سودارس : مهند الطاهر خلص ليكم القروش الدفعتوها للحضري

جبريل يلتقي المبعوث الشخصي للأمين العام للأمم المتحدة إلى السودان نزوح واسع في الكرمك بعد هجوم مليشيا الدعم السريع مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية كيف تفاعل النجوم مع خبر رحيل صلاح عن ليفربول؟ تعطيل الدراسة في الخرطوم ضبط 2800 قندول بنقو بالجزيرة في عملية نوعية لمكافحة التهريب النخبة بالخرطوم.. كيف؟ المريخ يكثف درجات إعداده ويتدرب بالصالة Africa Intelligence"" تكشف عن تعثّر صفقة تسليح كبيرة للجيش في السودان 4 وجهات محتملة لصلاح بعد قرار رحيله عن ليفربول تفجيرات بركان (93) / كيجالي (94) تنفيذي حلفا يتفقد عدداً من المؤسسات بوحدة عبري المملكة تتقدم للمرتبة ال22 عالميًا بتقرير السعادة العالمي التذبذب العالمي يربك سوق "الذهب" في مصر.. ماذا حدث؟ زعيم كوريا الشمالية يتعهد بأن بلاده لن تتخلى أبدا عن وضعها كدولة نووية الولايات المتحدة تحظر أجهزة «الروتر» الجديدة المصنعة فى الخارج لأسباب تتعلق بالأمن القومى تصعيد مجموعة من الشباب للفريق الأول بالأهلى.. اعرف التفاصيل روضة الحاج: لكنَّني وكعادتي في الحربِ لا أستسلمُ! هاجر أحمد توجه الشكر لمخرجة ومدير تصوير مسلسل أب ولكن محمد علاء : حبيت طارق جدا فى توابع وتعبنى أكتر من شهاب فى عين سحرية الصحة العالمية : إنقاذ 83 مليون مصاب بالسل فى العالم منذ عام 2000 شاهد بالصورة والفيديو.. مواطن كويتي يشيد بقرار حكومة بلاده بالإستعانة بأساتذة سودانيين: (هذا خبر يساوي مليون دينار) شاهد بالفيديو.. المطرب يوسف البربري يمازح الفنانة إنصاف مدني في حفل جمعهما بالسعودية (إنصاف عزيزة عليا) وملكة الدلوكة ترد عليه: (كضاب) شاهد.. ماذا قالت الفنانة ندى القلعة عن المطرب سجاد بحري!! شاهد بالفيديو.. دكتور حمزة عوض الله يعلق على هزيمة الهلال: (كل قرارات حكم المباراة بما فيها ضربة الجزاء صحيحة والهلال أقصى نفسه بنفسه) الكرمك ومنحدراتها الجبلية مناطق غنية بالذهب ومعدن الكروم والمطامع الدولية والإقليمية فيديو والمادة"5″..الهلال السوداني يبعث بخطاب ل"كاف" "تمبور" يكشف عن توجيهات صادرة جديدة ترامب يصدر أوامره ويكشف تطورات مثيرة مع إيران طهران ترد على تهديدات ترمب ابتكار يعيد الحياة لوظائف البنكرياس دراسة تؤكد تأثير صحة الأب على الحمل والجنين أكثر مما كان يعتقد هل مخالفة ترامب خلل في الكون؟! هل تستطيع أمريكا احتلال جزيرة خارك الإيرانية؟ الأمن يداهم مخزن يبيع الوقود المهرب لعصابات التنقيب عن الذهب تراجع معدّل التضخّم في السودان بادي يصدر مرسوم تنظيم أعمال التعدين التقليدي وضبط آليات التعدين بالنيل الأزرق رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة شركة كهرباء السودان تحديث حول سير أعمال الصيانة الطارئة للشبكة القومية توقّعات بارتفاع غير مسبوق في أسعار النفط ضبط 238 كجم من "الآيس" وأسلحة بجانب نحاس بولاية البحر الاحمر ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد أغلى علبة كعك في مصر تشعل مواقع التواصل قيم الهلال المتوارثة يجب أن تبقى أبد الدهر بنك السودان المركزي يصدر توجيهًا للمصارف إبراهيم شقلاوي يكتب: الزراعة ما بعد اقتصاد الحرب في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته ملتقي التحصين للعام 2025 ينعقد بحضور التحالف العالمي للقاحات والشركاء صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

مهند الطاهر خلص ليكم القروش الدفعتوها للحضري

قوون نشر في قوون يوم 15 - 03 - 2013

من وقت لآخر ..أحب أن اذكركم أني اكتب عن سلسلة بتاعة (ناس) كدا (عندهم ظروف مشاغبة)...أبحث فيها عن خواص أي زول ...وقد حدثتكم عن نماذج متفاوتة في أوقات متباعدة ...اليوم أعود اليكم ب (الزول البشغّل المروحة).

