اعترض اعلام المريخ ...(الاعلام السالب) قبل اتفاقية الجنتلمان ..على كتابة اعلام الهلال عن (البيت الازرق)...واعتبروا ان الكتابة عن هذا البيت نوع من (الخلعة). انتوا يا ناس المريخ لو عملتوا ليكم (طبلية) بتفلقوا لينا رأسنا. التعليق دا قبل (الاتفاقية). قال بعض المريخاب ان البيت (مؤجر) ولا يستحق كل هذه الضجة. بيني وبينكم ناس الهلال ديل ببالغوا. اجار البيت جابوا ليه (حرس الحدود). لو اشتريتوا البيت ...كنتوا جبتوا (برشلونة). عشان تعرفوا نحن ناس حقانيين. نرجع لي ناس المريخ. الكلام دا والاعتراض اعلاه من قبل الاعلام السالب (سابقا) اعلام المريخ (حاليا) حدث رغم اتفاقية الجنتلمان بين الهلال والمريخ. انا كنت متوقع بعد الاتفاقية ...مزمل ابوالقاسم ...يشيد بالفكرة من حيث المبدأ. ولو من ناحية (المبدأ). طبعا في ناس كدا ...لو عاوزين يخرموا.. بقولوا ليك نحن من ناحية (المبدأ) ما عندنا مشكلة. شفت من يقولوا ليك كدا ..اقنع من الموضوع. وكنت متوقع بعد الاتفاقية ...احمد محمد احمد يقول والله خطوة البرير دي جميلة ...وكنت فاكر احمد محمد احمد (ينداح) في الكتابة اكتر من كدا ويقول بعد الاتفاقية ...(لو اضايقنا بنجي عليكم). الحالة واحدة يا أحمد. الفنادق ما مضمونة ..اخير ليكم صلحوا علاقتكم. جمال الوالي دا يمكن يمشي في أي لحظة. لو جمال الوالي مشى (راكوبة) ما بتلقوها. الهلال عندو عمارة 16 شقة ...يعني اندية الممتاز كلها ممكن تنزل معانا. ما عندنا أي مشكلة. البيت الازرق شايلنا وشايل بقية الاندية. وكنت متوقع من باب (الاتفاقية) ان يتغزل لينا بابكر سلك في (العمارة)..ويهاجم جمال الوالي ويطالبو يعمل ليهم عمارة زي عمارة الهلال ..ان شاءالله من شقة واحدة. لكن هذا لم يحدث من اعلام المريخ ....(الاعلام السالب) قبل الاتفاقية ...اذ سخر الاعلام السالب من العمارة ..واعتبروها (منقصة) في حق الهلال. ايوة ...قلتوا لي. المريخاب ديل الواحد فيهم لو اتشجع شديد ...وقال ينتقد المريخ ...بنتقد (الشغيل). اكتر من كدا ما بقدروا يقولوا حاجة. حدهم الشغيل. قالوا ليك في واحد قرر من الاعلام السالب (قبل الاتفاقية) قرر يهاجم جمال الوالي. صاحبكم بدون ما يشعر ...لقى نفسو بهاجم في (همد). عينكم في (الوالي) وتطعنوا في (همد). كدا يا جماعة تعالوا نخت (الاتفاقية) دي جانبا ...نحن ما شغالين مع حطبة ...ولا مواقعين على (مستندات) مع عصام الحاج. تعالوا نضع الاتفاقية دي جانبا ...ونتكلم عن المريخ. ناس المريخ ديل فرحانين عشان (سكواها) شارك لمدة 7 دقايق في بطولة الامم الافريقية. سكواها دا شفتوا في مباراة السودان وزامبيا (لحظة) كدا ...زي لما يكون هناك خلل من المصدر. فجأة كدا واختفى. من جملة 570 دقيقة شارك سكواها في 7 دقايق. انت يا سكواها ماشي (عزاء). مع ذلك الاخ مامون ابوشيبة طالب روابط المريخ وانصاره باستقبال سكواها في المطار. عشان شنو؟. عشان 7 دقايق ..(لمس) سكواها فيها الكورة مرتين ...المريخاب طالبوا باستقبال سكواها في المطار. يا مريخاب ..(الكلام دا قبل الاتفاقية)...يا مريخاب انتوا عملياتكم دي للمنتخب الوطنى السوداني ما عملتوها. عاوزين تعملوها لي (سكواها). المنتخب صعد لدور ال (8) بعد 42 سنة...