سودارس : مريخ موردة قبل برشلونة بايرن ميونخ زي (الحفلة) القبل تبدأ كهربتها قطعت

عثمان ميرغني يكتب: السودان… هل تتَّسع شروخ «الدعم السريع»؟ انطلاق أعمال تأهيل وإعادة استاد الموردة المريخ يجري مرانه الرئيسي للقاء" جيكومبي" وسط حماس عالي مدرب المريخ داركو نوفيتش راض عن الفريق رغم الظروف الصعبة واعمل حاليا علي تجهيز المجموعة القادمة من السودان بالصور.. وفاة حفيد الإمام المهدي بجنوب أفريقيا وأصدقاء الأسرة ينعوه بعبارات مؤثرة: "خبر فاجع ورحيل مؤلم لزينة الشباب" شاهد بالصورة.. الشاعرة داليا الياس تخطف الأضواء في أحدث ظهور لها وتكتب: (هذا أكثر ما يعجبنى في أي ثنائي ناجح عاطفياً) النائب العام في الإمارات يحيل 13 متهماً و6 شركات لأمن الدولة بينهم صلاح قوش رئيس الوزراء السوداني يصدر توجيهًا شاهد بالصورة والفيديو.. في مشهد مؤثر.. أفراد أسرة سودانية ينهارون بالبكاء في ليلة "حنة" زواج إبنهم والجمهور يكشف السبب!! نشطاء على مواقع التواصل يكشفون أسباب "طلاق" الفنانة مروة الدولية رغم موافقتها على قرار زوجها بإعتزال الغناء شاهد بالصورة والفيديو.. في مشهد مؤثر.. أفراد أسرة سودانية ينهارون بالبكاء في ليلة "حنة" زواج إبنهم والجمهور يكشف السبب!! جبريل بين البدلة والبندقية..! فئات نقدية قديمة تثير التساؤلات... وبنك السودان المركزي يحدد موقفه رسمياً النور قبة : انحياز حميتي لقحت كانت أحد الأسباب الرئيسية لاندلاع حرب السودان كيليان مبابي ينافس ميسي ورونالدو في مؤشر "الكسل" الدفاعي أزمةٌ كبيرةٌ وسط الجالية السودانية والقنصلية في أسوان.. ومطالبات بتعيين قنصل جديد قائد منشق عن ميليشيا الدعم السريع يفجّر مفاجأة كيركيز : محمد صلاح يتمتع باحترافية عالية وسأفتقده في ليفربول روميرو يشعل الصراع بين قطبي مدريد وبرشلونة دراجة بخارية تحقق أرقاما قياسية وتصبح ثانى أسرع دراجة نارية عالميا الإمارات تنسحب من "أوبك" و"أوبك+" "ترجمة جوجل" تضيف التدريب على النطق بالذكاء الاصطناعي أمريكا تصدر جوازات سفر تذكارية تحمل صورة ترامب يحيى الفخرانى رئيسًا شرفيًا لمهرجان مسرح الأطفال مى عمر تكشف عن تفاصيل جديدة من فيلم شمشون ودليلة قبل عرضه بالسينما سر الظهور أصغر بعشر سنوات مرضى الضغط فى الصيف.. استشارى يقدم روشتة من 5 خطوات لتجنب أى مضاعفات وزير المعادن: نعمل مع الهيئة العامة للأبحاث الجيولوجية لتوسعة الشراكات الدولية خطوة استثنائية في الأفق.. السودان يطرق باب "فيفا" لتمديد الموسم المعجزة الحقيقية في كوننا أحياء مشروع إماراتي ب100 مليون دولار في قناة السويس كامل إدريس يكشف أسباب حظر استيراد 46 سلعة ياسمين صبرى بين فيلمين دفعة واحدة من كريم عبد العزيز لمعتصم النهار "يد الرب" و"هدف القرن".. قصة أشهر هدفين في تاريخ كأس العالم لماذا تصاب بجفاف العين بكثرة فى الصيف؟ الشرطة في بورتسودان تصدر بيانًا بشأن عملية اقتحام وزير سوداني يكشف عن ترتيبات وخطط..ماذا هناك؟ سوداتل تعلن تحقيق أعلى دخل تشغيلي منذ التأسيس وأرباحًا صافية 117.5 مليون دولار لعام 2025 من الذروة إلى الجمود.. مطار نيالا يفقد نبضه الجوي أكبر هجوم منسق واغتيال وزير الدفاع.. ما الذي يحدث في مالي؟ متأثّرًا بجراحه..مقتل وزير الدفاع في مالي نجاة ترامب من محاولة اغتيال معماري سوداني يفوز بالجائزة الكبرى لجمعية المعماريين اليابانيين والسفارة بطوكيو تحتفي بإنجازه مكافحة التهريب البحر الأحمر تُبيد (3.5) طناً من المخدرات مكافحة التهريب البحر الأحمر تُبيد (3.5) طناً من المخدرات أطباء بلا حدود : علي ظهور الجمال والحمير … اللقاحات تصل جبل مرة ترامب: سنمدد وقف إطلاق النار مع إيران حتى تقدم طهران مقترحاتها وتكتمل المفاوضات الهلال «مدرسة» قبل أن يكون «نادياً رياضياً» الدعيتر.. كان اللغة الثانية في البلاد مصر.. قرار بشأن المنتقبات بعد تدخل شيخ الأزهر في عملية اختطاف هزت البلاد مكافحة التهريب بالبحر الأحمر تضبط 340 كيلو آيس و200 ألف حبة مخدرة فى عملية نوعية بالتعاون مع المخابرات العامة السودان.. تفاصيل صادمة لاغتيال مواطن بدمٍ باردٍ شرطة ولاية نهر النيل تضبط (53) جوالًا من النحاس المخبأ تحت شحنة فحم بمدينة شندي وتوقيف متهمين عثمان ميرغني يكتب: فساد.. الفساد.. الشيخ بن زومة.. إلى جنة الخلد في زمن الضجيج.. القرآن بوصلة المعنى والسكينة صوت لا يغيب.. محمد رفعت ورحلة الآذان الخالد في رمضان شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