أكيد لاقكم زول بالشكل دا.

عشان اختصر ليكم الحكاية ..وما ألف أدور ليكم كتير.

مرات بتكون راقد في الصالون ..قاعد تفكر...(عادي بتقعد تفكر. التفكير إلى الآن ما فيه حاجة).

تكون راقد كدا ..بجي زول يدخل الصالون ...طوالي بمشي على (مفاتيح) المروحة...يشغل المراويح.

بشغلها ...وما بقعد.

بي مناسبة ..وبدون مناسبة بعمل كدا.

يا ود الناس أنت مالك ؟...يمكن (تفكيري) دا مخصوص كدا عاوزة بدون (مراويح).

الواحد في البلد دي أصلو ما يفكر بدون (مروحة).

المراويح من تشتغل ...بتقوم تعاين فوق ..وتقعد تفكر في حاجات تانية ..الحاجات الأصلية التى كنت بتفكر فيها بتخليها.

في ناس كمان جنهم يعاينوا للسقف.

يعدوا ليك (الكمر) الموجود في السقف ..كمرة ..كمرة.

وفي الناس (الجريد) بعدوه.

والله ...(وانتوا ما طالبني حليفة)...في ناس (التبس) بعدو.

ديل الناس البكونوا اتخرجوا من الجامعة من كليات لها علاقة بالحسابات وما اشتغلوا.

نرجع للزول البشغّل (المراويح)...حمانا الله واياكم.

هو تشغيّل (المراوح) ما حاجة كعبة ...لكن أنا الموضوع دا برتبط عندي دائماً بالزول البكون (مقلق) كدا ..وغالباه القعدة.

يمشي ويجي على (مفتاح) المروحة.

يخش ويمرق ..زي اللاعب البقولوا ليه قوّم سخن ..وبكون في أي لحظة منتظر (المدرب يناديه).

مرات بتكون نايم في الصالون ...ومشغل المراوح.

يعني حكاية زول يجيك ويشغل ليك المراوح دي ويطلع مافي...(حسمتها مخصوص بتشغيل المراوح من بدري).

تكون نايم في أمان الله كدا ...والمراوح شغالة ..يقوم يجيك زول ..بدون مناسبة كدا يمشي على مفاتح المراوح.

المراوح موش شغالة ...يقوم يقللها شوية ...يعني البتكون شغالة في 4 ..يرجعها 2.

البتكون شغالة في 2 ..بزيدها 4.

الزول يعمل عمليتو دي ..ويتخارج.

أنت نايم تستغرب في عملية الزول دا ...والنوم يقوم يطير من عينك.

ديل كلهم خلوهم.

في زول تاني ..أنا متأكد ..أنكم كلكم قابلكم.

كلكم لاقكم.

في الجوامع ..قبل الصلاة بشوية كدا ..والناس قاعدة منتظرة الصلاة.

في زول كدا بجي فاتح ..من يدخل على الجامع بمشي طوالي على (مفاتيح) المراوح.

يفتح ليك 21 مروحة ..ويشغل ليك المكيفات.

مرات بكون في برد ...تقول في نفسك ..الزول دا هسع مالو علينا...(نافخنا بالبرد دا ليه؟).

مراوح الجامع ...في أي حتة مرتبطة بي زول واحد ..ما عندو علاقة وظيفية بيها.

الزول دا بس متى ما يدخل الجامع ..بمشي يفتح ليك 21 مروحة ..ويدور ليك المكيفات.

الزول دا ذاتو ..وقت يلقى المراوح شغالة ..بعمل نفس العملية البعملها الزول البلقاك نايم في الصالون.

يقوم طوالي كدا ...(يرخّي) ليك المراوح.

