعب في فريق المريخ ..سحب الجمهور من الملعب بحجة الشغب.

لذا احذروا من مخططات المريخ.

ديل هسع في استادهم قالوا في 1523 كرسي اتحطم.

شوفوا الكضب.

ديل عاوزين يربحوا فينا.

في استادهم قالوا كدا...في عطبرة يقولوا شنو؟.

إدارة فريق الأمل يجب أن تنتبه لهذه المخططات.

اقفلوا الموبايلات من اللاعبين ..عشان يركزوا.

جمهور الهلال في عطبرة ..سوف يقف بقوة مع جمهور الأمل من أجل عودة الأمور إلى طبيعتها.

إن شاء الله الصدارة ترجع للهلال.

خطورة المريخ ..فقط في الكور الثابتة ..والمخالفات التى تكون على رأس الخط.

لذا على لاعبي الأمل الانتباه لذلك الأمر.

أما الحضري ...فقد أصبح كل الناس عارفين عندو مشكلة في الكور البعيدة.

صوبوا من بعيد ...الكورة لو ماشه الكشافة بتدخل في شبكة الحضري.

الحضري أصبح نقطة ضعف المريخ.

نتمنى ألا يسحب كروجر الحضري من تشكيلة المريخ.

عندي احساس ...أكرم الهادي سليم يعود لتشكيلة المريخ في عطبرة.

هلال كادوقلي الذي تعادل مع المريخ ليس أفضل من الأمل عطبرة.

أمل الحديد والنار.

سوف نستمتع بالحالة التى سوف يظهر بها الحضري.

يا مجدي أم بدة ..الزول دا ما بشوف.

يا مجدي أم بدة ..الزول دا لو فكيت فيه (فلنكة) بتدخل.

طبعاً ناس عطبرة عارفين (الفلنكات).

عطبرة ..هي محطة الوطن الكبير.

ونسائم عطبرة الحلوة.

وعطبرة يا عطبرة ..العزة فيك.

بالمناسبة سبق قبل هذا أن أعلن مدرب المريخ (كروجر) عن عدم سفره إلى عطبرة.

الزول دا سافر ولاّ قاعد في استراحة النادي.

كروجر عندو رأي سلبي في (عطبرة).

نتمنى أن يرد لاعبو الأمل بانتصار كبير على المريخ بإذن الله وتوفيقه.

الأمين العام للجنة (التصريحات)...اللورد الما عارف اسمو ..يصرح ..وقت محمد أحمد بحر يصرح ...الكلام ما بعجبو ..وبقوم يرد عليه ويطالبه بالاعتذار.

يا زول ما تبعد.

أنت منو عشان تطالب الأمين العام لمجلس الهلال المنتخب بالاعتذار.

يعني التصريحات حلال عليكم وحرام على ناس بحر.

تصريحات اللوردات ..يمكن أن تقود الوسط الرياضي إلى كوارث.

سوف نسمع الكثير من التصريحات ...من لوردات المريخ بعد العودة من عطبرة.

بالمناسبة اللورد دا ..هو رئيس بعثة المريخ في عطبرة.

تموها بركة.

الزمالك من 2007 ما حقق انتصار على الأهلي.

دا فريق شنو؟.

ويقولوا ليك برضو في قمة في مصر.

.......

عاجل : الحضري ما بشوف بعد (6)...باسكال مالو كمان.

انقر هنا لقراءة الخبر من مصدره.