غايتو يا علي جعفر – كورتكم دي قدام كورة عمار الدمازين ...(نقاشة) ما بتشغلكم ممكن بعد تسع سنوات – نبيل الكوكي ذاتو تلقوه في موقف شندي بضرب ليه في فول زول ينهي تعاقده مع كيبي واندرزينهو ..يعني عاوز يجيب منو؟..اكيد جايب ليه (قنبلة) الكاردينال ذاتو (شفت) – وقت يلبس (الكسكتة) لو عاوز يجيب (ميسي) بجيبو ليك
* بعد خمس سنوات او سبع سنوات (ما بقدر احدد ليكم التاريخ – عندي مشكلة في التواريخ) ، بعد المدة دي يمكن تلقوا (نبيل الكوكي) في سوق ليبيا بيضرب ليه في (خشاف). * يعني ح يكون بضرب في (ورنيش). * تقول ليه يا زول انت الجابك هنا شنو؟. * يقول ليك جابوني ناس المريخ. * حصلت مع (غارزيتو). * ممكن بتحصل. * وممكن بعد تسع سنوات – نبيل الكوكي ذاتو تلقوه في موقف شندي بضرب ليه في فول. * يا زول مالك هنا؟..ان شاءالله خير. * يقول ليك جابوني ناس الاهلي شندي. * الكورة في البلد دي مدورها (الهلال). * حصلت مع اكتر من مدرب ..يجيبه الهلال – نلقاهو بعد سبع سنوات في المريخ. * او نلقاه بعد عشر سنوات في الاهلي شندي. * جماعتنا ديل اصلو ما قاعدين يفكروا براهم. * بفكر ليهم الهلال. * ما بشوفو الحاجة كويسة إلّا وقت تكون في الهلال. * ولاءالدين بعد ان فاوضه الهلال وحسم امره ..ناس المريخ ديل عملوا اي حاجة عشان يخلوا مجلس الاهلي مدني المحترم يبدل رأيه. * قدر ما حفروا ..واتحرفنوا ما عرفوا يصلوا مع مجلس الاهلي مدني لي شيء. * الكاردينال ذاتو (شفت) – وقت يلبس (الكسكتة) لو عاوز يجيب (ميسي) بجيبو ليك. * ما بسأل ليك في زول. * ابوعاقلة دا ما بقى ليهم سمح – إلّا بعد ما رصده الهلال. * اللاعب حسب ما ذكره الزميل الرائع ابوعاقلة اماسا كان في ايديهم – لكن ما اقتنعوا بيه. * وقت الهلال حسم امره الموضوع بقى ليهم حار. * في البداية الاسم كانوا معترضين عليه. * الضربة القاضية كانت في عمار الدمازين – الجماعة مشغولين بالانسحاب – الكاردينال حسم ليكم موضوع عمار الدمازين. * غايتو يا علي جعفر – كورتكم دي قدام كورة عمار الدمازين ...(نقاشة) ما بتشغلكم. * بتقطع من اول جرس. * تسجيلاتنا لو كانت بالروعة دي ..يا الكاردينال عليك الله تاني كل سنة انسحب لينا من منافسات الاتحاد العام. * المفاجآت قالوا ليك شغال فيها الكاردينال الآن في ملف الاجانب. * زول ينهي تعاقده مع كيبي واندرزينهو ..يعني عاوز يجيب منو؟..اكيد جايب ليه قنبلة. * المريخاب اعلناهو صراحة – قالوا نحن السنة دي الاجانب ما عاوزين نسجل. * لجنة التسيير بتاعة المريخ حدها امير كمال. * ما عندها قدرة اكتر من ذلك. * اصلا المريخ بتعقب خطوات الهلال...بمشي وراء الهلال. * المريخ دي معروفة فيه – الدخلوا جداد في الشغلة فريق الاهلي شندي. * ديل بقوا (ضل) جديد. * ضل رامي شمال. * المريخ والاهلي شندي اثبتوا ان اي حاجة (يفنشها) الهلال ممكن نلقاها بعد فترة معاهم. * برانكو الكرواتي جابوه ناس الهلال ...ثم انهى الهلال التعاقد معه بعد مسيرة حافلة. * تتخيلوا بعد كم سنة كدا ..نشوف ليك برانكو الكانو بيشتموه وبقولوا عليه بتاع (خندقة) في المريخ. * برانكو بي خندقتو جاء المريخ. * يا جماعة ..