سودارس : ترباس أول ما سمع ب (أمي الله يسلمك) قال هسع دي أغنية أغنيها بي عمتي الكبيرة دي

ما حقيقة أسر العميد محمد منصور قائد اللواء 16 مشاة بالكرمك؟ رئيس الوزراء يصدر قرارًا بشأن الرسوم الجديدة في المعابر القنصل حازم مصطفى يجتمع بلاعبي سيد الأتيام بالمنتخب في جدة جان كلود يُسجّل هدفًا رائعًا ويقود بوروندي لانتصار ثمين أمام تشاد في تصفيات أمم إفريقيا بروح قتالية عالية.. الهلال يضع اللمسات الأخيرة لمواجهة «روتسيرو» بحثاً عن الصدارة والثأر توضيح لجنة المنشآت بنادي المريخ : دورنا فني فى ملف المنشآت واللجنة القانونية تتولى اجراءات الاخلاء تقارير تكشف عن تحرّكات كبيرة للجيش السوداني محمد عبد الباسط يكتب: لهذا تحركت باكستان الآن للوساطة بين أمريكا وإيران مسؤول الطيران المدني يعلن جاهزية مطار الخرطوم لاستقبال الرحلات الإقليمية بالصورة.. في مفاجأة كبيرة.. محترف جزائري ينضم لقائمة المنتخب السوداني استعداداً لمواجهة السعودية شاهد بالفيديو.. التيكتوكر "تجاني كارتا" يزور الفنانة مروة الدولية في منزلها ويطالبها بالعدول عن قرار الاعتزال: (لن أتزوج ولن أكمل ديني لو ما غنيتي في عرسي) ترامب ينهى تقليدا عمره 165 عاما متعلقا بالدولار.. ما القصة؟ الكرمك: ليس حدثاً عابراً ماذا قال العميد طارق كجاب بعد إحالته المفاجئة للمعاش؟؟ السكوت على هذا الأمر لا يرضي الله ولا رسوله!! حتى لا نخسر ما كسبناه الأهلي يُعيد النظر في رواتب اللاعبين لإنهاء "فتنة أوضة اللبس" هدف واحد يفصل مبابى عن لقب الهداف التاريخى لمنتخب فرنسا اتفرج واتمتع.. جميع أهداف محمد صلاح ال50 في دوري أبطال أوروبا إيلون ماسك يطعن في حكم تغريمه 2.5 مليار دولار في قضية "تويتر" عمرو دياب يحيى حفلا غنائيا فى تركيا 2 أغسطس دراسة : النشاط البدني مفتاح الوقاية من السكري رغم زيادة الوزن شاهد بالفيديو.. سودانية تطلب الطلاق من زوجها على الهواء: (لو راجل كنت منعتني من الظهور في "تيك توك" واللواء ستاير أحسن منك ياريت لو أتزوجته بدلاً عنك) شاهد بالصورة والفيديو.. بعد انتشار ظاهرة "حق الملاح".. ناشطة سودانية تحصل على آلاف "الدولارات" هدية من زوجها ارتفاع أسعار الذهب في السودان أحمد العوضي : بشكر جمهوري إنه عمره ما خذلني وصاحب الفضل فى نجاحي شيماء سيف تنشر فيديو طريف مع زوجها محمد كارتر على إنستجرام لأول مرة.. حكم يحمل إنستغرام ويوتيوب المسؤولية عن إدمان وسائل التواصل دراسة تكشف ترابطا بين أمراض معدية وخطر الإصابة بالخرف 10 أطعمة يجب تناولها لعلاج نقص البوتاسيوم 10 ثوانٍ فقط للمستبدل .. فيفا يعلن تطبيق حزمة تعديلات تحكيمية في المونديال السودان ومصر يوقعان بروتوكول مشترك لمكافحة بعوضة الجامبيا الخليج الضحية الكبرى: إيران وجهت 83% من هجماتها إليه… و17% فقط إلى إسرائيل مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية ضبط 2800 قندول بنقو بالجزيرة في عملية نوعية لمكافحة