مريخ موردة قبل برشلونة بايرن ميونخ زي (الحفلة) القبل تبدأ كهربتها قطعت

قوون نشر في قوون يوم 24 - 04 - 2013

الحاجة (بخيتة)...شايلة (انبوبتها) ..وحايمة البلد كلها ب (ركشة)..بتفتش ليها عن (انبوبة غاز).

تلاقى زول زول ..تسألو من (الغاز)..اي واحد يوصف ليها (محل).

زول يقول ليها في (جبرة)...وزول يقول ليها الضمان تمشي (الكلاكلة)..وزول يقول ليها احسن تمشي (حلة كوكو).

ناس في محلات الغاز بقعدوا ينظروا ليك (جنس تنظير)...تسأل ليك واحد يقعد يحكي ليك قصة حياة (انبوبتو).

ما فاضل إلا يخرجها ليكم من (كلية الطب).

وحاجة بخيتة شايلها (انبوبتها) وتسأل.

في ناس قالوا ليها امشي (السامراب)..وفي ناس قالوا ليها احسن تمشي الثورة الحارة (75)..والكثير منهم قالوا ليها امشي (الشجرة) احسن تمشي (المستودع) عديل كدا.

اي زول بي (فهم) ..واي زول المحل البوصفو ليها بقول ليها لو ما لقيتي في المحل دا خلاص (اقنعي).

الناس كلها بتقول ليك ...(لو ما لقيت في المحل دا تاني اقنع بس).

وكانت الحاجة (بخيتة) كل ما يوصفوا ليها (حتة)..تقول ليهم : يا اولادي انا اصلي عاوزة لي (انبوبة غاز)..وإلا (محطة فضائية).

معقولة البلد دي (انبوبة الغاز) فيها بقت زي (اللوتري).

ود الشوتلي ...شايف ليك الحاجة بخيتة ..كل يوم تطلع من سبعة صباحا ..تركب ليها ركشة بي انوبتها ..وترجع بخفي حنين.

كل يوم الحاجة بالطريقة دي.

ود الشوتلي مشى عليها ..قال ليها يا حاجة ما تتعبي ساكت ...انتظري شهري (6).

الحاجة عاينت ليه سمح ..لمن (طاقيتو) وقعت ..قالت ليه انتظر شهر (6) ليه؟.

انا عاوزة لي (انبوبة) وإلا عاوزة لي (محترف).

ود الشوتلي سمع ليك كلمة (محترف)..عجبو ليك الكلام ..جاها ليك جاري..وقال ليها : والله يا حاجة احسن تنتظرى (التسجيلات)..البلد دي ما فيها (غاز)..ما تضيعي وقتك ساكت.

في شهر يونيو ...نحن اصلا عاوزين لينا (مهاجم) ...وانبوبة غاز.

هسع انتي يا حاجة ما شفتي حالة المريخ دي بقت كيف ؟..(مهاجم) عديل ما عندهم.

