( 1 ) تحدثنا عن رأينا حول عودة هيثم مصطفى والتي قلنا إنها من أكبر المكاسب للهلال لأننا نعرف العقلية الكبيرة التي يتمتع بها ( الداهية ) هيثم مصطفى وهيثم مصطفى الآن يمكن ببساطة أن نقول إنه أمضى 23 عاماً في الملاعب مابين ملاعب دوري الثانية بحري في أول فترته مع الأمير ثم صال وجال في أي ملعب في السودان وزار أغلب دول أفريقيا وعاشر ما يزيد عن العشرات من المدربين الأجانب والوطنيين وتعامل مع مئات الإداريين في الهلال ومثلهم من الصحفيين ولهذا قلنا إن الكاردينال بقراره بإعادة هيثم أجهض مشروع مستقبلي لرئيس المريخ الأسبق جمال الوالي الذي كان تركيزه كله على أن يبعد هيثم مستقبلاً من الهلال والكاردينال بكل بساطة قطع الطريق .. لحدي هنا نحن متفقين حتى وأن كان للبعض رأي مخالف ونحترمه جداً والأيام كفيلة بأن تجعلهم يتراجعون ولكن الأهم الآن أن هيثم خلال الليالي الثلاث الماضية أدخل نفسه في ضغط جديد وبسبب الصحافة , التي هرعت لانتزاع تصريحات معه ونعرف أن هيثم ضنين في الحديث خاصة لوسائل الإعلام لكنه وجد نفسه أمام جهات لم تحسب أصلاً للمصلحة العامة وحسبت لمصالحها فقط وحاولت إجراء الحوارات معه ونحن نريد هيثم المفكر بزي التدريب وعلى بنش البدلاء يؤشر ويصيح ويهمس مابين الشوطين هذا مانريده من سيدا حتى يسجل النجاح في مهمته الجديدة وهيثم أدخل نفسه في أماكن كان يجب أن لا يدخلها وفتح أبواب ما كان له أن يفتحها لأنها ستخصم من الاستقرار الذي ينشده في الفترة المقبلة وهيثم يحتاج لظروف أفضل وأجواء أهدأ يزيل بها ذلك الكُرب الذي استمر لثلاث سنوات وأتمنى أن يصمت سيدا ويكون حديثه فقط في الميدان ومن بنك البدلاء ياعمك أقفل تلفونك وقول ليهم نتلاقى في سوسه . ( 2 )
تمنيت أن أفتح صحف المريخ يوماً ولا أجد تصريح لمحي الدين عبد التام لكنني أظن أنني أطلب لبن الطير زمان كان همت كلما يصرح في الجرائد الرياضية وأيام الخريف كمان بلقى سوق في الصحف السياسية هسا عبد التام شكلو متعاقد مع الصحف غايتو لو التصريحات بالدفع حانرتاح شديد من كتير من الإداريين أمس سألوا عبد التام عن قضية شرف شيبوب الوقع معاهو الهلال عشان يسجلوا في الملكية جوبا عارفين عبد التام قال شنو ؟ قال أنا شفته الصور بتاعت شيبوب مع الكاردينال لكن ماعرفنا فهمو شنو ؟ عشان كدا المجلس كلف عادل أبو جريشه عشان يقعد مع شيبوب ويعرف فهمو شنو الإدارة في خطر ( 3 )
واحد ثقيل جداً سألني قال لي المريخ ما أعاد أحمد الباشا وبله جابر ليه ؟ قلته ليهو السنة الفاتت الهلال ما أعاد مهند الطاهر ومعز محجوب وعمر بخيت .. قال لي هو ناس المريخ ديل في دي برضو بقلدونا أنتو عارفين ناس بله جابر كانوا عندهم كلام كتيير مفروض يقولو لقناة (قوون) لكن عملوا رايحين في آخر لحظة قالوا ليك من (قوون) أعلنت عن الحلقه تلفونات ناس الباشا ما وقفت قالو ليك بله جابر إلا قاعد جمب الشاحن اليوم كلو أنتو الناس ديل يكونوا دايرين يتكلموا عن الوالي ولا شنو ؟ طبعاً في المريخ أي شئ ولا تتكلم عن الوالي ( 4 )
الأيام دي طبعاً ريال مدريد بقى زي المريخ تعبان تعب الموت واحد ريالابي زعلان قال ناس كريستيانو ديل يكون دايرين يقيلو بينتيز طبعاً في البلد دي المدرب لو عمل حركات اللاعبين بجرجرو معاهو وخسارتين تلاته الإدارة بتشيل المدرب المدرب دا شماعة بس في البلد دي عشان كدا شبر ما بنمشي قدام ( 5 )
قالو ليك شيبوب لسه يعد في الدولارات يا سلك البقعد مع الكاردينال مابقوم قالو ليك الكاردينال في بيتو عندو طابق كامل دا بس بتاع عقودات وصور.