التهريب ترامب يصدر أوامره ويكشف تطورات مثيرة مع إيران هل مخالفة ترامب خلل في الكون؟! الأمن يداهم مخزن يبيع الوقود المهرب لعصابات التنقيب عن الذهب تراجع معدّل التضخّم في السودان بادي يصدر مرسوم تنظيم أعمال التعدين التقليدي وضبط آليات التعدين بالنيل الأزرق رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة شركة كهرباء السودان تحديث حول سير أعمال الصيانة الطارئة للشبكة القومية ضبط 238 كجم من "الآيس" وأسلحة بجانب نحاس بولاية البحر الاحمر ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد أغلى علبة كعك في مصر تشعل مواقع التواصل قيم الهلال المتوارثة يجب أن تبقى أبد الدهر في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته ملتقي التحصين للعام 2025 ينعقد بحضور التحالف العالمي للقاحات والشركاء صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

ترباس أول ما سمع ب (أمي الله يسلمك) قال هسع دي أغنية أغنيها بي عمتي الكبيرة دي

قوون نشر في قوون يوم 05 - 02 - 2015

الزمن دا لو مشيت طلبت (شاحن موبايل) من بنت ..إلّا يعقدوا ليك
الإهداء
قبل سبع سنوات كنا نتحدث عن (الإخلاص)..
بعد سبع سنوات ..أصبحنا نتحدث عن (الخلاص)..
الموية وصلت الباب..
غرقانين للركب.
لم نعرف في إجازة المدرسة الصيفية أن الفرق بين الإخلاص والخلاص (ألف) فقط.
هل نحن لم نتطور أم أن (الألف) أكبر من أن تستوعبه مقررات المدارس؟.
محمد
صورة وتحقيق
المسجل القدامك دا ..ما تجهلو.
المسجل القدامك دا ما ساهل.
انتوا فاكرين المسجل دا (4) حجار بتشغلو.
المسجل دا مع ال (4) حجار عاوز ليه شية جمر.
انتوا عارفين المسجل دا لو لقى ليه (شية جمر) لو ركبت فيهو شريط لي جمال فرفور بجيب ليك صوت محمد وردي.
انتوا فاكرين السر في (المسجل).
السر في (الشية).
هسع تلقى واحدين منكم قايلني قاصد السر محمد علي.
وأنا ولا جبت سيرة السر محمد علي.
براكم بتخترعوا ليكم حاجات من رأسكم.
رأسكم الكبير دا.
بالمناسبة ..(الغنا) زمان أيام الواحد بكون فرحان وما مصدق نفسو وقت يلقى ليه شريط لي حمد الريح فيه (بريدك وفي انتظار عينيك كملت الصبر كلو)...يقوم اصلو ما يكلم زول ..عشان ما في زول يشي
لمنو الشريط أو يشحدو ليه.
الزول وقت يسمع صوت الفنان من المسجل ..بقوم لمن (يشبع)..صوتو مختلف خالص من ام بي ثري ..والحاجات الدخلت حديثاً دي.
الصوت زمان بكون ليه طعم مختلف.
هسع المسجلات اختلفت ..وبقى ما في ليها وجود.
لو الناس شافوك شايل ليك مسجل ..بقولوا بالله شوفوا الزول دا قديم كيف؟..أنت يا زول من مواليد سنة كم؟.
تبقى في رقبتك..
البمرقك ما تعرفو..تندم على (المسجل) الشايلو.
والله يا حليل أيام زمان ...كان عندها نكهة ورايحة براها.
حكمة
الخريف السنة القادمة ..عندي إحساس المطرة ينزل معاها (سمك)..
موش الشتاء السنة دي جاب ليه (تلج).
اشمعنا...
مالو زعلان ؟
محسن سيد مع غارزيتو دا بقى زي الزول القاعد مع نسابتو...
