هدف سالمون في سطيف متل الحفلة البقولو ليك بي (ترباس) تمشي تلقاها بي واحد من ناس (نجوم الغد) قون (اندرزينهو) مع أنه جاء في (المغرب) إلّا نه جاء في (أنصاص الليالي) ***************************
إهداء عندما التقينا أول مرة كنا نتحدث عن (أطفالنا السمر)..وعن (القمر) في ليالي كمالها. أحلامنا كانت أكبر من مساحة الأرض ..عشان كدا كنا بنصل (القمر). لماذا أصبح الآن كل حديثنا عن تعرفة (الكهربة)؟. وأن طلعنا ومشينا (الحدايق) – تحدثنا عن تعرفة (الموية)... في حاجة غلط... يا ربي فينا ولّا في الكهربة!!. محمد
افتح صفحة جديدة مريخابي اشترى ليه (بطيخة) ..فتحها ..لقى فيها دعاية لمشروب غازي... المريخابي حمد الله – قال الحمدلله ما لقيت هدف اندرزينهو. أنتوا قايلين ناس الهلال ما ممكن يعملوها.
احتمال الزمن دا لمن تشتري ليك (فرخة).. يحمّروها ليك.. ويجيبو ليك (شوربتها). بجيبو ليك مع (الشوربة) أورنيك 15. تدفع أول. أما (الفرخة) في عضمها ما بتشوفها ..بتشيلها (المحلية). هسع دا احتمال. عندي إحساس لو جات مطرة يدفعونا رسوم (هوا بارد).
تنويه ضفر.. أمير كمال... سالمون... علاء الدين يوسف.. جمال سالم.. عليهم مقابلة (نزار حامد) في مكتبه في العمارات وذلك لأمر مهم.....(ملحوظة : جيبوا معاكم أوراقكم الثبوتية) ما في زول بعرفكم. أهم شيء (الرقم الوطني). يا ربي نزار حامد عاوز يعمل شنو؟. يمكن يكون عاوز يعمل ليهم دورة تدريبية في عدم خروج الكورة. أوعى يكون عاوز ينقلهم (مريخ الفاشر).
محطة خارجية كدايس الزمن دا – الكديسة لو مسكت ليها (فار) أول حاجة تقول ليه جيب ولي أمرك ... كدايس الزمن دا (اللبن) خرب طبعن... الكدايس بقت عندها (أخلاق). عشان كدا (الفورة) رفعن رأسن.
اقتراح الحاجة البتخلي الزول يضحك لمن يقع من خشمو (5) أسنان وضرسين ..أن المريخاب بتكلموا عن قوة هجوم المريخ. حتى الكوتش الفاتح النقر طلع في الموضة دي وقال المريخ يملك هجوماً قوياً.. هجوم قوي وين؟..إذا كان غارزيتو من حيرتو ورأسو الضارب ..بيلعّب (ضفر) مهاجم. أنتوا بتلعبوا على الناس ..ولّا زمان ما كنتوا بتحضروا حصة (الإنجليزي)؟. شغلكم دا شغل (بيئة) ساكت. عليك الله – وينو (الاقتراح) هنا؟.
ملحوظة نسوان الزمن دا بقن صعبات ..الواحدة تقول لي زوجها ..لو الكهربة جاءت املأ المكيف وشغل التلاجة ..وأكوى ملابس الشفع بتاعة المدرسة عشان بكرة ما نقومك بدري. الراجل المسكين كمان بقول ليها لو الموية جات املأ (الجركانات)؟. نحن عارفين قطوعات الموية والكهربة دي كلها بتقع في رأس الرجال.
عدم الموضوع سألوه في الحدايق ..قالوا ليه عدم الموضوع شنو؟. عاين كدا ..وصنقع في السماء ..وقال ليهم عدم الموضوع ..اسمّعكم آخر قصيدة كتبتها أمس. كلهم قعدوا يصفقوا.
وصفة هدف هدف سالمون في وفاق سطيف زي الحفلة البقولو ليك بي كمال ترباس – تمشي تلقاها بي واحد من ناس (نجوم الغد). وقت يجيبوا ليك صحن الكوكتيل بعد الصدمة دي ...تعاين للموزة في الصحن عشرة – عشرة.
