سودارس : شندي المحطة

قالت إنّها خرجت من آلية تحديد أسعار الوقود..الطاقة تكشف تفاصيل 20 باخرة في محيط البحر الأحمر شاهد بالفيديو.. داخل حرم إحدى المدارس.. والي النيل الأبيض ينفعل على وزير التربية والتعليم ويحظى بإشادة الجمهور: (لن أذهب حتى ينتهي البناء) شاهد بالفيديو.. الفنانة هدى عربي تخلع حذائها أثناء الحفل وتدخل في وصلة رقص مثيرة اختبار نسخة مدفوعة جديدة من "إنستغرام" "آبل" تستعد لإطلاق أول آيفون قابل للطي النفط ينخفض 1% بعد تقرير ترامب إنهاء حرب إيران "يغفر الله للجميع إلا باجيو!".. مأساة اللاعب الذي مات واقفا – فيديو عيد ميلاد إيمى سمير غانم.. خطوات ثابتة واختيارات مدروسة فى مسيرتها الفنية قرار لحكومة السودان بشأن معبر أدري قيادي بحزب المؤتمر الوطني يحسم جدل مثير صبري محمد علي (العيكورة) يكتب: *هذا ما قاله لي وزير التعليم العالي والبحث العلمي ظهر اليوم* عثمان ميرغني يكتب: فساد.. الفساد.. والي الخرطوم يوجه وزارة التخطيط العمراني بتطبيق القوانين وتسريع إجراءات معاملات الأراضي جهاز المخابرات العامة يدشن مبادرة العودة الطوعية للاجئين السودانيين من مصر إكتمال فتح الطرق والشوارع الداخلية بمنطقة وسط الخرطوم ارتفاع جديد في أسعار الوقود بالخرطوم شاهد بالفيديو.. رمى عليهم عبوة ناسفة وهرب.. جنود بالدعم السريع يضبطون مرتزق من جنوب السودان في وضع مخل مع سيدة داخل "راكوبة" بمدينة الفولة شاهد بالفيديو.. فنان "ربابة" سوداني يثير تفاعل الجمهور بعد ترديده أغنياته الشهيرة (صورة وصوت) في حفل حاشد بالسعودية الهلال يواجه أُماجوجو لتوسيع فارق الصدارة شاهد بالفيديو.. داخل حرم إحدى المدارس.. والي النيل الأبيض ينفعل على وزير التربية والتعليم ويحظى بإشادة الجمهور: (لن أذهب حتى ينتهي البناء) الأهلي يخسر من ساردية بدوري شندي (أماجوجو والنقطة 54) برشلونة يتلقى دفعة معنوية قبل مواجهة أتلتيكو مدريد شراكة استراتيجية بين "الشباب والرياضة" و"الصناعة" لتمكين المبتكرين ودعم الإنتاج الشبابي كريم عبد العزيز وفريق مطلوب عائليا يبحثون عن دولة أوروبية للتصوير الخارجى أزمة منشطات تشعل دوري أبطال إفريقيا.. الهلال السوداني يشكو نهضة بركان المغربي ل"الكاف" أيهما أكثر فائدة القهوة أم عصير البرتقال صباحًا.. والكميات المناسبة آلام الدورة ليست دائمًا طبيعية.. إشارات تكشف بطانة الرحم المهاجرة مبكرًا فصيلة الدم تكشف احتمالية الإصابة بالسكري السيسي للرئيس ترامب: لا أحد يمكنه وقف الحرب في المنطقة إلا أنت "فيفا" يتّخذ موقفًا حازمًا بشأن مشاركة إيران في كأس العالم مصر.. الدولار يقترب من 54 جنيها لأول مرة سارة بركة: أحمد العوضى مجتهد بشكل كبير وبيحب شغله جدا اختيار غير متوقع لمستقبل "الملك المصري" وجبة سمك تُنهي حياة 3 سودانيين بالقاهرة وتتسبب في إصابة 4 آخرين بحالة تسمم غذائى حاد بسبب ضعف الراتب.. وزير الثروة الحيوانية بالسودان يبحث عن عمل إضافي رئيس الوزراء يصدر قرارًا بشأن الرسوم الجديدة في المعابر محمد عبد الباسط يكتب: لهذا تحركت باكستان