الزول لمن يكون قاعد مع نسابتو لو جاب ليه (بطيخة) ساكت ..بقولوا ليه الليلة (القرعة) دي اشتريتها من وين؟.
لو فتح (المروحة) ...النسيبة تجري تقيف قدام (عداد) الكهربة.
يعقدوك من (هوا) الله دا.

ما تعرف تعمل شنو؟.
.ولا تتصرف كيف؟.
تحذير
قال ليه يا دكتور (ضرسي) دا الليل كلو بينتح ..تقول رابطين فيه (ماكرفون)..
الدكتور قال ليه :طيب أنت عاوزني أقلع ليك الضرس ولّا أقلع ليك الماكرفون...
عاين للدكتور كدا وقال ليه ...لا ..أبدًا يا دكتور ...أحشى الضرس واكتل الجذور للماكرفون.
باقى الزول وقت يكون عندو (رصيد) بتفلهم على الناس.
وبعمل فيها عارف أي حاجة.
الكلمة ومعناها
سألو ليك سؤال ما محرج ولا حاجة...
قال ليه :أنت تعال هنا عسل النحل دا شنو؟.
قال ليه (النحل) دا ..الناس الزيكم ديل ...لكن (العسل) ما سمعت بيه والله قبال كدا.
هو عليكم الله (الع
سل) وين؟.
هسع ناس الضرائب يسمعوا بالكلام دا ..يجيبوا جركاناتهم ويجوا جاريين.
بس ما يسمعوا ليهم حاجة.
(الخلعة) كاتلاهم.
غارزيتو دا مع (الصبر) ما تصلحوا ليكم معاه (فول)
المدير الفني للمريخ الفرنسي غارزيتو (نحن مجربنو)..نحن عارفنو ..يعني ما تحاولوا تغطوا ليه ساكت.
حافظنو حفظ ...ما يعمل ليكم فيها مدرب أجنبي.
مدرب أجنبي على منو؟.
على محسن سيد.
محسن سيد دا أنتوا فاكرنو ساهل ..لو أديتو فرصة ..بقوم يطلع ليكم جواز سفر برازيلي.
غارزيتو بعد الإطاحة ببرهان .
.قرر الإطاحة بمحسن سيد.
قصد ليك محسن.
واتلحو ليك.
خلاص عاوز يقبل ليكم على محسن سيد.
غارزيتو بقى يعمل ليكم حقارة (الفرنسيين).
انتوا طبعاً ح تقولوا حقارة الفرنسيين دي شنو؟.
(الفرنسيين) عندهم حقارة بعرفوها براهم..الواحد يكون ما بشرب سجائر ..يقولوا ليه لو سمحت معاك (ولاعة).
غارزيتو دور ليك (حقارة) في محسن سيد.
مرة يرسلو.
ومرة يقول ليه تمشي الميدان قبل ساعة من التمرين ..تقول في الكلية الحربية.
ومرة يقول ليه ..ما تتكلم مع الصحفيين.
وما تقعد لي في المؤتمر الصحفي بعد المباراة.
محسن سيد ..(الحقارات) الزي دي ما بتنفع معاه.
برهان تية ..عرفها ..قال دي حالة لا بقعدو معاها ولا حاجة.
شال شنطتو واتخا
رج من البلد.
المريخاب ..قعدوا يتلفتوا ليك في الشارع.
هسع موضوع محسن سيد وغارزيتو ..ممكن يصل المحكمة.
وممكن يجيب ليه ضرب.
الناس ديل افرزوا ليهم عيشتهم.
الفرنسي المن أصول ايطالية دا حقار.
ومحسن سيد حقارة (البيتزا) ما بتنفع معاه.
كمان جيتنا من بلدك يا غارزيتو عشان تعمل لينا فيها (حقارة).
أوعك يا غارزيتو.
بنقوم ندور فيك هسع (كرري).
ونحن صعبين.
لو حصلت عكة ..ما بنغشكم ..بنقيف مع ولدنا محسن سيد.