الما شاف هدف اندرزينهو (السينما) يخلعوا هدف شيبوب (المسرحية) بابكر سلك كتب ليه (52) مادة عن كورة شيبوب ..لا خلى حكم الراية ولا خلى مجدي شمس الدين. والكورة ما قون. العزيز سلك كان بيفتكر ..مجدي شمس من الكورة اتعكست يضرب تلفون لي حكم النص يقول ليه ما تشتغل بي حكم الراية ..الكورة ما عبرت. زي الحركات البعمل فيها أسامة عطا المنان هنا. (73) مادة حاول بابكر سلك يقنعنا فيها أن الكورة ما عبرت. ما عبرت ..عشان بنقتنع ليك يا سلك. الكلام دا قولو لي زول ما عندو نزار حامد. الكورة عبرت وشبعت عبور. الغريبة بابكر سلك ..مندهش بي كورة ما قون ..كورة عبرت ..وطلعت عديل كدا بره الملعب ..فرحان بيها..وما مصدق. طيب يا سلك ..أنت لو شفت هدف (اندرزينهو) تقول شنو؟. هدف نزار حامد ما عاوزين نجيب ليكم سيرته ..عشان بتقوموا تنصدموا في (بكري المدينة) ساكت.
هدف زي الكهربة نحن ما عارفين التشبيه حق منو؟. نشبه هدف اندرزينهو بالكهربة. ولّا نشبه الكهربة بالهدف... أنا ما عارف... الشيء البعرفها...أن الكهربة بقت عندنا زي هدف اندرزينهو ما بتجي إلّا بعد الساعة واحدة صباحاً... والله أنا خايف بعد الكلام دا – يدفعونا فاتورة على الهدف.
ضفر قبل وضفر بعد قالوا ليك ضفر بعد ما جاء راجع من الجزائر ...جاء حافظ ليه سبع كلمات (فرنسية). لكن أول ما وصل مطار الخرطوم خمس كلمات فرنسية طارت من رأسو. يا ضفر الفول دا ما فول (فرنسي).. والله موية الفول ...العربي تطيرو من رأسك.
تلويحة واحد زوجتو كرّهتو ليك بي (القرع). كل ما يمشي البيت – يجيبو ليه (الغداء)...يطلع (قرع). زولكم كره (القرع). لكن ما قادر يقول أي شيء. ولا حاجة..... يوم كدا قاعد ياكل في القرع رقم (129)...زوجتو فتحت التلاجة وجات شايلو ليه (فرخة). زولكم خلى (القرع) وقبل على (الفرخة)...وقال ليها وهو بالو في هدف اندرزينهو ..أنت وقت عندك حاجات زي دي في (الكنبة)..منجضانا بي (القرع) مالك؟. دا (سمك) يختوه في (تلاجة).
نزار (جامد) أوي مصري جابوه يحلل في هدف نزار حامد... أول حاجة قلع البدلة... يا ود الناس أنت عاوز تحلل ولّا عاوز تضبح.. المصري قعد يكورك – لا دي ما طريقة ..لا دا موش ممكن ..لا دا جامد أوى... أيه دا. أيه الحلاوة دي كلها. أيه العظمة دي... المصري جاتو (سكتة قلبية) ما قدر يتم الهدف ..ناس القناة طوالى طلعوا لي فاصل إعلاني.. أول أنتوا وقت ما بتقدروا على الحاجات دي – بتجيبوها لينا مالكم؟.
