* مع صباح كل يوم جديد تخرج الصحف بخبر يحمل اصابة نجم من نجوم الهلال .. * الموضوع ده ليهو تلاتة ايام .. * تفتح الجرايد تلقى إصابة فلان بالخط العريض .. * لدرجة إنو الواحد فينا بقى يقرأ الجريدة بعين واحدة خوفا من الاحباط .. * زي بطولة حوض النيل .. * هسه إحنا لما نلقى جريدة مريخية قدامنا الواحد بقرأها لكن بعين واحدة .. * تمسك الجريدة المريخية وتغمض عين وتقرأ بالعين التانية .. * بطولة حوض النيل دى ما بتستاهل (جوز عيون) .. * عين واحدة بس .. * بطولة (هجين) والمستوى (طين) .. * المهم .. * هذه الاصابة مزعجة جدا ومخيفة جدا .. * ولسوء الحظ هذه الاصابات تزامنت مع الايقافات .. * وهذا يصعب مهمتنا في الابطال .. * وكلما كانت مهمتنا صعبة كلما احتاج الهلال لجمهوره .. * وجمهور الهلال مسؤول بشكل مباشر عن مباراة فيتا كلوب .. * يمكن للهلال ان يعوض الغيابات بحناجر الجمهور .. * حناجر الجمهور تستر كثيرا من العيوب .. * وأهم من ذلك ان نقف بقوة مع البدلاء المرشحين لدخول التشكيلة حتى يكونو خير سلف .. * هذا إلى جانب ضرورة إضافة عناصر جديدة للكشف .. * وفي حتة العناصر دى أنا عايز أقول حاجة .. * بحسابات (الكورة) وليس (العمر) فان بدر الدين قلق أفيد للهلال من كوليبالى .. * كوليبالى الذى هو (صغير في السن) ما قدمه في ستة اشهر يمكن ان يقدمه قلق (الكبير في السن) في مباراة واحدة فقط .. * نعم بين الهلال وقلق (مواقف ومبادئ) ولكن فشل لجنة التسيير في التعامل مع التسجيلات التكميلية يمكن ان يجعل قلق خيارا .. * مجلس الهلال لم يتعامل بالشكل الامثل مع الفترة التكميلية للتسجيلات .. * سجل المجلس المهاجم البرازيلى (المشكوك) في إمكانياته وإكتفى بذلك حتى الان .. * لو سعى المجلس أكثر من ذلك لنجح في دعم الفريق بثلاثة محترفين افارقة من الوزن الثقيل .. * الهلال ده لو لقى ليهو (ربع دستة) من المحترفين الصحى صحى على بالنعمة بيشيل الكأس السنة دى .. * قلق أفضل من كوليبالى وأفضل من على النور .. * يمكن تسجيل قلق لستة شهور مقابل مبلغ مالى بسيط .. * قلق (جن بنعرفو) وسيرجو (جن لا بنعرف ولا شفنا) .. * بمناسبة قلق .. * العمود ده أنا كتبتو امبارح بالليل لكن ما عرفت المريخ عندو مباراة إلا الليلة الصباح .. * دى كيف أنا ذاتى ما عارف .. * المهمة اللحظة الكتبت فيها العمود ده ما كنت عارف المريخ لاعب مباراة لكن الليلة الصباح عرفت إنو هم كانو لاعبين أمبارح .. * عرفت كده .. * وأى زول طبعا حر في (معرفتو) .. * إنتو حوض النيل دى بتلعبوها كيف ؟؟ * يعنى المغلوب بيطير ولا بالنقاط ولا كيف ؟؟ * وهل المباراة في حوض النيل زمنها (90) دقيقة ولا (70) دقيقة ؟؟ * وهل الحكام من بره ولا حكام سودانيين ؟؟ * هذه اسئلة تبحث عن اجابات .. * نتمنى من الاخوة في اعلام المريخ ان يمدونا بمعلومات عن حوض النيل .. * إنتو كان تسموها (حوض النيم) وتريحو رقبتكم .. * الفرق المشاركة دى كلها ما شافو النيل إلا في الخرطوم !! * كيف تسموها حوض النيل ؟؟ * النيل برئ من هذه المهازل .. * اظرف حاجة أمبارح الضو قدم الخير قال بيرشح المريخ للفوز بالبطولة .. * يعنى البطولة دى بسجمها ورمادها ده في إحتمال المريخ ما يفوز بيها .. * هى بطولة عاملنها للمريخ يا الضو تقول لي برشح المريخ .. * يعنى داير ترشح منو يعنى ؟؟ * غايتو جنس غايتو .. * الكلام ده كلو ما مهم بالنسبة لينا .. * المهم عندنا إنو مباراة فيتا كلوب نلعبها في استاد الحكومة .. * استادنا لسه ما جاهز عشان كده من حقنا نلعب في استاد المريخ الحكومى .. * استاد المريخ ده عندنا فيهو نصيب .. * استاد (لوحة صفراء) يعنى حكومى يا مولانا .. * والحكومة تدعم ممثل الوطن بلاشك .. * ولذلك نرجو من الاخوة التمهيداب تجهيز الأستاد بالشكل الذى يليق بهلال السودان .. * جهزوا لينا الاستاد بصورة تليق بمباراة الهلال وفيتا .. * استادكم ده زمن طويل ما استقبل كور بالحجم ده .. * بيستقبل مباريات التمهيدى وسيكافا .. * عشان كده دى فرصة طيبة نلعب ليكم فيهو .. * على فكرة اخر مرة ورد فيها اسم المريخ في قناة الجزيرة الرياضية كان قبل سبع سنوات .. * ويوم مباراة الهلال والزمالك المعلق ذكر اسم المريخ مرتين .. * المرة الاولى قال : (نصر الدين الشغيل لاعب المريخ السابق) .. * والمرة التانية قال : (في السودان الناس منقسمة بين الهلال والمريخ) .. * يعنى مرتين فقط .. * أيامكم والله .. * و..و.. * وماشة معاك عسل على رأى المثل ..