أنت يا محسن سيد ..غارزيتو دا ما تحاول تجيه بالفانلة البتتفاءل بيها ..يمكن الموضوع يفك شوية.
تسهيلات
زمان العرس كان صعب شديد ..يقولوا ليك الواحد لو ما عمل ليه بيت وتلاجة وتلفزيون وأنبوبة غاز أصلو ما يعرس..
لو ما عملت الحاجة دي ما في زول بيديك بنتو.
ما تقول بنت عم
ي ..وأنا ود خالتها.
وكانوا بيشترطوا الشيلة 12 – 12...
وفتح الخشم وقولة الخي
ر ..وسد المال ..وخطوبة وعقد ...وفطور العريس وحفلات تستمر 14 يوماً.
موضوع العرس دا يجر (7) شهور.
زمان وقت تمشي تطلب ليك يد بنت للعرس ...بقولوا ليك لازم نشاور أهلها ..يردوا عليك بعد (45) يوماً...
وكان الواحد بكسر جنس تلج.
ما بخلي ليه حاجة..
هسع لو مشيت طلبت (شاحن موبايل) ساكت ..إلّا يعقدوا ليك...
يا جماعة انتوا كمان حكاية العقد طوالي دي ..ما ظريفة ..اصبروا شوية ..خلوا الناس يفهموا بعض في فترة الخطوبة.
اسعاف
جماعتنا ديل الواحد لمن تجيه (ملاريا) بيدسها..
عشان عندنا ناس صعبين في الحلة ..ناس واجب ..لو زول جاتو (نزلة) ساكت ..بمشوا يجهزوا ليه (القبر).
أنا ما عارفهم ضايقين كدا ليه؟.
الواحد يدفنو ناقص عمر.
شاحن جلاكسي
لمن بكري المدينة يمر من البلد كلها ..ويتخطى حارس المرمى ويخت الكورة ف

ي (الكشافات) ..مفروض جمهور الهلال يغني ليه : (قالوا قالوا علي شقي ومجنون ..صحيح مجنون وانتوا جنوني يا حلوين).
هسع وينو شاحن الجلاكسي هنا؟.
غايتو الزول وقت يكون عاوز ليه سبب.
احتمال
الظاهر رمضان قرب...
الدليل على ذلك ..مشيت لي عباس ود التكليبة ...قالوا لي مشى على دكتور الباطنية...
يا جماعة موضوع الشكوى من الكلى دا بدري عليه ...
اصبروا شوية.
هسع دا احتمال دا..
وشاية
وقفو ليك في نص الشارع ...وقال ليه ما تسمع لي كلام الناس ديل ..البلد دي ما فيها أز

مة غاز ولا حاجة.
تلقى واحد من الجماعة الكبار ديل عندو شحنة (فحم) عاوز يخلصها.
اقتراح
الزول لو عندو وجع ضهر ..ما يشرب ليه كركدي ساخن....عشان الموضوع دا ما عندو علاقة بالكركدي الساخن.
هسع دا اقتراح ليك.
نظرية
علي جعفر ...والريح علي ...في دفاع المريخ ..زي الجماعة البكونوا واقفين بالابريق في الصيوان ..من يشوفو ليهم زول جديد ..يحلفو إلّا يغسلو ليه.
يقابلوا الزول من الشارع....
صفيحة دغالة
الزول وقت يكون دغل ..تلقوه يوم الجمعة دون الناس جاب ليه (فسيخ) وظبطو ليك ..وقرش ليه معاه بصلة.
الفسيخ خلوه ..عليكم الله في داعي هسع للبصلة يوم الجمعة.
واسطة
عندو شافع قاعد يلعب مع الشفع ..قال لي صاحبو الولد دا أنا عاوز اطلعو (دكتور).
صاحبو عاين للشافع كدا ..وقال ليه ولدك دا دكتور ما بطلع ..لكن لو لقيت ليك زول في التلفزيون ممكن يطلع (فنان).