كلتشي شغال بالشحن ..يدفعوا ليه (يلعب)..ما يدفعوا ليه بقول عندي (رباط صليبي).

رباط الصليبي بس بجيه وقت ما يصرفو ليه.

رباط (محترف).

مبرمج كدا ..يدفعوا ليه يكون زي الطلقة ..ما يدفعوا يحصل ليه (قطاع).

تصوري ناس المريخ الاهداف عندهم بقوا يجيبوها ناس (بلة جابر).

كلتشي بقى قاعد في تشكيلة المريخ زي سواقين البصات السياحية ..ما جايب خبر.

امس سجل بس عشان سمع جمال الوالي راجع ...(لو ما قالوا ليه جمال الوالي راجع »كورنر« ما بجيبوا ليكم)

ومحمد موسى ..زي الزول الماسك (الكشف)..شايل ليه كرسي وتربيزة وقاعد بعيد.

والله يا حاجة البلد دي لا فيها مهاجم زي الناس ..ولا فيها (غاز)..عشان كدا نحن من هسع نسقنا مع (الوكيل) ابوبكر مصطفى.

نسقت معاه على شنو يا ود الناس ؟...على انو يجيب لينا (مهاجم) ...وإلا انبوبة غاز (محترفة)؟.

لو الاتحاد العام لكرة القدم ..ضمّن لينا في عقودات الاحتراف حقتو دي (انبوبات الغاز)..يكون ما قصر.

ازمة الغاز دي ما بتنحل إلا نقبل على (نيجيريا).

على الاقل ..انبوبة الغاز افضل لينا من ناس سيلمانو ومكسيم ..ودومنيك.

هسع نحن في الهلال ..(خلوه المريخ)..لو فكينا (دومنيك) دا بجيب لينا انبوبة غاز؟ دا كيلو غاز ما بجيبو.

دا دومنيك اخيّر شوية ...(مكسيم) بتاع المريخ ..(والكلام دا ما يطلع من العمود دا)...(ملوة فحم) ما بجيبها.

ملوة فحم شنو؟...دا (ربطة حطب) كتيرة عليه.

بتعرفوا (ربطة الحطب).

نرجع للفحم ...الجماعة ديل ما بعرفوا لي (الحطب).

حطب شنو؟...ناس الخرطوم ديل (الحطب) في التاريخ ما بكون قابلهم.

شفتوا (كيس الفحم) الببعوه ب (2) جنيه داك ..(كلو هريسة)...مكسيم ما بجيبو ..( لو ما مصدقني اسألو الكوكي).

مرة مشيت اشتري لي (فحم)..مديت لي سيد الدكان (2) جنيه ..مدا لي (كيس).

عاينت للكيس كدا ..قلت ليه طيب دا (الكيس)..وينو الفحم؟.

قال لي الفحم جوة الكيس.

قلت ليه معقولة ..الكيس دا فيه (فحم)...طيب الشيء دا وقت غالي كدا ..ما تبعوه في (الصيدليات).

لزومو شنو؟..تجهجهونا كدا.

لذلك افتحوا باب الاحتراف لانبوبات الغاز في الدوري السوداني.

يعني الواحد تاني عادي يشوف وكيل الحضري (شيحة) عشان يجيب لينا (انبوبة غاز) من مصر.

احسن لينا من اللاعبين البجيبوهم لينا من برة.

لو فتحتوا باب الاحتراف للغاز في السودان ..6 شهور كدا بتلقوا الدوري السوداني دا كلو بقى (انبوبات غاز).

جمال الوالي ..(الشايفو) انا دا ..تاني ح يجيب (انبوبة انبوبة)..يجنسها في المطار ويدخلها.

يمنح ليك طوالي الانبوبة الاجنبية جنسية (ابرسي) غاز.

ناس الخرطوم الوطني وناس هلال كادوقلي طبعا ما عندهم قدرة للغاز دا..عشان كدا بتجهوا الي (الاعارة).

او يلعبوا ب (حطبهم) المحلي دا.

يعني ..الخرطوم الوطني ممكن يجيب ليه (انبوبة) حبشية (اعارة) (6) شهور ..لمن ازمة الغاز دي تنتهي يرجعوا الانبوبة بلدها.

لو ما اتعاملتوا بالطريقة دي مع (الغاز)...ازمة الغاز ما بتنتهي ..افتحوا باب الاحتراف احسن.