الآن للوساطة بين أمريكا وإيران السكوت على هذا الأمر لا يرضي الله ولا رسوله!! ارتفاع أسعار الذهب في السودان الخليج الضحية الكبرى: إيران وجهت 83% من هجماتها إليه… و17% فقط إلى إسرائيل مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية ترامب يصدر أوامره ويكشف تطورات مثيرة مع إيران الأمن يداهم مخزن يبيع الوقود المهرب لعصابات التنقيب عن الذهب رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة ضبط 238 كجم من "الآيس" وأسلحة بجانب نحاس بولاية البحر الاحمر ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد قيم الهلال المتوارثة يجب أن تبقى أبد الدهر في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

شندي المحطة

قوون نشر في قوون يوم 13 - 03 - 2015

الموية الباردة كانوا بجيبوها لينا مع (عكسيات) منصور بشير تنقا ..اول من حول (العكسيات) الى سيمفونيات موسيقية
"""""""""""""""""""""""""""""""""""
وقت والي الدين محمد عبدالله -رحمه الله- يقول كدا ..ويسرح ليك بي غادي ..بنشعر ليك بالقهوة دي دخلت لينا في المخ ..اتخللت (العصب)..ونحن ما شربناها
"""""""""""""""""""""""""""""""""""""""
ببساطة هذا الزول ولطافته ...وجمال شندي ...كان ومازال (عبدالله مليم) هلاليتو فيها طعم الفطير باللبن
"""""""""""""""""""""""""""""""""""""""""""
ووقت نتغالط نطلع ليهم بي عثمان الشفيع نفسو ونقول (وانت الوحيد بالذات الكنا ذاكرنك)
"""""""""""""""""""""""""""""""""""""
• قبل الطيب عبدالله ..وقبل الامير صديق منزول والملك نصرالدين جكسا ...شلنا ملامحنا الغبشاء ومرقنا (نشخبط) بالفرح.
• الشقاوة ظاهرة في (نعلينا).
• نطلع من مدرسة (الشمالية) الابتدائية في شندي (1912م) اخر اليوم الدراسي ..ونكورك (ابو دومة)..نلقى نفسنا وصلنا البيت في (لحظة).
• يا اولاد مالو نفسكم مقطوع كدا؟.
• ابودومة كان زول صعب ..لو بقيت ما جراي وحريف وشقي ما تخاطر وتقول ليه (ابو دومة).
• اوعك.
• قعدنا في ضل ..قدر ما يرمي نرمى معاه...اليوم طويل ما زي هسع (ممحوق) زي الرصيد البي جنيهين.
• الموية الباردة كانوا بجيبوها لينا مع (عكسيات) منصور بشير تنقا ..اول من حول (العكسيات) الى سيمفونيات موسيقية.
• نغني ونرقص فيها.
• وهو واول من وزرع (التمريرات) موسيقيا.
• قلنا دا شنو دا؟.
• اتلخبطنا في (الطحنية).
• واتلخبطنا في (البطيخ).
• والعدس.
• والقرع.
• غايتو انت (القرع) دا لو ما دخلتو لينا في اي حتة ما بترتاح.
• اوعك!!.
• لا قدرنا نقول ثبت لا قدرنا نقول ما ثبت.
• موسيقى (الوتر) عرفناها – موسيقى (الكفر) جات من وين؟.
• ننقز في عكسيات منصور بشير تنقا زي ما بنعرض في اغاني علي ابراهيم اللحو (مويس) وحسين شندي (الديومات)..لمن يجيبوا لينا شاي الصباح.
• ندفق بي غادي.
• ونطلع من جلدنا.
• شربنا الشاي ..ودبلناهو وقت (مصطفى النقر) بيجيب اقوانو في اخر الدقائق ...نكسر بيه الزمن.
• يطلع الناس من الاستاد بدون (عمم)..يحرقوا (عممهم) مع القون ويطلعوا من الاستاد ..لينتشروا بالفرح.
• فرح جد.