ولو لقيت ليك زول في القصر ..ممكن يطلع ليك (وزير) عديل كدا.
ملحوظة
لمن يكون عندك (باسطة) في التلاجة ..بكون عندك إحساس أكبر بأغنية زيدان إبراهيم (بكون فرحان يوم تكون جنبي وأعاين ليك وأنت تبسم لي).
كرتونة حروف نصب
واحد مستهبل شديد...
قال الواحد لو عاوز ليه مليار جنيه في أسبوع...
يا يمشي الدهب..
يا يمشي كمان مكتب الوالي.
أرنب نط
عبد الصمد محمد عثمان قال جمعية المريخ العمومية ح تكون شهر مايو..
وجمال الوالي قال ما ح نقعد تاني...
وتحالف المعارضة بتاع المريخ ..قالوا نحن شهر خمسة ما فاضيين ..عشان بنكون بنتجهز لمعارضة المجلس الجديد...
أها يا مزمل أبوالقاسم ..مريخكم دا شهر يونيو إلا تعملوه (أوقاف)...
ما في زول بمسكو ليكم.
الرقم مشغول
أمير كمال قالوا عاوز يعمل ليه طابق تاني ..وعاوز يبدل العربية ..ويعمل ليه مزرعة في سوبا ..ويفتح ليه مصنع بتاع زيوت في أم درمان..
ويعمل ليه حديقة في الخرطوم 2...
واحد من مجلس المريخ قال ليه لو عاوز تعمل حاجاتك دي إلّا نشوف ليك تلفون أشرف الكاردينال.
الشغل دا شغل ناس الجوهرة الزرقاء ..نحن لا بنقدر عليه ولا حاجة.
تنويه
ناس الحكومة بقولوا ليك ح نوزع الليلة الغاز في أم درمان في أبوروف سوق الشجرة..
لو قالوا كدا ..بكونوا عاوزين يوزعوه في سوبا.
نحن حركات الحكومة دي بنعرفها كويس.
تسلل
مدير الهيئة القومية للإذاعة والتلفزيون شالوه.
عارفين شالوه ليه؟.
عشان سيحة يوم الجمعة الفاتت قال هدف الهلال جاء من تسلل.
مثل جديد لنج
لو عاوز تعرف رمضان قرب ...اطلع الشارع بتلقى ليك أربعة شباب كدا بدون أي مناسبة بقولوا ليك والله نحن قررنا نخلي التدخين.
شولة هندية
الزول لو حضر ليه فيلم هندي ..أوعكم ينوم فيه...
تنوم تصحى تلقى البطل طلع أخت البطلة.
أوعكم تنوموا..لا في الفيلم الهندي ..لا في البلد دي.
تنوموا تلقوا الجماعة زادوا الزيت ..وقفلوا الكبري..
والله أخير الهنود.
فروقات
قال ليه الفرق بين كيلو اللحمة ونص كيلو اللحمة شنو؟.
قال ليهم ما متأكد ..لكن يتخيل لي كدا الاتنين واحد ..نص كيلو اللحمة الحكومة شالت نصو.
أو احتمال ...لمن تمشي الجزارة تسأل من سعر كيلو اللحمة تقوم تقول للجزار خلاص أديني نص.
الكشافات نفر
حكم الراية في مباريات المريخ مفروض يكون قاعد في (الكشافات)..مع ناس عنكبة وبكري المدينة الحكم ما محتاج يجري للنص.
الحكم في مباريات المريخ بيجري على الكشافات.
تقول جابو ليه خبر وفاة.
طاقية( بنبسجية)
الواحد وقت يكون عاوز يعرس ..كل ما يمشي ليه بيت زيارة يعملوا ليه عصير ليمون ساقط.
ليه الزول وقت يكون ما عاوز يعرس بعملو ليه (شاي).
والشاي ذاتو بكون تقيل وبارد..وبجيبوه ليك كمان بدون صينية ..تقول شغال بتركب ليهم في (لمبة) كهربة.
