سودارس : كلموا بلة جابر ما يخرب ليكم (اتفاقيتكم) دي بي تصريح

أمجد فريد الطيب يكتب: حياة تجلت في وضوح المبادئ: وداعا فينك هايسوم عثمان ميرغني يكتب: حرب السودان ومخطط شد الأطراف الخليج الضحية الكبرى: إيران وجهت 83% من هجماتها إليه… و17% فقط إلى إسرائيل بعثة المنتخب تصل بورتسودان وسط إهتمام كبير منتخبنا يتدرب صباح الخميس بإستاد بورتسودان قائمة صقور الجديان لوديتي السعودية كواليس صادمة... كيف تعطلت صفقة تسليح الجيش السوداني في اللحظات الأخيرة؟ 11 دقيقة إضافية من النوم ليلا تساعد فى الوقاية من النوبات القلبية 13 حزمة لغوية جديدة لترجمة محادثات "واتساب" سناب شات" يحوّل الصور إلى فيديو بالذكاء الاصطناعي بالصورة.. الصحفي السوداني الشهير حسين خوجلي يستعيد بصره وسط سعادة أصدقائه ومتابعيه: (عودة البصر لصاحب البصيرة والوان وحمدا لله على السلامة أبو ملاذ) الباشا طبيق : السيطرة على الكرمك تعيد تشكيل الخريطة العسكرية في السودان تعديل وزاري مرتقب في السودان يشمل ست حقائب وزارية هل يكون محمد صلاح الصفقة الكبرى القادمة بالدوري الأمريكي بعد جريزمان؟ جلسة مع محمد صبحى في الزمالك.. اعرف السبب استمرار محاولات الأهلي لإنهاء أزمة الشرط الجزائي مع توروب يارا السكري تكشف لليوم السابع تفاصيل دورها فى فيلم صقر وكناريا شاهد بالصورة.. فاتنة الإعلام السوداني تخطف الأضواء بأحدث إطلالة لها والجمهور يطيل الغزل في جمالها: (يا دووب كدة عيدنا) باسم سمرة: الناس بقت تناديلى ب«زكى».. ونجاح عين سحرية توفيق من ربنا ذكرى رحيل أحمد حلاوة.. ممثل جمع بين الهندسة والدكتوراه فى فلسفة الفنون نصائح لوقاية مرضى حساسية الصدر من التقلبات الجوية والرياح مشروبات تساعد على حرق الدهون بعد كحك العيد اكتشاف مرض وراثي جديد يسبب الشيخوخة المبكرة والقصور الإدراكى شاهد بالصور. الفنانة مروة الدولية تفاجئ الجميع وتعتزل الغناء وعازفها الشهير ينشر مراسلات واتساب بينهما أكدت فيها تمسكها بالقرار بالصور.. مدارس أبو ذر الكودة تلزم أسرة طالب بدفع غرامة قدرها 100 ألف جنيه بسبب كسره مفتاح مروحة بالفصل ومتابعون يتصدون للدفاع عن المؤسسة شاهد بالصورة والفيديو.. في تقليعة جديدة.. شباب سودانيون يلطخون صديقهم العريس ووزيره ب"ظهر الصابون" و"البودرة" الهلال يواجه ضغط المباريات في رواندا جبريل يلتقي المبعوث الشخصي للأمين العام للأمم المتحدة إلى السودان مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية كيف تفاعل النجوم مع خبر رحيل صلاح عن ليفربول؟ ضبط 2800 قندول بنقو بالجزيرة في عملية نوعية لمكافحة التهريب ترامب يصدر أوامره ويكشف تطورات مثيرة مع إيران طهران ترد على تهديدات ترمب هل مخالفة ترامب خلل في الكون؟! الأمن يداهم مخزن يبيع الوقود المهرب لعصابات التنقيب عن الذهب تراجع معدّل التضخّم في السودان بادي يصدر مرسوم تنظيم أعمال التعدين التقليدي وضبط آليات التعدين بالنيل الأزرق رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة شركة كهرباء السودان تحديث حول سير أعمال الصيانة الطارئة للشبكة القومية توقّعات بارتفاع غير مسبوق في أسعار النفط ضبط 238 كجم من "الآيس" وأسلحة بجانب نحاس بولاية البحر الاحمر ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد أغلى علبة كعك في مصر تشعل مواقع التواصل قيم الهلال المتوارثة يجب أن تبقى أبد الدهر بنك السودان المركزي يصدر توجيهًا للمصارف إبراهيم شقلاوي يكتب: الزراعة ما بعد اقتصاد الحرب في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته ملتقي التحصين للعام 2025 ينعقد بحضور التحالف العالمي للقاحات والشركاء صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

كلموا بلة جابر ما يخرب ليكم (اتفاقيتكم) دي بي تصريح

قوون نشر في قوون يوم 25 - 02 - 2012

الايامات دي الهلال والمريخ (سمن على عسل).

