…و…. محمد عبد الماجد اللقب العاشر بتوقيت ريال مدريد . …و . بعضهم عندهم رأي واضح وصريح في (القميص) الذي تلبسه. . يطلعوا ليك (القميص) اي كلام. . و… . (وزي في الحتة دي). . بي كل بساطة وبي عدم مبالاة كمان. . كثيرون عندما تلتقي بهم اول حاجة يقولوا ليك : (عليك الله دا قميص تلبسو). . او (اللون) دا ما متناسب مع (عمرك). . او عمرك ما متناسب مع القميص. . اللون دا لون فرايحي شوية. . الفرح ممنوع. . كأنو الزول متعاقد رسميا وحصريا مع (الحزن). . يا جماعة انتوا الواحد لو عاوز يطلع من الحزن بي لون القميص – انتوا عندكم رأي. . و… . (وشنو كمان). . كأنو (الفرح) محجوز عند ناس الولاية ..يمنحوه ويصرفوه لمن يحبون. . على كيفهم كدا. . وفي ناس تعليقاتهم عن (حلاقتك)… الواحد يدرس (نقد) عشان يعلق ليك عن (الحلاقة). . نقد في (الحلاقة). . هسع دي حلاقة ليك ..تقول محترف في الدوري الفرنسي. . يا جماعة الله ..انتوا مالكم..(الشعر) دا انتوا شركاء فيه. . مرة مشينا عرس ..لقينا ليك (العريس) حالق حلاقة …حلاقة باك ..ما حلاقة عريس. . حلاقة زول كوروتو في (الكشافات). . مشينا عليه عشان نبارك ليه في الكوشة ..قلنا ليه مبروك العرس وهاردلك الحلاقة. . تاني يا ود الناس لو عرست عليك الله ما تحلق الحلاقة دي. . حلاقتك دي كورة ما تلعبك. . من اليوم داك ..عرفت ليك الناس الما عندهم موضوع ممكن يعملوا ليك من الحلاقة موضوع. . التعليق عن الحلاقة – عندهم زي التعليق على الاخبار. . زي التعليق السياسي. . يا جماعة ركزوا في ورقكم. . خلوا الحكومة ..وخلوا المعارضة ..وقعدوا ينتقدوا في (الحلاقة). . ينظروا ليك في (الحلاقة) زي ما عاوزين. . المريخاب عملوا نفس الشيء. . خلوا (كباتنهم) البشطبوا فيهم بتصفية رسمية ، وتركوا (سيكافا) وقبلوا ليك على الهلال. . انتوا يا جماعة ما تشوفوا (باكاتكم) وين؟. . فريقكم كلو (باكات). . من الله خلقكم شفتوا ليك (باك) كابتن فريق. . في واحد قال لي بلة جابر بقى قاعد براهو في المريخ زي (يبقى للاعادة). . جماعتو كلهم اتخلصوا منهم. . سعيد السعودي – موسى الزومة – بلة جابر بقى قاعد براهو في الطرف. . اعملوا ليه كشف. . يا بلة ما تخاف جابوا ليك بخيت خميس…يعني موسى الزومة إلا شوية. . ومعاك (ضفر)…اكتر من كدا عاوز شنو؟. . وسعيد السعودي من شندي بكون على اتصال بيكم. . و… . (حتة تانية). . الواحد وقت تكون قافلة معاه …وعندو رأي في اي حاجة ..اي شيء تقابلوا بقعد ينتقدها ليك. . ناقد افندي. . الحكاية دي بتظهر من اول (عدس) يقابلو الشخص في الصينية. . الليلة (عدسكم) دا ما طاعم. . والله (عدسكم) دا عاوز يشقنا. . العدس لا بتأكل في السخانة دي ولا حاجة. . عدسكم دا عاوز ليه (بصلة). . شفتوا من العدس يسعفوا ليك ب (بصلة) خارجية ..