الاستغراب فينا – متل (شفع العرب الفقاره) عند محمد الحسن سالم حميد فريق لعب خمس مباريات ولم ينتصر إلّا في مباراة واحدة وعلى فريق صومالي كمان – مع ذلك بلعب في نهائي البطولة الان كان تقولوا المريخ سافر روندا او يوغندا (البطولة وين هي) من اجل العلاج – احسن من تقولوا من اجل سيكافا سيرجيو لو كان بلعب في سيكافا كان هسع بكون عندو (51) هدف – غير ضربات الجزاء * جابو لينا زول زي (ناظر المدرسة الجديد)...الما عندو (نضارة) – جنو وجن الاستهلاك غير المرشد للطابشير. * ناظر المدرسة ما بحب الاستاذ البستهلك (طباشير) كتير في حصتو. * عاوز تجيب ليه نفسيات قول ليه الطابشير انتهى. * تعريجة صغيرة كدا. * طبعا (ناظر المدرسة الجديد) اول يوم ليهو في المدرسة بلف على الفصول كلها – وبقيف في حوش المدرسة وبقول (الشتل) بتاع المدرسة دا ما قاعدين تسقوه. * ما قاعدين تدوه موية. * الشجر دا عطشان. * يخلي اي حاجة ويمسك ليك في (الشتل). * دحين نحن وانطلاقا من هذه النظرية – جابوا لينا زول جديد كدا – قعد ينظر لينا زي صحن الملوحة. * اول صحن الملوحة بنظر. * والله الزمن دا البسوى والما بسوى بنظر. * الواتس آب علم الناس التنظير. * زمان التنظير دا قصرا على القاعد في النجيلة وبشرب في عصير البرتقال. * (التنظير) ذاتو كان بخلوه للناس (المثقفين) شوية كدا. * يعني مستحيل تلقى ليك زول ما (مثقف) قاعد ينظر. * ما في تنظير ساكت. * ما في تنظير ما مؤسس. * جابو لينا زول جديد شايل ليه (مفك) وكتاب جغرافيا. * نحن من الاستغراب الفينا قلنا هسع علاقة (كتاب الجغرافيا) بالموضوع دا شنو؟. * انت ساكت عاوز تجهجه (جغرافية) الناس ديل. * الاستغراب فينا – متل (شفع العرب الفقاره) عند محمد الحسن سالم حميد له الرحمة والمغفرة. * في حالة عطش حايمة في الحلة. * العطش الدخلو هنا شنو؟. * زولكم عامل لينا فيها مهندس – عارف اي شيء...قال لينا طبقكم دا بجيب (سيكافا). * قلنا ليه ابدا – يمين طبقنا دا يجيب سيكافا تاني ما يدقها هنا. * واحد اتزوج ليه واحدة مجبور عليها – واهلو قال ليه احسن توريها العين الحمراء من بدري. * الزوج اول ما رجع من شهر العسل قال ليها اسمعي انا لا باكل البامية المفروكة ولا المطبوخة ولا الملوخية ولا القرع ولا الاسود ولا البطاطس ولا الفاصوليا ولا العدس ولا الفول. * اسمعي هنا يومي البجيب ليك في البيت دا (قرع) تعملي لي حاجة تانية غير القرع – تعملي لي من القرع ذاتو (سمك) ...شية جمر تصرفي بس. * اجيب ليك بامية – تعمليها لي منها - كبدة – قشطة – شعيرية بي لبن – تعمليها لي اي حاجة غير (البامية) – تصرفي بس. * اجيب ليك فول – تعملي لي منو (كباب). * فهمت الوضع يا ولية. * الولية حذروها اهلها – قالوا ليها اوعك الراجل دا تناقشيه في حاجة او تغالطيه – بقوم يرجعك في شهرك. * الولية مفتحة قالت ليه خلاص عليك الله الليلة جيب لينا معاك (عدس) عشان اعمل ليك منو (فراخ). * الراجل اتخلع – قال دي يتخلصو منها كيف ؟...