منتخب مالي كلو (طار) من البطولة...
وتراوري بقول ليك ما قادر (أطير) ..ما في حجز.
هو المنتخب كلو (طار)..بقت على تراوري يعني.
نعم
واحد عندو ملاريا ..الدكتور كتب ليه (21) (درب)..
صاحبكم عاين للدربات وعاين للدكتور ..وقال ليه يا دكتور أنت الشيء ديل كاتبهم لي ولّا لمشروع سندس الزراعي.
شوية زعل
لو ما ناس الكهربة قاصدنها ..ليه من تخت الشاحن في الموبايل ..الكهربة كدا بدون مقدمات بتقوم تقطع.
مع الاعتذار للأغنية
يا أخواني البنات الجري دي ما حقي ..لكن آخر الشهر الظروف بتبقى صعبة شوية
التجاني حاج موسى...(أصلي مجروح مرتين)
لمن قدمت أغنية (أمي يا دار السلام) لترباس قال ليه أنت عاوزني بي عمتي الكبيرة دي أقيف قدام الناس وأقول أمي الله يسلمك
الشاعر التجاني حاج موسى ..نجح في أن يدخل في أضابير الوجدان السوداني ..ليتحرك فيه بأغنيات كانت فتح جديد للمشاعر.
دخل بمفردات جديدة ..وفكرة مختلفة في الحب ...جعلته يتفرد في مجاله ..ليكون دولاب أغنياته يمثل حالة لوحدها ..ممنوع الاقتراب منها والتصوير لها ..ليس لأنها منطقة عسكرية ..ولكنها لأنها منطقة حساسة جداً ..وهو إنسان مسكون بالرهف ..والحس العالي.
يكفى أنه جعل بطاقته لأمه هى البطاقة الرسمية لكل الأبناء وكل الأمهات في عيد الأم وفى كل المناسبات الأسرية السعيدة ..فالأم حاضرة في كل مواقيتنا ..بأغنية التجاني حاج موسى (يعطيك لي طولة العمر في الدنيا يوم ما يألمك).
ليس هناك أوسع ..ولا أشمل من هذه البطاقة..
هذه حكايات كانت لنا مع التجاني حاج موسى ..نتوقف في بعض المحطات منها.
(1)
الشمس في الدويم تشرق على شواطئ النيل الأبيض بشيء من الفرح ..والزغرودة الجميلة...غير أنها في صبيحة يوم 22 ديسمبر 1949 ..أشرقت أكثر فرحاً على طفل يولد في ذلك الصباح ..يجعل للتاريخ معنى ..وللدويم مخرج آخر.
كان ذلك الطفل الصغير الذي شكلته مدينة الدويم بتلويناتها المتعددة سوف يأتي يوم يتغنى الشعب السوداني بأغنياته ويردد معه ما يقوله من شعر.
في بخت الرضا درس التجاني حاج موسى ..وما تعطيه بخت الرضا ..أعلى من الذي هو في بطون الكتب والمقررات.
درس المتوسطة بالدويم الأهلية ثم الثانوي العالي في مدرسة عبدالناصر ليأتي ويدرس القانون في جامعة القاهرة فرع الخرطوم.
بدأ التجاني حاج موسى حياته معلماً لفترة قصيرة ثم عمل موظفاً بمصلحة الضرائب وشغل في الضرائب منصباً رفيعاً بعدها انصرف للعمل الإبداعي في وزارة الثقافة وفي التلفزيون متفردًا بشاعريته وخبرته في الحياة ومقدماً نماذجاً ناجحة في الإذاعة والتلفزيون والصحافة.
(2)
توفى والد التجاني حاج موسى وهو طفل لم يفطم بعد ..لتتولى والدته تربيته ..وتنقطع من أجل ذلك ..صارفة كل حياتها ووقتها لأبنها.