يعني المراوح دي بمشي عليها بمشي ...في كل الأحوال.

غير دا كلو ...(كلام برضو ليه علاقة بالمروحة).

مرات مروحتكم بتبوظ ..تقوم تركب رأسك كدا ..وتقول أجيب ليها زول يصلحها.

علماً أن المروحة والساعة لمن تبوظ أحسن طوالي تغيرهن..حكاية (الإصلاح) دي ما بتقسم معاهن.

أها مرة ...(ركبت) رأسي (بالشنقيطي)..وقلت أجيب لي زول يصلح لي (المروحة).

والله شفت (العجب) في تصليح المروحة دي.

أول ما جاء الزول ...فتح المروحة كدا ...جابت ليها (صوت غريب) زي صوت (طه سليمان).

زولكم طوالي قال لي : المروحة دي بايظة!!.

طير والله ...عجيب عديل كدا.

قلت ليه طيب أنا ما عارفها بايظة ..تفتكر أنا جايبك هنا (مبعوث للأمم المتحدة)..مالك عاوز تجنني.

صاحبكم شعر بالإحراج ..رغم من أني حسيت أنو ما فاهم حاجة ..من الكلام البقولو ليه دا.

عاين لي كدا ..قال عاوز (برميل).

مشيت فرغت الموية ..وجبت ليه (البرميل)..وقلبتو ليه.

البرميل طلع قصيّر..قال لي عاوز لي (تربيزة) فوق البرميل.

جبت ليه التربيزة.

قال لي التربيزة دي (قوية)..يعني ما بتقع بي.

قلت أقوم أقول ليه قوية ..تقوم تقع بيه ..تكسر ليه (الترقوة) يقوم يعمل لي فيها عصام غانا.

عشان كدا ..من البداية كنت معاه واضح ..قلت ليه كدا شوفها ..قبل ما تطلع فيها.

قبل ما يطلع في التربيزة ..قال لي عاوز (موية).

جبت ليه الموية.

شرب الموية ...قال لي عشان (امخمخ) كويس ..اعمل لي (جبنة) عشان اشوف (مروحتكم) دي مالها؟.

عملت ليه (الجبنة).

قال لي إن الجبنة ما بشربها إلا معاها (بلح).

جبت ليه (البلح).

قال لي بعد الجبنة ...بشرب الشاي طوالي.

جبت ليه (الشاي).

قال لي شوف بعد الشاي ..أنا بتجيني (ترخيمة) بسيطة كدا ..وبأخد لي نومة ..الساعة 12 دي لو ما نمت لي نص ساعة كدا ...ما بقدر اشتغل.

يا ود الناس أنت (المروحة) دي عاوز تشغلها في مجلس الوزراء.

حلفت بي ديني وإيماني ...الخواجة (المنحوس) دا ..الصنع المروحة دي واخترعها وركبها سلك ..سلك ...ما يكون عمل الحاجات البيعمل فيها الزول دا.

على باليمين ...الزول الاخترع المروحة يكون إلى الان ما شرب ليه فنجان قهوة.

الزول دا ...المروحة دي أنا قلت ليه صلحها ..وإلا قلت ليه اقلبها لي (طيارة).

يا ود الناس مالك عاوز تجنني.

حرام عليكم ...دا عذاب دا.

الحاجة قالت لي طول بالك يا ولدي ...الفنيون البتجيبوهم ديل ..الواحد لو ما طولت معاه بالك ..ما بشتغل ليك شغل نضيف.

طولت بالي.

عملت فيها زول ظريف عديل كدا.

فتحت ليه الصالون ..وشغلت ليه المكيّف والمراوح ..وقلت ليه اخد راحتك ..وقفلت باب الصالون وقلت ليه بجيك بعد نص ساعة.

بعد نص ساعة ...جيّتو طاير ..لقيتو ليك في سابع نومة...قدر ما صحيتو ما قام.

يا زول قوم شوف المروحة دي ...الوقت راح.

خلينا انوم شوية ..انت عارف أنا أمس ما نمت ..مساهر الليل كلو مع (الشافع).

قلت اخليه شوية...(اتذكرت كلام الحاجة).

مشيت ..ورجعت ليه بعد نص ساعة تانية.

قال لي : والله أنا تعبان شديد ..بي حالتي دي ما بقدر افك لي مروحة ...خلينا اخد راحتي ...عشان اقوم اشوف ليك (المروحة).