ناس مجلس ادارة نادي الهلال ..ح يجيبوا ليك (انبوبة) من ساحل العاج ...وح يقولوا ليك (المنظم) لسع ما وصل.

يعني (الكرت) ما وصل ..من الاتحاد العاجي.

او يجيبوا ليك (4) انبوبات غاز من مالي ..ويقفلوها في واحد من (دكاكين) استاد الهلال ...وبعد شوية يقولوا ليك (البلف) قفل.

يعني (السيستم) قفل.

ويطلع بعد كدا ...هاشم ملاح في التلفزيون ويقول ...نحن (انبوباتنا) دي ح نسجلها في فترة الانتقالات القادمة.

نحن راجعنا موقفنا في (الفيفا) ...ولقينا موقفنا (سيلم)...ما عندنا اي مشكلة.

ويطلع العقيد صديق حسن صالح في الشروق ..ويقول ليك : عندنا محاولات نلحق الانبوبات بي كشف الهلال.

...يا حاجة (بخيتة)..اقول ليك حاجة .. شيلي (انبوبتك) دي ..وخلينا نتابع كورة المريخ والموردة.

خلونا نضحك شوية.

هسع الكورة دي فرقها شنو من ( يا خلف الله ما عذبتنا).

فريق المريخ دا كلو بقى (خلف الله).

اكرم الهادي سليم (خلف الله) ..باسكال (خلف الله)...ضفر (خلف الله)..موسى الزومة (خلف الله)...الباشا (خلف الله)...امير كمال (خلف الله) ...علاءالدين يوسف (خلف الله) ..العجب (خلف الله الكبير)...كلتشي (خلف الله)..رمضان عجب (خلف الله)..كلتشي (خلف الله)..هيثم مصطفى ذاتو بقى (خلف الله) مع ناس بلة جابر ديل.

فريقكم كلو (خلف الله خلف الله خلف الله).

وقبل ما نتابع ...انتوا تعالوا هنا ..(غارزيتو) دا الوداهو استاد المريخ شنو؟.

كمان قاعد يتفرج.

تتفرج شنو يا غارزيتو؟ ...الكورة دي نحن في البيت بنحوّل القناة منها ..وبنرجع ليها.

ما عندنا (صبر) ليها.

امشى يا غارزيتو اتلم من بدري لي مباراة بايرن ميونخ ..قاعد لي توسخ عيونك بالكورة دي.

الكوكي شاف (غارزيتو) قلبو طار.

وهيثم مصطفى ذاتو ما قدر يلعب.

مباراة المريخ والموردة امس قبل مباراة برشلونة ..(تقفل) النفس ..تورينا حقا نحن واقفين وين؟.

متخلفين في اي شيء.

كورتكم زي (عواستكم).

عليكم الله هسع دي (نجيلة).

نجيلة كلها (ديدان).

الديدان ما خلت ليها حتة سليمة في ارضية استاد المريخ.

بالمناسبة قون بلة جابر العكسي ...(الديدان) لعب فيه دور.

بلة ذاتو قال كدا.

المباراة ذاتها كدا ... كانت (تراثية) صور شعبية...مباراة المريخ قبل مباراة بايرن ميونخ ..زي الزول البكون قاعد في الحفلة ..قبل الحفلة ما تبدأ (الكهربة) تقطع.

زي (الفول) في الغدا.

كورتكم دي يا ناس المريخ ...زي ملاح (الورق) في الفطور...هسع دي كورة ...وكورة برشلونة وبايرن ميونخ كورة.

انتوا قاعدين وين؟.

والله (الكشافات) كتيرة عليكم.

مفروض تلعبوا (العصر).

ما معقول من كورتكم ...نمشي على كورة برشلونة طوالي.

مفروض يكون في فاصل على الاقل (3) ساعات.

كورتكم دي كورة جدودنا القدماء.

كورة (اديك كيس يا خال).

موش الزول وقت يمشي على سوق الخضار ...اول ما يقيف كدا في شافع بقيف جنبو ويقول ليه : (كيس يا خال).

كورتكم دي يا ناس المريخ زي (الكيس) دا.

كورة ما عندها اي علاقة بالكورة.

ريحة كورة ساكت ما فيها.

فتور ..وملل ..ولخبطة ..وجليط.

كورة زي (دخان) الحطب.

بامانة كدا ..دا اسوأ مريخ اشوفو في الفترة الاخيرة.

ناس فييرا ديل تقول جابوهم ينزلوا (الكراسي).

كأنهم دخلوا الاستاد دا (اجرة).

ناس ضفر علاقتكم شنو بالكورة.