• الهلال ..علمنا الحاجات دي...قبل ما يصرفوا لينا (الكراسات) وكتب المطالعة والجغرافيا والرياضيات.
• قبل ما نعرف (القهوة) ذاتها ..قالوا لينا (الجبنة) للناس الكبار ..كنا بنقعد نتفرج فيهم وهم بيشربوا في (القهوة).
• احترام جد.
• وقت والي الدين محمد عبدالله يقول كدا ..ويسرح ليك بي غادي ..بنشعر ليك بالقهوة دي دخلت لينا في المخ ..اتخللت (العصب)..ونحن ما شربناها.
• ولا شفناها.
• لكن شمينا ريحتها..واتمخمخنا ليك بيها بي قون والي الدين.
• العلّم والي الدين محمد عبدالله (القهونة) دي منو؟.
• اتعلمنا القهوة من اقوان والي الدين.
• بقينا لو ما شربنا القهوة ندروخ ليك زي الزول الواقع ليه من جمل.
• ساعة هيثم مصطفى يشيل (الكورة) ويقعد يقسّم فيها ..جزء يمشي للباكات ينشغلوا بيه.
• يصنقعوا في السماء.
• وجزء يمشي للمدافعين بتاعين العمق ..ينشدهوا ليك بالحاصل.
• وجزء للحراس – يقعدوا يتغالطوا.
• وجزء للمهاجمين.
• الكورة قون.
• الرشيد بدوي عبيد يقعد (يكورك)..نشيل نعلينا ونطلع الشارع.
• نمعط ليك (حجارة البطارية) من الراديو ..عشان (نعضيها) ونرجعها تاني.
• بتبقى قوية ..والصوت بترفع.
• بنعمل (العضة) دي برضو وقت ابراهيم عوض يغني (ليه بتسأل عني تاني بعد ما بعت الاماني).
• نطلع تاني من روحنا.
• ونقيف في الشوارع نتلفت.
• يا زول (محجوب سراج) دا فتح لينا مدارس من (الجراح)..عمل ليه جامعة للجرح.
• وحكمت يس عندها في حتة الجراح دي (الجرح جرحي براي منو البداوي معاي).
• كمان في زول بحدق الجرح.
• في زول بيحجز الجرح.
• نقطع لينا (جك موية) ساقط من التعب.
• من الوجع – ونفتح الشباك.
• رغم ان ما في علاقة بين انك تفتح الشباك وبين الوجع ...بس دا (جن) مننا ساكت.
• مجانين فرحة.
• بنتفورح.
• الهلال فينا كدا ..قاعد ومتداخل في عروقنا وفاتح لينا صالون البيت.
• اول صورة علقناها في الصالون في البيت صورة (جدنا) قالوا زول صعب وما برضى الحقارة ..والكلمة بعقبها بالعكاز.
• الصورة التانية صورة (طارق احمد ادم) وهو لابس شعار فيه دعاية لبن فورمست...فانلة زرقاء مشخطة بالابيض.
• بتذكر.
• من اليوم داك حبينا ليك الفورمست.
• بقينا ناس فورمست ساكت.
• الشاي لو ما جابوا لينا بي الفورمست ما بنشربوا ..ولا بنجامل فيه.
• لكن تتخيلوا قبل كل هذه الروائع والحاجات.
• قبل عثمان حسين ما يغني (وين حسن ظنك بي) لعوض أحمد خليفة..وقبل محمد وردي يقول (يجيني معاك زمن امتع نفسي بالدهشة) لعمر الطيب الدوش..شلنا هلاليتنا من (شندي)..من حاراتها وحللها ..من شوارعها وبيوتها.
• من الناس الفيها ..ما فيهم (خلية) غريبة ..كلهم اهل ..من الشرق - من الغرب - من الشمال - من الجنوب كلهم واحد.
• ما في زول بمشي شندي ويقعد فيها ..وما بقول ليك انا من شندي.
• تجي من اي حتة في السودان ..تقعد (ساعة) طوالي بتقول انا من شندي.
• ناس شندي كلهم اهل ..كلهم واحد...ما فيهم زول غريب.
• بشيلوا منك الغربة من اول لحظة.