مشيت خليتو ..(اعمل شنو؟).

بعد ساعة ..اشوف ليك الزول بتشطف في الماسورة ...قلت الحمدلله ...قام براهو.

قال لي عاوز لي فرشة ومعجون.

جبت الفرشة والمعجون...(الحاجة قالت لي طول بالك).

اتشطف وقال لي : اها الغداء كيف؟.

اتحرجت ..الساعة ساعة غداء ...قلت ليه الغداء جاهز ..نتغدي ونقوم على (المروحة).

شفتوا المروحة دي بقت لي زي (الحريات الأربعة).

عذبتني عذاب.

يمين المفاوضات الفيها ...في (النفط) ما حصلت.

جبت الغداء ..زولكم ضرب ليك في (البلدي) دا ضرب صاح ...وقال لي والله مشتهين (الكسرة) ..تصور لي 3 شهور ما اكلت لي كسرة.

قلت ليه واضح يا اخوي.

الحكاية دي ظاهرة.

انت يا اخوي لا بلدي لا اكل افرنجي اكلتو في الفترة الماضية.

ضرب البلدي ...قال لي اسمع (التحلية) كيف؟..جيب لي الفواكه قبل (الحلو).

قلت ليه لكن نحن ما عندنا (حلو)..لكن الفواكه موجودة.

قال لي (الحلو) عندي أهم من (الفواكه)..وبي صراحة مروحتكم دي من الستينات ما في زول فتحها.

يعني بدون (حلو)..ما اظن تشتغل.

قلت ليه ما مشكلة ...بجيب ليك (الحلو).

قال لي الفواكه قبل (الحلو).

قلت ليه جدا ...(الحاجة قالت لي طوّل بالك).

اعمل شنو أنا.

جبت ليه الفواكه ...ضرب ليك فيها ضرب زي كأنو ما اكل ليه حاجة في (البلدي).

جبت (الحلو)..قال لي أنا أهم حاجة عندي بعد الحلو (العصائر).

قلت ليه اسمع انت (المروحة) دي عاوز تستنسخ منها النعجة (دوللي).

قال لي يا زول المروحة دي من الستينات ما في زول فتحها ..والله لو اتفتحت لينا ساكت ما قصرت.

قلت ليه : يا ود الناس انت عاوز تفتتح ليك (جامعة).

مالك عاوز ترفع لي (الضغط) زي كور موسى الزومة المرفوعة.

يا ود الناس بعد (العصائر) دي مفروض تفتح (القسطنطينية).

شرب العصائر ..وقال لي (قهوة) كيف؟.

لاحظت انه في البداية كان بقول (جبنة)...هسع خاشي بي حنك جديد ..قال (قهوة).

جبت ليه القهوة...شربها ...وعاين للساعة.

قلت ليه بتعاين للساعة مالك؟.

قال لي الوقت اتأخر ...والأولاد براهم ...أمهم عند أهلها ..أحسن حاجة امشي واجيك بكرة من بدري.

عاوز اقوم فيه ..اتذكرت كلام الحاجة ...(طول بالك).

اعمل شنو أنا يا جماعة.

زولكم مشي ...وجاني بكرة الساعة 8 صباحاً...دخلتو على المروحة طوالي.

وقفني قال لي تصور شاي الصباح ما شربتو.

جبت ليه شاي الصباح.

قال لي ما بشرب شاي الصباح بدون (زلابية).

مشيت سوق أربعة ..جبت ليه (الزلابية).

اكل الشاي ..وشرب الزلابية ..اقصد شرب الشاي واكل الزلابية ..وقال لي ما عندك جرايد.

جبت ليه الجرايد.

قعد يعلق لي في الجرايد ..انت عثمان ميرغني مالو ما قاعد يكتب الأيامات دي ليه؟.

صحي مشى (اليوم التالي).

اسحق أحمد فضل الله ..أمس كتب ليه كلام غريب.

ناس (الخرطوم) ديل شفتوا جريدتهم الجديدة دي...رأيك فيها شنو؟.

يا زول ما تقوم على (المروحة).

المروحة ..ملحوقة ...ما تضيق.

كدا جيب لي الجرايد الرياضية.

صحي مزمل أبوالقاسم وضع صورة (سيدا) بعد مباراة القمة.