حتة شوق بالعربي وشوقك مخير يشقلب دروسنا يقطع كتبنا يشخبط غلافنا يتور شعورو وشوقك مخير يدفن عيونو ومغبش لوينو... وشوقك يفتر ... يحيّر جنونو يكسر الكبابي بدون هيا تشعر تتلب براها تنط من علاها تكسر سنونها وشوقك يلخبط شوارع المدارس عنابر الحوادث يقعّد شجونك يحندق خصومك يعشم غيومك نقول في صدودك دا شوق ولّا برجل؟ دا قون ولّا كورنر؟ نشيل في عذابنا ندسدس حزنو نقصقص كلامنا ونغيّر دربنا. معلومات قد تهمك بعد نهاية الخدمة مرة قاعد كدا ..قعدت أفكر براي. كمان عندكم رأي في (التفكير).. قاعد أفكر كدا ..(ما عاوز أقول ليكم الكهربة قاطعة عشان ما أطمم ليكم بطنكم). قاعد أفكر كدا ..جابو لي قايمة الماكولات.. قلت هسع الماكولات والطبائخ دي لو كان عندها شعور ..وإحساس كان ح تنقسم على الهلال والمريخ بهذه الصورة.. الويكة قطع شك ح تكون (مريخابية) وكذلك العدس وملاح القرع. ملاح القرع (أصفر). والعدس (أصفر) ..يعني ح يكون بشجعوا الاتحاد مدني – أكيد بشجعوا (المريخ). الكوارع ذاتها مريخية. والفتة ..والبوش ..وموية الفول. الدكوة مريخابية.. وأم رقيقة وأم شعيفة ...والكوارع. كل هذه الماكولات (مريخية). تعالوا شوف الماكولات (الهلالية)...شية الجمر ..الملوخية ..(لكن بدون أرانب)..الأرانب عند المريخاب. الباسطة والحلويات ..كلها (هلالية). والحلو ..والفواكه. بالمناسبة يا مريخاب عشان (الويكة) ما تزعلكم ..(الحمام) ذاتو مريخابي ..بكل أنواعه محمر أو شوربة ..أو مطبوخ (دمعة) عادية.
واحد زايد واحد بساوي خمسة قالوا ليك هلالابي ..مستغرب ...وما قادر يلقى ليه أي تفسير للموضوع دا. ما عارف الحاصل شنو؟. قبضوه ليك ناس المحلية ..قال ليهم أنا الشيء المحيرني ..قون اندرزينهو دا جاء في (المغرب) – لكن مع ذلك جاء في (أنصاص الليالي). المغرب ونص الليل ديل بتلموا كيف؟. غايتو يا اندرزينهو بتعمل في حاجات غريبة ..جمعت المغرب ونص الليل في وقت واحد. قصرتها من كنبتها. هدف (قصرا)...جمع المغرب ونص الليل. اندرزينهو بجيب قونو (المغرب). لكن نزار حامد بجيبو قونو من (العصر). شفتوا العلم دا كيف؟. قلنا ليكم نحن أي حاجة عندنا بي نظام – قعدتوا تغالطوا فينا.
شوال غتاتة المريخ في المجموعات (وصيف). الوصافة دي أصلو ما بتشبعوا منها.. جماعتكم في الدوري المحلي ..ما عندهم غير (الوصافة). وفي الدوري الجزائري برضو ما عندهم شيء غير (الوصافة). وصافة بره وجوه. طبعاً المريخ وصيف الدوري الممتاز الآن حتى الآن ..باعتبار أن المريخ خصمت منه نقاط مباراة الأمل. تصوروا بعد (الإعادة) معلق قناة بي ان سبورت ما عندو رأس – قال المريخ متصدر الدوري الممتاز. متصدر كيف يعني؟. الحساب كمان ما بتعرفوا ليه. الموضوع دا خلوني أكتب ليكم فيه عمود. شوفوا التفاصيل في (وان طال السفر).
كرتونة تعب ما جات مطرة.. ولا في أي مقدمات ...واحد من ناس الحلة وقعت فيه (حيطة). زولكم قام يتنفض زعلان ...قال تصوروا بعد كدا ناس الولاية يقولوا ليك الاستعدادات جيدة للخريف... الحيطة وقعت قبل الخريف ...طيب لمن يجي الخريف ..البقع شنو؟.
صفيحة كلام فارغ قالوا ليك (كوفي) بعد شاف هدف اندرزينهو قال عاوز يجيب ليه هدف متلو... محسن سيد قالوا قال ليه والله أنت لو دخلت بي (كنبتك) قون زي قون اندرزينهو دا ما تجيبو. قون اندرزينهو دا هين ...الكلام (بكري المدينة) يقوم يطس في رأسو ويقول عاوز أجيب لي هدف زي هدف نزار حامد. يمين يا بكري المدينة هدف زي هدف نزار حامد لو رجعوك الروضة ..ودرسوك (جغرافيا) من أول جديد ...قون زي قون نزار حامد قدام بيتكم ما بتجيبوا.