خايف مباراة القمة القادمة تكون بالطنبور.

او تكون تحت اضاءة خافتة ...مع موسيقي هادئة.

انا مرات بتخيل القى ليك عصام الحاج وهاشم ملاح في (حدايق السلام) قاعدين بتكلموا عن افلام نور الشريف القديمة.

كورة شنو؟.

الكورة طايرة.

دي شنو الحاجات الصغيرة دي.

انتوا ما بتكبروا.

موش موقعين (اتفاقية).

مرات بتخيل الامين البرير وجمال الوالي بحضروا ليهم في فيلم هندي في قاعة الصداقة.

موش موقعين (اتفاقية).

الكورة دي كبروا عليها.

تتصارعوا وتتطاحنوا ...والمستفيدين من الحكاية دي ناس (بلة جابر).

ما تتحيروا ...الزمن دا ما في حاجة بعيدة.

بعد (الاتفاقية) نحن بنصدق أي حاجة.

غايتو بي طريقتكم دي ...هلال مريخ القادمة ح تكون (بين الزهور متصور).

ويا احلى عيون بنريدها ...في زول علمنا الريدة.

بختكم يا ناس اسحاق الحلنقي.

القمة القادمة ممكن تكون (حكم المباراة).

أي لاعب يعمل مخالفة تقول ليه : (تغلطوا انتوا يا حلوين نجيكم نحن بالاعذار).

الكرت الاصفر عند الحلنقى (بتتعلم من الايام مصيرك بكرة تتعلم).

الكرت الاحمر ..(يا المصيرك تنجرح بالسلاح البيه مرة جرحتني).

ما شاعر.

يعنى ح يعمل ليكم اكتر من كدا شنو؟.

وكمان موقعين ليه (اتفاقية).

بمناسبة (الدومة) دي.

قالوا ليك واحد وقع من الطابق السابع.

قام ما جاتو أي حاجة.

عارفين ليه؟.

عشان عندو (واسطة) قوية.

هسع (الدومة) هنا وين؟.

بعد الاتفاقية.

عادي جدا.

الامين البرير يتغدى مع جمال الوالي.

وما عاوز اقول البغسل ليهم الايادي منو؟.

جمال الوالي يفطر الامين البرير.

وبرضو ما عاوز اقول البغسل ليهم منو؟.

والجماعة يصوروا.

البرير يتبرع باسم الوالي.

والوالي يقول بيت الازرق عبارة عن فندق خمس نجوم.

جنس مجاملة.

بقيتوا (ظرفا) عديل كدا.

الجماعة من (الظرافة) قالوا عاوزين يعملوا ليهم غرفة تسجيلات مشتركة.

زي غرفة الهلال والاهلي شندي زمن صلاح ادريس.

اللاعب بدخل الغرفة.

وما عارف نفسو ح يتسجل وين؟.

في الهلال وإلا في المريخ.

موش قلتوا (غرفة تسجيلات مشتركة).

مشتركة كيف يعني؟.

كتاب جغرافيا هي.

بمناسبة (الظرافة) دي.

قالوا ليك في واحد خاطب ليه واحدة اربع سنوات.

اربع سنوات ما قادر يقول ليها حاجة.

اربع سنوات كلمة واحدة ما قادر يقول ليها.

اصحابوا يلكزوا فيه لكيز عشان يقول ليها حاجة.

هو ما قادر يقول ليها حاجة.

اخر حاجة قال عاوز يتشجع ويقول ليها كلمة.

بعد كدا الببقى اليبقى.

زولكم اتحزم ومشى عليها.

قال ليها : اسمعى..

الخطيبة قالت الحمدلله ابوالهول عاوز يتكلم.

قالت ليه: نعم.

قال ليها : عاملة عيونك الكبار ديل.

قالت ليه : دا غزل يعني.

قال ليها : غزل شنو؟...عيونك الكبار ديل انا بقددن ليك.

البنت شالت بستلتها وطلعت.

البستلة هسع الدخلها شنو؟.

زمان في حاجات بتحصل بالشكل دا.

يقولوا ليك : البستلة ...وحلة اللبن ...وكراع العنقريب.

الحاجات دي هسه مشت وين؟.

اختفت نهائي.

نرجع للاتفاقية.