مزمل وضع صورة (الحضري) بعد الكورة.

الرشيد علي عمر ..قفلوا ليه (حبيب البلد)...طلع (الأسياد)...تستاهلوا عشان تاني تقفلوا ليه (جريدة).

والله يا مريخاب كان أرحم ليكم (حبيب البلد)..براكم بتجيبوه لي نفسكم.

انت مجدي أم بدة بيلعب وين؟.

مجدي أم بدة بيلعب قدام حوش ناس بابكر سلك.

عليك الله اديني ايميل بابكر سلك.

جدا.

ولو عندك تلفون مامون أبوشيبة بتكون ريحتني عديل كدا ..قالوا أبوشيبة بعد مباراة القمة عندهم (7) مراوح حرقت.

يا ود الناس ما تقوم على (المروحة).

كدا ..خلينا نفطر ..ونقوم عليها ..ما تضيّق انت.

فطرنا.

القهوة كيف؟.

شربنا القهوة.

عاوز اخد لي (ترخيمة) بسيطة كدا...انت عارف برنامجي ...بعد الساعة 12 ما بشوف لو ما اخدت لي نومة.

اخد الترخيمة.

نفس برنامج أمس طبقوا لي الليلة.

عمل نفس الشيء.

يا جماعة الله الزول دا أعمل ليه شنو؟.

21 يوم ..أنا في البرنامج دا ..الشاي والقهوة ..والفطور والترخيمة ..والجرايد ...وبجيك بكرة بدري.

21 يوم ..لمن الحاجة قالت لي انت بالك طويل كدا ..ليه؟ ..الزول دا احسمو.

ناس الزمن ديل ..الواحد فيهم لو ما حسمتو بطلع ليك في رأسك؟

سمعت كلام الحاجة ..وانتظرت ليك في بداية الشارع.

المرة دي كان جايني بي (شنطتو)..قال سفّر الأولاد ..عشان يتفرغ للمروحة.

شاف العكاز ..طلع في البرميل.

جيب الشاكوش دا.

جيب السلك.

ارفع المفك.

جيب لي (تلجة).

جبت ليه (تلجة).

عاوز (بندول).

جبت ليه بندول.

حرك الطبق.

حركت الطبق.

اسمع يا زول انت (المروحة) دي عاوز تنزل لي فيها قناة (طيور الجنة)..فكنا عليك الله.

والله (المروحة) دي بعد تعبنا دا ..لو ما جابت (mbc) يكون ما في فائدة.

شوية كدا ..بعد ساعة ونص ..زولكم قعد ينطط ...قال لي المروحة اشتغلت...والله أنت زول بركة عديل كدا.

عاينت ليك في المروحة ..لقيتها واقفة.

قلت ليه : يا زول اشتغلت وين؟...المروحة دي لسع ما دورت.

قال لي : هي تاني ما بتدور ...لكن أنا عندي حل.

حلك شنو يا ختري انت؟.

نجيب لينا ولد ..يلز الأجنحة حقتها دي ..والله أنا عندي ولد لهلوبة في الشغل ب (750) جينه ممكن يشتغل.

يا زول أنا وقت اجيب لي ولد واصرف ليه مرتب (750) جينه في الشهر ..ما اجيب لي مروحة جديدة ...وارتاح من (المروحة) دي.

المعلم الخطير قال لي ..لكن مراوح زمان ما زي مراوح الزمن دا ..مروحتك دي من الستينات ...انصحك تحافظ عليها ..وما تفرط فيها بي سهولة.

قلت ليه : انزل عليك ...انزل بس.

قال لي : عاوز اربطها.

قلت ليه خليها كدا...بس انزل عليك الله.

نزل ..وقعد يضرب في حساباتو ..قال لي المروحة دي أنا شغال فيها 23 يوم...يعني لو كنت شغال في (مروحة تربيزة) ساكت ...كنت هسع طلعت منها (بترول) عديل كدا.

حاسبتو ...والحاجة قالت لي شيل تلفونو ..عشان لو أي (مروحة) اتعطلت عندنا نجيبو.

قلت ليها (وارغو) دا لو طلع من هنا تاني ما بنجيبو.

ملحوظة : عليكم الله ...الزول دا أنا ما طولت ليه بالي.