زول اشتغل بيه مافى. سكواها الذي شارك 7 دقايق في 6 مباريات عاوزين يعملوا ليه استقبال واحتفال..وقومة وقعدة. يا ربي منتخبنا السوداني دا كان مشارك في دورة دول الساحل والصحراء. السودان دا كان في دورة (س – ص). والله نحن لو ما الاتفاقية ...الموضوع دا ما كنا بنفوتوا ساكت. كنتوا بتسمعوا مننا كلام اسخن من الكلام دا. الله شافكم بس يا مريخاب. يا مريخاب اقول ليكم حاجة تانية. كاريكا مهاجم المنتخب السوداني ولاعب نادي الهلال اختاروه في منتخب افريقيا. اها نحن الموضوع دا ما اشتغلنا بيهو. ولا عملنا ليه توم وشمار. لا توم وشمار. ولا توم ان جيري. عادي مررنا الموضوع. غايتو يا المريخاب بتعملوا ليكم في جنس حاجات. حركاتكم دي بتنسف الاتفاقية. استقبال سكواها ليه ...حرر الكرمك. الغريبة بعد دا معترضين على الاحتفاء بالبيت الازرق. يا جماعة نحن فرحتنا بالبيت دا ...ما عشان الموضوع حاجة كبيرة ..فرحتنا على هذه الخطوة ناتج من كون هذه الخطوة عملية تحسب للهلال. وهذا امر يشكر عليه الامين البرير ...ان يكون للهلال بيت ...يضم اللاعبين والجهاز الفني. تلك الخطوة خطوة احترافية وفيها الكثير من النظام ...والتقدم الي الامام. الاشياء عندما تكون (مرتبة) هكذا تسعد ...وكنا سوف نسعد بذلك حتى لو تلك الخطوة قام بها المريخ. حتى لو كانت ما في (اتفاقية). الحق حق. انتوا كمان يا مريخاب ....عاوزين تلونوا الحق. في واحد قال لي هسع بعد (الاتفاقية) دي ح تعترفوا بي كاسات المريخ الجوية. قلت ليهو هي الكاسات الجوية دي المريخاب ذاتهم ما معترفين بيها. دا كلام للاستهلاك فقط. ما في حاجة اسمها (الكاسات المحمولة جوا). اقول ليكم حاجة. ما هو موقع ضربة الجزاء الوهمية التي يتحدث عنها مامون ابوشيبة منذ 1996م بعد الاتفاقية؟. الاجابة. مامون ابوشيبة بعد الاتفاقية يمكن يطلع الكورة برة الخط ...ويقول ان المخالفة وقعت على رأس الخط. ابوشيبة لو طلع الكورة من رأس الخط ...ما بطلعها من رأسو. غايتو الاتفاقية دي ح تجهجه ناس كتيرة. قالوا ليك بابكر سلك كان عاوز يكتب عن (بونية) الامين البرير ...اتذكر الاتفاقية ...كتب ليك عن حمية البرير وعن غيرتو على شعار الهلال. نحن ما قلنا ليكم كدا من الصباح. انتوا ساكت قعدتوا تغالطوا. مزمل ابوالقاسم قالوا ليك كان عاوز يكتب عن (ايقاف سادومبا مدي الحياة). تاني كان عاوز يرجع للموضوع دا ...عشان يسخن بيه الهلال قبل بداية الموسم. قام مزمل اتذكر الاتفاقية. عارفين كتب عن شنو؟. كتب عن هاتريك رونالدو الاخير. هسه الدخل هاتريك رونالدو في ايقاف سادومبا مدى الحياة شنو؟. انت يا مزمل ما تشوف لينا (مدى الحياة) دي..لي خليفة. ان شاءالله ربع كيلو (مدى الحياة). احكي ليكم قصة تانية. قالوا ليكم عصام الحاج مبسوط شديد من (الاتفاقية). عصام الحاج قال ما في حاجة بتمرقنا من الفرنسي (غارزيتو) دا غير (الاتفاقية) دي. عصام الحاج ناوي في اول مباراة قمة بين الهلال والمريخ ..يشيل (الاتفاقية) معاه ويدخل المباراة. وقت الهلال يجيب الهدف الاول ...عصام الحاج ما بقول حاجة. وقت الهدف التاني يجي...عصام الحاج برضو ما بقول حاجة. وقت الهدف الثالث يجي ...