محمد عبد الماجد …و…. انتوا لو عندكم (كرامة) قدر دي ما كان طلعتوا من (التمهيدي) …و ناس المريخ لقوا الدنيا كلها بتتكلم عن هيثم مصطفى. الموضوع الرئيس في كل الاحداث (هيثم مصطفى). مجلس الهلال يجتمع لاصدار قرار عن هيثم مصطفى. هيثم مصطفى يقدم خطاب اعتذار لمجلس ادارة نادي الهلال من اجل العودة. والروابط ما بين الرفض والقبول تتحدث عن هيثم مصطفى. لافتات وشعارات وبيانات – كلها يدور موضوعها الرئيس عن هيثم مصطفى. الناس نسوا التجنيس. وخلوا الاعارات. حتى المحترفين بقوا ما شغالين بيهم زول. الكلام كله عن هيثم مصطفى. في زول هسع في المريخ بجيب سيرة فيصل العجب. في لافتة واحدة في المريخ اترفعت تطالب بعودة الكابتن فيصل العجب ليختم مسيرته في المريخ. في لافتة اترفعت في المريخ ترفض عودة العجب. في بيان صدر. ولا كلمة. ناس مزمل ابوالقاسم – الى الان ما كتبوا ليهم سطر عن فيصل العجب. وين السلطان عجبنا يا مزمل. وين المرجيحات يا بابكر سلك. وين نشيد العجب الوطني. انتوا مالكم بتنسوا سريع كدا يا سلك. تقول فيصل العجب دا كان بلعب في الرابطة كوستي. الفرق كبير بين الهلال والمريخ. الهلال استغنى او رفض التجديد لثلاثة من كباتنه الكبار – مع ذلك الحديث عن هيثم مصطفى. اختلفنا اواتفقنا – سيطرة هيثم مصطفى على الاحداث تأكد مكانة اللاعب…تأثير اللاعب الرياضي كبير. حتى السلطة قيل انه تداخلت في موضوع هيثم مصطفى الذي اصبح في هذه الفترة هو الموضوع الرياضي والسياسي ايضا. موضوع هيثم مصطفى سوف تنزل ستارته اليوم – بعد انتهاء فترة التسجيلات. نشوف الحكاية ح تنتهي على شنو؟. و…. (وشنو تاني؟). ان شاءالله ناس الحكومة يلقوا ليهم موضوع تاني – يشغلوا بيه الناس.ويقرروا ليهم مع الفطور. او يصبح هو حديث الصباح والمساء في السودان – كما جاء في رواية نجيب محفوظ. ناس المريخ – لقوا (الموضة) الايامات دي موضة هيثم مصطفى – قالوا يأخدوا نصيبهم من (التورتة). يمشوا مع (الموضة). حكاية ان هنالك رفض لهيثم مصطفى في الهلال – الموضوع دا ما عجب المريخ. وان الهلال لا يريد اعادة هيثم مصطفى. خاصة ان المريخ فعل كل شيء من اجل استمرار هيثم مصطفى ضمن كشوفاته. وهيثم رفض. قال ليهم السما قريب. مجلس المريخ كان مستعدا ان يبقى هيثم مصطفى جالسا في بيته – وما يشارك مع المريخ – شريطة ان يكون في كشف المريخ. قالوا ليه لو قعدت في البيت ما مشكلة. المريخاب ما كان عندهم مشكلة في الحتة دي – وقد بقى هيثم مصطفى موسما كاملا بعيدا عن المريخ – رفض المشاركة وفضل القعاد في البيت. قال ليهم بيتنا ولا اللعب معاكم. البيت ولا المريخ. مع ذلك قدم جمال الوالي لهيثم مصطفى شيك على بياض من اجل الاستمرار في المريخ. الان المريخاب قالوا ان المريخ يرفض هيثم مصطفى (بالله) – انتوا قايلين نفسكم الهلال. عملوا لهيثم مصطفى اي شيء – عشان يستمر في المريخ. لو هيثم مصطفى قال ليهم عاوز لي (وزارة) كان ادوها ليه. هيثم قال ليهم : لا – اللعب في المريخ كان (زعلة) ساكت. يعني اللاعب الذي كان يلعب في الهلال ما بلعب في المريخ إلّا (زعلة). مهند الطاهر مع زعلتو من الهلال رفض مليارات المريخ. المهم المريخاب استغلوا زعلة هيثم مصطفى في الموسم الاول – وجعلوه يلعب لهم. قروش زي الناس ما ادوه ليه. ووقت الموضوع بقى ليهم صعب قالوا يمشوا يشتكوه في الاتحاد العام. الطريف في الامر ان المريخ عشان يثبت انو عندو (كرامة) برضو – بدون اي مناسبة قالوا ليك المريخ يرفض اعادة هيثم مصطفى. طبخوا ليهم (طبخة) قالوا فيها ان مجلس المريخ رفض عرض وسيط توسط من اجل عودة هيثم مصطفى للمريخ. الجماعة الطباخين ديل. وسيط منو؟. الوسيط خلوه يرجع (العجب). انت هيثم مصطفى عرفت من متين؟. هو هيثم مصطفى قالوا ليكم ح يرجع ليكم – عشان ترفضوا عودته للمريخ. نسيتوا الشيك الذي كان على بياض الذي قدمه جمال الوالي لهيثم مصطفى في التسجيلات الماضية. المريخاب ظنوا ان رفض الهلال لتسجيل هيثم مصطفى ممكن يجعل هيثم مصطفى يقوم يزعل تاني. يقوم ينفعل ويوقع مرة اخرى في المريخ. او هم حاولوا يستردوا كرامتهم التى فقدوها عندما رفضهم هيثم مصطفى موسم كامل وقعد في بيتو – قالوا يقلدوا الهلال عشان يثبتوا انهم عندهم كراموا برضو. قاموا قالوا شنو؟. قالوا المريخ يرفض عودة هيثم مصطفى. القال ليكم هيثم مصطفى ح يرجع ليكم منو؟. زول كان موسم كامل قاعد في بيتو – تفتكروا ممكن يوقع ليكم تاني في كشوفاتكم. بعدين انتوا يا مريخاب لو عندكم كرامة قدر دي – كرامة تخليكم ترفضوا هيثم مصطفى ما كان بتطلعوا من دور ال (64). بعد كدا احسن المريخ يفكر في موضوع تاني. فكروا في (التمهيدي) – الموضوع دا قرب. اتخيلوا كيف ح يكون وضعكم في (التمهيدي)؟. ابقوا جاهزين لينا. عشان نحن منتظرين (التمهيدي) بفارق الصبر. التمهيدي المرة دي ح يجيكم في (برد) صعب – جهزوا فنائل السقط. و… انتوا تعالوا هنا – الليلة موش اليوم الختامي للسيستم. قفلة السيستم (كرت عام). و… انتهى…