• شفت الهلال اول مرة عند (رومبيك) رجل من ابناء الدينكا كان يعمل (خفيرا) او خلونا نقول (غفير) بطعم الكلمة ذاتها في مدرسة (المك نمر المتوسطة).
• رومبيك دا كان حياتو كلها (الهلال).
• تجي متأخر دقيقة ما بتدخل ..لو كنت ناظر المدرسة ذاتها.
• لكن لو جبت ليه سيرة الهلال ..يدخلك (جامعة الخرطوم) نفسها.
• رومبيك بكون فرحان وقت يجي المدرسة الصباح شايل ليه (جريدة) فيها كلام عن الهلال..وبرجع المساء فرحان برضو شايل ليه (رطل لبن) ..ورطل (باسطة) قبل ما تبقى بالكيلو.
• الرطل كان مبروك اكتر.
• وقت الهلال يتغلب ..كنا بنشيل هم من (رومبيك) كان بوقف ليك المدرسة كلها على فد كراع.
• اليوم داك الطابور بتلغى ..عشان (رومبيك) بكون واقف في حوش المدرسة بشرح ويحلل وبيضرب.
• ما بقبل كلمة في الهلال.
• اول درس لينا في شندي كان من (رومبيك).
• واول (هلال) كان لينا من ذلك الرجل ..الذي رحل من هذه الدنيا – لكن الى الان عندما نمشي شندي بنلقى (دربو) في الواطة وهو راجع على مدرسة المك نمر.
• هلالية (رومبيك) ممكن توحد ليكم الشمال والجنوب في (قون).
• وزول تاني ..هلالابي يكاتل.
• بضحك ويمشي ويجيك تاني راجع....علاقتو حلوة مع كل الناس.
• ببساطة هذا الزول ولطافته ...وجمال شندي ...كان ومازال (عبدالله مليم) هلاليتو فيها طعم الفطير باللبن.
• (مليم) زول بسيط ايضا ...بنتظر الجرايد ..وبمشى (السلخانة)..ما عارف كيف جمع مليم بين السلخانة والجرايد؟.
• لكن عملها.
• يمكن عشان الجرايد برضو طلع فيها (سلخ).
• مليم كاد ان يفقد بصره ..غير ان الذي تولى علاجه واعاد له نور الحياة (عمك ميلاد) وهو قبطي يثبت ان حيشان شندي كلها فاتحة في بعض.
• بقيادة عمك ميلاد ..ساهمت شندي في علاج (مليم) واعادوا ليه (نور) الحياة.
• مليم الى الان بقول ليك انا بعد ما تمغرب ما بطلع من البيت ..عشان ما بشوف تاني.
• مليم كان بشجع (النسر) ..نسر عوض دوكة وسليمان حليبي وعلي فليكو والسحار والطيب ادم ومصباح ..ورومبيك كان بشجع (النيل)..المؤسسة ..مؤسسة خالد سعيد وميرغني وكمال جمعة وهيثم محمد الامين والزين.
• هؤلاء كلهم اسقطوا منهم اللون والقبيلة ..واصبحوا كلهم (شنداويه).
• تفطر بي فول (عمك جاد) الذي اهدى شندي اروع المواهب الراحل عبدالخالق جاد الرب والموهوب والمدرب الحالي ياسر جاد الرب.
• وتمشي بعد دا كلو تتعشى بي (فول ابوالزيك) ..مع الموية باردة ...زي كأن شندي كلها بتجتمع في (الفول) دا.
• أصبح بينا عشرة وفول ابوالزيك.
• يضربوا الفول عند القبطي (ابوالزيك) ويقعدوا يتغالطوا.
• هذه شندي ..الطيب عبدالله الذي قدم من هناك (السنين) قالوا لي انساه وامسح من خيالك ذكرياته.
• اها بعد كدا اعمل شنو؟.
• اصلو ما بتقولوا ليكم حاجة تفش للزول مغستو.
• شندي عثمان الشفيع ..وود القرشي واجمل شراكة في الوجدان السوداني (وما تقول نسينا الناس وصرنا ناسنك).