ضفر ..براهو بيعمل (ضربة جزاء).

هسع يا ضفر (ضربة الجزاء) العملتها دي ..فرقها شنو من قون بلة جابر العكسي.

كلكم بقيتوا (بلة جابر).

مفروض مباراة المريخ والموردة تكون ب (كورة الشراب)...الكورة الرسمية كتيرة عليها.

ومفروض تلعبوا في (الدلجة).

والكدارات مفروض تلبسوها بدون (شرابات).

او اي لاعب مفروض يلبس كدارة (فردة) واحدة.

الجوز كتير عليكم.

علاءالدين يوسف في المباراة وصلتو (70) كورة ..عمل فيها (79) مخالفة.

التسعة تماها ليه (امير كمال).

امير كمال الي الان بفتكر انو الكورة (حلاقة).

كل مباراة يدخل لينا بي (حلاقة) جديدة.

يا ود انت قايل نفسك لسع بتلعب في (العشرة).

كورتك ما عاوزة تتطور.

كورتك دي كورة زول عندو (ملاريا).

يا امير انت ما كويس.

ما عاوز تتقدم ..امير يا هو امير ..يعمل (مخالفة) ويعترض كمان على الحكم.

اما فيصل العجب ...من الافضل له ان يحترم نفسو.

يا زول كفاك.

الشطب ان خلاك (الكبر) ما بخليك.

كورتك دي (كنبة) محترمة ما بتقعدك فيها.

يا العجب ما تخرب سمعتك ساي ..شهر يونيو دا اعتزل ..وحتى يأتي شهر يونيو تاني ما تلعب.

بتخرب سيرتك ساكت.

دقيقة بايرن ميونخ جاب قون في الدقيقة (24).

الواحد مفروض يدخل على (الهوامش)..عشان يتفرغ للمباراة دي.

مباراة ساخنة ..وعصام الشوالي يعجبك.

الكورة دي ..ما بنفع معاه كتابة.

الدقيقة 28 من عمر المباراة برشلونة تضيع فرصة للتعادل.

تقولوا لي (ضفر).

هسع ضفر لو كان في الكورة دي ما كان بلع لسانو.

لو قاعد في المدرجات ..بيبلع لسانو.

ضفر مع ناس الموردة بعمل (ضربة جزاء).

ملحوظة : والله الكورة دي لا بتنفع معاها كتابة ولا حاجة ..(رسل ساي يا اخوي).

هوامش

ركنية لبايرن ميونخ في الدقيقة 31 ...ومدافع برشلونة شالها بي ايدو.

يا مامون ابوشيبة ما تكتب لينا في الحكاية دي.

انت بس مركز لي في ايدين ناس معاوية الامين.

كنت اخشى على الهلال امام الاتحاد في مدنى ..وخفنا على الهلال من هلال كادوقلي في الخرطوم.

لكن اليوم الهلال ان شاءالله سوف يعود بانتصار عريض من عطبرة.

تلاتة اهداف ان شاءالله وتلاتة نقاط.

والله كورة البرسا وبايرن ...ما بتخلينا نكتب.

رسل.

الاهلي شندي يلعب امام النيل في شندي ...والاهلي دائما يخسر في شندي امام اندية الولايات.

احساس لاعبي الاهلي بشندي ضعيف ..يمكن عشان الوقت كلو قاعدين في الخرطوم.

الاهلي شندي بمشي للمباراة في شندي زيو وزي الفريق المنافس ..وبرجع الخرطوم.

لذلك الاهلي شندي يخسر دائما في الاهلي.

بايرن ميونخ ..يبدو الاقرب لبطولة الاندية الاوربية هذا العام.

ميونخ سرعة ..وقوة ..وتكتيك ومهارات ..واردة وقوة ...عندهم كل عناصر البطولة.

غايتو البشوف كورة المريخ والموردة ..ويجي يشوف كورة برشلونة وبايرن ميونخ ..زي الكأنو كان بكسر في (حطب).

او زي كأنو كان واقف ليه في فرن.

كورة المريخ والموردة زي (تقوم بينا العربية)...او زي (اضربني بي مسدسك).

اما كورة بايرن ميونخ وبرشلونة زي (أغدا القاك)..او زي اغنية محمد عبده (الاماكن).

شريط مباراة المريخ والموردة ..مفروض يحرقوه عديل كدا.

ما تفضحونا ساكت.

عاجل : يا زول خلينا نتابع الكورة.

انقر هنا لقراءة الخبر من مصدره.