حصة فيزياء مريخابي ما ناقش أي حاجة.. ما عارف شيء. سألوه قالوا ليه حاتم عبد الغفار استقال ليه؟. قال ليهم: تكون الزيادة الحصلت في تعرفة الكهربة.
فهم جديد المغرب كدا – قالوا ليك مريخابي جاهو رصيد بالغلط... المريخابي استغرب ليك استغراب شديد ..وقال جمال الوالي دا بقى يفك (أرصدة) ساكت كدا في الهوا. افتكروا مرسلو جمال الوالي. المريخاب عندهم وهم...وهم عديل كدا.
التطواني ومازيمبي لا (نقطة) ولا حتى (شولة) بقدروا يشيلوها من (المقبرة) لاعبو الهلال ما قصروا ..تحصلوا على تعادلات مع أقوى الأندية وفي ظروف صعبة. مباراة في رمضان. ومباراة في العيد. مع ذلك نجح أخوان سيف الدين مساوي قائد نادي الهلال في الحصول على نقطة من (وكر) مازيمبي الصعب. فريق مازمبي الآن بالحسابات يعتبر المرشح الأقوى للبطولة ..فهو أقوى فرق المجموعتين...مع ذلك استطاع الهلال أن يعود بي نقطة من مازيمبي الذي لعب في حضور (50) ألف مشجع. حصول الهلال على نقطة من مازيمبي – بالتأكيد هى أغلى نقطة يتحصل عليها الهلال في تاريخ مبارياته في المجموعات. الهلال جاء وحصل على نقطة غالية أخرى أمام فريق المغرب التطواني الذي قدم هو الآخر مباراة كبيرة جداً أمام الهلال. التطواني لعب في وجود مساندة جماهيرية عالية ساندته طوال ال (90) دقيقة. إذن ناس الشغيل عملوا العليهم ..أصلو ما قصروا ..رفضوا الخسارة وعادوا بي نقطة من وكر مازيمبي ونقطة من معقل التطواني. تبقى دور جماهير الهلال والتى نعلم من أنها سوف تكون في الموعد تماماً عندما يواجه الهلال (التطواني) الجمعة القادمة في المقبرة. ثم يواجه في المقبرة نفسها فريق مازيمبي. ولا التطواني ولا مازيمبي ..بقدروا يشيلوا من الهلال (نقطة). يمين (شولة) ما يشيلوها. ولا يفكروا في حاجة زي دي. ولا يحلموا. جمهور الهلال جاهز لقبر التطواني ومازيمبي في المقبرة. والمقبرة معروفة للجميع. كمان نحن بنلعب. نحن لا بنلعب. ولا عندنا كلام كتير.
صينية باسطة واحد طقتو عقرب... قالوا ليه نجيب ليك شنو؟. قال ليهم جيبوا لي (باسطة).
أنتوا الأحق بالأميرة السمراء من حيث التاريخ ..والانتماء ..والشعبية ..وحب الجماهير الكبير ..يبقى الهلال هو الأحق بالفوز باللقب الأفريقي. الهلال الأحق بالأميرة السمراء. ليس هناك أعظم من الهلال. ولا يوجد أجمل من هذا الحب الذي تحمله جماهير الهلال لفريقها. أقل ما يمكن أن يكون مقابلاً لهذا الحب ..هو أن يفوز الهلال باللقب الأفريقي ..وهو جدير بذلك بإذن الله وتوفيقه. فقط مطلوب من لاعبي الهلال إرادة وعزيمة أكبر ..لا بد من مضاعفة العزيمة والإرادة والرغبة من أجل الفوز باللقب. كذلك يحتاج الهلال إلى جماهيره ليس في المباريات القادمة فقط ..بل يحتاج الهلال إلى جماهيره طول الوقت. في كل اللحظات..اقتربوا من الهلال أكثر. عبروا عن هذا الحب ..وترجموه واقعاً. يحتاج الهلال إلى مساندة فعالة وقوية من جماهير الهلال حتى نقبض على اللقب منذ الآن. اللقب لا يحقق في مباراة واحدة. بل يأتي اللقب عبر خطوات ومباريات ..ومساندة وتشجيع مستمر. قربوا أكتر لهلالكم ..هو قريب جداً من حلمكم. قريب جداً من أن يحقق اللقب. مطلوب من مجلس الإدارة أن توفر في الفترة كل احتياجات الفريق ..نحن في فترة حصاد. إعلام الهلال يحتاج أن يبعد عن الصراعات والخلافات وكل ما يمكن أن يضعف الهلال أو يقلل من قيمة أي شيء هلالي. يجب أن ننصرف كلياً نحو الهلال حتى يحقق الهلال اللقب. لن نجد فرصة أعظم من هذه الفرصة ..الظروف والمقومات كلها في صالح الهلال. بالحب والدعم المستمر يمكن أن نحقق البطولة. إذا غاب (الحب) لن نحقق اللقب. كونوا يد واحدة ...عشان الهلال يضرب بيد من حديد.