• ووقت نتغالط نطلع ليهم بي عثمان الشفيع نفسو ونقول (وانت الوحيد بالذات الكنا ذاكرنك).
• دي شندي ..والمتمة ..(يا حليل ربوع شندي)..ومحطتها وقطاراتها.
• اي حاجة تنسبها لي شندي بتميزها.
• لو قلت دي (طعمية) شندي ..خلاص الحديث انتهى.
• لو قلت دي (منقة) شندي ..تاني ما في كلام.
• (موز) شندي ..قرب يبقى (بطيخ).
• سمك شندي ...لو ما بتخجل من الناس تشيلوا وتصّوّر بيه.
• شندي ..حسين شندي ..واهلي شندي ..تاني عاوزين شنو اكتر من كدا؟.
• ناس الاهلي ديل بقوا يضربوا ليك (كورة) زي ناس البساتين.
• كورة شندي زي (جناينها).
• كورة شندي زي فواكها.
• حاجة ما بتخلص.
• شندي ..علي ابراهيم اللحو (يا الفي شندي ساكن بالسكة الحديد).
• تاني عاوزين ترجعونا المحطة ..والقطر جا.
• الزول وقت يقيف في (الرصيف) بيشبع من ريحة الطعمية ومن رغيف الشاذلي.
• بتذكر في شندي (نقادي) كان فاتح ليه دكان جوار حي السكة الحديد ...النقادي بوزع سكر التموين ..لمن السكر كان بصرفوه في التموين.
• النقادي كانت اضانو تقيلة شوية ..وكنا لمن يرسلونا نسأل من سكر التموين ..نقول ليه السكر جاء؟.
• يقول لينا الهلال غالب تلاتة؟.
• نمشي نقول لي اهلنا (السكر جابوه).
• دي شندي ..يلاقيك (السر مشعال) اشهر ظرفاء المدينة ..تقعد تضحك لي تاني يوم.
• لو ما فاطر تشبع (ضحك).
• السر مشعال بثقافتو التدريسية ..بتلقاه شايل التاريخ والجغرافيا والرياضيات واللغة العربية في حكايتو وفي تعاملو مع الناس.
• اخر زيارة لي شندي لاقيت (عثمان سنهوري) من شخصيات الشقاولة المعروفة بهلاليتها الصارخة.
• عثمان سنهوري قال لي تعرف انا بشجع الهلال دا من سنوات طويلة الى الان ما بعرف احضر مباراة في الهلال إلّا اذا قعدت ليها في الواطة.
• سنهوري بنزل ليها في واطة الله دي.
• في هلالية اكتر من كدا.
• شندي – الاستاذ سراج الدين بشير الشيخ ..عنده كل العلم والادب والسماحة ..كأنه يمثل انسان شندي بكل فضائله.
• بتواضع ..وبي كل الحكايات يمشي بين الناس طيبا.
• ............
• ملحوظة : سوف ارجع الى شندي لاكتب عن الخواجة عبدالمحمود ..في عمود منفصل لاحقا.
هوامش
• كذلك سوف اقف عند شخصيات شندي الشهيرة والمعروفة عبدالمجيد منصور وصلاح ادريس وعصام الحاج ومنصور عبدالرحيم ومزمل ..وقبل اولئك جميعا عامر جمال الدين.
• وسنكتب عن معز شندي ومعتز كبير ومرتضى وعثمان الجلال ودحيش 80.
• وسوف نرجع ان شاءالله تفصيلا لنكتب عن محطة شندي.
• قصدنا ان نعود الى شندي من خلال اللقاء الذي يخوضه فريق الاهلي شندي اليوم.
• ارسنال العرب.
• النمور اليوم ان شاءالله في الموعد.
• هيثم مصطفى ..ح يرجع يقسمها ليكم تاني زي الما كتاب بقول.
• عاوزين شنو انتوا؟.
• كل الطلبات بنفذها ليكم هيثم مصطفى.
• وان شاءالله الاهلي شندي ينتصر اليوم ونعود الى كورته بصوره اشمل في مساحة الغد.
• ....
• عاجل : القطر صفّر.

انقر هنا لقراءة الخبر من مصدره.