برانكو دا موش الكان بتقولوا عنو ما عندو اي حاجة. * الليلة بقيتو عليه. * وقبل برانكو كان ميكلوس الالماني. * الضل طبعا محكوم بحركة صاحبه. * نحن ما قاعدين نبالغ ولا قاعدين نطلب لينا حاجة برة المقرر. * طبيعي ان يلتزم (الضل) بقانون صاحبه. * دي حاجة طبيعية. * برانكو فات – حاولوا يعملوا نفس الحركة مع (مصطفى يونس). * لكن شداد قال ليهم ..مصطفى يونس دا ممكن يتاجر في (الشطة). * ممكن يتاجر في (الكركدي). * يتاجر في (التبلدي). * يتاجر في (الويكة). * لكن يمسك ليه فريق كورة في البلد دي ...ما ممكن. * ولا يفكر في حاجة زي دي. * احسن يركز في (شطته). * بالله شوفوا زمان نحن كان عندنا اتحاد قوي كيف؟. * اتحاد عنده كلمة وقرار – وماشي بالقانون وما في اي زول بقدر يقول فيه حاجة. * شداد قال مصطفي يونس ما بدرب هنا ..يبقى مصطفى يونس ما بدرب هنا. * جمال الوالي قام ووقع – ما لقى ليه حاجة لي مصطفي يونس غير (الشطة). * كمال شداد قال فاروق جبرة موقوف سنتين...يبقى فاروق جبرة موقوف. * المريخ يقوم ويقع. * وجمال الوالي يدخل ويطلع. * ورئاسة الجمهورية تتدخل ..وشداد ينفذ العقوبة بصورة قانونية. * ولا في زول بقدر يقول حاجة. * تعال شوف هسع دي. * بكري المدينة يضرب ليه حكم بونية – اسبوع واحد بكري ما يقيف ..يلعب المباراة التالية طوالي وبخطاب من الاتحاد العام. * حليل شداد. * حليل القوانين. * حليل اللوائح وقت كانت بقدموها وبطبقوها بصورة عادلة. * والضل وقف – لكنو زاد. * لفت الايام ودارت ..وجاب الهلال البرازيلي (ريكاردو). * موضوع عادي زي اي برازيلي في البلد دي. * بنتذكر وقتها لمن الهلال جاب ريكاردو ناس مزمل ابوالقاسم قالوا دا مدرب بتاع ناشئين ساكت. * وقالوا كان في السعودية ماسك ليه (براعم). * زي كلامهم عن الشركة الصينية التى نفذت مشروع الجوهرة الزرقاء..قالوا بتاعة (بزازات). * اول مرة اشوف لي (بزازات) في شكل سيخ وطوب واعمدة خرسانية. * بزازات ...وانتوا المادة 105 ما بتعرفو تفسيره. * ريكاردو مسك الهلال وفات. * الايام لفت ودارت ..وريكادو جابوه ناس المريخ. * ناس المريخ القالوا ريكاردو بتاع مدارس براعم. * ويا ريت الموضوع لو وقف على كدا. * بعد المريخ ..ريكاردو جابوه ناس الاهلي شندي. * نكروا كلامهم كلو – كلو. * زي كأنو ما في مدرب غير المدربين الذين يحضرهم الهلال. * الضل زاد. * بقى عندنا ضل غير المريخ. * الاهلي شندي ضل الضل. * اقول ليكم. * ناس الاهلي شندي من (الضللة) بتاعتهم في كاس السودان جايبنهم بدل فاقد. * ضل للطيش. * الخريطة الحركية للمدربين واللاعبين بقت على ذلك النحو. * المدرب او اللاعب اول حاجة يكون في الهلال. * ايام مجده وفي سنوات الشباب والعطاء. * بعد شوية تشوفوه في المريخ. * عادي ولا بخجلوا من الحاجات دي. * شوية كمان تشوفه في المريخ. * ريكاردو بدأ في الهلال. * جاء المريخ. * مشى الاهلي شندي. * كلتشي نفس الشيء. * بدأ في الهلال وقدم مستويات افريقيا كلها اتكلمت فيها. * مشى المريخ. * وح يختم شكلو