ناس المريخ ما مصدقين يلقوا الحاجات دي كلها من ناس الهلال...ناس الهلال برضو بقوا (يتظارفو).

الظرافة دي ايام صلاح ادريس ما كانت بتحصل.

دي (العدلاء) ما كان بعملوها.

الامين البرير جاء طبقها ليك في الواقع.

تصوروا ناس الهلال خلوا متوكل احمد علي يمثلهم في اجتماع الكتلة.

في ثقة اكتر من كدا.

دي ظرافة فايتة الحد.

يعني سادومبا تاني بكون منفرد بي اكرم الهادي سليم ...ساعة يكون خلاص عاوز يسجل (باسكال) بلكزوا بي (الاتفاقية).

سادومبا بشوت الكورة في الكشافات.

كاريكا هو والقون.

بلة جابر يلحقو بالاتفاقية.

كاريكا يشوت الكورة في ام بدة.

غايتو يا المريخاب عرفتوها.

مع (فلانتاين) دا إلا تشوفوا ليكم (اتفاقية).

لا الباشا ..لا باسكال.

لا موسي ..لا بلة.

لا سكواها .لا اديكو.

ديل كلهم ما بنستروا مع ناس فلانتاين ونزار حامد.

اخير تعملوها لينا (اتفاقيات).

قالوا ليك بعد معسكر المريخ في كينيا.

ريكاردو اجتمع بي دائرة الكورة في المريخ.

قال ليهم شوفوا لي (اتفاقية) مستعجلة مع ناس الهلال.

انا ما معقول انافس لي فريق عندو 9 لاعبين بيلعبوا في الكان.

انتوا مجانين.

ديل تسعة.

طوالى ناس عصام الحاج فكروا ليهم في (اتفاقية).

وجمال الوالي جاء يتغزل في البيت الازرق.

بمناسبة (المحلبية) دي.

قالوا ليك واحد قدر ما يطلع ويرجع البيت يلقى زوجتو بتابع ليها في مسلسل تركي.

زوجتو تقول بتقلب ليها في زلابية ...من قناة لي قناة.

تنتهى الحلقة في القناة دي ...تقلب تلحق ليها حلقة في قناة تانية.

الراجل مسكين ...يطلع ويرجع يلقاها قاعدة تتفرج في المسلسلات التركية.

الراجل اتوكل وقال لزوجتو والله السنة دي الدوري الممتاز لو منقول في (التلاجة) حقتنا دي ما عندنا طريقة من متابعتو.

صاحبكم (قنع) عديل.

نرجع للاتفاقية.

هل جزء من (اتفاقية) الهلال والمريخ ان ينتقل نقل الدوري الممتاز الي قناة الشروق؟.

في حاجة بقولها لي ناس الهلال.

الجماعة ديل يا ناس البرير ما يغشوكم ساكت.

شنو في كل التوقعات والبيانات المشتركة بين الهلال والمريخ اسم المريخ بسبق الهلال.

الكلام دا ما بنفع معانا.

ولا يصح إلا الصحيح.

مما ممكن جمال الوالي يسبق الامين البرير.

او عصام الحاج يسبق هاشم ملاح.

بيانات واتفاقيات زي دي ما طلعوها لينا.

ما عاوزنها.

الهلال بتقدم في أي شيء.

شوفوا كم مرة نحن شلنا الممتاز ...والمريخ شال الممتاز كم مرة.

لو اتفاقيتكم على انكم تقدموا المريخ على الهلال في المكاتبات والبيانات المشتركة من هسع بنقول ليكم لموا اتفاقيتكم عليكم.

انتوا يا ناس هاشم ملاح ..ما تبقوا مساكين.

وانت يا الامين البرير ما تجامل في حق الهلال.

الهلال هو الاصل.

والهلال يتقدم ..ولا يتقدم عليه.

إلا الهلال.

ما عرفوا يغلبونا بالمال والدولة والسلطة ...عاوزين يغلبونا بالاتفاقيات.

مرة اخرى نقول يجب ان يتقدم الهلال وممثلوه على المريخ وممثليه.

الموضوع دا واضح.

ما عاوز ليه (ثعلبة).

ولا (شيطنة).

في ناس طبعا قالوا الاتفاقية دي ممكن ينسفها هدف سادومبا ..او تصويبة من مهند الطاهر.

لكن نحن شايفين ان الاتفاقية يمكن ان ينسفها هذا العمل ...وهذا الذي يحدث في الخفى يؤدي الي تقديم المريخ على الهلال.

من متين المريخ بتقدم على الهلال.

ولو انتوا شايفين الموضوع دا ما فارق معاكم يا مريخاب قدموا لينا الهلال.