(خارج المقرر يعني) اعرف طوالي انو العدس دا امكانياتو ضعيفة. . انا من الله خلقني ما لقيت لي عبارات غير عبارات (الشناف) للعدس. . اصلو ما شفت لي زول شكر ليه (عدس). . الناس كلها بتهاجم في العدس – وبلة جابر. . طبعا بلة جابر دخل عرضا فيى السطر الفوق. . اي (عدس) يختوا قدامو بسمع ليك (المناحة) دي. . طيب انتوا وقت عندكم رأي سلبي في (العدس)..البخليه اساسي في (تشكيلتكم) شنو؟. . زي موسى الزومة. . المريخاب قالوا لعبوا موسى الزومة …ما ارتاحوا…(الكشافات) اشتكت من الحتة دي. . قعدوه في الكنبة ما ارتاحوا….(الكنبة) اشتكت من الحتة دي. . طلعوا من التشكيلة ..عمل ليهم مشاكل برة – يعني برضو ما ارتاحوا. . طيب يعملوا شنو؟. . قالوا ليهم موسى الزومة دا إلّا تشطبوه. . اصلو ما بتقدروا ترتاحو منو إلّا بالشطب. . موسى الزومة دا مع الشطب ..في ناس قالوا مفروض (يجلدوه). . قلنا ليهم يجلدوه على شنو؟. . قالوا لينا يجلدوه على القون الجابو في الهلال. . موش موسى الزومة دا مرة جاب ليه قون في الهلال. . هو (ضفر) جاب ليه قون في الهلال. . المشكلة شنو يعني؟. . القون ما بزيل بلم. . هسع انا عاوز اطلع ليكم من (المحلية) دي ..عاوز اتجاوز موضوع موسى الزومة وبلة جابر. . عاوزين نعلق على تحقيق ريال مدريد لكأس الاندية الاوربية للابطال بعد 12 سنة. . الريال حقق اللقب العاشر. . عشرة القاب كأس الاندية الاوروبية للابطال …(الالقاب دي ما فيها ولا سيكافا واحدة). . سيكافا دي زي اكل المستشفى والله لا بتتأكل ولا بتستطعم. . ناس المريخ بلعبوا مع ناس البوليس ..(تقول سارقين ليهم حاجة). . وبلعبوا مع فكتوريا ومع الملكية جوبا. . انتوا عارفين الاندية دي ..ريال مدريد في (الخريطة) ما بصادفهم. . ولا في حاجة بتلمو بيهم. . ولا عندو قضية بيهم. . هسع نحن بصورة جادة كدا ..ممكن نواجه ريال مدريد في بطولة كأس العالم للاندية. . ممكن نقابل الريال في المغرب. . بي حقنا. . ما بي (12) مليار جنيه. . لذلك بنقول للجهاز الفني للهلال مفروض تسجلوا لينا تسجيلات صاح. . تسجيلات تسترنا قدام الريال. . ناس المريخ بختبروا في لاعبين قدام البوليس وفكتوريا والملكية ..انتوا ديل عاوزين تختبروهم في (السلخ). . جيبوا ليهم (خروف) اختبروهم فيه ..بدل (الجرجرة) دي. . ديل إلا بتكونوا بتختبروا فيهم على (التشجيع). . كورة شنو البلعبوها ليكم قدام فكتوريا اليوغندي. . ح تندموا على سعيد السعودي. . وح تندموا على موسى الزومة. . وبخيت خميس تاني كل ما يشوت ليه كورة بتقولوا يا حليل موسى الزومة. . على الاقل موسى الزومة كورتو بتمشي (الكشافات). . بخيت خميس دا قالوا ليك كورتو بتمشي (القلابات). . والله يا ناس المريخ بتيجبوا ليكم (باكات) في حصاد السمسم ما بنفعوا. . انتوا ليه وقت يقولوا ليكم الحقيقة بتزعلوا …وتعملوا فيها ما راضيين من الكلام دا. . احسن نقول ليكم كلامنا دا من هسع ..من التسجيلات ..عشان بعدين ما يجيكم (مغص) ساكت. . نحن المريخاب ديل بنقول ليهم الحقيقة ..لكن ما قاعدين يقبلوا. . و… . انتوا الليلة اليوم دا مالو طويل كدا ..تقول تامنو ب (سبت). . سبت شنو يا زول؟. . انت دخلت غلط. . احسن تطلع. . انتهى.