في الاهلي شندي. * كلتشي الآن في الاهلي شندي. * هيثم مصطفى قدم اجمل مواسمه مع الهلال (17) سنة من العطاء الجميل في الهلال. * مشى المريخ موسم في الميدان وموسم في البيت. * بعد المريخ مشى الاهلي شندي. * نص موسم في الميدان ونص موسم في البيت. * هكذا اصبح المريخ والاهلي شندي (ضللة) للهلال. * تراوري جابو الهلال وقدم معه موسم اكثر من رائع. * انتقل تراوري للمريخ. * واشتغل بي نفس الطريقة – موسم في الميدان وموسم في البيت. * والظاهر كدا والاحتمال الاكبر ان تراوري يمكن ان نشوفه في الاهلي شندي بعد ثلاثة مواسم. * الحاجات كدا. * بكري المدينة ذاتو – شكلو ح يرجع تاني للاهلي شندي. * كل الذين يستغنى عنهم الهلال في الاجهزة الفنية او من اللاعبين مكانهم شاغر في المريخ والاهلي شندي. * ديل ضللتنا. * تاني. * ولاءالدين بعد 17 سنة في المريخ. * ولاءالدين بعد 21 سنة في الاهلي شندي. * ابوعاقلة بعد 16 سنة في المريخ. * ابوعاقلة بعد 20 سنة في الاهلي شمدي. * عمار الدمازين بعد 15 سنة في المريخ. * عمار الدمازين بعد 19 سنة في الاهلي شندي. * وليد الشعلة بعد 16 سنة في المريخ. * وليد الشعلة بعد 22 سنة في الاهلي شندي. * صهيب الثعلب بعد 18 سنة في المريخ. * صهيب الثعلب بعد 22 سنة في الاهلي شندي. * الكلام دا بحصل لو الله امد في الاعمار. * اقول ليكم حاجة ..اسامة ونسي ذاتو انا خايف بعد سنة ونص نشوفه في الاهلي شندي. * الجماعة ديل مشتركين في (الضل). * الاتنين بقوا (ضل) للهلال. * تلخبطو الزول والله في ضلو. * هسع الضل الرامي قدام دا الاهلي شندي وإلّا المريخ. * بقينا نتغالط في (ضلنا). * ............ * ملحوظة : الواحد بقى لكن يكورك يا ضلنا ...يلقى واقفين قصادو اتنين. هوامش * مثلما كان ريكاردو في الهلال ومشى المريخ ثم جاء للاهلي شندي ، يمكن النظرية تنطبق على غارزيتو برضو. * غارزيتو كان في الهلال. * ومشى المريخ. * ويمكن نشوفه بعد فترة في الاهلي شندي. * عشان كدا يا غارزيتو صلح معاملتك الظروف ما معروفة ..يمكن تجيبك الاهلي شندي. * احسن تصلح. * الزميل ابوعاقلة ماسا كتب تقريرا رائعا عن اللاعب ابوعاقلة المنتقل باذن الله الى الهلال. * طبعا ابوعاقلة من اكتر الصحفيين متابعة لانشطة ملاعب الاندية الصغرى. * واي موهبة بلتقطها ابوعاقلة قبل فترة من تفجرها. * اللاعب ابوعاقلة ح يعمل نقلة كبيرة في الوسط. * مثلما سوف يحدث ولاءالدين نقلة في الهجوم. * جمال الوالي يمكن يرجع بعد ان رجعت لجنة التسيير امير كمال للمريخ. * الزول دا منتظر امير كمال يرجع. * التسجيلات تبدأ غدا. * الهلال يفترض ان يوقع مع اللاعب لمدة 5 سنوات وان يصل معهم لاتفاق على ذلك ..لأن كل اللاعبين الذين سوف يضمهم الهلال صغار في السن. * يا ريت ولاءالدين وابوعاقلة وعمار الدمازين وميسي التوقيع معهم يكون لمدة خمس سنوات. * اذا لم يفقد الاتحاد العام اهليته فقد فقدت الثقة فيه. * ما في زول قاعد يثق في هذا الاتحاد. * اتحاد يقود الكورة الى الهاوية. * ............ * عاجل : غرفة تسجيلات الاهلي شندي تضم سمير فضل.