هوامش

مامون أبوشيبة 40 يوم كان بكتب عن (ضربات الجزاء).

وسنة 1996م ..والمريخ ما احتسبوا ليه ضربة جزاء.

والله يا مامون أبوشيبة وانت ما طالبني حليفة ..فريقكم دا (ضربة ركنية) كتيرة عليه.

مامون أبوشيبة ما فاضل اليه إلا يطلع ليه (مجلد) عن ضربات الجزاء.

وريني بس يا مامون ...يحسبوا ليكم ضربة جزاء كيف ...وانتوا خط 18 ما دخلتو.

إلا لجنة الحكام تطلع ليها استثناء ليكم ...أي مخالفة في السنتر ..(ضربة جزاء) طوالي للمريخ.

دي ذاتها مع ناس عمر بخيت ما تحلموا بيها.

فييرا خرب كورتو الكانت في الهلال ...وهيثم مصطفى خرب تاريخو.

ناس المريخ شافوا (تراوري)...خلوا التفكير في (سادومبا).

الهلال دا أي محترف يفوت منو ..بنجيب اخطر منو.

مشى كلتشي جبنا سادومبا.

مشى سادومبا ..جبنا تراوري.

شفتوا كيف؟.

نحن أي حاجة عندنا بي نظام.

اكرم الهادي سليم قالوا عاوز يلحق ببعثة المريخ.

العجب ما في زول شغال بيه.

هسع يعاقبوا العجب ..ويسفروا اكرم الهادي سليم.

عصام الحضري بقى شغال مع المريخ مقاولة ....مباراة ...مباراة.

والله خطير يا حضري.

عصام الحاج دا إلا تشتغل معاه بالقطعة.

كنا خايفين على المريخ من أهلي شندي ...طلع ليه هلال كادوقلي.

المريخ فشل في الانتصار على أي (هلال) في الدوري الممتاز.

مباراة المريخ مع هلال كادوقلي في الدورة الثانية ح تتلعب وين يا ربي؟.

كوستي ولاّ الفاشر.

ناس المريخ ديل ما بيلعبوا في كادوقلي.

علماً أن المريخ إلى الان لم يغادر الخرطوم.

مع ذلك هو الثالث.

ما طلع من الخرطوم حتى الاسبوع الرابع.

وبعد دا المريخ (وصيف).

وصيف (هلال كادوقلي)...ما وصيف (الهلال).

وصيف زي دا نحن ذاتو ما بنقبل بيه.

وصيف تعبان وكلو (كابتن).

فريقكم دا يا ناس المريخ بقى زي (الفيلم الاجنبي)..كلو غرباء.

ناس من الهلال وناس من برة البلد.

مرتضى كبير ..الطبيب نصحو ..ما يشارك في مباراة القمة القادمة.

نزار الصاقعة ...ذاتو غلطان.

في زول بشبح كدا.

لقيت حل لي ديدان نجيلة استاد المريخ.

رشوه ب (بشة).

بشة اخطر من (المبيد).

يا معاوية صابر يا بشاشة يا اسلام ..جيبوا لي صورة (طه سليمان).

المروحة خلوها.

لكن لو اتلقت مروحة تربيزة ما كعبة معاي.

القروش الدفعتوها للحضري خلصها ليكم مهند.

مهند الطاهر شغال (جلد) عديل للحضري.

الحضري مسكين ..بعد المباراة طوالي سافر القاهرة.

البلد ما بتتقعد ليه مع (التصويبات) دي.

والله دي حارس عمرو 44 سنة ..لا بقدر عليها ولا حاجة.

زول بضيّع في الزمن من الدقيقة الخامسة للمباراة.

فيصل موسى دا هو عاوز يزعل متين.

يا زول أنت ما عندك احساس.

مدرب اللياقة في المريخ ..لماذا هرب؟.

صلعة الكوكي دي ..ما صلعت (مدير فني).

الصلعة دي بالكتير كدا ..صلعة (مدرب حراس).

نحن كمان ما بنعرف الصلع.

في مدير فني مرتبو أقل من (حافز) الحضري في المباراة.

عاجل :
مونزا قال عاوز ليه (صانع العاب)..طيب هيثم مصطفى البيلعب معاك دا عميد كلية الطب في عين شمس.

انقر هنا لقراءة الخبر من مصدره.