عصام الحاج بشيل (اتفاقيتو) ويمشي لي (غارزيتو)...ويقول ليه : (انت الاتفاقية دي نحن موقعنها عشان حقوق البث)..شنو يا ود الناس ..ما تصلح معانا؟. الاتفاقية دي نحن ما بنفعلّها إلا بعد الثلاثة. قبل الثلاثة اقوان ...ما في زول يجيب لينا (اتفاقية). ولا بنجامل. ملحوظة : ان شاءالله بيت مال وبطولات. هوامش تابعت من على البعد تحركات الاخوان عبداللطيف ضفاري (صاحب الفكرة) مع الرائع هيثم صديق من اجل تبادل الاعمدة الرياضية بين كتّاب الهلال وكتّاب المريخ. واسعدتني الفكرة ...وتحمست لها ...وتابعت ردود الافعال كلها ...وتمنيت ان تتنفذ الفكرة ...لأن التعصب والخلافات بين الهلال والمريخ اصولها (اعلامية). المشكلة في الاعلام. هذا اعتراف واضح ...لو قللنا التعصب في الكتابات بين كتّاب الهلال والمريخ سوف نصل الي المنطقة التي نريد. سوف تزول الكثير من الخلافات والصراعات. لذا تبادل الاعمدة بين الطرفين هو بمثابة اعلان لوقف اطلاق النار. لو الفكرة طبقت مرة ..ونجحت يمكن ان تتطبق دوريا من وقت لاخر. نحن متفقين ..انو ما في مريخ بدون الهلال. لكن اقول ليكم حاجة. في هلال بدون مريخ. بالجد..الهلال والمريخ قوتهما في تنافسهما. لكى يظل الهلال (قويا)..لا بد من ان يكون المريخ (قويا). ولكى يزول التعصب ...علينا ان نتبادل الاعمدة. الفكرة تحتاج الي اجتهاد اكبر من ضفاري وهيثم صديق ...سوف تجدا الكثير من التعب والكثير من المشقة...لكن في النهاية سوف تساعدوا في اطفاء نار العصبية. عاوزين الموسم الجديد ..يكون موسم نموذجي ...وهادي وجميل. عاوزين نستمتع بي كورة حقيقية. من بعد ليس مهم من ينتصر. الوطن فوق الهلال والمريخ. لو قدمنا السودان في كل تحركاتنا ...ما بتجينا أي مشكلة. ضعوا الوطن في (المقدمة). والهلال والمريخ (مجرد كورة). نعترف ان الهلال والمريخ يمنحان انصارهما الكثير من الفرح ...والبهجة ..هى سعادة سودانية خالصة. الهلال والمريخ (قيمة) سودانية جميلة ...لا تحرقوهما بالتعصب. قد يرى البعض ان كتاباتنا تزكى نار التعصب ...لكن تبقى (نوايانا) خالصة من اجل المحبة والاخوة. بس يا ابوشيبة عندي طلب. ما تكتب لينا عن ضربة الجزاء التي لم تحتسب للمريخ سنة 1996. وما تزود الحكاية. معقولة. عاوز روابط المريخ تستقبل (سكواها). لو سكواها اختير في منتخب افريقيا..كنا قلنا ما في مشكلة. سكواها من قعاد الكنبة لمن (سمن). وعمل ليه (حلاقة) جديدة. حلاقة (الكنبة)...ظاهرة. سكواها (كنب) عديل. اليوم يواجه الهلال حرس الحدود. وهذا امر اخر يحسب للامين البرير ومجلسه. نذكر ان المريخ فشل في احضار انبي. شفتوا الفرق. الهلال نجح في احضار متصدر الدورى المصري. نحن أي حاجة عندنا بي نظام. شفتوا كيف؟. انبي شنو يا جماعة البجيبوا المريخ. المريخ (عصام الحضري) فشل في احضاره. تقولوا لي (انبي). خليكم في (حضريكم) احسن. هسه لو ما الهلال دا إلا تلعبوا مع (حرس الصيد) يا مريخاب. حرس الصيد وام بدة. ريكاردو شكلو كدا باقى ليهو في المريخ شهر ونص. ما تقولوا لي بعد (الاتفاقية) ما في داعي للكلام دا نحن حقنا ما بنخلى. كان تتفقوا ..كان تختلفوا. عاجل: يا ناس المريخ لو عاوزين تكرموا زول كرموا (الكشافات)..افضل ليكم من (سكواها).