من هنا نشأت العلاقة القوية بين التجاني حاج موسى ووالدته الحاجة (دار السلام عبد الله أبو زيد) التى أصبحت فيما بعد رمزًا للأمومة السودانية ..بفضلها كان نشيد السلام الأموى الأول في السودان (أمي الله يسلمك)...الأغنية التى نوطد فيها لهذه العلاقة الجميلة ..والأمومة الخالدة.
الحاجة دار السلام عبدالله أبوزيد ..لم تكن امرأة عادية ..بل كانت امرأة بقدر ذلك البهو الذي جعل الفنان كمال ترباس يتغنى لها ..ويتغنى فيما بعد الشعب السوداني كله لها.
وقد تعبت وكدَّت الحاجة دار السلام كثيرًا ..حتى علمت ابنها ..وزوَّجته ..ثم رحلت من هذه الدنيا ..بعد أن تركت له أمانة عند أحد أقاربه ...كانت تلك الأمانة أن سلمت للتجاني حاج موسى بعد وفاة والدته.
فقد جاء رجل للتجاني حاج موسى صباحاً وسلمه أمانة عبارة عن (قروش) قال له إن والدتك تركتها لك ..وقالت تسلم لك بعد موتها ..فقد قالت الحاجة دار السلام: إن التجاني ما بمسك القروش ..وربما أموت ويكون ما عندو حاجة ..والتجاني ناسو كتيرة.
انظروا عظمة هذه المرأة ..ولروعة الأم السودانية العظيمة التى تقوم بأدوار كتيبة من الرجال لا يستطيعوا القيام بها.
(3)
في وقت مبكر من عمر التجاني حاج موسى غنى له زيدان إبراهيم أغنية (باب الريدة وانسده).
كتبها التجاني حاج موسى وهو في المرحلة الثانوية ..وغناها له زيدان إبراهيم عندما التقى به في حي العباسية ..الحي الأم درماني العريق والذي كان عبارة عن مسرح مكبر ..فيه كل الأدباء والفنانين.
يكفي أن حي العباسية جمع التجاني حاج موسى بالفنان زيدان إبراهيم وكان ثالثهم الملحن الذي شكل معهم مثلث فني خالد في الأغنية السودانية عمر الشاعر.
في حي العباسية كانت هناك عائشة الفلاتية وكان هناك بادي محمد الطيب وكان في الموردة عوض أحمد خليفة ..وفي بانت أبوعركي ومحمد الأمين.
كل الروعة كانت هناك.
معظم الأعمال التى كتبها التجاني حاج موسى كانت من الحانه إلا بعض الأعمال التى تغنى بها زيدان إبراهيم ولحنها عمر الشاعر.
جمع بين زيدان إبراهيم والتجاني حاج موسى ..باب الريدة وانسده ..وقصر الشوق..وكنوز محبة ..ويا المخلوق بلون الطيف.
(4)
قال التجاني حاج موسى إنه عندما كتب أغنية (أمي يا دار السلام)..ولحنها ذهب بها إلى الفنان كمال ترباس ..الذي رفضها في البداية ..واحتج عليها وقال ليه عاوزني بي عمتي الكبيرة دي أقيف قدام الناس وأقول أمي الله يسلمك.
ولم يخف ترباس احتجاجه هذا وقال للتجاني: أنت ناس زيدان إبراهيم تديهم الغنا السمح بتاع (باب الريدة وانسده)..وتجيب لي أنا أغنية (أمي الله يسلمك).
قال ترباس ذلك ودخل إلى غرفته ..إلّا أن التجاني كان مقتنعاً بالأغنية ..فقدمها لفرقة ترباس التى تغنت بها ..وهو غنا معهم ..ليبكي أحد أفراد فرقة كمال ترباس بعد أن سمع الأغنية ..ليخرج من بعد ذلك كمال ترباس ..ويشيل الأغنية ويقول الأغنية البكت الزول دا ما أغنية ساهلة.
حفظها كمال ترباس في ساعتها وقدمها في الإذاعة وأصبحت الأغنية الأولى من أول وهلة تقدم فيها.
