زمان نحن في شندي نتراسم فرحة - فرحة ونتقاسم الضحكة ...وشندي مدينة شوارعها زي البيوت ..فيها نفس الالفة ..والمودة ..والعشرة والملاح. تلقانا حايمين في الشوارع متل (حوض الجرجير)...حايمين بالفرح كلو..نتقاسم مع الناس عشم باكر.
اول حوض الجرجير بحوم.
والله البلد دي أي حاجة فيها بتحوم ..ما في حاجة قاعدة في الواطة.
لمن يكون معاك (هوا) ..بتقول لي صاحبك ..اسمع بعدين صلّح (نقط نقط)..وبجي عليك.
تمشي ليه تلقاه صلح ال (نقط نقط).
النقط نقط هنا يا جماعة (الفول)...عشان تفكيركم ما يمشي لي بعيد...لكن (الفول) ذاتو لمن تصلحو بتعمل ليه (شفرة).
انتوا قايلين (الفول) ساهل.
ناس صحيفة الاسياد امس ..قالوا إن الموقع الرسمي للبايرن تجاهل المريخ واهتم بالكويتي.
اول الموقع الالماني شن خبرهم بالمريخ.
قالت الاسياد : ( ابرز موقع بايرن ميونخ أن الفريق سيلعب ترويحية بقطر حدد زمانها والفرق التى سيلتقيها ومن بينها فريق كويتي فيما لم يتطرق للقاء يجمعه مع المريخ وكتب التاريخ على أن يحدد لاحقاً الفريق ويبدو أن البافاري ترك الامر مفتوحاً لشركة التسويق وتظهر الصور هنا أن اسم المريخ غير موجود على اللائحة ما يجعل الحديث عن الاستعانة بكروجر للحصول على معلومات من قبل البافاريين اقرب للمزحة منه إلى الواقع).
يعني موقع بايرن ميونخ ...خلى خانة الفريق الذي سوف يلعب معه (نقط نقط).
بايرن ميونخ ح يلاقى نقط نقط.
ونقط نقط دي ممكن يكون المريخ ..وممكن يكون الاسماعيلي أو وادي دجلة أو الظفرة.
الحكاية مفتوحة.
قول ناس بايرن ميونخ عرفو انهم سوف يواجهوا في الدوحة (المريخ).
قول عرفوا.
وقول كمان عرفوا أن المريخ بيلعب فيه سعيد السعودي وموسى الزومة وضفر وبله جابر وعنكبة.
قول عرفوا.
قول ناس بايرن ميونخ ديل شالوا ليهم معلومات من كروجر عن المريخ.
قولوا الكلام دا كلو حصل.
هم برضو المريخ عندهم فريق مجهول..وما معروف ..ونقط ..نقط.
يعني يعرفوا ليهم المريخ بي شنو؟.
يقولوا ليهم المريخ دا كان بيلعب فيه (فيصل العجب)..ومشى هسع يلعب في المريخ الفاشر.
يقولوا ليهم ...المريخ دا ...فريق استادو فيه (طابق تاني).
يقولوا ليهم ...جمال الوالي رئيس نادي المريخ (رئيس طوالي).
وروني انتوا يقولوا ليهم شنو عن المريخ ..ويعرفوه ليهم كيف؟.
إلّا يقولوا ليهم المريخ النادي الذي يفصله من الهلال شارع واحد.
لذا المريخ بالنسبة للالمان ديل نكرة ..ما بعرفوه ليكم ..ان كتلتوا رقبتكم.