(المفتحة) دي. * بقى يجيب (العدس) يأكل (فراخ). * يجيب (القرع) يأكل (شية جمر). * يجيب (فول) يأكل (كباب). * بقى قدر الدولاب دا في اسبوع. * يوم صاحبكم جاء راجع من الشغل قافلة معاه – ما طايق نفسو ..دخل البيت قال ليها عملتي لينا (البامية) شنو؟. * المدام قالت ليه عملت ليك البامية (سمك). * الراجل اتفصم ليك فيها – قال ليها مية مرة قلت ليك اعملي لينا منها (بيتزا) – نحن عليك الله السمك دا ما اكلنها قبل (41) يوم. * المدام قالت ليه ما تغضب البامية الجبتها كتيرة – عملت منها (سمك) – ونصها التاني عملت منو (بيتزا). * الرجل بلع ريقو – وقال ليها البيتزا العملتيها ما تكون بردت. * المدام قالت ليه ابدا – مولعة نار. * الراجل اتفصم فيها تاني قال ليها مولعة نار ليه – انا جيت متأخر مخصوص عشان القى الاكل برد شوية – تقولي لي مولع نار. * المدام قالت ليه (البيتزا) ذاتها مقسومة – فيها جزء مسخن وجزء بارد. * في اللحظة دي تلفون زولكم ضرب. * رفع التلفون قالوا ليه عندك قريبك اتوفى. * الراجل قبل على المدام قال ليها شفتي انا عارف (النقة) الكتيرة دي ما تفوت ساكت – اها كتلت لينا قريبنا – انت طالق ما بتنفعي معاي. * والله بيتزتك دي من البداية نفسي ما دارتها. * وطلع على كدا. * ناس (الشوف ود الجربتو) عندهم (طبق) مجنون عديل كدا ...يظبطوه عشان يجيب الكورة يقوم يجيب ليهم (فول). * زي نظام الزول الهارش مرتو دا. * يوم قاعدين عندهم قلنا نحضر لينا مباراة بين الخرطوم الوطني والاهلي الخرطوم – قدر ما لفينا (الطبق) ما جاب لينا المباراة. * اخر حاجة جاب لينا (سندوتشات). * الزول المنظر (الكلمتكم عنو فوق) قال لينا ح اجيب ليكم (سيكافا) في طبقكم دا...لكن عشان تشوفوا مباريات سيكافا في تلفزيوناكم دا لازم (ندنقر) الطبق للواطة – عشان البطولة – بطولة هابطة ما عندها اي قيمة – بلتقطوها من الارض – ما بجيبوها من السماء. * صاحبكم وجّه الطبق نحو الارض – سيكافا برضو ما جات. * قال لينا معليش – لازم نحن نقطع السلك بتاع (الريسفير)..المباراة دي ما عاوزة ليها اي (سلك) – معاوية الجاك بجيبها. * قلنا ليه انت عاوز تجيب لينا مباراة – وإلا عاوز تجيب لينا محمد سيد أحمد. * معاوية الجاك دا زول بتاع (كأس عالم) لكن ناس بلة جابر ديل اجبروه على (سيكافا) ساكت. * شوية كدا زولكم قال جيبوا لي (بصلة). * يا ود الناس – بصلة شنو؟..انت عاوز تعمل شنو؟. * انت عاوز تعمل ليك (حلة)...عاوز تعمل ليك (سخينة)..اوعك تقول عاوز (لحمة) سيكافا دي (مرقة دجاج) كتيرة عليها. * جبنا ليه (البصلة). * قال جيبوا لي (كديسة) – الاشارة طاشة ...