(5)
من ألحانه وكلماته أيضاً قدم التجاني حاج موسى أغنية كلمني يا حلو العيون للفنان محمد ميرغني.
وكان الفنان مصطفى سيد أحمد قد سبق محمد ميرغني في أغنية التجاني (تباريح الهوى) والتى تحمل مقطعاً يقول فيه التجاني (بشكي ليكم يا مظاليم الهوى أصلي مجروح مرتين).
التجاني يقول عن تجربته تلك : إن أغنياته الصادمة عاطفياً تلك كانت في تجربة عاطفية لم يكتب لها النجاح.
غير أن التجاني جاء وحقق استقراراً أسرياً وعاطفياً جميلاً مع زوجته الحالية التى تمثل له ملهمته الأولى في وقته الحالي.
(6)
تميز التجاني حاج موسى بأغنياته ذات المسحة الشعبية اللطيفة ..وعرف أن يتوغل بين الناس بما قدمه من أغنيات قريبة منهم ..شالت ملامحهم وكانت أقرب للتعبير عنهم ..والتحدث باسمهم.
قدم التجاني لكمال ترباس أغنية (وجاي تفتش الماضي خلاص الماضي ولى خلاص...جفف دمعك الغالي مسامحك ما عشان عينيك ..عشان تتعلم الغفران وتغفر لو زمن جار بيك)..وهي من روائع الأغاني السودانية ..حملت رفض الماضي بعزة وقوة ..واتجهت نحو المستقبل بقوة.
التجاني غنى في الشكوى أيضاً أروع الأغنيات (بعد دا كلو كمان بتشكي ما كفاية الشفتو منك ولّا اكتر من ببكي) وقدمها كمال ترباس بطريقته الرائعة.
وغنى له عبدالوهاب الصادق في جانب الأغنيات الشعبية ..التى سادت وسيطرت على وسط الناس وتصدرت للساحة أغنية (من بعد ما فات الأوان الليلة جاي تعتذر وترجع الريد الزمان من وين أجيب ليك العذر).
وغنى عبدالكريم الكابلي والنور الجيلاني بلحن مختلف أغنية التجاني حاج موسى (في عز الليل أنا مساهر يا هاجر).
التجاني حاج موسى ..شاعر صاحب لونية (شعبية) متفردة في الأغنية السودانية ..وهو مع ذلك ..شاعر عظيم الإنسانية ...صاحب حواس وشعور مرهف.
التجاني حاج موسى ..قال لي: تصور أنا مرات في ناس بقولوا عليَّ (عوير)..لأنه لا بسأل من حقو ..ولا الفي جيبو حقو.
ما أروع التجاني حاج موسى ..الذي تحدثنا عن بعض محطاته أو بعض عناوينه البارزة ..لنعود لاحقاً أن مد في الأعمار لنتحدث عن التفاصيل وعن أغنياته ..التى فرشت قلوبنا بكلماتها.
قصة قصيرة جداً
قالت ليه : تصور أنا قبل ما أشوفك بعرفك.
قال ليها : بتعرفيني من وين؟.
قالت ليه : شكلك دا ما غريب عليَّ ..صورتك دي مرت عليَّ في كتاب المطالعة بتاع سنة تالتة.
زولكم ما عرف يمشي وين؟.
هلال 87
شوفوا صورة لاعبي هلال 87 ..ريال مدريد شنو؟.
وبرشلونة ايه؟.
وشيلسي بتاعة جنك..
هسع عليكم الله فريق زي دا ..وبي هذه الأسماء الكبيرة ..موش مفروض ما يخلي ليه لقب حايم في الواطة.
ديل عمالقة عديل كدا.
ديل سحرة..
أنا لمن شفت الصورة قعدت افتش في عثمان حسين ومحمد وردي ..ما معقول وردي وعثمان حسين يكونوا بره الصورة دي.
إبداع عديل كدا.

انقر هنا لقراءة الخبر من مصدره.