* أسوأ حاجة في الدنيا دى أنك تشيل الصرفة الأولى في صندوق فيهو (12) نفر * تاخد الصرفة الأولى وتقعد تدفع حداشر شهر زي جمال الوالى * تدفع لما تكره الصناديق * جمال الوالى (13) سنة بيدفع للمريخ ولحدى الان ما شال صرفتو * لا جاب كأس محلى ولا كأس خارجى * بيدفع بس * أنا طبعاً نفسى أدخل في صندوق مع جمال الوالى * متمنى الحاجة دى * وأى زول طبعاً حر في (امنياتو) * تدخل مع جمال الوالى في صندوق تشيل الصرفة الأولى وتعمل رايح * زي مبينزا * مبينزا جاء المريخ وعمل كشف طبى وأبدى الرغبة والجماهير حملته على الأعناق وقبض الدولار الحار ومشى وما جاء * وجمال الوالى ما بيقدر يقول حاجة لأنو الوالى عارف عزو * والعارف عزو مستريح * المشكلة كلها إنك تكون ما عارف عزك * هسه لو داير تتزوج أهم حاجة تعرف العروس عارفه عزها ولا ما عارفه * لو بقت ما عارفه عزها تبقى مشكلة * قبل كم يوم عندنا بت في حلتنا خطبوها وبعد يومين فسخو الخطوبة * سبب الفسخ قالوا البت ما عارفه عزها * بمناسبة العروس * عناصر الجمال عندنا هى : (الخدرة والماء والوجه الحسن) * وعناصر الجمال في مونديال البرازيل هى (الصفار والماء والوجه الحسن) * المدرجات في المونديال مليانة بنات سمحات * المونديال ده على بالقسم فيهو بنات يوقفن الحركة * بلاتر لو شاف بنات المونديال ديل بيعمل كأس العالم كل سنتين * هسه معقولة البنات ديل كلهن بايرات * غايتو المشجعات ديل بسماحتن دى يوم بيكتلن ليهن (حكم رايه) * المونديال ده قبل ما ينتهى بتلقو ليكم حكم رايه ميت * ونحن خوفنا كلو على رجل الخط التانى * لانو بيكون قريب من المدرجات والجمال * جمال ب(الحاء) .. * إنطلق إعداد الهلال بعد توقف لأيام قليلة * والإقبال على التدريبات من قبل نجوم الفريق لم يكن كما يجب * التكاسل والغياب عن التدريبات الأولية يحدث فروقات في الإعداد وتباين في المستويات * والهلال مقبل على مرحلة حرجة ومباريات كبيرة جدًا وأي خلل في الإعداد يعنى فشل الفريق لاحقاً * ويبدو أن المحترفين سيعودوا بنا لعهد (حجوزات الطيران) و(أبوى عيان) و(أمى خطبوها) .. * ظرف الهلال لن يستحمل الأعذار والغيابات في هذا التوقيت القاتل .. * يجب أن تفرض دائرة الكرة عقوبات ماليه على كل لاعب لا ينخرط في الإعداد اليوم * اليوم هى الفرصة الأخيرة لإنخراط كل اللاعبين .. * وغدًا الخميس هى الفرصة الأخيرة بالنسبة لهيثم مصطفى من قبل المريخ * اللجنة التى كونها مجلس المريخ لمحاسبة هيثم عقدت اجتماعها الأول وهيثم ما جاء * أكلو الفول والبلح وهيثم نايم في البيت * المرة التانية اللجنة جات واجتمعت وأكلو الفول والبلح وهيثم ما جاء * المريخ لما يكوِّن لجنة لمحاسبة زول أول حاجة بيفكروا فيها هى البلح والفول * بيجهزوا ليك البلح قبل أجندة الاجتماع * يدخلوا القاعة يضربوا الفول والبلح وموية الصحة ويطلعوا بدون أي فايدة * (13) سنة الناس ديل بيأكلو في الفول والبلح دون أي فايدة * والله (بلحكم) ده لو أكلو كاكى كان كل أسبوع جاب لينا ميدالية * ومن هسه بكره هيثم ما بيجى * وما بتقدروا تعملوا ليهو حاجة * لو كان بتقدروا كان عملتو للحضرى * ستة شهور سيمضيها هيثم بمنزله ومن بعد ذلك يذهب لأهلى شندى ويختم حياته في (الهلال ب) * عشان كده اللجنة بتاعتكم دى أنا شايف حقو ما تجتمع * ولو اجتمعت حقو يكون الاجتماع بدون فول وبلح * وفي حاجة أهم من ده كلو * اللجنة دى لو ما عارفه عزها تبقى دى مصيبة * المريخ لا يقوى على معاقبة لاعب مبتدئ ناهيك عن هيثم * المريخ الذى تعاقد مع برهان ومحسن في وجود جبرة وابراهومة وأبو عنجة لا يقوى على شئ * بعد التعاقد مع برهان ومحسن فإن تشجيع المريخ في الوقت الراهن يحتاج ل(شجاعة أدبية) * إن لم تكن لك شجاعة أدبية لن تتمكن من تشجيع المريخ * ناس زيكو وأبو عنجة والضو قدم الخير قاعدين فراجة * ناس المريخ لو ماشافوها شينة كان بيجيبو خالد بخيت وأبو شامة * بعد ما سجلو مشاطيب الهلال مجاهد وريتشارد وطمبل والبلدوز وأكرم والباشا ، جابو ريكاردو وحتى مترجم ريكاردو خالد أمبدة * وقبل أيام المريخ فاوض مدرب أحمال الهلال التاريخى فتحى بشير * غايتو جنس غايتو * الناس ديل بحبو ناس الهلال وحاجات الهلال * أنا خايف يوم نلقى (سور استاد المريخ) أبيض بأزرق * و..و.. * وخسارة الريد البعتو ب...(إسكراتش أبو عشرة) .