والاشارة بي حالتها دي ما بتلقطها ليكم إلا (كديسة). * جبنا ليه الكديسة– قعد ينظر لينا. * قلنا ليه : اها الحاصل شنو؟. * قال لينا : والله انا منتظر (المطر). * قلنا ليه المطرة عاوز بيها شنو كمان؟. * قال لينا ابدا عشان لمن المطر تهطل – ح اقول ليكم الاشارة طشت بسبب (المطر). * قلنا ليه : ايوا – يعني عاوز ليك سبب تتعلل بيه في عدم وجود اشارة. * صاحبكم قال لينا والله الاشارة دي ما في – وما في منطق اتعلل بيه غير هطول الامطار. * اصلها وقت تهطل مطرة الاشارة بتطش. * قلنا ليه سيكافا دي طاشة طبيعي – طاشة بدون مطر. * شوية كدا جابوا لينا مباراة. * لا عرفناها مباراة في دوري الداخليات في مدرسة ثانوية وإلا عرفناها في مباراة سيكافا. * غايتو نحن الضربات الترجيحية الكتيرة دي ما بنشوفها إلّا في دوري الداخليات. * فريق لعب خمس مباريات ولم ينتصر إلّا في مباراة واحدة وعلى فريق صومالي كمان– مع ذلك بلعب في نهائي البطولة الان. * عليكم الله الكلام دا في دوري الداخليات قاعد يحصل. * هسع بي امانة كدا لو خليل فرح ذاتو. * خليل فرح شخصيا لو شاف فرحتكم دي ح يكون شعورو شنو؟. * خليل فرح اكيد ما كان ح يكتب (الشرف الباذخ) لو كان شاف لعبكم في بطولة سيكافا. * فلق الصباح ذاتها ما كان بكتبها. * سيكافا حقتكم دا كان تلعبوها في السر. * ما كان تكلمو بيها زول. * كان تقولوا المريخ سافر روندا وإلّا يوغندا (البطولة وين هي) من اجل العلاج – احسن من تقولوا من اجل سيكافا. * سيكافا دي لو جبتوها لي دكان اليسع ود كلتوم ما بديكم مقابل ليها اكتر من ربع رطل سكر. * تاني وقية ما بزيدكم. * .... * ملحوظة : المريخ يقدم عروض رائعة – المريخ بروح فدائية – الابطال يقدمون اجمل الدرر – وهم يا حسرة لم ينتصروا إلّا على فريق صومالي. * هوامش * سيرجيو لو كان بلعب في سيكافا كان هسع بكون عندو (51) هدف – غير ضربات الجزاء. * صلاح ادريس اتوقف من الكتابة في الرياضة – خلوه يكمل جميلو ويتوقف من (التلحين) كمان. * كدا يكون ما قصر. * مفروض على كدا الكاردينال تاني (سطر) شعر ما يكتبو لينا. * يمكن ان نقول ان الهلال في هذا الموسم قدم مباريات رائعة امام مازمبي في الخرطوم وامام فيتا كلوب في الكنغو وامام الزمالك في الخرطوم كانت اروع من كل المباريات التى قدمها الهلال في المواسم السابقة. * ننتظر اتاحة الفرصة لمحمد عبدالرحمن ووليد علاءالدين. * وننتظر احمد بيتر واطهر الطاهر بعد حل اشكاليتهما. * اكتر كورة مقنعة في البلد دي اصبحت كورة سيسه. * ونيلسون كان نعم الاضافة للهلال. * الهلال يحتاج محترف قناص محترف اقوان – مع طرف شمال ومدافع ولعب وسط. * الكاردينال ومجلسه عليه بواسطة اللجان الفنية ان يحسم امر التسجيلات. * مع التركيز التام في الدوري والكأس. * مستوى الهلال امام الزمالك جعلنا اكثر ثقة في ان يحصل الهلال على كل البطولات المحلية. * يبقى الترتيب منذ الان للبطولات الخارجية في الموسم القادم. * سوف يكون الهلال في الموعد. * المعز محجوب عاد متألقا – تقول كان بلعب في الدوري الانجليزي ما كان قاعد كنبة. * .... * عاجل : ناس بلة جابر ديل بعد سيكافا مفروض يلعبوا في دار الرياضة ام درمان ضمن اندية الدرجة الثانية بالولاية. *