الهلال نحن عندنا (صدارة) في أي حاجة.

بعدين لو عاوزين الاتفاقية دي تنجح ..اول حاجة عدلوا من موقع (الهلال) في جامع المريخ.

انتوا الهلال في الجامع ما بالعنو.

ما تعملوا لينا الموضوع عادي ..وتمرروا لينا (اجندتكم).

سوف ننتظر (البيان) المشترك القادم ...ونشوف ان تم تصحيح الوضع.

يا البرير انت (مفتح).

ما يغشوك ب (الاتفاقية) دي.

الهلال اولا واخيرا.

فقط نقدم (الوطن) على الهلال.

تانى ما بنقبل حاجة تتقدم على الهلال لأن الواقع والتاريخ والمستقبل والمنطق برفض ذلك.

بالمناسبة (اتفاقيتكم) العاجباكم دي ممكن بلة جابر ينسفها ليكم بي (تصريح).

تصريح ما اكتر.

ما تخلوا بلة جابر يصرح.

اوعكم تخلوا يجيب ليه سيرة ل (المطبخ المفتوح).

سكتوه الزول دا.

وقالوا ليهو ارفع كورتك ساكت.

الكشافات في الانتظار.

بمناسبة (الراكوبة) دي.

واحد قال والله (الصينيين) في شارع (افريقيا) اكتر من الافارقة.

مرة مشيت ليك عرس ...لقيت ليك المعازيم كلهم (صينيين) ..قلت يا ربي انا دخلت غلط.

يمكن اكون دخلت لي شركة بترول.

شوية كدا اشوف ليك خال العريس.

تصوروا خال العريس طلع (صيني).

قعدت شوية.

شفت ليك (العريس).

العريس ذاتو (صيني).

خالو صيني ..يعني ح يطلع الماني.

انتظرت العروس.

العروس اتأخرت ...لكن امها وصلت.

ام العروس ذاتها صينية.

شوية كدا العروس وصلت.

العروس طلعت برضو (صينية).

امها صينية ..يعني ح تطلع شنو؟...دنماركية.

ناديت لي اقرب صيني في العرس ..قلت ليه انت دا عرس منو؟.

قال لي دا عرس بونغ كونغ سونغ.

قلت ليه على منو؟.

قال لي على شونغ سوادغ لونغ.

قلت ليه طيب ما تقول كدا من الصباح.

انا كنت فاكرو عرس عباس ود التومة.

اها كلامك انتهى.

المعنى قصتك خلصت.

عاوز اسألك..(الراكوبة) هنا الدخلها شنو؟.

ملحوظة : دخلتها اتفاقيتكم دي.

هوامش

كنت سعيد بمشاركة طلاب اكاديمية السودان لعلوم الاتصالات وهم يحتفلون بصحيفتهم الحائطية (تداول) بعد ان اكملت العام.

ثقافة الصحف الحائطية يجب ان تعود لأن البداية منها تمنحنا صحافة في المستقبل معافية ...وصحافة حقيقية.

في اكاديمية السودان لعلوم الاتصالات توجد الكثير من المواهب الاعلامية والتى سوف يكون لها دور كبير في الساحة الاعلامية في السنوات القادمة.

الشكر لطلاب الاكاديمية ولطلابها النوابغ.

اتحاد الكورة بقى لعبة في يد الهلال والمريخ.

يا حليل كمال شداد.

تصوروا ناس الهلال والمريخ بقوا يحددوا الشركة الراعية وحقوق التلفزة ...

والاتحاد قاعد ساكت.

القرعة ذاتها بقوا يعملوها ناس الهلال والمريخ.

اذا كانت اتفاقية الهلال والمريخ سوف تأتي للذهاب بهيبة الاتحاد وبمصلحة الاندية الاخرى ..تبقى الاتفاقية مرفوضة.

الهلال والمريخ ارهبوا الاتحاد العام باتفاقيتهما.

الاتفاقية على (الظلم)...افضل منها الاختلاف على (العدل).

شنو يعني جمال الوالي يزور البيت الازرق.

والامين البرير يزور بيت جمال الوالي.

هل كانت الاتفاقية من اجل التعدى على حقوق الاندية الاخرى.

يا ناس الهلال ما تنسوا مباراة الاربعاء امام الاهلي شندي.

مباراة صعبة وما ساهلة.

ما تنشغلوا بالاتفاقية.

والاشياء هناك تطبخ على نار هادية.

ابقوا عارفين.

عاجل : لو دا فريقكم يا ناس المريخ اعملوا ليكم (اتفاقية) تاني مع الامل عطبرة.

انقر هنا لقراءة الخبر من مصدره.