الزول الوسيم ..طلع من (القلب) وغادر (المجموعة) • يوشك أن تبلغ مرحلة (المثل الشعبي)...مقولة : (أنت قايل نفسك النعام آدم)..أحد الأصدقاء يقول دائماً هذه العبارة متى جاء أحدنا بعمل فيها عبقري ..أو اعتقد أنه سوف يعمل عملاً خارقاً. • لذلك هو عنده مقولة : ( يا أخوي أنت قايل نفسك النعام آدم) كثيرة...متى ما حاولت (تفكها) في نفسك ..وتعمل فيها أنك زول كبير...بقول ليك هذه العبارة. • عموماً يقال هذا القول المأثور للزول العامل (تفتيحة) أو الزول التفتيحة بالجد (اختلاف الآراء لا يفسد للود قضية)...أو الذي يدعى أنه مقطع السمكة وذيلها..رغم من أني ومن منطلق شخصي .. ما شايف قطيع السمكة وذيلها عملاً صعباً أو عبقرياً ..الناس وصلوا القمر ..ونحن إلى الآن مفتكرين أن قطيع السمكة وذيلها شيء خارق ..شيء فوق العادة. • بعدين مع الفيس بوك والتويتر ما في زول فاضي عشان يقطع ليه (سمكة). • على العموم يشبه الإنسان بالنعام آدم ...متى ما خرج من حدود الإنسان وأفقه الضيق وجاء بشيء غير مألوف. • والشيء غير المألوف (فقيها)...شيء فوق العادة ..أما اصطلاحاً فهو كل ما جاء في قالب مدهش وغريب. • هذا يجعلني أعود إلى الراحل المقيم ..الضخم النعام آدم ..الذي مع كونه أعمى ..إلا أنه كان (مفتح) البصيرة. • النعام آدم رغم من أنه لا يرى إلا أنه كان (تفتيحة) حقاً...يقال أن النعام يستطيع أن يفعل بالطنبور ما يشاء ..زول بقدر يقول ليه حاجة ما في. • ما يخطر ببالك ..وما لا يخطر ..يفعله النعام آدم بالطنبور. • مسألة الطنبور دي النعام آدم مكملها ...يستنطق النعام حبال الطنبور وأوتاره ويدخل بنغماته في مطبات وشُعب صعبة. • يقال كذلك أن النعام آدم يمتلك قدرة فائقة في فرز الأصوات ...نحن في الصحف ..وفي ثقافات ناس اللابات (ناس التصميم)...هناك فرز الألوان ...ربما لأن النعام آدم لا يرى فهو قد استبدل تلك الخاصية بفرز الأصوات. • بمعنى أن النعام آدم يخزن في أرشيفه (الصوتي) أي صوت استمع له ..من بعد فإنه يستطيع أن يخرج صاحب هذا الصوت من بين ألف شخص وبعد عشرات السنوات. • أحدهم يقال أوقف النعام آدم في ميدان الأممالمتحدة بالسوق العربي ..وقال للنعام آدم يا أستاذ ما عرفتني؟. • واكتفى بهذا. • فكان أن رد النعام آدم ..وقال له : (يتخيل لي سمعت هذا الصوت في ليبيا). • وكان صاحب الصوت قد التقى بالنعام آدم في ليبيا قبل عشرين سنة...ولم يقابله منذ عقدين من الزمن. • هذه ذاكرة صوتية نادرة ...لذا أحسب أن النعام آدم مهندس صوت قدير..لم يدرس ولم يدخل الجامعات ..ولكنه اكتسب تلك القدرة بالموهبة والفطرة ...وقد حرمه الله سبحانه وتعالى من بصره ...لكنه أعطاه بصيرة نافذة. • فنياً ..النعام آدم هو أول من خرج بأدب الطنبور وطلع بأنغامه من شمال السودان ..إلى شرقه وغربه وجنوبه. • بل، إن النعام آدم في وقت من الأوقات كان هو فنان الحفلات الأول في الخرطوم. • شكّل النعام آدم مع الراحل المقيم حسن الدابي ثنائية شمالية ..خالدة ..خرجت من جروف نوري والقرير ...فشملت السودان بأصيل الأغنيات وروائعها. • وأضاف الشاعر محمد سعيد دفع الله بالزول الوسيم و(لا شوفتن تبل الشوق ولا ردن يطمئن) للنعام آدم إضافات نوعية في مسيرة أغنيته العاطفية. • الفضائيات السودانية محتاجة أن تنقب في تراث النعام آدم ..فقد خلف لنا ذلك الرجل إرثاً يحتاج للدراسة والبحث والإفاضة.
البلد دي مالها بقت كلها (دكاكين ناصية) • اعتقد ...(وهذا من عندي)...أن الدكاكين الناصية كلها تلتقي في أن هناك مجموعة من الشباب يجلسون في زاوية مطرفة من الدكان ..ويتحدثون عن (إشاعة). • أغلب الذين يجلسون في الدكاكين الناصية ...يتحدثون عن (إشاعة)..ليس هناك (حقيقة) واحدة يتحدث عنها أولئك الشباب. • والإشاعات التى تكون في هذه (الجلسة) ..الما منظور مثيلها ...تكون عادة عن موت جون سينا ..أو سقوط طائرة في بورتسودان....الخ. • في هذه الجلسة في الغالب الأعم أن ينط واحد ...من الجماعة ويقول : الليلة شفتوا الجزيرة؟. • ينط آخر ويقول : حصل شنو؟. • يحكى الشاب عن القصة التى لم تأت في الجزيرة وإنما جاءت من بنات أفكاره. • لكن الجزيرة عندنا بتشيل الكثير من الإشاعات. • أي واحد عاوز الناس تصدقوا في (إشاعاته) ..يقول الليلة جابو الخبر دا الصباح في الجزيرة. • أحدهم كان يعمل على إقناع المجموعة التى يجلس معها على زيارة الرئيس المصري السيسي للكلاكلة. • ومعروف أن الكلاكلة لا علاقة لها بمصر ...مثل (حلايب) تماماً ...لكن الشاب أقنع الناس بذلك ..وأكد لهم أن الخبر بثته الجزيرة أمس. • أنتوا ما شفتوا (التقرير). • إذن الكثير من الإشاعات تخرج من الدكاكين الناصية ...لذا احذروا الدكاكين الناصية واعملوا حسابكم. • قبل القنوات الفضائية ...وقبل ثورة الاتصالات الرقمية تلك ..كانت (الدكاكين الناصية) هى الفضائيات ...وهى وكالات الأنباء ...وهى التى تخرج منها الدراما بما فيها (المسلسلات التركية). • أي خبر ممكن تلقى في دكان ناصية ...العرسوها ...والطلقوها ...والعاوزة تشتغل في التلفزيون. • السافر وما رسل لي أهلو ...والأدوه شاكوش ...هذه الأخبار توجد في الدكان الناصية. • وتوجد كذلك بروايات مختلفة. • لذلك أخبار الحارة كلها بتلقاها في دكان ناصية.
أفراح شندي للصباح احتفلت شندي وابتهجت المسيكتاب بأفراحها العريضة وزفافها الجميل وهي تزف المهندس (سلمان منصور) على الحسناء ست الكمال والجمال (ندى عوض الله) ..كما اكتملت الأفراح ..وطلعت شندي عن بكرة أبيها فرحى بزفاف المهندس (أكرم حسن) على الدكتورة التى تشبه القمر في ليلة كماله (ندى حبيب الله). تهانيء مبعوثة (صوامع)..و(حواشات) كمان من المهندس هيثم علي السنوسي ومحمد عبدالماجد. وإن شاء الله بيوت مال وعيال وعلم وزراعة.
